Skip to content

Skip to secondary menu

Skip to table of contents

Sarina Witnisi te Zihova

Roviana

Inavoso Leana Mae Guana Koe Tamasa!

 Lesoni 5

Na Sa Sa Hiniva te Tamasa Koa Sa Pepeso?

Na Sa Sa Hiniva te Tamasa Koa Sa Pepeso?

1. Na vea gua meke tavetia Tamasa sa pepeso?

Poni nia Jihova sa pepeso koari na tie. Nada popoa sa pepeso. Lopu tavetia Tamasa sari Adama meke Ivi pude koa pa maṉauru. Ba, sari na mateana mo si taveti Tamasa pude koa vasina. (Zobi 38:4, 7) Vekoa Tamasa se Adama pa paradaesi leleana hola, pa inuma Idini. (Zenesesi 2:15-17) Hiva nia Jihova se Adama meke sari nana koburu pude toa hola pa pepeso.Tiroa Samu 37:29; 115:16.

Totosona asa pa inuma Idini mo koa sa paradaesi. Tozi ni Tamasa sari Adama meke Ivi pude podo koburu meke va siṉia sa pepeso. Totosona asa meke kote tiqe paradaesi sa doduruna sa pepeso. (Zenesesi 1:28) Lopu kaqu murimuri sa pepeso hie ba kaqu koa holaia gita na tie ninae rane.Tiroa Samu 104:5.

2. Na vea gua meke lopu na paradaesi sa pepeso kamahire?

Vura pani Jihova sari Adama meke Ivi koa sa inuma, sina lopu va tabea arini se Tamasa. Sa paradaesi asa si beto, meke lopu pada sari na tie pude tavete pulea sa Paradaesi. Podalae koa sa totoso asa si koaia tie kaleadi sa pepeso.—Zobi 9:24.Tiroa Zenesesi 3:23, 24.

Vea gua, muliṉi nia Jihova gua sapu hiva nia sa? Lokari! Asa sa ṉati Tamasa. Kaqu gore vura sa nana hiniva. (Aisea 45:18) Kote va leana pulea sa sa kinoa tadina tie gua sapu tavetia sa pa totoso kekenu.Tiroa Samu 37:11, 34.

3. Vea gua meke kote boka ta evaṉa pule sa Paradaesi?

Totoso koa Baṉara se Jisu si kote ta evaṉa pule sa Paradaesi pa pepeso. Koa sa vinaripera sapu ta pozae Amagedoni, si kote turaṉi Jisu sari na mateana te Tamasa meke va matei sari na tie kaleadi. Mudina asa si kote pusia Jisu se Setani pa  1,000 vuaheni. Kote turaṉi meke kopu ni Jisu sari na tie te Tamasa ke lopu kaqu mate sari ni koa sa vinaripera. Kote koa qetuqetu meke toa hola koa sa Paradaesi pa pepeso sari ni.Tiroa Revalesoni 20:1-3; 21:3, 4.

4. Totoso sa si kote beto sa kinoa tasuna?

Totoso sa si kote va beto pani Tamasa sari hahanana kaleadi pa pepeso? Tozia Jisu si keke vinagilagila pude va dogoro nia sapu sa vinabetodi sari na totoso hire si tata. Sari na tiṉitoṉa kaleadi sapu ta evaṉa kamahire si va sosodea sapu koaia gita “sa vinabetona sa totoso.”Tiroa Matiu 24:3, 7-14, 21, 22, BHPZR.

Kote koa se Jisu pa maṉauru meke baṉara maeia sa sa pepeso pa 1,000 vuaheni. Totoso na asa si kote beto sari doduru kinoa tasuna. (Aisea 9:6, 7; 11:9) Na Baṉara meke na Ṉati Hiama se Jisu. Koa gua sapu na Ṉati Hiama si asa kote va beto pani sa sari na sini tadina tie sapu tataru nia se Tamasa. E Jisu kote va beto pani sari na minoho, binarogoso, kinaleqe, meke minate.Tiroa Aisea 25:8; 33:24.

5. Esei si kote koa pa Paradaesi?

Pa vasina hoke varigara lotu sari na Witnes te Jihova si boka tutuvi goi sari ni sapu tavetia sa hiniva te Tamasa

Sari na tie sapu va tabea se Tamasa si kote koa pa Paradaesi. (1 Zone 2:17) Garuni Jisu sari ni sapu luli koa sa pude hatai sari tie ṉoṉo meke va tumatumaei pude tavetia sa hiniva te Tamasa. Kamahire soku milione tie si tavetia sa hiniva te Jihova pude boka koa pa Paradaesi pa pepeso. (Zepanaea 2:3) Koari na vasina hoke varigara lotu sari na Witnes te Jihova si ta va tumatumae sari na tatamana. Sari na koburu meke tia tamadia si boka koa keke pa dia vinahesi na sa Tamasa meke vagi tinumatumae koa sa inavoso leana.Tiroa Maika 4:1-4.