Ja ku birimwo

Ja ku rutonde rw'ibirimwo rwa kabiri

Ja ku rutonde rw’ibirimwo

Ivyabona vya Yehova

Ikirundi

Bibiliya kuri internet | BIBILIYA Y’ISI NSHASHA

Ezekiyeli 39:1-29

39  “Nayo wewe ga mwana w’umuntu, vuga ubuhanuzi bucira urubanza Gogi+, uvuge uti: ‘Ibi ni vyo Umukama Segaba Yehova avuze: “Ehe ngira nkurwanye, ewe Gogi, wewe mukuru kizigenza wa Mesheki+ na Tubali+.  Nzoguhindukiza, ndakuyobore+, ntume uduga uvuye mu mihingo y’uburaruko iri kure kuruta iyindi+, ndakuzane ku misozi ya Isirayeli.  Kandi nzokubita umuheto wawe uve mu kuboko kwawe kw’ukubamfu, n’imyampi yawe ntume ikoroka ivuye mu kuboko kwawe kw’ukuryo.  Uzogwa ku misozi ya Isirayeli+, mwe n’inteko zawe zose be n’ibisata vy’abantu bizoba biri kumwe nawe. Nzogutanga ubere indya inyoni zihiga, inyoni z’amababa y’ubwoko bwose, be n’ibikoko vyo mu gahinga+.”’  “‘Uzogwa ku gahinga+, kuko jewe navuze,’ ni ko Umukama Segaba Yehova avuze.  “‘Nzorungika umuriro kuri Magogi+ no ku bantu bibera mu mazinga mu mutekano+; kandi bazobwirizwa kumenya yuko jewe ndi Yehova.  Izina ryanje ryeranda nzorimenyekanisha hagati y’igisata canje Isirayeli, kandi sinzokwongera kureka ngo izina ryanje ryeranda rihumanywe+; kandi amahanga azobwirizwa kumenya yuko jewe ndi Yehova+, Umweranda muri Isirayeli+.’  “‘Raba! Ivyo bizoba ata kabuza, kandi ntibizobura kuranguka+,’ ni ko Umukama Segaba Yehova avuze. ‘Uwo ni wo musi navuze+.  Kandi ababa mu bisagara vya Isirayeli bazosohoka koko baturire ibirwanisho, bacanishe imiriro ibirwanisho n’udukinzo dutoyi be n’inkinzo zagutse, hamwe n’imiheto n’imyampi n’inkoni zo mu minwe be n’amacumu; bazobicanisha imiriro+ imyaka indwi. 10  Kandi ntibazotwara inkwi zivuye mw’ishamba, canke ngo begeranye inkwi mu bibira, kuko ibirwanisho ari vyo bazocanisha imiriro.’ “‘Emwe, bazosahura abari bahoze babasahura+, banyage abari bahoze babanyaga,’ ni ko Umukama Segaba Yehova avuze. 11  “‘Kandi kuri uwo musi nzoha Gogi+ ikibanza ng’aho, imva muri Isirayeli, umubande w’abarengana, ku ruhande rw’ubuseruko bw’ikiyaga, kandi uwo mubande uzoza urahagarika abarengana. Aho ni ho bazohamba Gogi n’isinzi ryiwe ryose, kandi bazowita Umubande w’Isinzi rya Gogi+. 12  Kandi ab’inzu ya Isirayeli bazobwirizwa kubahamba mu ntumbero yo guhumanura igihugu, mu mezi indwi+. 13  Emwe, abanyagihugu bose bazobwirizwa guhamba, kandi ivyo bizobagira ba rurangiranwa umusi nzokwininahaza+,’ ni ko Umukama Segaba Yehova avuze. 14  “‘Kandi hazoba abantu baguma bakoreshwa, abantu bazoshirwa ku ruhande, baza baraca mu gihugu, bari kumwe n’abarengana, bahamba abasigaye ku buringanire bw’isi, kugira ngo bayihumanure. Bazoguma barondera, gushika amezi indwi arangiye. 