Skip to content

Skip to secondary menu

Skip to table of contents

Sarina Witnisi te Zihova

Roviana

Inavoso Leana Mae Guana Koe Tamasa!

 Lesoni 6

Na Sa Sa Rinoverove Tadirini Sapu Mate?

Na Sa Sa Rinoverove Tadirini Sapu Mate?

Zama se Tamasa koe Adama: “Na kavuru si goi ke pa kavuru tugo si kaqu kekere pule la si goi.”—ZENESESI 3:19.

1. Na sa sa inavoso leana guguadi arini sapu mate?

Totoso kamo se Jisu pa Betani, sa baere tanisa, se Lazarasi, si ele mate made rane. La pa popomunuana se Jisu meke luli koa sa sari karua tasina Lazarasi sari Mata meke Mere. Lopu seunae sana si varigara mae mo sari na tie. Qetu hola dia sari Mata meke Mere totoso va toa pulea Jisu se Lazarasi!Tiroa Zone 11:21-24, 38-44.

Ele gilania Mata sa inavoso leana guguadi arini sapu mate. Gilania sa kote va toa pulei Jihova pa pepeso sari ni sapu mate.Tiroa Zobi 14:14, 15.

2. Na sa si ta evaṉa koa gita totoso mate?

Tavetia Tamasa pa kavuru sa tie. (Zenesesi 2:7; 3:19) Loketoṉa si toa hola pa tinida totoso mate si gita. Totoso mate si gita si beto sari nada binalabala meke hiniva. Gua asa ke totoso toa pule se Lazarasi si lopu vivinei nia sa gua sapu ta evaṉa koa sa totoso mate si asa, sina arini sapu mate si lopu va nonogaia keke tiṉitoṉa.Tiroa Samu 146:4; Ekiliziasiti 9:5, 6, 10.

Vea gua, mudina mate sa tie si la Tamasa va sigitia pule pa nika? Zama sa Buka Hope sapu sa tie sapu mate si lopu gilania keke tiṉitoṉa. Gua asa meke sa vina tumatumae guguana sa nika heli si lopu hinokara sina zama ṉoṉovalia sa se Tamasa. Lopu koa hokara pa bulona Tamasa sa binalabala pude va sigitia sa tie pa nika.Tiroa Zeremaea 7:31.

 3. Vea gua, boka zama mae koa gita sari ni sapu mate?

Lopu boka zama meke avoavosae sari ni sapu mate. (Samu 115:17) Ba kaiqa mateana kaleadi si hoke kokohai sari na tie meke zama gua tugo arini sapu mate. (2 Pita 2:4) Lopu malumia Jihova pude podeke zama turaṉi gita sari tie sapu mate.Tiroa Diutironomi 18:10, 11.

4. Esei si kote toa pule?

Soku milione tie sapu ele mate si kote toa pule pa pepeso. Kaiqa arini sapu lopu gilania se Tamasa meke lopu va tabea ba kote toa pule tugo.Tiroa Luke 23:43; Sarina Tinavete Tadina Apositolo 24:15.

Sari tie sapu toa pule si boka vagia sa tinumatumae hinokara na sa Tamasa meke va tabea meke va dogoro nia sa dia rinaṉeraṉe koe Jisu. (Revalesoni 20:11-13) Pude tavete va leana sari ni si kote qetu meke koa hola pa pepeso.Tiroa Zone 5:28, 29.

5. Na sa si va dogoro nigita Jihova totoso va toa pulei sa sari na tie?

Kote boka toa pule sari na tie sina ele va maeia Tamasa sa Tuna pude harupu gita. Sa tinoa pule tadina tie matedi si va dogoro nia sa tataru te Jihova. Esei si hiva dogoro holaia goi totoso toa pule sari ni sapu mate?Tiroa Zone 3:16; Roma 6:23.