Gushikira ivyo urondera

Hitamwo ururimi

Ja ku rutonde rw'ibirimwo rwa kabiri

Ja ku rutonde rw’ibirimwo

Ja ku birimwo

Ivyabona vya Yehova

Ikirundi

Bibiliya kuri internet

BIBILIYA Y’ISI NSHASHA

Ezekiyeli 27:1-36

27  Ijambo rya Yehova ryongera kunzako, riti:  “Nayo wewe ga mwana w’umuntu, ririmba akaririmbo k’intimba ku bijanye na Tiro+,  ubwire Tiro uti: “‘Yewe wewe uba ku minjiriro y’ikiyaga+, mucuruzakazi w’ibisata vy’abantu ku bw’amazinga menshi+, ibi ni vyo Umukama Segaba Yehova avuze: “Ewe Tiro, wewe ubwawe wavuze ngo: ‘Singira akanenge mu bwiza+.’  Hagati mu biyaga* ni ho uturere twawe turi+. Ubwiza bwawe, abubatsi bakwubatse babugize ubutagira akanenge+.  Bagukoreye imbaho zose mu bishōro vy’igiti c’umuberoshi vy’i Seniri+. Bafashe isederi ry’i Libani+ ngo baguhingureko inkingi y’ubwato.  Bakoze ingafe zawe mu biti bininibinini bisagaraye vy’i Bashani. Impanza* yawe bayikoze mu masenge ahomekanze mu mbaho z’akajwari, zo mu mazinga ya Kitimu+.  Igihuzu wasanza ngo kikubere ihema cari ic’inyuzi z’ilino y’amabara y’indobeke iva mu Misiri+. Inyuzi z’ubururu+ be n’ubwoya buzize ibara ry’umuyugubwe ugomba gutukura+ vyo mu mazinga ya Elisha+, ni vyo vyari ibipfukisho vy’uruhande rwawe rwo hejuru.  “‘“Ababa i Sidoni+ n’i Aruvadi+ bakubereye abo kugusoza. Abahanga bawe+ ga Tiro, bahora muri wewe; ni bo bagutumbereza+.  Mbere n’abatama b’i Gebali+ n’abahanga baho bahora muri wewe, ari abahoma amafatanirizo yawe+. Imeri zose zo mu kiyaga n’abazigendesha bahora muri wewe, kugira ngo bakābe ibidandazwa. 10  Abaperesi+ na Ludimu+ n’abagabo b’i Puti+, bahora mu nteko zawe za gisirikare, abarwanyi bawe. Inkinzo n’inkofero babimanika muri wewe+. Ni bo batuma ugira ubwiza bwakaka. 11  Bene Aruvadi+, mbere inteko zawe za gisirikare, bahora ku mpome zawe irya n’ino, kandi abahizi ni bo bahora mu minara yawe. Inkinzo zabo z’umuzingi bahora bazimanika ku mpome zawe irya n’ino+. Ubwiza bwawe ni bo bahora babugira ubutagira akanenge. 12  “‘“Tarushishi+ yari umudandaza wawe kubera ubwinshi bw’ibintu vy’agaciro vy’ubwoko bwose+. Ivyo mu bubiko bwawe vyatangwa ngo uronke ifeza yaho, icuma caho, ubutare bw’ibati bwaho n’ubutare bw’isǎsu bwaho+. 13  Yavani+, Tubali+ na Mesheki+ bari abacuruza bawe. Ibikabwa vyawe vyatangwa ngo uronke abantu+ be n’ibintu vy’umujumpu. 14  Mu nzu ya Togaruma+ hava amafarasi be n’amafarasi y’imbangutsi be n’inyumpu, ivyo waronka mu gutanga ivyo mu bubiko bwawe. 15  Bene Dedani+ bari abacuruza bawe; amazinga menshi yakubera abadandaza ukoresha; bagusubije ituro ry’amasenge+ n’igiti c’umwebeni. 16  Edomu yari umudandaza wawe kubera ubwinshi bw’ibikorwa vyawe. Ivyo mu bubiko bwawe vyakabwa amabuye y’agaciro yitwa turukwazi+, ubwoya buzize ibara ry’umuyugubwe ugomba gutukura, n’impuzu z’amabara y’indobeke, n’ibitambara vyiza, n’amabuye y’agaciro yitwa korali be n’amabuye y’umutuku. 17  “‘“Yuda be n’igihugu ca Isirayeli bari abacuruza bawe. Ibikabwa vyawe vyatangwa+ ngo uronke ingano+ y’i Miniti+ n’ivyo kurya bidasanzwe n’ubuki+ n’amavuta n’umusomozo*+. 18  “‘“Damasiko+ yari umudandaza wawe mu bikorwa vyawe vyinshi, kubera ubwinshi bw’ibintu vyawe vyose vy’agaciro, hamwe n’umuvinyu+ w’i Heluboni be n’ubwoya bweragurika bugomba gutukura. 