1. Na vea gua meke varigara ni Tamasa sari na tie Izireli pukerane?

Varigara ni Tamasa sari butubutu te Ebarahami meke poni ni Sa sari na lo pude luli. Sa butubutu asa sapu ta pozae “Izireli” si lulia sa vinahesi hinokara meke kalia sa zinama te Tamasa. (Samu 147:19, 20) Gua asa meke sari na tie pa doduru butubutu si boka vagi tinamanae koa sa butubutu Izireli hie.Tiroa Zenesesi 22:18.

Vizati Tamasa sari tie Izireli pude arini sari na witnes tanisa. Sari na tiṉitoṉa sapu ta evaṉa koari tie Izireli pukerane totoso lulia arini se Tamasa si boka tokani sari tie. Totoso va tabea arini sari lo te Tamasa si kote qetu sari ni. (Diutironomi 4:6) Gua asa si boka gilania arina tie sa Tamasa hinokara totoso doṉo lulia arini gua sapu ta evaṉa koari na tie Izireli.Tiroa Aisea 43:10, 12.

2. Na vea gua meke kaqu varigara sari Tie Lotu hinokara pude tavetia sa hiniva te Jihova?

Sina lopu va tabea arina tie Izireli se Jihova, si etuli sa meke va hobe ni sa koa sa ekelesia Tadina Tie Lotu. (Matiu 21:43; 23:37, 38) Kamahire sari Tie Lotu hinokara si sari na witnes te Jihova.Tiroa Sarina Tinavete Tadina Apositolo 15:14, 17.

Varigarae ni Jisu sari ni sapu luli koa sa pude tarae meke va tumatumaei sari tie pa doduru popoa meke va evaṉae ni disaepeli sari na tie. (Matiu 10:7, 11; 24:14; 28:19, 20) Sa tinavete hie si ṉiṉira hola kamahire sina tata mae sa vinabetona sa totoso koaia gita. Totoso kekenu kamahire sapu varigarae ni Jihova sari soku milione tie pa doduru popoa pude keke binalabala sari ni meke vahesia pa hinokara. (Revalesoni 7:9, 10) Sari na tie lotu hinokara si varigarae pude variva ṉiṉiraei meke varitokae. Be pae koa sari ni pa kasia popoa, keke mo sa dia vina tumatumae pa Buka Hope koari na dia vinarigara lotu.Tiroa Hiburu 10:24, 25.

 3. Vea gua meke podalae sa tinavete tadi Witnes te Jihova?

Koari na vuaheni 1870 keke puku minate hite si vilitia arini sa Buka Hope meke doṉo gilania arini sa vina tumatumae hinokara sapu koa pa Buka Hope. Ele gilania arini sapu e Jisu podalae nia sa tinavete tarae koari na ekelesia, gua asa si podalae nia arini sa tinavete pude tarae nia sa Binaṉara pa kasia popoa. Pa vuaheni 1931 si ta pozae nia arini sa pozapoza Witnes te Jihova.Tiroa Sarina Tinavete Tadina Apositolo 1:8; 2:1, 4; 5:42.

4. Vea gua meke tavetavete sari Witnes te Jihova?

Pa totoso tadina aposolo keke puku tie sapu ṉiṉira pa tinoa tie lotu si koimata ni sari na ekelesia pa ninae kasia popoa. Sari tie hire si doṉo gilania sapu e Jisu si Batuna sa ekelesia tadina tie lotu. (Sarina Tinavete Tadina Apositolo 16:4, 5) Kamahire si koanana tugo si keke puku tie sapu ṉiṉira pa tinoa tie lotu sapu koimata ni arini sari na Witnes te Jihova pa ninae kasia popoa. Sa puku tie hie sapu ṉiṉira pa tinoa lotu si koimata ni sari opesi tadina Witnes te Jihova sapu iliri pa hopeke zinama, taveti meke va hiai pa 600 hola zinama sari na buka sapu vivinei nia sa Buka Hope. Gua asa meke sa puku tie sapu ṉiṉira pa tinoa tie lotu hie, si va ṉiṉirai meke turaṉi pa kali Buka Hope sari 100,000 hola ekelesia pa kasia popoa. Koari na hopeke ekelesia si koa dia sari na tie sapu pada pude tuturaṉa. Sari tie hire si hiva hola pude kopu ni sari na sipi te Tamasa.Tiroa 1 Pita 5:2, 3.

Sari Witnes te Jihova si hoke varigara pude tarae nia sa inavoso leana koari na tie pude tokani pude mae gua na disaepeli sari na tie. Tarae koari na ninae vetuvetu sari ni, kekeṉoṉo gua arina aposolo. (Sarina Tinavete Tadina Apositolo 20:20) Hiva hola sari ni pude va tumatumaei sari na tie sapu hiva gilania sa vivinei hinokara pa Buka Hope. Sari na Witnes te Jihova si lopu na linotu mo. Ba gua na keke tatamana sapu tagoa arini si keke papa sapu tataru ni si arini. Gua na tamatasi vari tatarue sari ni. (2 Tesalonaika 1:3) Koa gua sapu tavetavete varigara sari tie te Jihova pude va qetua se Tamasa meke tokani sari na tie, gua na keke tatamana sari ni pa pepeso sapu qetu hola.Tiroa Samu 33:12; Sarina Tinavete Tadina Apositolo 20:35.