Zaburi 45:1-17
Ku mukuru w’abaririmvyi. Ni indirimbo* y’abahungu ba Kora+. Bayiririmbira kw’ijwi ryitwa «Amalisi.» Ni indirimbo y’urukundo.
45 Umutima wanje uraryohewe cane kubera ikintu ciza.
Ngira ndirimbe* ivyerekeye umwami+.
Ese ururimi rwanje rwoba nk’ikaramu*+ y’umwanditsi* w’umuhanga+.
2 Ewe mwami, uri mwiza kuruta abandi bantu bose.
Amajambo ava mu kanwa kawe ni ay’igikundiro+.
Ni co gituma Imana yaguhezagiye ibihe vyose+.
3 Kenyera inkota yawe+ mu mbavu wa ntwari we+,mw’iteka ryawe n’ubwiza bwawe buhebuje+.
4 Mu bwiza bwawe buhebuje, nugende ugana ku ntsinzi*+.Gendera kw’ifarasi urwanire ukuri, ukwicisha bugufi n’ubugororotsi+,kandi ukuryo kwawe kuzokora* ibintu biteye akoba.
5 Imyampi yawe irasongoye kandi ituma amahanga agwa imbere yawe+.Itobekeranya abansi b’umwami mu mitima+.
6 Imana ni yo ntebe yawe y’ubwami gushika ibihe bidahera+.Agakoni k’ubwami bwawe ni agakoni k’ubutungane*+.
7 Wakunze ubugororotsi+, wanka ububisha+.
Ni co gituma Imana, Imana yawe, yakurobanuje+ amavuta* y’umunezero+ kuruta bagenzawe.
8 Impuzu zawe zose zimota imira*, ingagari n’umubagabaga.Umuziki w’ibicurarangisho vyo ku kirimba cawe gisharijwe n’amasenge* uraguhimbara.
9 Abakobwa b’abami bari mu bagore b’iteka bo ku kirimba cawe.
Umwamikazi ahagaze iburyo bwawe, yambaye inzahabu z’i Ofiri+.
10 Nyumviriza mukobwa wanje, untege ugutwi.Niwibagire ab’iwanyu hamwe n’inzu ya so wawe.
11 Umwami azoca yipfuza ubwiza bwawe.Numwunamire rero,kuko ari umukama wawe.
12 Abantu b’i Tiro* bazokuzanira ingabire.Abantu batunze cane bazogusaba ngo ubatoneshe.
13 Imbere mu kirimba, umukobwa w’umwami arasayangana.Impuzu ziwe ziriko udusharizo tw’inzahabu.
14 Bazomuzanira umwami yambaye impuzu zijishwe neza*.
Abigeme* bamuherekeje bazobazana imbere y’umwami.
15 Bazobazana mu munezero n’akanyamuneza,maze binjire mu kirimba c’umwami.
16 Abahungu bawe bazoja mu kibanza ca ba sokuruza bawe.
Uzobagira abatware* kw’isi yose+.
17 Nzomenyekanisha izina ryawe ibihe vyose*+.
Ni co gituma amahanga azokuninahaza gushika ibihe bidahera.
Utujambo tw'epfo
^ Mu giheburayo havuga ngo «masikili.» Raba Insiguro y’amajambo (Masikili).
^ Mu giheburayo havuga ngo «ibikorwa vyanje ni.»
^ Mu giheburayo havuga ngo «agasaruzo.» Raba Insiguro y’amajambo (Agasaruzo).
^ Canke «umwimuzi.»
^ Canke «ku kuroranirwa.»
^ Mu giheburayo havuga ngo «kuzokwigisha.»
^ Canke «k’ukugororoka.»
^ Raba Insiguro y’amajambo (Kurobanura).
^ Imira ni ibintu bimeze nk’uburembo bimota neza. Raba Insiguro y’amajambo.
^ Amasenge ni amenyo y’ibikoko bimwebimwe nk’inzovu n’ibindi.
^ Mu giheburayo havuga ngo «umukobwa w’i Tiro.»
^ Hashobora kandi kuvugwa ngo «amakanzu adeshwe neza.»
^ Canke «abakobwa b’isugi.»
^ Canke «abaganwa.»
^ Canke «uko urunganwe rukurikira urundi.»
