Yobu 9:1-35
9 Yobu yishura ati:
2 «Ndazi neza ko ari ukwo biri.
Ariko none umuntu buntu yoshobora gutsinda Imana mu rubanza+?
3 Hamwe umuntu yoshaka guharira na yo*+,ntiyokwishura n’ikibazo kimwe mu bibazo vyayo igihumbi.
4 Ni inkerebutsi mu mutima, kandi ifise ububasha burenze+.
Ni nde yoyihanga akagenda adakomeretse+?
5 Yimura* imisozi ntihagire n’uwubimenya,ikayitembagaza yashavuye.
6 Iranyiganyiza isi ikava mu kibanza cayo,ku buryo inkingi zayo zijugumira+.
7 Itegeka izuba ngo ntiryake,igapfuka umuco w’inyenyeri+.
8 Isanza ijuru ari yonyene+,ikagendera ku mikuba ikomeye y’ikiyaga+.
9 Ni yo yakoze umugwi w’inyenyeri witwa Ashi*, uwitwa Kesili*,uwitwa Kima*+ hamwe n’imigwi y’inyenyeri zo mu bumanuko.
10 Ikora ibintu bikomeye bisiga ubwenge+,ibintu vy’agatangaza bidaharurika+.
11 Ica iruhande yanje ariko sindayibone.Irandengana ariko sindayimenye.
12 Iyo inyakuye ikintu, ni nde yoyitangira?
Ni nde yoyibaza ngo: “Ivyo ugira ni ibiki+?”
13 Imana ntizotangira ishavu ryayo+,mbere n’abashigikiye Rahabu*+ bazoyunamira.
14 Hari akantu rero jewe igihe ndayishura!Wumva ntakwiye guhitamwo neza amajambo mvuga?
15 Naho noba ndi mu kuri, sinoronka ico ndayishura+.
Nta kindi nokora atari ugusaba imbabazi umucamanza wanje*.
16 Hamwe noyihamagara, ugira ngo yonyitaba?
Sinibaza n’uko yonyumviriza,
17 kuko insavya ikoresheje igihuhusi,ikongereza ibikomere vyanje ata mvo+.
18 Ntimpa n’akanya ko guhumeka.Iguma intamika ibintu vy’umururazi.
19 Hamwe twovuga ibijanye n’inguvu, ni yo izifise rero+.
Tuvuze ibijanye n’ubutungane na ho, ica ivuga iti: “Ni nde yombaza ivyo nakoze*?”
20 Naho noba ndi mu kuri, akanwa kanje kontsindisha.Naho noba ndi intungane*, yovuga ko nagiriwe n’icaha.
21 Naho noba ndi intungane, sinzi ikindindiriye.Ubu buzima burandambiye*.
22 Vyose ni cokimwe. Ni co gituma mvuga nti:“Intungane n’umubisha irajaniranya.”
23 Hamwe hotera isegenya igahitana abantu giturumbuka,yokwitwengera ibonye ingene intungane zihebuye.
24 Isi yayishize mu maboko y’ababisha+.Abacamanza bo muri yo irabahuma amaso.
Nimba atari yo ibigira, none ni nde?
25 Imisi yanje isigaye inyaruka kuruta umwirutsi+.Iriruka, ikarangira ata ciza na kimwe mbonye.
26 Irihuta nk’ubwato bukozwe mu rufunzo,nk’inkona ishungurukira ku kintu igira ifate.
27 Naho novuga nti: “Reka nibagire amaganya yanje,reka nezerwe ndeke kwijirwa mu maso”,
28 nogumana ubwoba kubera imibabaro yanje yose+,kandi ndazi ko itazonyita intungane.
29 Nokubitwa intahe mu gahanga.
Kubera iki none noruhira ubusa+?
30 Naho nokwoga amazi y’urubura* rwashonze,nkongera ngakaraba intoke n’isabuni+,
31 yoca interera mu kinogo,gushika n’aho impuzu zanje zinyanka urunuka.
32 Erega si umuntu nkanje ku buryo noyishura,canke ngo turengukane imbere y’ubutungane+.
33 Nta muntu* n’umwe ariho yodutatura,canke ngo atubere umucamanza*.
34 Hamwe yoreka kunkubita*no kuguma intera ubwoba+,
35 noyivugisha ntatinya,kuko ntazi kuvugana ubwoba.
Utujambo tw'epfo
^ Canke «kuyiburanya.»
^ Canke «ikuraho.»
^ Ushobora kuba ari umugwi w’inyenyeri witwa Taureau mu gifaransa.
^ Ushobora kuba ari umugwi w’inyenyeri witwa Orion mu gifaransa.
^ Ushobora kuba ari umugwi w’inyenyeri witwa Grande Ourse mu gifaransa.
^ Rushobora kuba ari urukoko runini rwo mu mazi.
^ Hashobora kandi kuvugwa ngo «uwo tuburana.»
^ Mu giheburayo havuga ngo «ni nde yondengutsa?»
^ Canke «ntagirako umugayo kandi ngororotse.»
^ Canke «buranshisha, ndabwanse.»
^ Canke «shelegi.» Shelegi ni utuvunjivunji twera cane dukoragurika nk’imvura. Mu gifaransa batwita neige.
^ Canke «umuhuza.»
^ Mu giheburayo havuga ngo «aturambikeko ibiganza twese.»
^ Mu giheburayo havuga ngo «yonkurako inkoni yiwe.»
