Ja ku birimwo

Ivyabona vya Yehova

Hitamwo ururimi Ikirundi

TIRKIMENISTANI

Bapfunzwe bazira ukwemera kwabo

Bapfunzwe bazira ukwemera kwabo

Kuva mu 2017 gushika mu 2019, abategetsi ba Tirkimenistani barapfunze imisore 14 y’Ivyabona vya Yehova kubera yanse kuja mu gisoda ibitumwe n’ijwi ryo mu mutima. * Iyo misore yakurikiranwa hisunzwe Ingingo ya 219(1) yo mu Gitabu c’amategeko mpanavyaha ivuga ko ‘kwanka kuja mu gisoda bitemewe n’amategeko.’ Sentare zo muri ico gihugu zaranse kwakira imanza zitari nke Ivyabona bunguruje basaba ko ingingo zari zafashwe zohindurwa. Babiri muri iyo misore barekuwe bahejeje umunyororo w’umwaka bari baciriwe. Cumi na babiri basigaye bapfungiwe mw’ibohero ry’i Seydi (LB-E/12).

Mu 2018, Ivyabona nka 40 barahamagawe ngo baje mu gisoda. Biraboneka ko n’abandi bazopfungwa mu 2019.

Haracariho ikibazo co kwubahiriza uburenganzira bwo kwisunga ijwi ryo mu mutima, ubwo kwubahirizwa mu vyiyumviro n’ubwo gusenga aho umuntu ashaka

Mu 2015 no mu 2016, Komite ya ONU ijejwe agateka ka zina muntu yarasohoye ingingo cumi zishigikira Ivyabona ku birego bari bayishikirije. Ivyo birego vyari vyashikirijwe n’Ivyabona bari bahoze bapfungiwe ahantu habi cane bahorwa ko banse kuja mu gisoda kubera ijwi ryo mu mutima. Ubu hariho izindi manza zitanu Ivyabona bitwariye leta ya Tirkimenistani muri iyo komite, ariko ntiziracibwa.

Muri Raporo iyo komite yasohoye muri Ndamukiza 2012, yarahimirije leta ya Tirkimenistani “kuraba neza ko amategeko yayo n’uburyo ikora mu bijanye no kwemerera amadini gukorera ku mugaragaro vyokwubahiriza uburenganzira abantu bafise bwo gusenga no kubwira abandi ivyo bemera mu mwidegemvyo, nk’uko bitegekanijwe [n’Amasezerano mpuzamakungu yerekeye amategeko agenga abantu n’ivyabo be n’uburenganzira mu vya politike].” Mu 2008 Ivyabona baranditse ikete ryo gusaba kwemerwa n’amategeko, ariko leta ntiranamenyesha ko yarironse.

Twoba twokwizigira ko ibintu bizogenda neza?

Ivyabona vya Yehova barakenguruka kuba leta ya Tirkimenistani iheruka kurekura abari bapfunzwe kugira ibarenganure. * Ariko rero, turavye Ivyabona iyo leta iheruka gukubita intahe mu gahanga, biragaragara ko iriko irirengagiza akamo amakungu aguma ayitera ko kwubahiriza uburenganzira bw’abanka kuja mu gisoda babitumwe n’ijwi ryo mu mutima. Ivyabona barizigiye ko leta ya Tirkimenistani izokwubahiriza ingingo zafashwe na Komite ya ONU ijejwe agateka ka zina muntu, ni ukuvuga kurushiriza kwubahiriza agateka ka zina muntu muri rusangi ariko na canecane uburenganzira umuntu afise bwo kwisunga ijwi ryo mu mutima, ubwo gusenga aho ashaka, n’ubwo kwemera ivyo ashaka.

Ivyabaye n’igihe vyabereyeko

  1. 15 Ndamukiza 2019

    Ivyabona bose bapfunzwe bari 12.

