Imigani 12:1-28
12 Uwukunda indero aba akunda ubumenyi+, mugabo uwanka igikangiro ni imburabwenge+.
2 Umwiza arashimwa na Yehova+, mugabo umuntu w’ivyiyumviro vy’ububisha amwita umubisha+.
3 Nta muntu azoshimangirwa biciye ku bubisha+; mugabo imizi y’abagororotsi yoyo, ntizoterwa kudandabagirana+.
4 Umugore abishoboye ni urugori kuri inawe+, mugabo uwukora ivy’akamaramaza ni nk’ububore mu magufa ya inawe+.
5 Ivyiyumviro vy’abagororotsi ni ubutungane+; ukuyobora kw’ababisha ni ubuhendanyi+.
6 Amajambo y’ababisha ni ukubundira gusesa amaraso+, mugabo akanwa k’abagororotse ni ko kazobarokora+.
7 Ababisha baratembagazwa ntibabe bakiriho+, mugabo inzu y’abagororotsi izoguma ihagaze+.
8 Umuntu azoshemezwa kubera akanwa kiwe kiyubara+, mugabo uw’umutima ugoramanze azoba uwo gukengerwa+.
9 Uwubahwa buhoro mugabo akaba afise umusuku, aruta uwininahaza mugabo akaba akenye umukate+.
10 Umugororotsi aritaho ubuzima bw’igitungwa ciwe+, mugabo imbabazi z’ababisha ntizigira ikigongwe+.
11 Uwurima ubutaka bwiwe azohaga umukate+, mugabo uwukurikirana ibintu ata co bimaze ntagira umutima+.
12 Umubisha yipfuje icafashwe n’urusenga rw’ababi+; mugabo umuzi w’abagororotsi wowo uratanga icamwa+.
13 Umuntu mubi afatwa n’umutego w’ukugabitanya kw’iminwa+, mugabo umugororotsi arava mu marushwa+.
14 Umuntu arahaga ivyiza bivuye ku vyamwa vy’akanwa kiwe+, kandi ico amaboko y’umuntu akora kizomugarukako+.
15 Inzira y’igipfu iragororotse mu maso yaco bwite+, mugabo uwumviriza impanuro ni inkerebutsi+.
16 Igipfu ni co kimenyekanisha umwikomo waco kuri nya musi nyene+, mugabo umunyabwenge arapfuka agateterwe+.
17 Uwusuka ubwizigirwa avuga ibigororotse+, mugabo icabona c’ikinyoma kivuga ubuhendanyi+.
18 Hari uwuvuga atiyumviriye nk’aho avuganye ugusogota kw’inkota+, mugabo ururimi rw’abantu b’inkerebutsi ruravūra+.
19 Umunwa w’ukuri+ ni wo uzoshimangirwa ibihe bidahera+, mugabo ururimi rw’ibinyoma ruzomara gusa akanya gato+.
20 Ubuhendanyi buri mu mutima w’abategura gukora ikibi+, ariko abaremesha amahoro bagira umunezero+.
21 Nta kibi kizoshikira umugororotsi+, mugabo ababisha ni bo batazobura kwuzuzwa ivyago+.
22 Iminwa y’ikinyoma ni ikintu giteye ishishi kuri Yehova+, mugabo abakorana ubwizigirwa baramuhimbara+.
23 Umuntu w’umunyabwenge arahisha ubumenyi+, mugabo umutima w’ibijuju usemerera ubupfu+.
24 Ukuboko kw’abanyamwete ni kwo kuzoganza+, mugabo ukuboko kw’ubute kuzoba ukwo gukora ibikorwa vy’agahato+.
25 Amaganya mu mutima w’umuntu awutera kwicurikira+, mugabo ijambo ryiza rirawunezereza+.
26 Umugororotsi agendura iragiriro ryiwe, mugabo inzira y’ababisha ibatera kuyerera+.
27 Ubute ntibukoma igikoko umuntu ahīga+, mugabo umuntu w’umunyamwete ni ubutunzi bw’agaciro bw’umuntu.
28 Mu munyuro w’ubugororotsi hari ubuzima+, kandi kugira urugendo mu kayira kabwo bisobanura ko ata rupfu+.
