Zaburi 71:1-24
71 Muri wewe, ewe Yehova, ni ho mpungiye+.Yoo! ese ntokwigera maramara+!
2 Mu bugororotsi bwawe nundokore, unkize+.Ntega ugutwi, unkize+.
3 Numbere iboma ry’igitandara ryo kwinjiramwo nantaryo+.Tegeka nkizwe+,Kuko uri urutare rwanje n’igihome canje gikomeye+.
4 Ewe Mana yanje, nunkize ukuboko kw’umubisha+,Unkize ikiganza c’uwukora ivy’akarenganyo n’agahahazo+.
5 Kuko uri icizigiro canje+, ewe Mukama Segaba Yehova, umwizero wanje kuva mu buto bwanje+.
6 Ni wewe nishimikije kuva nkiri mu nda+;Ni wewe wantandukanije n’ubura bwa mama+.Muri wewe ni ho ishemezo ryanje ryama+.
7 Nacitse nk’igitangaro ku bantu benshi+;Mugabo ni wewe buhungiro bwanje bukomeye+.
8 Akanwa kanje kuzuye ishemezo ryawe+,Kaguma kuzuye ubwiza bwawe bukarinda bwira+.
9 Ntunte mu gihe c’ubusaza+;Igihe nyene inkomezi zanje ziriko zirayama, ntumpebe+.
10 Kuko abansi banje bavuze ku binyerekeye+,N’abaguma bareretse ubuzima bwanje bagiye hamwe baja inama+,
11 Ngo: “Imana ubwayo yamuhevye+.Mukurikirane mumufate, kuko ata murokozi ariho+.”
12 Ewe Mana, ntungume kure+.Ewe Mana yanje, nyaruka umfashe+.
13 Nibamaramare, bahone, abo barwanya ubuzima bwanje+.Nibipfuke iceyi n’agateterwe, abo bandonderera ivyago+.
14 Nayo jewe, nzoguma ndindiriye+,Kandi nzokwongereza ishemezo ryawe ryose.
15 Akanwa kanje kazodonda ubugororotsi bwawe+,Kadonde ubukiriro bwawe burinde bwira+,Kuko ntamenye ibitigiri vyavyo+.
16 Nzozanana ubushobozi buhambaye+, ewe Mukama Segaba+ Yehova;Nzovuga ubugororotsi bwawe, ubwawe gusa+.
17 Ewe Mana, wanyigishije kuva mu buto bwanje+,Kandi gushika n’ubu nguma ntangaza ibikorwa vyawe vy’agatangaza+.
18 Mbere no gushika mu gihe c’ubusaza n’imvi ku mutwe, ewe Mana, ntumpebe+,Gushika mbwiye iyaruka ivy’ukuboko kwawe+,Mbwiye abazoza bose ivy’ubushobozi bwawe+.
19 Ubugororotsi bwawe, ewe Mana, bugereza iyo hejuru+;Nayo ku biraba ibikomeye wakoze+,Ni nde ga Mana ameze nkawe+?
20 Kubera ko watumye mbona amarushwa menshi n’ivyago vyinshi+,Nungarurire agatege+;Ongera unduze, unkure mu nyenga z’amazi z’isi+.
21 Niwongereze ubukuru bwanje+,Unkikuze, umpoze+.
22 Nanje, nzoguhaya ku gicurarangisho c’imirya+,Ku biraba ukuri kwawe, ewe Mana yanje+!Nzoguhibongoreza ku nanga, ewe Mweranda wa Isirayeli+!
23 Iminwa yanje izokwiha akamo k’umunezero igihe nzoba numva noguhibongoreza+,Emwe, jewe uwo wacunguye+.
24 Vyongeye, ururimi rwanje, ruzovuga ubugororotsi bwawe n’ijwi ritoyi burinde bwira+,Kuko bamaramaye, kuko bariye ivyatsi, abandonderera ivyago+.
