Gushikira ivyo urondera

Hitamwo ururimi

Ja ku rutonde rw'ibirimwo rwa kabiri

Ja ku rutonde rw’ibirimwo

Ja ku birimwo

Ivyabona vya Yehova

Ikirundi

Bibiliya kuri internet

BIBILIYA Y’ISI NSHASHA

1 Ngoma 22:1-19

22  Maze Dawidi avuga ati: “Aha ni ho nzu+ ya Yehova Imana y’ukuri, kandi iki ni co gicaniro+ co gushikanirako ishikanwa riturirwa ku bwa Isirayeli.”  Nuko Dawidi avuga ko bakoranya ba kavamahanga+ bari mu gihugu ca Isirayeli, maze abagira ababaji b’amabuye+ kugira ngo babaze amabuye+ y’ikwadarato yo kwubaka inzu y’Imana y’ukuri.  Vyongeye, Dawidi ategura ivyuma vyinshi vyo gukoramwo imisumari y’imiryango y’amarembo n’ivyo gukoramwo ibidadizo, ategura n’umujumpu mwinshi utoshobora gupimwa+,  be n’ibiti vy’amasederi+ bitagira igitigiri; kuko Abanyasidoni+ n’Abanyatiro+ bari bazaniye Dawidi ibiti vy’amasederi vyinshi.  Dawidi avuga rero ati: “Salomo umuhungu wanje aracari muto kandi nta nkomezi aragira+, kandi inzu igiye kwubakirwa Yehova izoba ari iy’agatangaza bimwe bihebuje+, kugira ngo ibe ntangere mu bwiza+ ku bihugu vyose. Hinge rero ndamugirire imyiteguro.” Nuko Dawidi ategura ibintu vyinshi imbere y’uko apfa+.  Vyongeye, ahamagara Salomo umuhungu wiwe kugira ngo amutegeke kwubakira inzu Yehova Imana ya Isirayeli.  Nuko Dawidi abwira Salomo umuhungu wiwe ati: “Jewe ubwanje naragize icipfuzo mu mutima wanje+ co kwubakira inzu izina+ rya Yehova Imana yanje.  Mugabo ijambo rya Yehova ryaje kuri jewe riti: ‘Wavishije amaraso menshi+ kandi warwanye intambara zikomakomeye+. Ntuzokwubakira inzu izina ryanje+, kuko wavishije amaraso menshi kw’isi imbere yanje.  Ehe uzovyarirwa umuhungu+. Azoba umugabo arangwa n’akaruhuko, kandi nzomuha ata gukeka kuruhuka abansi biwe bose impande zose+; kuko azokwitwa Salomo*+, kandi nzoha amahoro+ n’impore Isirayeli mu misi yiwe. 10  Ni we azokwubakira inzu izina ryanje+, kandi azombera umwana+, nanje ndamubere se+. Sinzobura gushimangira intebe y’ubwami y’ingoma yiwe+ kuri Isirayeli gushika igihe kitagira urugero.’ 11  “None rero mwananje, Yehova abane nawe; uze uroranirwe, wubake inzu ya Yehova Imana yawe, nk’uko yavuze ku bikwerekeye+. 12  Gusa, Yehova aguhe ukwiyubara n’ugutegera+, kandi aguhe ibwirizwa ku vyerekeye Isirayeli, egome, kugira ngo ugumye itegeko rya Yehova Imana yawe+. 13  Aho ni ho uzororanirwa+, niwitwararika gushitsa ingingo nyobozi+ n’ingingo z’ubutungane+ Yehova yategetse+ Musa ku bijanye na Isirayeli. Ugire umutima rugabo kandi ukomere+. Ntutinye+ canke ngo utekerwe n’ubwoba+. 14  Ehe mu kiringo c’amarushwa yanje+ narateguriye inzu ya Yehova italanto ibihumbi ijana z’inzahabu+ n’italanto umuliyoni z’ifeza; umujumpu+ n’ivyuma+ ntibishobora gupimwa kuko ari vyinshi cane; kandi nateguye ibiti n’amabuye, mugabo uzovyongereza. 15  Kandi uri kumwe n’abazokora ico gikorwa benshi, ababaji b’amabuye n’abakora mu vy’amabuye+ n’ibiti, n’umuntu wese w’umuhanga mu gikorwa c’ubwoko bwose+. 16  Inzahabu, ifeza, umujumpu n’ivyuma ntibishobora guharurwa+. Haguruka ukore+, kandi Yehova abane nawe+.” 17  Maze Dawidi ategeka abaganwa bose ba Isirayeli gufasha Salomo umuhungu wiwe, ati: 18  “Mbega Yehova Imana yanyu+ ntari kumwe namwe, kandi ntiyabahaye akaruhuko impande zose+? Kuko yatanze mu kuboko kwanje ababa mu gihugu, kandi igihugu caramazwe igabo imbere ya Yehova+ n’imbere y’abantu biwe. 19  None rero, nimushire umutima wanyu n’ubuzima bwanyu+ ku kubaza Yehova Imana yanyu+, kandi muhaguruke mwubake aheranda+ ha Yehova Imana y’ukuri+, kugira ngo muzane isandugu+ y’isezerano rya Yehova n’ibikoresho vyeranda vy’Imana y’ukuri ku nzu yubakiwe izina+ rya Yehova.”

Amakuru yiyongereye

Rivuye kw’ijambo risobanura “amahoro.”