Egome, kubera ko imfashanyo nziza kurusha izindi zose itangwa n’“Imana, yo ihoza abishwe n’umubabaro, ikabaremesha, ikabaruhurira ikongera igatuma bagira umunezero.”​—2 Abakorinto 7:6, The Amplified Bible.

•   Inkomezi. Mu ‘kukuruhurira no mu gutuma ugira umunezero,’ Imana ntica ikuraho ingorane zose ufise, ariko irishura amasengesho uyitura uyisaba inkomezi zo kwihangana. (Abafilipi 4:13) Numenye neza ko yiteguriye kukwumviriza, kuko Bibiliya ivuga iti: “Yehova ari hafi y’ab’umutima umenetse; kandi abajanjaguritse mu mutima arabakiza.” (Zaburi 34:18) Mu vy’ukuri, Imana irashobora kukwumva igihe uyitabaje, naho utoba ushoboye guserura mu majambo ukuntu wiyumva.​—Abaroma 8:26, 27.

•   Uburorero bwiza. Umwe mu bo Imana yakoresheje mu kwandika Bibiliya yasenze Imana ati: “Iyo ndi mu mwiheburo ukomeye ndakwambaza.” Uwo mwanditsi w’amazaburi yarihanganiye umubabaro ukomeye yarimwo mu kwibuka ko Imana idashaka ko turemerwa n’umutwaro w’ukwiyagiriza. Ahubwo yabwiye Imana ati: “Iyaba uguma wandika ibicumuro vyacu, ni nde atokwagiriwe n’icaha? Ariko uratugirira ikigongwe, kugira tugutinye.”​—Zaburi 130:1, 3, 4, Good News Translation.

•   Icizigiro. Uretse ko Imana iduhoza muri iki gihe, yarasezeranye ko izokuraho ingorane zose zituma twihebura. Niyashitsa iryo sezerano, “ivya kera [harimwo n’umubabaro ukomeye] ntibizokwibukwa, eka mbere ntibizoza mu mutima.”​—Yesaya 65:17.

 Menya neza: Naho twebwe Ivyabona vya Yehova twemera ko Imana ishobora kudufasha, turivuza igihe turwaye indwara nk’akabonge. (Mariko 2:17) Ariko rero, nta we turemesha ngo yivuze mu buryo bunaka; tubona ko umuntu wese ari we akwiye kwifatira ingingo ku bijanye n’amagara yiwe.