Imigani 31:1-31
31 Amajambo ya Lemuweli umwami, ubutumwa buremereye+ nyina yamuhaye mu kumukosora+:
2 Mvuge iki ga mwananje? Mvuge iki ga mwana w’inda yanje+? Mvuge iki ga mwana w’indagano zanje+?
3 Ntuhe inkomezi zawe abagore+, canke ngo inzira zawe uzihe ibishikana abami ku guhanagurwa+.
4 Si ivy’abami, Lemuweli we, si ivy’abami kunywa umuvinyu, canke ngo bibe ivy’abategetsi bakurubakuru kuvuga ngo: “Inzoga iboreza iri hehe+?”
5 kugira ngo umuntu ntahave anywa akibagira ivyashinzwe, akagoreka imburano z’uwo ari we wese mu bana b’amarushwa+.
6 Nimuhe inzoga iboreza uwuri mu guhwera+, n’umuvinyu ab’umutima udundumiwe+.
7 Umuntu nanywe yibagire ubworo bwiwe, kandi ntasubire kwibuka ivyago vyiwe.
8 Teranura akanwa uvugire ikiragi+, uburanire abari mu kuvaho bose+.
9 Teranura akanwa, uce imanza mu bugororotsi, uburanire umurushwa n’umworo+.
א [ʼAlefu]
10 Umugore abishoboye, ni nde yomuronka+? Agaciro kiwe karuta kure n’iyo ak’amabuye y’agaciro yitwa korali.
ב [Beti]
11 Umutima wa inawe waramwizigiye, kandi inyungu ntibura+.
ג [Gimelu]
12 Uwo mugore yamuhemvye ivyiza, si ibibi, imisi yose y’ubuzima bwiwe+.
ד [Daleti]
13 Yarondeye ubwoya n’inyuzi z’ilino, kandi akora ikintu cose gihimbara amaboko yiwe+.
ה [Heʼ]
14 Ameze nk’imeri z’umudandaza+. Azana ibifungurwa vyiwe abikuye kure.
ו [Vau]
15 Kandi avyuka hakiri mu kajoro+, agaha ibifungurwa urugo rwiwe, agaha n’inkumi ziwe umugabane zigenewe+.
ז [Zayini]
16 Yariyumviriye itongo, araryironsa+; bivuye ku vyamwa vy’amaboko yiwe, yateye umurima w’imizabibu+.
ח [Heti]
17 Yakenyeje amafyinga yiwe inkomezi, kandi aha ingoga amaboko yiwe+.
ט [Teti]
18 Yiyumvisemwo ko urucuruza rwiwe ari rwiza; itara ryiwe ntirizima mw’ijoro+.
י [Yodi]
19 Yatumye amaboko yiwe ku gakoni kazingîrwako urunyuzi, amaboko yiwe na yo afata agati kazungurutsa urunyuzi+.
כ [Kafu]
20 Yagaranzuriye ikiganza umurushwa, kandi yaramvuriye amaboko umworo+.
ל [Lamedi]
21 Ntatinyira urugo rwiwe kubera shelegi, kuko urugo rwiwe rwose rwambaye impuzu zirimwo zibirizibiri+.
מ [Memu]
22 Yihinguriye ibisaswa+. Ivyambarwa vyiwe ni ivy’ilino n’ubwoya buzize ibara ry’umuyugubwe ugomba gutukura+.
נ [Nuni]
23 Inawe+ ni umuntu azwi mu marembo+, iyo yicaranye n’abagabo b’inararibonye b’igihugu.
ס [Sameki]
24 Yarahinguye mbere n’impuzu zo munsi+, arazigurisha, aha n’imikaba abacuruza.
ע [ʽAyini]
25 Inkomezi n’ubwiza bwakaka ni vyo vyambarwa vyiwe+, kandi aratwenga umusi uzoza+.
פ [Peʼ]
26 Yateranuye akanwa kiwe mu bukerebutsi+, kandi itegeko ry’ubuntu bwuzuye urukundo riri ku rurimi rwiwe+.
צ [Tsade]
27 Aracungera imirimo y’urugo rwiwe, kandi ntarya umukate w’ubunebwe+.
ק [Kofu]
28 Abahungu biwe barahagurutse bamwita umuhirwe+; inawe arahaguruka, akamushemeza+.
ר [Reshi]
29 Hari abakobwa+ benshi berekanye ko babishoboye, mugabo wewe, emwe, waraduze ubaheta bose+.
ש [Shini]
30 Igikundiro coshobora guhendana+, n’ubwiza bwoshobora kuba ubusa+; mugabo umugore atinya Yehova ni we yihesha ugushemezwa+.
ת [Tau]
31 Nimumuhe ku vyamwa vy’amaboko yiwe+, kandi ibikorwa vyiwe bimushemeze mu marembo+.
