Na vea gua meke hiva vivinei turaṉia arina tie se Jisu?—MATIU 11:29; MAKA 10:13-16.

1. Pavei mae gua na se Jisu?

Votikaena hola se Jisu koari na tie. Sina totoso lopu ele podo sa pa pepeso si keke maqomaqo si asa pa maṉauru. (Zone 8:23) E Jisu si tavete kenua Tamasa, meke vari tokae si asa koari na tinavetedi sari doduru tiṉitoṉa. Telena Tamasa tavetia se Jisu gua asa meke ta pozae na “Tuna Ekei” Tamasa. (Zone 1:14) Ta poni nia Jisu sa taetolo “sa Zinama” sina asa sa ṉati tie zama te Tamasa.Tiroa Tinumatumae Te Solomone 8:22, 23, 30; Kolosae 1:15, 16.

2. Na vea gua meke mae se Jisu pa pepeso?

Totoso va gore maeia Tamasa sa tinoa tanisa Tuna, si vekoa sa pa tiana Mere, keke vineki Jiu. Gua asa meke lopu na tie gua gita sa tamana Jisu. (Luke 1:30-35) Mae se Jisu pa pepeso pude taveti sari ka ṉeta tiṉitoṉa hire: (1) pude totozi nigita sa hinokara na sa Tamasa, (2) pude va dogoro nigita vea meke boka tavetia gita sa hiniva te Tamasa vea gua kamo gita na tinasuna, (3) pude poni nia sa nana tinoa toṉotona pude ‘holu pule ni sari sokudi.’Tiroa Matiu 20:28.

3. Na vea gua meke kaqu mate se Jisu pude rupahi sari soku tie?

Totoso tata mate si keke tie, kaiqa totoso si kaiqa tie si kaqu vala ni kaiqa tiṉitoṉa pude harupia pa minate. (Ekisidasi 21:29, 30) Tatasana hokara si lopu koa pa hiniva te Tamasa sa minate, binarogoso meke kinaleqe. Vea gua meke gilania gita sapu gua asa? Tozi nia Tamasa se Adama sa tie kekenu, sapu kote mate si asa pude sini si asa. Lopu kaqu mate se Adama pude lopu sini si asa. (Zenesesi 2:16, 17; 5:5)  Zama sa Buka Hope sapu “mae gua” koe Adama sa sini. Doduru koburu te Adama si kamoi sini meke minate. Gua asa meke hiva nia gita pude ta va rupaha koa sa minate sapu poni nigita Adama.Tiroa Roma 5:12, BHPZR; Roma 6:23.

Esei kote boka va rupaha gita pa minate? Loke tie gua gita kote boka rupahi sari doduru tie pa dia sini. Totoso mate gita si tabaria gita sari nada sini teleda.Tiroa Samu 49:7-9.

4. Na vea gua meke mate se Jisu?

Sa tinoa te Jisu si toṉoto, lopu gua gita. Lopu sini se Jisu ke lopu pada mate ni sa sari nana sini. Ba mate poni ni Jisu sari na sini tadina tie. Va dogoro nia Tamasa sa nana tataru koari na tie totoso va maeia sa sa Tuna pude mate poni nigita. Va dogoro nigita tugo Jisu sa nana tataru totoso va tabea sa sa Tamana meke mate poni nigita sa sari nada sini.Tiroa Zone 3:16; Roma 5:18, 19.

5. Na sa si tavetia Jisu kamahire?

Totoso koa se Jisu pa pepeso, salaṉi Sa sari ni sapu moho, va toa pulei Sa sari ni sapu mate, meke tokani Sa sari ni sapu koa tasuna. Sari na tinavete hire si va sosodea gua sapu kote tavetia Jisu koari ni sapu va tabea si asa koari na rane mae hire. (Matiu 15:30, 31; Zone 5:28) Mudina mate se Jisu si va toa pulea Tamasa meke poni nia Sa sa tinoa maqomaqo. (1 Pita 3:18) Aqa se Jisu pa kali matao na se Tamasa osolae poni nia Jihova sa ṉiniraṉira pude Baṉara nia Sa sa pepeso. (Hiburu 10:12, 13). Kamahire si Baṉara se Jisu pa maṉauru meke arini sapu lulia si asa si korapa tozi vura nia sa inavoso leana pa doduru na sa kasia popoa.Tiroa Daniela 7:13, 14; Matiu 24:14.

Tata kote tavetavete nia Jisu sa nana ṉiniraṉira pude beto pani sari na tinasuna meke sari na tie kaleadi. Arini sapu raṉea meke va tabea se Jisu si kote toa hola pa paradaesi pa pepeso.Tiroa Samu 37:9-11.