HӦL SE TĒ ‘E ‘ON LALOGA

Skip to secondary menu

Skip to table of contents

Uetnes ‘on Jihova

Rotuạm ta

Tög‘ he 10 se Sạio‘ ne Haharạgi A‘mou Sại‘o

 SẠIO‘ 2

‘E Rēko tese tä Gou Kokon‘ạki e ‘Otou Kelkelega?

‘E Rēko tese tä Gou Kokon‘ạki e ‘Otou Kelkelega?

HÜN NE ‘ÄE KOP LA ‘INEA E

Tē ‘e ‘on rereag pumuạ se‘ ‘e tē ne ‘äe räe ‘e tior heta.

KA TES TÄ ‘ÄE LA RĒ?

Rē a‘häe se tē te‘is: ‘E avat ne Julia tior‘ȧk iạ ‘e tior heta ma iạ räe ne iạ haharȧg. Ma täe iạ ‘ea ‘e ‘on huga, “gou kop la tuk for”—aier ma ne ‘on ö‘rua ma ‘on kạumane‘aga ‘ea ne iạ “tör sui se‘.”

Ma tä Julia a‘häe ne iạ kop la ‘ātē foh la vil‘ȧk ta “kilokäräm he ruạ ma fūma.” Ma tē ne iạ la rē ta‘ag la a‘sogea iạ ‘e laloag ne terȧn he his . . .

Kepoi ka ‘äe la agtạu ma tē ne Julia agtạu mar, tes tä ‘äe la rē?

A‘HÄE A‘TOTOAK!

‘Ou räe se ‘äeag la pō la fak se mạlut ‘e ta tior rạhrạhut

Iạ kat raksa‘ ra la ‘äe la kokon‘ȧk ‘ou kelkelega. Ka Puk Ha‘a fäeag‘ȧk kelkeleag lelei ‘on fā ma hạiạn he his la fak se Sera, Rejieli, Apikali, Josefa ma Tevita. Puk Ha‘a ‘ea ne le Apisaki iạ le‘ hȧn “keleag lelei pạu.”—1 Sạu 1:4.

Ka, lelea‘ haharȧg ma‘oi kokon‘ȧk sirien ‘oris kelkelega. Iạ la pō la ho‘im ta pefä‘ rạurạut. Sạkior se:

  • ‘E ta sạkior tēet, pasen 58 ‘e hạina ‘ea ne iris haharȧg sirien, ka ‘on aire gat ke pasen 17 ‘esea ta haharạgi.

  • ‘E ta sạkior tē hoi‘ạkit, pasen 45 ‘e iris hạina ne jaojao a‘häe ne iris haharȧg sireris!

  • ‘E oris fe‘en la tuk for, lelea‘ haharȧg ma‘oi hele‘eris la pō ‘e anorexia (pa kat ‘ātē ra)—ta‘ag ‘af‘afat ne hün‘ȧk se le‘et ‘on la fesiạ‘ȧk la ‘ātē ne ‘on la a‘sög ne iạ.

 Kepoi ka ‘äe ‘es ‘e faki‘oag ne anorexia ne ta ‘af‘af hoi‘ạkit ne hün‘ȧk se pa kat ‘ātē ra, ‘äe la ao hạiasoag. Hạifäegag mumuạ ma le‘et ‘e ‘ou ö‘rua ne ta le‘ mafuet ne ‘äe tua‘nȧk sin. Puk Ha‘a ‘ea: “ ‘Ot kạinag airet la mäeav hanis ‘e te‘ ne av ‘atakoa. ‘Ot sạsig airet la a‘sūum ma la ia la hanisim ‘e av noanoa.”Fäeag ‘Es Fuạga 17:17.

JEN TI‘ PUMUET NE ‘ÄE LA PŌ LA RĒ!

Fūfū ne ‘os huga ta rē‘ia le‘et la keleag lelei. Sạkior se Apisalomi le‘ fā ‘on Sạu ta Tevita. Puk Ha‘a ‘Ea:

“Ka ne kat ‘es le‘et ra ‘e Isirel ‘atakoa heta keleag lelei la fak se Apisalomi. . . . Kat ‘es ra ta tēet la mer.”2 Samuela 14:25.

Ka, fā haharȧg te‘ iạ le‘ huạg pa ti‘u, a‘a‘häe ma ke iạ, ka ‘on huga hoi ke ‘e ag rosi! Puk Ha‘a kat ‘ea ra ta tē leleit ‘e rēko Apisalomi; iạ ‘ea ne iạ fā huạg se aire, ma ‘on huạg fua‘a ta hele‘ue la iạ pa al‘ȧk tē.

Iạ ma ‘on hün lelei, Puk Ha‘a nā e se ‘isa muạ‘ạkiag te‘:

‘Fȧl‘ȧk se ‘ạusa famör fo‘ou ta.’Kolosa 3:10.

“Ma ‘omus ososi la se tē fakforo . . . , ko la rē ma ‘e famör ‘oroit ‘e ‘omus ‘ata.”1 Pita 3:3, 4.

Iạ ‘eake tē raksa‘at la pa ‘es la keleag lelei, ka pumuạ se ‘ou aga ‘e ‘ou kelkelega. ‘Ou ag lelei ta tēet ne la keleag lelei se‘ se famori ‘e ta for ne‘ne‘it ne ta for keleag leleit! Phylicia le‘ hȧn haharạgit ‘ea, “Maf sagsaga iạ tē a‘pumuạ‘ạkit, ka famori kal mao‘ȧk ra fūfū ne ‘ou huga ma ‘ou ag lelei.”

TĒ LA RĒ A‘HÄE SIN

Ka tei ka ‘äe a‘mou fekfek se ‘ou kelkelega?

Ka tei ka ‘e rē a‘häe la jenea ‘ou kelkelega ne la tạupir se ta rērē ne ‘ātē fohot (diet) la pō la tukia ‘ou foro?

Kepoi ka ‘äe la pō, tes tä ‘äe la jen ‘e ‘ou kelkelega? (Sah tēet ma ne ‘äe a‘häe.)

  • ‘OU LAMLAMA

  • ‘OU MAH TA

  • ‘OU LEVA

  • ‘OU FORO

  • ‘OU MAFA

  • PȦN NE ‘OU ‘ULI

Kepoi ka tög ne ‘ou sạio‘ mumuạ he rua ta ‘i ma ‘äe sah se tē he his ‘e sạio‘ tä ‘on folu, rē a‘häe se tē te‘is: Kop ma räe ‘on iris ne tore la tū se‘, ou räe seseav pạu. Iạ vavhiạn pạu la ‘is la kokon‘ȧk sirien ‘os kelkelega ma tä ‘is ao sal la jenea.1 Samuela 16:7.