Ja ku birimwo

Ja ku rutonde rw'ibirimwo rwa kabiri

Ja ku rutonde rw’ibirimwo

Ivyabona vya Yehova

Ikirundi

Be maso!  |  Gitugutu 2013

 ICOFASHA UMURYANGO | UMUBANO

Igihe ubugenzi burenze urugero

Igihe ubugenzi burenze urugero

INGORANE

Urafise umugenzi mudasangiye igitsina agutahura vy’ukuri. Ni umugenzi mushobora kuganira vyose, kandi nkako muyaga vyose. Wibwira uti: ‘Turi abagenzi gusa.’ Ariko uwo mwubakanye si ko yobibona hamwe yoramuka amenye ivyo mumara umwanya munini muriko muraganira.

Ubugenzi ufitaniye n’uwo muntu bushobora kuba bumaze kurenga urugero, ukaba rero ukeneye gutunganya ico kibazo. Ariko imbere ya vyose, nusuzume ivyoba vyaratumye ibintu bigera iyo hose.

IKIBITERA

Icipfuzo co kwumva ko uri n’agaciro. Tuvugishije ukuri, kwitwararikwa n’abo tudasangiye igitsina biraturyohera. Kumenya ko abandi baduha agaciro biratunezera bigatuma kandi twumva ko badushima. Umaze igihe kanaka wubatse, woshobora gutangura kuza urifatanya n’umugenzi mudasangiye igitsina kugira ngo wumve ko uri n’agaciro. Ariko ico ukwiye kumenya ni iki: Kurondera kwironsa ivyo bintu ukeneye mu gucudika n’uwundi muntu atari uwo mwubakanye biragira ingaruka mbi. Kwiyumvamwo mu buryo butabereye uwo mudasangiye igitsina biratuma ubucuti ufitaniye n’uwo mwubakanye bucumbagira. Uba uriko urima uwo mwubakanye urukundo wabwirizwa kumuha.

• Niwibaze uti: ‘Ni ibintu ibihe nkeneye ubwo bugenzi bundonsa vyorushiriza kuba vyiza ndabirondereye ku wo twubakanye?’

Ingorane zo mu mubano. Bibiliya iravuga idacisha ku ruhande yuko abubaka bagira “amakuba” ku rugero runaka. (1 Abakorinto 7:28) Nk’akarorero, birashobora gushika ukumva umenga uwo mwubakanye ntakwitaho canke ngo agushime, canke ukaba ukimushavuriye kubera ingorane mutaratorera umuti. Uwo mwubakanye ashobora kuba atipfuza ko muganira mwene ivyo bibazo, ivyo bigatuma uvunika umutima, bigaca rero vyoroha ko ucudika n’uwundi muntu akwitwararika. Abahinga bamwebamwe bavuga yuko kudashaka kuganira ibibazo bigoye ari kimwe mu bintu bihambaye bishobora gutuma mu mubano habura agahimbare, bigashobora mbere gutuma abubakanye bahukana.

• Niwibaze uti: ‘Hoba hari ikintu kitagenda neza mu mubano wacu catumye vyoroha ko ngiranira ubucuti butabereye n’uwundi muntu?’

 ICO WOKORA

Nubone akaga birimwo. Bibiliya ivuga iti: “Har’umuntu yoshira umuriro mu gikiriza, impuzu ziwe ntizishe?” (Imigani 6:27, Bibiliya Yera) Ico womenya co ni uko gukundana n’uwundi muntu kandi usanzwe wubatse vyonona umubano. (Yakobo 1:14, 15) Ntiwiyumvire gusa ivyoshobora gushika. Raba n’ingaruka bimaze kugira mu mubano wanyu. Iyo witwararitse uwundi muntu muri ubwo buryo, uba uriko urirengagiza uwo mwubakanye kandi wabwirizwa kumwitwararika.

Reka kwihenda. Kugiranira ubugenzi somambike n’uwundi muntu birashobora gutuma wiyumvira ingene uba umerewe iyo wubakana na we. Ariko rero, mu kwiyumvira gutyo ushobora kuba ufata ivyo ushima kuri uwo mugenzi wawe ukabigereranya n’ivyo udashima ku wo mwubakanye, ukwo kukaba ari ukugereranya ibintu bitajanye. Niwibuke kandi yuko umunezero ugira igihe wiyumviriye uwo mugenzi wawe ushobora kuba ari wo nyene wagira wiyumviriye uwo mwahavuye mwubakana.—Iciyumviro co muri Bibiliya cofasha: Yeremiya 17:9.

Nushinge uturimbi. Abantu usanga bagira ico bakoze kugira ngo imodoka yabo canke inzu yabo bayikingire ibisuma. Nawe urashobora kugira ico ukoze kugira ukingire umubano wawe. Bibiliya ivuga iti: “Zigama umutima wawe.” (Imigani 4:23) None ivyo wobigira gute? Gerageza ibi bintu bikurikira:

  • Nutume abantu babona ko usanzwe ufise uwo mwubakanye, kumbure mu gushira amafoto yiwe aho ukorera.—Iciyumviro co muri Bibiliya cofasha: Itanguriro 2:24.

  • Niwishingire ivyo ushobora gukora n’ivyo utokora mu bijanye n’imigenderanire ugirana n’abo mudasangiye igitsina. Nk’akarorero, ntivyoba bibereye ko ubwira umugenzi wawe ingorane ufise mu mubano canke ngo uje gusangira agacupa n’uwo mukorana mudasangiye igitsina.

  • Nimba ubugenzi ufitaniye n’uwo mudasangiye igitsina bumaze kurenga urugero, nubuhagarike. Nimba ubona ko kubuhagarika ari amananiza, niwibaze igituma. Aho kugerageza gushigikira imigenderanire ufitaniye n’uwo muntu, nushigikire uwo mwubakanye uheze ugire ivyo ukoze kugira ngo ukingire umubano wanyu.—Iciyumviro co muri Bibiliya cofasha: Imigani 5:18, 19.