Gushikira ivyo urondera

Hitamwo ururimi

Ja ku rutonde rw'ibirimwo rwa kabiri

Ja ku rutonde rw’ibirimwo

Ja ku birimwo

Ivyabona vya Yehova

Ikirundi

Bibiliya kuri internet

BIBILIYA Y’ISI NSHASHA

Ezekiyeli 30:1-26

30  Ijambo rya Yehova ryongera kunzako, riti:  “Mwana w’umuntu, vuga ubuhanuzi, uti+: ‘Ibi ni vyo Umukama Segaba Yehova avuze: “Nimuboroge muti: ‘Yoo, ewe musi uraho+!’,  kuko umusi uri hafi, emwe, umusi wa Yehova uri hafi+. Uzoba ari umusi w’ibicu+, igihe cashinzwe c’amahanga+.  Kandi inkota izoza koko mu Misiri+, ububabare bukaze na bwo buze muri Etiyopiya umuntu niyagwa agandaguwe mu Misiri, bagatwara vy’ukuri ubutunzi bwaho, n’imishinge yaho igasamburwa+.  Etiyopiya+ na Puti+ na Ludi be n’uruvange rw’abantu rwose+ na Kubi na ben’igihugu c’isezerano, bazogwa hamwe na bo bagwishijwe n’inkota+.”’  “Ibi ni vyo Yehova avuze: ‘Abashigikira Misiri na bo nyene bazogwa ata kabuza, n’ubwishime bw’inkomezi zayo buzoshika hasi+.’ “‘Kuva i Migidoli+ gushika i Siyeni+ bazogwishwa muri co n’inkota,’ ni ko Umukama Segaba Yehova avuze.  ‘Bazotegerezwa kandi kugirwa umusaka hagati mu bihugu vyacitse umusaka, ibisagara vyaho na vyo bibe neza na neza hagati y’ibisagara vyatikijwe+.  Kandi bazobwirizwa kumenya yuko jewe ndi Yehova ninadomeka umuriro mu Misiri, n’abayifasha bose bakavunagurwa vy’ukuri+.  Kuri uwo musi, intumwa zizogendera mu meri zivuye imbere yanje, kugira ngo zijugumize Etiyopiya yiyizigira+. Emwe, bazogira ububabare bukaze ku musi wa Misiri, kuko utegerezwa kuza+.’ 10  “Ibi ni vyo Umukama Segaba Yehova avuze: ‘Nzozimanganya kandi isinzi rya Misiri biciye ku kuboko kwa Nebukadirezari umwami wa Babiloni+. 11  We n’abantu biwe bari kumwe na we, intwazamukazo z’amahanga+, bagira bazanwe kugira ngo batume igihugu gisigara ari ibihomvagurike. Emwe, bazosokora inkota zabo barwanye Misiri, buzuze igihugu abagandaguwe+. 12  Imigende ya Nili+ nzoyigira ubutaka bwumutse, ngurishe igihugu mu kuboko kw’abantu babi+, igihugu be n’ibicuzuyemwo vyose ntume bigirwa umusaka n’ukuboko kw’ab’ahandi+. Jewe Yehova, ndavuze+.’ 13  “Ibi ni vyo Umukama Segaba Yehova avuze: ‘Nzorandura kandi ibigirwamana vyabo vy’umwanda+, ntume za mana ata co zimaze zizimangana i Nofu+, kandi nta mukuru wo mu gihugu ca Misiri azokwongera kubaho; kandi sinzobura gushira ubwoba mu gihugu ca Misiri+. 14  I Patirosi+ nzohagira umusaka, ndomeke umuriro i Zowani+, nshitse imanza muri No+. 15  Nzosuka ubushangashirwe bwanje+ kuri Sini, rya boma rya Misiri, ndandure isinzi ryo muri No+. 16  Nzodomeka umuriro mu Misiri. Sini ntizobura kugira ububabare bukaze, No na yo ibe iyigenewe gufatwa biciye ku bihengeri; nayo ku bijanye na Nofu, hazobaho abarwanizi ku murango! 17  Nayo abasore b’i Oni+ n’i Pibeseti, bazogwishwa n’inkota, ibisagara na vyo bijanwe kugirwa imbohe. 18  I Tahapanesi+ umurango uzocura umwiza, ninavunayo imitambikwa y’ingǒgo* ya Misiri+. Kandi muri we ubwishime bw’inkomezi ziwe buzozimanganywa vy’ukuri+. Nayo we, ibicu bizomupfuka+, ibisagara bimukukira bijanwe kugirwa imbohe+. 19  Nzoshitsa imanza mu Misiri+; kandi bazobwirizwa kumenya yuko jewe ndi Yehova.’” 20  Nuko mu mwaka ugira cumi na rimwe, mu kwezi kwa mbere, ku musi ugira indwi w’ukwo kwezi, ijambo rya Yehova ryongera kunzako, riti: 21  “Mwana w’umuntu, nzovuna koko ukuboko kwa Farawo umwami wa Misiri+, kandi, ehe ntikuzogenda gutubitswe kugira ngo gukizwe mu gushirwako igitambara co kuguhambīra+, gushobore gukomera ngo gufate inkota.” 22  “Ibi rero ni vyo Umukama Segaba Yehova avuze: ‘Ehe ngira ndwanye Farawo umwami wa Misiri+, ndamuvune amaboko+, ugukomeye n’ukwavunitse+, ntume inkota ikoroka ivuye mu kuboko kwiwe+. 23  Kandi nzosanzaza Abanyamisiri mu mahanga, ndabashwiragize mu bihugu+. 24  Nzokomeza amaboko y’umwami wa Babiloni+, nshire inkota yanje mu kuboko kwiwe+, mvune amaboko ya Farawo, anihire cane imbere yiwe nk’uwukomerekejwe bimwe vyica+. 25  Nzokomeza amaboko y’umwami wa Babiloni, amaboko ya Farawo na yo agwe; kandi bazobwirizwa kumenya yuko jewe ndi Yehova ninashira inkota yanje mu kuboko kw’umwami wa Babiloni, na we akayibangurira vy’ukuri igihugu ca Misiri+. 26  Nzosanzaza Abanyamisiri mu mahanga+, ndabashwiragize mu bihugu; kandi bazobwirizwa kumenya yuko jewe ndi Yehova.’”

Amakuru yiyongereye

Raba Inyongera ya 21.