Yesaya 30:1-33
30 “Baragowe abana b’intagondwa+,” ni ko Yehova avuga, “abagomba gushitsa impanuro, mugabo atari iyivuye kuri jewe+, bakagomba no gusuka ikinyobwa c’ishikanwa, mugabo batabigiranye impwemu yanje, kugira ngo bongere igicumuro ku kindi+;
2 abafata inzira ngo bamanuke mu Misiri+ kandi batasiguje akanwa kanje+, ngo bikinge igihome gikomeye ca Farawo no kugira ngo bahungire mu gitutu ca Misiri+!
3 Kandi mwebwe, igihome gikomeye ca Farawo kizotegerezwa kubabera imvo yo kumaramara+, ubuhungiro mu gitutu ca Misiri na bwo imvo yo guteterwa+.
4 Kuko abaganwa biwe bashitse i Zowani+, kandi abatumwa biwe bashika n’i Hanesi.
5 Bose bazomaramazwa koko n’abantu ata nyungu bazanira umuntu, ata co bafasha kandi ntihagire inyungu bazana, ariko bakaba ari imvo yo kumaramara be n’imvo yo kugira iceyi+.”
6 Ijambo ryamenyeshejwe ku bikoko vyo mu bumanuko+: Baca mu gihugu c’amarushwa+ n’ibintu bigoye, c’intambwe n’ingwe iroha, c’imamba n’inzoka y’umuriro iguruka+, bagatwara amatunga yabo ku bitugu vy’indogobwa zikuze, ku mapfupfu y’ingamiya+ na ho ibintu vyabo. Nta co bizokwungura abantu.
7 Abanyamisiri ni ubusa gusa, kandi bazofashiriza ubusa gusa+. Ni co gituma uyo namwise ntya: “Rahabu+—ni abo kwiyicarira ata co binona.”
8 “Ubu rero nuze, uvyandike ku gisate uri kumwe na bo, uvyandike mbere mu gitabu+, ngo bifashe ku bw’umusi uzoza, bibe intahe gushika igihe kitagira urugero+.
9 Kuko ari igisata c’ikigarariji+, abana b’ababeshi+, abana batashatse kwumva itegeko rya Yehova+;
10 ni bo babwiye ababona ngo: ‘Ntimubone,’ n’aberekwa ngo: ‘Ntimutubonere ibigororotse na bimwe+. Tubwire ibisosa; nimubone ivy’uruhendo+.
11 Nimukevye muve mu nzira; nimute umunyuro+. Nimuzimanganye wa Mweranda wa Isirayeli kubera twebwe+.’”
12 Ibi rero ni vyo wa Mweranda wa Isirayeli avuze: “Ko mwataye iri jambo+, kandi kubera ko mwizigira ukugunga be n’ivy’uruyeri, akaba ari vyo mwishimikiza+,
13 ni co gituma iri kosa rizobabera nk’igihimba gisadutse kigira gitembe, ubuvyimbe ku ruhome rudugijwe hejuru cane+ rushobora gusenyuka bukwi na bukwi, mu kanya isase+.
14 Kandi ruzomenagurwa nk’igihe bamenagura umubindi munini w’ababumvyi+, uwo bajanjagura ata wuwuziguriza, ku buryo mu tuvunji twawo tujanjaguwe ata wushobora gusangamwo urujo rwo kurahuza umuriro mu ziko canke rwo kuyoza amazi ahantu h’urushanga+.”
15 Kuko ibi ari vyo Umukama Segaba Yehova, wa Mweranda wa Isirayeli+, avuze: “Mugarutse mukaruhuka, muzokizwa. Inkomezi zanyu zizobonekera mu kuguma mutekanye no mu kwizigira+.” Mugabo ntimwakunze+.
16 Muraheza muvuga muti: “Oya, ahubwo tuzohunga turi ku mafarasi+!” Ni co gituma muzohunga. Muti: “Kandi tuzogendera ku mafarasi anyaruka+!” Ni co gituma ababakurikirana bazonyaruka+.
17 Igihumbi bazojugumizwa n’uguhambara kw’umwe+; uguhambara kwa batanu kuzobahungisha gushika musigaye muri nk’inkingi y’ubwato kw’isonga ry’umusozi, nk’ikimenyetso ku murambi+.
18 Ni co gituma Yehova azoguma arindiriye kubagirira ubutoni+, kandi ni co gituma azohaguruka ngo abereke imbabazi+. Kuko Yehova ari Imana y’imanza+. Hahiriwe+ abo bose baguma bamurindiriye+.