15  Kandi abarengana bazoca mu gihugu, hanyuma hagize uwubona vy’ukuri igufa ry’umuntu azoca yubaka ikimenyetso iruhande yaryo, gushika abahamba barihamvye mu Mubande w’Isinzi rya Gogi+. 16  Nayo izina ry’ico gisagara rizoba kandi Hamona. Kandi bazobwirizwa guhumanura igihugu+.’ 17  “Nayo wewe ga mwana w’umuntu, ibi ni vyo Umukama Segaba Yehova avuze: ‘Bwira inyoni z’amababa y’ubwoko bwose be n’ibikoko vyose vyo mu gahinga+, uti: “Nimwikoranirize hamwe, muze. Nimwiyegeranirize hamwe muvuye impande zose, muze ku kimazi canje nshikanye ku bwanyu, ikimazi gihambaye ku misozi ya Isirayeli+. Kandi koko muzorya inyama, munywe n’amaraso+. 18  Muzorya inyama z’abanyenkomezi+, munywe n’amaraso y’abakuru b’isi: impfizi z’intama, amasuguru y’intama y’imikangara+, n’amasuguru y’impene, ibimasa+, ibitungwa bikiri bito binuze vy’i Bashani vyose hamwe+. 19  Muzorya ibinure muhage+ mwongere munywe amaraso muborerwe, ku kimazi canje nzoshikana ku bwanyu.”’ 20  “‘Kandi muzohaga ku meza yanje, muhage amafarasi, n’abatwara imikogote, n’abanyenkomezi be n’abarwanyi b’ubwoko bwose,’ ni ko Umukama Segaba Yehova avuze+. 21  “‘Nzoshira ubuninahazwa bwanje mu mahanga; kandi amahanga yose azobwirizwa kubona urubanza rwanje nzoba nashikije+, be n’ukuboko kwanje nzoba nashize muri yo+. 22  Kandi ab’inzu ya Isirayeli bazobwirizwa kumenya yuko jewe ndi Yehova Imana yabo kuva kuri uwo musi kubandanya+. 23  Kandi amahanga azobwirizwa kumenya yuko ikosa ryabo ari ryo ryatumye bo, inzu ya Isirayeli, baja mu bunyagano+, kubera yuko bampemukiye, bigatuma ndabahisha mu maso hanje+ nkabatanga mu kuboko kw’abarwanizi babo, bakaguma bagwa, bose hamwe, bagwishijwe n’inkota+. 24  Nabagiriye ibihwanye n’ubuhumane bwabo, ibihwanye n’ibigabitanyo vyabo+, kandi nagumye ndabahisha mu maso hanje.’ 25  “Ibi rero ni vyo Umukama Segaba Yehova avuze: ‘Ubu ni ho nzogarukana imbohe za Yakobo+ kandi nkagirira vy’ukuri imbabazi inzu ya Isirayeli yose+; kandi nzorwanira ubweranda bw’izina ryanje*+. 26  Bazoba barikoreye agateterwe kabo+ n’ubuhemu bwabo bwose bangiriye+, nibibera ku butaka bwabo mu mutekano+, ata n’umwe abajugumiza+. 27  Ninabagarukana ndabakuye mu bisata vy’abantu, nkabakoraniriza hamwe vy’ukuri ndabakuye mu bihugu vy’abansi babo+, ni ho nzokwiyeza muri bo mu maso y’amahanga menshi+.’ 28  “‘Kandi bazobwirizwa kumenya yuko jewe ndi Yehova Imana yabo, ninabarungika mu bunyagano mu mahanga kandi vy’ukuri nkabegeraniriza hamwe ku butaka bwabo+, ku buryo ata n’umwe muri bo nzokwongera kureka ngo asigareyo+. 29  Kandi sinzokwongera kubahisha mu maso hanje+, kuko nzosuka impwemu yanje ku nzu ya Isirayeli+,’ ni ko Umukama Segaba Yehova avuze.”

Amakuru yiyongereye

Canke, “nzokwerekana ko nihebera izina ryanje ryeranda ryonyene gusa.”