Guharura 23:1-30
23 Balamu aca abwira Balaki ati: «Nyubakira ng’aha ibicaniro indwi+, untegurire impfizi z’inka indwi n’impfizi z’intama indwi.»
2 Ubwo nyene Balaki aca akora ivyo Balamu amubwiye. Hanyuma Balaki na Balamu bashikana impfizi yʼinka n’impfizi y’intama ku gicaniro kimwekimwe cose+.
3 Balamu aca abwira Balaki ati: «Sigara ng’aho iruhande y’ishikanwa riturirwa ryawe, jewe ngiye harya hirya gatoyi. Hari aho Yehova yombonekera. Ico ambwira cose ndakikumenyesha.» Aca ava ng’aho agenda hejuru ku gasozi.
4 Hanyuma Imana ibonekera Balamu+, na we ayibwira ati: «Natondetse ibicaniro indwi, kandi nashikanye impfizi y’inka n’impfizi y’intama ku gicaniro kimwekimwe cose.»
5 Yehova aca ategeka Balamu+ ivyo akwiye kuvuga*, maze amubwira ati: «Subira kwa Balaki, kandi ivyo abe ari vyo umubwira.»
6 Aca asubira inyuma, asanga Balaki n’abaganwa b’i Mowabu bose bahagaze iruhande y’ishikanwa riturirwa ryiwe.
7 Maze Balamu avuga ati+:
«Balaki umwami wa Mowabu yankuye i Aramu+,mu misozi yo mu buseruko, maze ambwira ati:
“Ingo umvumire Yakobo.
Emwe, ingo untukire Isirayeli+.”
8 Nokwubahuka gute kuvuma abo Imana itavumye?
Nokwubahuka gute gutuka abo Yehova atatutse+?
9 Ndababona ndi hejuru ku bitandara,nkabitegereza ndi hejuru ku mitumba.
Ni umugwi w’abantu uri ukwa wonyene+,baritandukanije n’ayandi mahanga+.
10 Ni nde yoharura udutete tw’umukungugu wa Yakobo+,canke yoharura n’ica kane ca Isirayeli?
Icompa nkipfira urupfu rw’abagororotsi,iherezo ryanje rikamera nk’iryabo.»
11 Balaki aca abwira Balamu ati: «Ivyo unkoreye ni ibiki? Nakuzanye kugira umvumire abansi, ariko raba wishinga kubahezagira+.»
12 Na we amwishura ati: «None ivyo Yehova antegetse si vyo mvuga+?»
13 Balaki aca amubwira ati: «Ndakwinginze uze tujane ahandi ushobora kubabona. Uza kubona igice cabo gusa, ntubabona bose. Uheze ubamvumire uri ng’aho+.»
14 Aca amujana mu murima wa Zofimu, hejuru ku musozi wa Pisiga+. Araheza yubaka ibicaniro indwi, maze ashikana impfizi y’inka n’impfizi y’intama ku gicaniro kimwekimwe cose+.
15 Balamu rero abwira Balaki ati: «Sigara ng’aho iruhande y’ishikanwa riturirwa ryawe, jewe ngiye harya hirya kuvugana n’Imana.»
16 Yehova aca abonekera Balamu, amutegeka ivyo aza kuvuga+. Hanyuma amubwira ati: «Subira kwa Balaki, kandi ivyo abe ari vyo umubwira.»
17 Aca asubira kwa Balaki, asanga amurindiririye hafi y’ishikanwa riturirwa ryiwe, ari kumwe n’abaganwa b’i Mowabu. Balaki aca amubaza ati: «Yehova yakubwiye iki?»
18 Na we amwishura ati+:
«Haguruka Balaki wumvirize,
nyumviriza wa muhungu wa Zipori!
19 Imana si umuntu ngo ibeshe+,canke umwana w’umuntu ngo ihindure ivyiyumviro*+.
Iyo ivuze ikintu, mbega ntigikora?
Iyo isezeranye ikintu, mbega ntigishitsa+?
20 Raba, nazanywe no guhezagira,ko rero yamaze kubahezagira+, sinshobora kuyivuguruza+.
21 Ntiyihanganira ivyogirira nabi* Yakobo,ntiyemera ko Isirayeli ashikirwa n’ivyago.
Yehova Imana yabo* ari kumwe na bo+,kandi barasamiriza impundu ko ari umwami wabo.
22 Imana ibakuye mu Misiri+.
Imeze nk’amahembe y’ishuri yo mw’ishamba* kuri bo+.
23 Nta kuragura kwogirira nabi Yakobo+,nta bupfumu bwogirira nabi Isirayeli+.
Ku vyerekeye Yakobo na Isirayeli, umuntu yoshobora kuvuga ati:
“Raba ibitangaza Imana yakoze!”
24 Iryo hanga rizohaguruka nk’intambwe,ryiduze nka kurya kw’intambwe+.
Rizomera nk’intambwe itaryama itariye ico yafashe,canke itanyoye amaraso y’ibikoko yishe.»
25 Balaki aca abwira Balamu ati: «Nimba udashoboye kubavuma, pfuma ureka no kubahezagira.»
26 Balamu amwishura ati: «Sinakubwiye none ko nza gukora ivyo Yehova avuze vyose+?»
27 Balaki yongera kubwira Balamu ati: «Ingo basi tuje ahandi hantu. Hari aho Imana y’ukuri yokwemerera kubamvumira+.»
28 Balaki aca ajana Balamu hejuru ku musozi Peyori, aharabana n’i Yeshimoni*+.
29 Balamu araheza abwira Balaki ati: «Nyubakira ng’aha ibicaniro indwi, untegurire impfizi z’inka indwi n’impfizi z’intama indwi+.»
30 Balaki aca akora ivyo Balamu amubwiye, ashikana impfizi y’inka n’impfizi y’intama ku gicaniro kimwekimwe cose.
Utujambo tw'epfo
^ Mu giheburayo havuga ngo «aca ashira iri jambo mu kanwa ka Balamu.»
^ Canke «ngo yicuze.»
^ Canke «amageza yo kugirira nabi.»
^ Mu giheburayo havuga ngo «Imana yiwe.»
^ Gishobora kuba cari igikoko kigomba kumera nk’imbogo. Raba Insiguro y’amajambo.
^ Hashobora kandi kuvugwa ngo «aharabana n’ubugaragwa», «aharabana n’agahinga.»
