Skip to content

Skip to secondary menu

Skip to table of contents

Sarina Witnisi te Zihova

Roviana

Inavoso Leana Mae Guana Koe Tamasa!

 Lesoni 2

Esei Se Tamasa?

Esei Se Tamasa?

1. Na vea meke kaqu vahesia gita se Tamasa?

Sa Tamasa hinokara va podaki sari doduru tiṉitoṉa. Loke pinodalaena meke loke vinabetona sa Tamasa. (Samu 90:2) Sa inavoso leana pa Buka Hope si mae gua na koe Tamasa. (1 Timote 1:11) Sina Tamasa poni nigita sa tinoa, pada pude vahesia gita si asa.Tiroa Revalesoni 4:11.

2. Na sa vivinei gunia sa Buka Hope se Tamasa?

Loke tie dogoria se Tamasa. Sina Maqomaqo si asa. Asa ginuana si ululu hola ni sa sari na tie pa pepeso. (Zone 1:18; 4:24) Lopu dogoria gita si asa ba boka tumae nia gita sari hahanana tanisa totoso dogori gita sari na tiṉitoṉa sapu taveti sa. Dogoria gita sa tinumatumae meke sa tataru te Tamasa totoso doṉo laia gita sari na hopeke kineha vua huda meke havoro. Sa ninomana sa kasia popoa si va dogoro nigita sapu asa tugo sa Tamasa ṉiṉirana.Tiroa Roma 1:20.

Totoso tiroa gita sa Buka Hope si kote boka tumae nia gita sari na hahanana te Tamasa. Tozia Buka Hope gua sapu hiva nia Tamasa, meke gua sapu lopu hiva nia sa.Tiroa Samu 103:7-10.

3. Esei pozana se Tamasa?

Zama se Jisu: “Tamamami pa Maṉauru, mani ta pamaṉae sa pozamu hopena.” (Matiu 6:9, Buka Hope Pa Zinama Roviana) Soku hola sari na taetolo te Tamasa, ba keke mo sa pozana sa. Koa pa hopeke zinama sa pozana Tamasa. Pa zinama Roviana si ta pozae “Jihova.” Ba kaiqa tie si poza nia “Yahweh.”Tiroa Samu 83:18.

Ta hobe pa soku Buka Hope sa pozana Tamasa meke veko lania arini sa taetolo Baṉara ba Tamasa. Ba totoso kubere kenua arini sa Buka Hope, ka 7,000 totoso si koa sa pozana  Tamasa. E Jisu va ta gilana nia koari na tie sa pozana Tamasa.Tiroa Zone 17:26.

Kekeṉoṉo gua sa papa hie, Tamasa si talotaṉa tugo totoso koa tasuna si gita

4. Tataru nigita tugo Jihova?

Totoso kamoi tinasuna sari na tie, vea gua, hie ginuana si lopu tataru ni Jihova? Zama sari kaiqa tie e Tamasa poni nigita sari na tinoketoke sina hiva podeke gita sa. Ba lopu hinokara si hie.Tiroa Zemisi 1:13.

Koa gua sapu pamaṉa nigita Tamasa, si malumu gita sa pude vizatia teleda gua sapu hiva tavetia gita. Qetu nia gita sapu malumu gita Tamasa pude vizatia gita pude vahesia si asa. (Zosua 24:15) Ba soku tie si vizatia pude tavetia gua sapu kaleana la koari na tie meke poni ni tinasuna. Talotaṉa hola se Jihova totoso dogori sa sari na hahanana hire.Tiroa Zenesesi 6:5, 6.

Tamasa tataru se Jihova. Hiva nigita sa pude koa qetuqetu.Tata kote va betoi sa sari na tinasuna meke sari na tie sapu tavetedi. Ba totoso lopu ele tavetia sa, si va malumi sa sari na tinasuna koasa totoso papakana kamahire. Kote dogoria gita sa binalabala te Tamasa pa Lesoni 8.Tiroa 2 Pita 2:9; 3:7, 13.

5. Vea gua meke boka tata la koe Tamasa si gita?

Ruvata gita Jihova pude tata la koa sa totoso varavara laia gita. Koa tata si asa koa gita na hopeke tie. (Samu 65:2; 145:18) Aqa taleoso nigita sa. Doṉo gilania Sa sa binokaboka tadigita, vea gua hoqa si gita kaiqa totoso. Gua asa ke boka baere va leana si gita koe Tamasa.Tiroa Samu 103:12-14; Zemisi 4:8.

Kaqu tataru nia gita se Jihova hola nia keke tie sina asa poni nigita sa tinoa. (Maka 12:30) Boka va dogoro nia goi sa mua tataru koe Tamasa totoso vagia goi sa tinumatumae na sa meke tavetia sa nana hiniva. Pude gua asa kote boka tata la koa Sa si goi.Tiroa 1 Timote 2:4; 1 Zone 5:3.