  2. 19 Ntwarante 2019

    Muhammedali Saparmuradov yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  3. 13 Ruhuhuma 2019

    Bahram Hemdemov yararekuwe arangije umunyororo yari yaciriwe w’imyaka ine ahorwa ibikorwa bijanye no gusenga.

  4. 29 Nzero 2019

    Kerven Kakabayev yararekuwe arangije umunyororo yari yaciriwe w’umwaka umwe ahorwa kwanka kuja mu gisoda abitumwe n’ijwi ryo mu mutima.

  5. 7 Nzero 2019

    Azamatjan Narkuliyev yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  6. 19 Kigarama 2018

    Eziz Atabayev yaraciriwe umunyororo w’imyaka ibiri kubera yanse kuja mu gisoda abitumwe n’ijwi ryo mu mutima.

  7. 17 Kigarama 2018

    Arslan Begenjov yararekuwe arangije umunyororo yari yaciriwe w’umwaka umwe ahorwa kwanka kuja mu gisoda abitumwe n’ijwi ryo mu mutima.

  8. 28 Munyonyo 2018

    Gurbangylych Muhammetgulyyev yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  9. Nyakanga 2018

    Imbere y’uko umukuru w’igihugu atanga ikigongwe ku wa 24 Nyakanga, abakuru b’ibohero baramenyesheje Kerven Kakabayev, Mekan Annayev na Veniamin Genjiyev ko bari mu bazorekurwa. Naho amazina yabo yari ku rutonde rw’abanyororo vyavuzwe ko bazorekurwa, ntibari mu bantu 1.722 barekuwe ku wa 25 Nyakanga.

  10. 28 Myandagaro 2018

    Serdar Atayev yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  11. 27 Myandagaro 2018

    Sokhbet Agamyradov yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  12. 13 Myandagaro 2018

    Ruslan Artykmuradov yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  13. 9 Myandagaro 2018

    Isa Sayayev yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  14. 17 Mukakaro 2018

    Veniamin Genjiyev na Maksat Jumadurdiyev baraciriwe umunyororo w’umwaka umwe kubera banse kuja mu gisoda babitumwe n’ijwi ryo mu mutima.

  15. 11 Mukakaro 2018

    Ihlosbek Rozmetov yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  16. 26 Ruheshi 2018

    Mekan Annayev yaraciriwe umunyororo w’imyaka ibiri kubera yanse kuja mu gisoda abitumwe n’ijwi ryo mu mutima.

  17. 29 Nzero 2018

    Kerven Kakabayev yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  18. 17 Nzero 2018

    Arslan Begenjov yaraciriwe umunyororo w’umwaka umwe kubera yanse kuja mu gisoda abitumwe n’ijwi ryo mu mutima.

  19. 12 Rusama 2017

    Abategetsi ba Tirkimenistani bararekuye Mansur Masharipov, akaba yari yapfunzwe kuva agifatwa ku wa 30 Ruheshi 2016.

  20. 18 Myandagaro 2016

    Mansur Masharipov yaraciriwe umunyororo w’umwaka umwe ahowe ibirego vy’ibinyoma.

  21. Mukakaro 2016

    Komite ya ONU ijejwe agateka ka zina muntu yarasohoye ingingo zitandatu zishigikira Ivyabona vya Yehova bariko barakurikiranwa n’ubutungane kubera banse kuja mu gisirikare bishimikije ijwi ryo mu mutima.

  22. 14 Kigarama 2015

    Komite ya ONU ijejwe agateka ka zina muntu yarasohoye ingingo zishigikira Ivyabona batatu bariko barakurikiranwa n’ubutungane kubera banse kuja mu gisirikare babitumwe n’ijwi ryo mu mutima. Hari n’iyindi ngingo ishigikira Ivyabona iyo komite yari yafashe ku wa 19 Rusama 2015.

  23. 19 Rusama 2015

    Bahram Hemdemov yaraciriwe umunyororo w’imyaka ine ahowe ibikorwa bijanye no gusenga. Hari haciye amezi abiri afashwe aca arapfungwa vy’agateganyo.