19 Abantu b’i Siyoni+ nibaba i Yeruzalemu+, ntuzogenda urize+. Ntazobura kukugirira ubutoni niyumva ijwi ry’amaborogo yawe; akiryumva ntazobura kukwishura+.
20 Kandi Yehova azobaha koko umukate w’amarushwa be n’amazi y’agahahazo+; yamara Umwigisha wawe Ahambaye ntazokwongera kwinyegeza, kandi amaso yawe azoba vy’ukuri amaso abona Umwigisha wawe Ahambaye+.
21 Kandi amatwi yawe azokwumva ijambo inyuma yawe rivuga ngo: “Iyi ni yo nzira+. Nimuyigenderemwo,” nimwaramuka mugiye iburyo canke ibubamfu+.
22 Kandi muzohumanya ibihometse ku bishusho vyanyu bibajwe vy’ifeza+ n’agakuyengezo gafashe neza k’igishushanyo canyu c’inzahabu+ ishongeshejwe+. Uzobisanzaza+. Nka kurya kw’umugore ari mu butinyanka, uzobibwira uti: “Muri umucafu gusa+!”
23 Ntazobura gutanga imvura ku bw’imbuto yawe ubiba mu butaka+, kandi bwa mwimbu w’ubutaka atange umukate, uwuzobwirizwa kuba unuze kandi utonyanga ivuta+. Kuri uwo musi, ibitungwa vyawe bizorisha mw’iragiriro ryagutse+.
24 Kandi inka n’indogobwa zikuze zirima ubutaka, bizorya indya z’ibitungwa zirunze umufumbegeti, zagosojwe ikiyozo+ n’ikanya.
25 Kandi ku musozi muremure wose no ku murambi ukirurutse wose hazotegerezwa kuba imigezi+, imifurege y’amazi, ku musi w’ugusasika inganda gukomeye, iminara niyatemba+.
26 Kandi umuco w’ukwezi kw’igisyo uzocika koko nk’umuco w’izuba rirurumba; kandi umuco w’izuba rirurumba uzokwongerekana incuro indwi+, nk’umuco w’imisi indwi, ku musi Yehova azotubika isenyerana+ ry’abantu biwe agakiza+ n’uruguma rukaze ruvuye ku nkoni bakubiswe na we.
27 Raba! Izina rya Yehova riraje rivuye kure, rirurumba ishavu ryiwe+ kandi rizananye n’ibicu biremereye. Nayo iminwa yiwe, yuzuye imisibo, ururimi rwiwe na rwo ni nk’umuriro uyigiza+.
28 Impwemu yiwe ni nk’uruzi rw’isumo rusegenyuka rukadengera gushika no kw’izosi+, kugira ngo izungagize irya n’ino amahanga ikoresheje ikiyunguruzo+ c’ibitagira mvura; kandi umujiginya+ utera kuyerera uzoba mu mibangabanga y’ibisata vy’abantu+.
29 Muzogira ururirimbo+ nka rurya rwo mw’ijoro aho umuntu yiyeza ku bw’umusi mukuru+, n’umunezero w’umutima nk’uw’umuntu agendana umwironge+ ngo yinjire mu musozi wa Yehova+, ku Gitandara ca Isirayeli+.
30 Kandi Yehova azokwumvikanisha koko iteka ry’ijwi ryiwe+, yerekane ukumanuka kw’ukuboko kwiwe+, mu bushangashirwe bw’ishavu+, n’urubeya rw’umuriro uyigiza+, n’ugupumuka kw’ibicu, n’ikirura c’imvura+ be n’iminana y’urubura+.
31 Kuko Ashuri izocibwa ivutu n’ijwi rya Yehova+; mbere azoyikubita ikibando+.
32 Kandi igihe cose akubise inkoni yiwe y’uguhana, iyo Yehova azorambika kuri Ashuri, hazovuga utugoma n’inanga+; kandi vy’ukuri azobarwanisha urugamba rw’ukubangura ibirwanisho+.
33 Kuko Tofeti+ yiwe itunganijwe kuva mu bihe vya vuba; vyongeye irateguriwe umwami ubwiwe+. Ikirundo cayo yakigize kirekire. Umuriro n’inkwi birahari ku bwinshi. Impemu za Yehova zirayirurumbira, nk’uruzi rw’isumo rw’amazuku+.
