Ja ku birimwo

KOREYA Y’EPFO

Bapfunzwe bazira ukwemera kwabo: Koreya y’Epfo

Bapfunzwe bazira ukwemera kwabo: Koreya y’Epfo

Inyuma y’imyaka hafi mirongo indwi Ivyabona vya Yehova bo muri Koreya y’Epfo bamaze batorohewe, barahimbawe cane n’ivyabaye ku wa 28 Ruhuhuma 2019. Kuri uwo musi ni ho Icabona ca Yehova yari asigaye mw’ibohero azira kwanka kuja mu gisoda kubera ijwi ryiwe ryo mu mutima, yarekurwa. Ivyabona vya Yehova barakenguruka kuba ubu amategeko ya Koreya y’Epfo yemera ko umuntu ashobora kwanka kuja mu gisoda abitumwe n’ijwi ryiwe ryo mu mutima maze agakora ibindi bikorwa atari ivya gisirikare bibisubirira.

Haciye nk’umwaka, sentare nkuru yaratanguye gusozera imanza zitari bwarangire z’abanse kuja mu gisoda kubera ijwi ryabo ryo mu mutima. Ku wa 13 Ruhuhuma 2020, sentare yarambitse izera Ivyabona vya Yehova 108, ku wa 27 Ruhuhuma na ho yambika izera ibindi Vyabona 210.

Hashirwaho ibikorwa bisubirira ivya gisirikare

Muri Kigarama 2019 ni ho hashingwa itegeko ryo gushiraho ibikorwa bisubirira ivya gisirikare ku bw’abanka kuja mu gisoda babitumwe n’ijwi ryabo ryo mu mutima. Bigenewe gufasha imisore y’Ivyabona yanka kuja mu gisoda ibitumwe n’ijwi ryo mu mutima ngo bagire ico baterereye mu kibano mu buryo buboneka. Amategeko mpuzamakungu yerekeye ivyo bikorwa bisubirira ivya gisirikare avuga ko ivyo bikorwa bikwiye kuba ata ho bihuriye n’igisirikare canke ngo bibe bihagarikiwe na co. Vyongeye, ayo mategeko mpuzamakungu yerekana ko ivyo bikorwa bisubirira ivya gisirikare bidakwiye gufatwa nk’igihano. Kandi ivyo vyaratomowe mu ngingo yafashwe na Sentare yubahiriza ibwirizwa shingiro muri Ruheshi 2018 igira iti: “Hamwe ibikorwa bisubirira ivya gisirikare vyomara igihe kirekire canke bikaba bikaze cane ku buryo bitorohera n’abanka kuja mu gisoda babitumwe n’ijwi ryo mu mutima, vyoba bitaye intumbero canke bikaba bibaye nk’igihano.”

Ku wa 26 Gitugutu 2020, Ivyabona vya Yehova 63 baremeye ivyo bikorwa maze baratangura gukorera kuri imwe mu nyubakwa zibiri z’agasho mu kiringo c’imyaka itatu. Naho ari ukwo, amategeko agenga ivyo bikorwa bisubirira ivya gisirikare ntazwi neza. Abategetsi baracariko bariga urugero bazoshikanako mu guha abo bantu umwidegemvyo wo gusohoka izo nyubakwa inyuma y’amasaha y’ibikorwa, kugira bagire uruhara mu bikorwa bijanye no gusenga no mu bindi bikorwa.

Gushika ubu, ntibizwi neza ko ibikorwa bisubirira ivya gisirikare bihari ubu bihuye n’amategeko mpuzamakungu. Nimba iryo tegeko ryemeza ko ivyo bikorwa bihuye n’igisirikare kandi ko bihagarikiwe na co, canke ko iryo tegeko rifatwa nk’igihano, Ivyabona vya Yehova bohava banka kubikora kubera ijwi ryabo ryo mu mutima. Ku rundi ruhande, hamwe ivyo bikorwa bitoba bicungerewe n’igisirikare be n’uko bidafatwa nk’igihano, Icabona ca Yehova wese yanka kuja mu gisoda abitumwe n’ijwi ryiwe ryo mu mutima yokwihitiramwo kubikora canke kutabikora.

Ivyabaye n’igihe vyabereyeko

  1. 31 Ntwarante 2021

    Jin-seong Bang yararekuwe ivy’agateganyo.

  2. 10 Ntwarante 2020

    Jin-seong Bang yaratanguye umunyororo yaciriwe w’umwaka n’inusu.

  3. 13 na 27 Ruhuhuma 2020

    Sentare nkuru yarambitse izera Ivyabona barenga 300; Icabona umwe yaragiriwe n’icaha.

  4. Kigarama 2019

    Koreya y’Epfo yarashinze itegeko ry’uko hashirwaho ibikorwa bisubirira ivya gisirikare.

  5. 28 Ruhuhuma 2019

    Icabona ca Yehova wa nyuma yari asigaye mw’ibohero yararekuwe.

  6. 1 Munyonyo 2018

    Sentare nkuru yaremeje ko kwanka kuja mu gisoda ubitumwe n’ijwi ryo mu mutima atari icaha.

  7. 28 Ruheshi 2018

    Sentare yubahiriza ibwirizwa shingiro yo muri Koreya y’Epfo yaremeje ko kuba ata bikorwa bisubirira ivya gisirikare bihari bidahuye n’ibwirizwa shingiro.