19  Vedani na Yavani h’i Uzali, hatanga ibintu ngo haronke ivyo mu bubiko bwawe. Ibintu bicuzwe mu cuma, umubagabaga be na kanehe*+, vyari ivy’ibikabwa vyawe. 20  Dedani+ yari umucuruza wawe mu vy’impuzu zijishirwa kugendera ku mafarasi. 21  Abarabu+ be n’abakuru bose b’i Kedari+ bari abadandaza wakoresha. Bari abadandaza bawe mu bijanye n’imyagazi y’intama y’amasuguru, n’impfizi z’intama be n’amasuguru y’impene+. 22  Abacuruza b’i Sheba+ n’i Rayama+ bari abacuruza bawe; ivyo mu bubiko bwawe vyaratangwa ngo uronke ibimota neza vy’ubwoko bwose vyiza kuruta ibindi vyose, n’ubwoko bwose bw’amabuye y’agaciro, n’inzahabu+. 23  Harani+ na Kane na Edeni+, abacuruza b’i Sheba+, Ashuru+ na Kilimadi, bari abacuruza bawe. 24  Bari abacuruza bawe mu vy’impuzu z’akaroruhore, mu vy’imyitwikiro ikozwe mu mpuzu y’ubururu n’impuzu y’amabara y’indobeke no mu vy’ibisaswa* bikozwe mu bintu vy’amabara abiri, mu vy’imigozi itsivye kandi yakomejwe cane, ku cicaro cawe c’urucuruza. 25  “‘“Imeri z’i Tarushishi+ ni zo zakubera ibikoresho vyo guseha ibikabwa vyawe, ku buryo wuzura ukagira ubuninahazwa bwinshi mu nda y’igezi ry’ikiyaga+. 26  “‘“Abagusoza bakuzanye mu mazi menshi+. Umuyaga wo mu buseruko wagusabirije mu nda y’igezi ry’ikiyaga+. 27  Ibintu vyawe vy’agaciro be n’ivyo mu bubiko bwawe+, ibikabwa vyawe+, abakugendesha be n’abagutumbereza+, abahoma amafatanirizo yawe+ be n’abakāba ibidandazwa vyawe hamwe n’abarwanyi bawe bose+ bari muri wewe no mw’ishengero ryawe ryose, abari hagati muri wewe,—bizogwa mu nda y’igezi ry’ikiyaga ku musi w’ugutemba kwawe+. 28  “‘“Nihumvikana urwamo rw’amaborogo y’abagutumbereza, i musozi hazotigita+. 29  Kandi abakoresha ingafe bose, abagendesha ubwato, abatumbereza ubwato bose bo mu kiyaga, bazokwururuka bave mu meri zabo; bazohagarara i musozi+. 30  Ntibazobura kwumvikanisha ijwi ryabo ku bikwerekeye, barire babogoze+. Kandi bazokwiyorera umukungugu ku mitwe+. Bazokwikumbagaza mu minyota+. 31  Bazokwiharanguza kubera wewe+, bakenyere amagunira+, bakuririre badundumiwe mu mutima+, baboroge bimwe bibi. 32  Kandi mu gucura intimba kwabo bazokuririmbira koko akaririmbo k’intimba, baririmbane agahinda ku bikwerekeye+ bati: “‘“‘Ni nde ari nka Tiro+, nk’umwe anumirijwe hagati mu kiyaga+? 33  Ivyo mu bubiko bwawe+ vyarasohoka bivuye mu kiyaga+, ugahaza ibisata vyinshi vy’abantu+. Watungishije abami b’isi ubwinshi bw’ibintu vyawe vy’agaciro be n’ibikabwa vyawe+. 34  None ubu wasabijwe n’igezi ry’ikiyaga, ibwina mu mazi+. Nayo ibikabwa vyawe n’ishengero ryawe ryose+, vyaguye hagati muri wewe. 35  Ababa mu mazinga bose+, ntibazobura kukuraba bumiwe, kandi abami babo bazobwirizwa guhinda agashitsi bari n’ikinya+. Mu maso h’abantu hazohungabana+. 36  Nayo abadandaza bo hagati mu bisata vy’abantu, ntibazobura kuvuza agahwa ku bikwerekeye+. Uzohinduka ibica ivutu bukwi na bukwi, kandi ntuzokwongera kubaho, gushika igihe kitagira urugero+.’”’”

Amakuru yiyongereye

Ijambo ku rindi ni “mu mutima w’ibiyaga.”
Impanza ni igice c’imbere c’ubwato.
Raba Inyongera ya 21.
“Kanehe” ni igiterwa kimota kimeze nk’umusigati.
Canke, “amatapi.”