Yeremiya 46:1-28

  • Ubuhanuzi bujanye na Misiri (1-26)

    • Misiri izoneshwa na Nebukadinezari (13, 26)

  • Ivyo Imana yasezeraniye Isirayeli (27, 28)

46  Ibi ni vyo Yehova yabwiye umuhanuzi Yeremiya ku bijanye n’amahanga+.  Ng’ibi ivyo yavuze kuri Misiri+, ku bijanye n’ingabo za Farawo Neko+ umwami wa Misiri, yari iruhande y’uruzi Efurate agatsindirwa i Karikemishi na Nebukadinezari* umwami wa Babiloni. Hari mu mwaka ugira kane w’intwaro ya Yehoyakimu+ mwene Yosiya, umwami w’Ubuyuda. Yavuze ati:   «Nimutegure inkinzo ntonto* n’inkinzo zagutse,muje ku rugamba.   Yemwe abagendera ku mafarasi, nimuyambike imigozi maze muyurire. Nimuhagarare mu bibanza vyanyu, mwambare n’inkofero. Nimusene amacumu, mwambare n’amakoti y’ivyuma.   “Ko mbona barandutse umutima? Bariko basubira inyuma, abarwanyi babo babatsinze barabatsindagira. Bataye umutwe barahunga, abarwanyi babo ntibanahindukiye. Hose abantu barandutse umutima”, ni ko Yehova avuze.   “Abanyaruka ntibashobora guhunga, n’abarwanyi ntibashobora kuyanyaga. Mu buraruko, hafi y’inkombe y’uruzi Efurate,ni ho batsitariye baragwa+.”   Uwu ni nde aduga nk’uruzi Nili,nk’inzuzi z’amazi asuriranya?   Misiri ni yo iduga nk’uruzi Nili+,nk’inzuzi z’amazi asuriranya,ikavuga iti: “Nzoduga mpfuke isi. Nzotikiza igisagara n’abakibamwo.”   Mwa mafarasi mwe, nimuduge! Mwa mikogote mwe, nimugende nk’abasazi! Abarwanyi nibegere,ab’i Kushi n’i Puti bazi gukoresha inkinzo+,n’Abaludimu+ bazi gukoresha umuheto no kuwutegura*+. 10  Uwo musi ni umusi w’Umukama Segaba, Yehova Nyeningabo. Ni umusi w’ukwihora, umusi azokwihora abamurwanya. Inkota izorya ihage, inywe amaraso yabo ihimbe, kuko Umukama Segaba, Yehova Nyeningabo, afise ikimazi co gutanga* mu gihugu co mu buraruko hafi y’uruzi Efurate+. 11  Ewe mukobwa w’isugi wa Misiri,duga i Gileyadi gutora amavuta yo kuvura*+! Imiti wayigwirije ubusakuko udashobora gukira+. 12  Amahanga yumvise agateterwe kawe+,kandi amaborogo yawe yuzuye igihugu. Kuko umurwanyi atsitara ku wundi,bose bakagwa.» 13  Ibi ni vyo Yehova yabwiye umuhanuzi Yeremiya ku bijanye n’ukuza kwa Nebukadinezari* umwami wa Babiloni, aje gutikiza igihugu ca Misiri+: 14  «Nimubimenyeshe mu Misiri, mubitangaze i Migidoli+. Nimubitangaze i Nofu* n’i Tahapanesi+ muvuge muti: “Nimuhagarare mu bibanza vyanyu mwitegure,kuko inkota izomara abantu irya n’ino yanyu. 15  Kubera iki abantu bawe b’abanyenkomezi bakukumuwe? Ntibashoboye kurinda,kuko Yehova yabasunuriye hasi. 16  Batsitara ari benshi bakagwa. Babwirana bati: ‘Haguruka dusubire iwacu no mu bacu,kubera inkota ikaze.’” 17  Batangarijeyo bati:“Farawo umwami wa Misiri ni urwamo gusa.Yaretse akaryo* karamujana+.” 