  24. Ruhuhuma/Ntwarante 2015

    Ivyabona babiri bari bapfunzwe bazira ko banse kuja mu gisirikare kubera ijwi ryo mu mutima bararekuwe. Komite ya ONU ijejwe agateka ka zina muntu yarasohoye ingingo ishigikira Icabona yariko arakurikiranwa n’ubutungane kubera yanse kuja mu gisirikare yishimikije ijwi ryo mu mutima.

  25. 18 Munyonyo 2014

    Ivyabona babiri barapfunzwe bazira ko banse kuja mu gisirikare kubera ijwi ryo mu mutima.

  26. 22 Gitugutu 2014

    Umukuru w’igihugu ca Tirkimenistani yarahaye ikigongwe Ivyabona vya Yehova umunani bari bapfunzwe baca bararekurwa.

  27. 30 Nyakanga 2014

    Ivyabona icenda barapfunzwe: Indwi bazize ko banse kuja mu gisoda kubera ijwi ryo mu mutima, babiri na bo bagirijwe ibirego vy’ikinyoma bishingiye ku bikorwa bijanye no gusenga.

  28. 2 Nyakanga 2014

    Abategetsi ba Tirkimenistani bararekuye Bibi Rahmanova, baca barabangira gushira mu ngiro umunyororo w’imyaka ine bari bamuciriye.

  29. 18 Myandagaro 2014

    Bibi Rahmanova yaraciriwe umunyororo w’imyaka ine ahowe ibirego vy’ibinyoma.

  30. 25 Mukakaro 2014

    Ivyabona indwi barapfunzwe: batanu bazize ko banse kuja mu gisoda kubera ijwi ryo mu mutima, babiri na bo bagirijwe ibirego vy’ikinyoma bishingiye ku bikorwa bijanye no gusenga.

  31. 6 Ndamukiza 2014

    Ivyabona 26 barapfunzwe, 13 muri bo bakaba bafashwe ata na kimwe bagirizwa. Abo 13 bategetswe kuriha amande.

  32. Munyonyo 2013

    Ivyabona icenda baragumijwe mw’ibohero: umunani bazize ko banse kuja mu gisirikare kubera ijwi ryo mu mutima, umwe na we yagirijwe ibirego vy’ikinyoma bishingiye ku bikorwa bijanye no gusenga.

  33. 29 Myandagaro 2013

    Ivyabona batatu baritwariye leta ya Tirkimenistani muri Komite ya ONU ijejwe agateka ka zina muntu, kubera yanse kwubahiriza uburenganzira bwabo bwo kutaja mu gisirikare babitumwe n’ijwi ryo mu mutima.

  34. 1 Rusama 2013

    Ivyabona babiri baritwariye leta ya Tirkimenistani muri Komite ya ONU ijejwe agateka ka zina muntu, kubera yanse kwubahiriza uburenganzira bwabo bwo kutaja mu gisirikare babitumwe n’ijwi ryo mu mutima.

  35. 24 Nzero 2013

    Abapolisi 30 baraje gusaka kwa Navruz Nasyrlayev haciye indwi nka zingahe Komite ya ONU ijejwe agateka ka zina muntu imenyesheje leta ya Tirkimenistani ivyo yitezweko. Abapolisi barakubise abagize uwo muryango be n’abashitsi bari ng’aho barashaya.

  36. 7 Nyakanga 2012

    Ivyabona cumi baritwariye leta ya Tirkimenistani muri Komite ya ONU ijejwe agateka ka zina muntu, kubera yanse kwubahiriza uburenganzira bwabo bwo kutaja mu gisirikare babitumwe n’ijwi ryo mu mutima. Navruz Nasyrlayev ni we yari imbere mu bitwaye.

  37. 21 Myandagaro 2008

    Ivyabona vya Yehova barasavye kwemerwa n’amategeko ya Tirkimenistani.

^ ing. 2 Umwe muri abo basore yararekuwe muri Kigarama 2018 arangije umunyororo yari yaciriwe.