Zaburi 38:1-22
Ni zaburi ya Dawidi igenewe kwibutsa.
38 Ewe Yehova, ntumpane washavuye,kandi ntunkosore warakaye+.
2 Kuko imyampi yawe yanyinjiyemwo cane,kandi ukuboko kwawe kurandemereye+.
3 Umubiri wanje wose urarwaye* kubera wanshavuriye.
Nta mahoro mfise* kubera igicumuro canje+.
4 Kuko ndengewe n’amakosa yanje+.Ameze nk’umuzigo uremereye cane, sinshobora kuwikorera.
5 Ibikomere vyanje biranuka kandi vyuzuye amashirakubera ubupfu bwanje.
6 Amaganya aranyishe kandi nihebuye cane.Ngendana intuntu bukarinda bwira.
7 Numva umuriro ururumba muri jewe*,umubiri wanje wose urarwaye+.
8 Umubiri wanje watimvye kandi wajanjaguritse wose.Nguma mboroga* cane kubera intuntu mfise mu mutima.
9 Ewe Yehova, urazi ivyipfuzo vyanje vyose,kandi ntuyobewe amaborogo yanje.
10 Umutima wanje uguma udidagizwa, inguvu zose zahezekandi n’amaso yanje yahumye*+.
11 Abakunzi n’abagenzi banje bampevye kubera ivyago vyanje,kandi abagenzi banje somambike basigaye banca kure.
12 Abarondera ubuzima bwanje bantega imitego.Abarondera kungirira nabi baguma bavuga ibijanye no kunyica+.Birirwa baravuga ibinyoma bukarinda bwira.
13 Ariko jewe sindabumviriza+, meze nk’umuntu atumva.Sinkurako umunwa nka kurya kw’umuragi+.
14 Nsigaye meze nk’umuntu atumva,adashobora kwiburanira n’akanwa kiwe.
15 Kuko ari wewe narindiriye, ewe Yehova+!Kandi waranyishuye, ewe Yehova Mana yanje+!
16 Navuze nti: «Ese batonyigambakocanke ngo banyirateko ikirenge canje kinyereye!»
17 Kuko hari hasigaye gato ngo ntembagare,kandi ububabare bwaguma bunsesereza+.
18 Nahavuye natura ikosa ryanje+.Nari nabuze amahoro kubera igicumuro canje+.
19 Ariko abansi banje barakomeye* kandi bari n’ububasha.Abanyankira ubusa basigaye ari benshi.
20 Nabakoreye ivyiza ariko banyishura ibibi.Bagumye bandwanya kubera nshaka gukora iciza.
21 Ewe Yehova, ntumpebe!
Ntugume kure yanje, ewe Mana yanje+!
22 Nyaruka untabare,ewe Yehova bukiriro bwanje+!
Utujambo tw'epfo
^ Mu giheburayo havuga ngo «nta hakomeye hariho mu mubiri wanje.»
^ Mu giheburayo havuga ngo «nta mahoro ariho mu magufa yanje.»
^ Mu giheburayo havuga ngo «ikiyunguyungu canje cuzuye ubushe.»
^ Canke «niha.»
^ Mu giheburayo havuga ngo «kandi n’umuco w’amaso yanje wazimye.»
^ Mu giheburayo havuga ngo «ni bazima.»