18  “Ndirahiye jewe Imana nzima”, ni ko jewe Umwami yitwa Yehova Nyeningabo mvuze:“Azoza* ameze nka kurya kwa Tabora+ mu misozi,nka Karumeli+ hafi y’ikiyaga. 19  Ewe mukobwa aba mu Misiri,tekera umuzigo uzojana mu bunyagano. Kuko i Nofu* hazocika akajoreza.Hazoturirwa* hasigare ata wuhaba+. 20  Misiri imeze nk’ishashi y’inka iteye igomwe,mugabo udukoko tuguruka turyana, tuzoyitera tuvuye mu buraruko. 21  N’abasoda bayo b’abacangero bari muri yo bameze nk’inyana zivyibushe.Mugabo na bo nyene basubiye inyuma bahungira icarimwe. Ntibashoboye kurinda+kuko umusi w’ivyago vyabo washitse,igihe c’uko bagira ico babazwa.” 22  “Urwamo rwayo rumeze nk’urw’inzoka inyororomba ihunga,kuko biruka kuri Misiri ari igitero gikomeye bitwaje amashoka,nk’abicira ibiti*. 23  Bazokwicira ikibira cayo”, ni ko Yehova avuze, “naho wamengo nta wocinjiramwo. Kuko ari benshi kurusha inzige, bakaba badaharurika. 24  Umukobwa wa Misiri azomaramazwa. Azotangwa agwe mu maboko y’abantu bo mu buraruko+.” 25  Yehova Nyeningabo, Imana ya Isirayeli, avuze ati: “Ngira mpagurukire imana Amoni+ y’ahitwa No*+, Farawo, Misiri, imana zaho+ n’abami baho. Egome ngira mpagurukire Farawo n’abamwizigira bose+.” 26  “Nzotuma bagwa mu maboko y’abarondera kubica, mu maboko ya Nebukadinezari* umwami wa Babiloni+ n’abasuku biwe. Ariko mu nyuma, hazosubira kuba abantu nka kera”, ni ko Yehova avuze+. 27  “Nayo wewe musavyi wanje Yakobo, ntutinye,wewe Isirayeli, nturanduke umutima+. Kuko nzogukiza ndagukuye kure,n’uruvyaro* rwawe ndarukize ndarukuye mu gihugu bagizwemwo imbohe+. Yakobo azogaruka, abeho atekanye ata kimuhungabanya,ata n’umwe amutera ubwoba+. 28  Rero musavyi wanje Yakobo, ntutinye kuko ndi kumwe nawe”, ni ko Yehova avuze. “Nzohonya amahanga yose nagushwiragijemwo+,mugabo wewe sinzoguhonya+. Nzogutoza indero* ku rugero rubereye+,mugabo sinzogenda ntaguhanye.”»

Utujambo tw'epfo

Mu giheburayo havuga ngo «Nebukadirezari.» Iyo ni iyindi nyandiko.
Abarasisha umuheto ni bo bakunda gukoresha mwene izo nkinzo.
Canke «kuwugonda.» Mu giheburayo havuga ngo «kuwuhonyora (igihe bawambika uruvuto).»
Canke «ibitungwa vyo gukerera.»
Canke «amavuta yo gusomora.» Raba Insiguro y’amajambo (Amavuta yo gusomora).
Mu giheburayo havuga ngo «Nebukadirezari.» Iyo ni iyindi nyandiko.
Canke «Memfisi.»
Mu giheburayo havuga ngo «igihe cashinzwe.»
Ni ukuvuga uwuzoza gutera Misiri.
Canke «Memfisi.»
Hashobora kandi kuvugwa ngo «hazoba agahinga.»
Canke «nk’abasenya inkwi.»
Ni ukuvuga Tebe (Thèbes).
Mu giheburayo havuga ngo «Nebukadirezari.» Iyo ni iyindi nyandiko.
Mu giheburayo havuga ngo «urubuto.»
Canke «nzogukosora.»