HӦL SE TĒ ‘E ‘ON LALOGA

Skip to table of contents

Uetnes ‘on Jihova

Hil fäeag ta Rotuạm ta

 VÄE 9

“Joniomus ‘e Mös ‘E‘eve”

“Joniomus ‘e Mös ‘E‘eve”

“Ma te‘is, ‘ạu la al‘ạkia ‘omus fupag ne nōnō ‘e rȧn te‘,-mös ‘e‘eve, ma ag se ma‘ma‘a, ma hea‘hea‘ raksa‘a, ma pa ‘es raksa‘a, ma küm tē (agat ne tē ‘esea ma ma ‘ạit‘ạkiạg ne tupu‘a).”KOLOSA 3:5.

1, 2. Ka Pela‘ami rös tapen famör ‘on Jihova la vil se faksara?

FĀ hagotat pūof se ‘on ut hagotoag heta. Iạ pa ‘es la pō ta kạinag i‘et. Iạ hilia ta moun het, ‘um‘ȧk se ‘ȧv heta ma kir‘ȧk sio ‘alol heta se tạn ta. Kat roa ra ka ‘alol ta marō ma ‘ại heta lel sio, ma täe iạ futim iạ‘ heta. ‘On huga ‘oaf ne iạ hilia moun noj heta.

2 ‘E fạu 1473 M.A.K., Pela‘ami ao tape‘ma ta moun het la iạ la ‘es‘ao‘ạkia la pō‘ia famör ‘on ‘Ạitu ne fū‘ȧk sio ‘oris nohoag ta se Ut Aroag‘esea ne Moape, ‘e tohiạg ne Hanuạ Porȧk ta. Pela‘ami ‘ea ne iạ parofiạt ‘on Jihova, ka ‘on aire, iạ fā küm tēet ne famori tög la fäeag ha‘oa Isireli. Ka tē ta‘ag kat sok ra ‘e rēko Jihova rē ma iạ fäeag ạlạlum‘ạkia Isireli. Pela‘ami kat huạg noa ra, iạ pa ‘es la pō tög ma iạ a‘häe ne kop ma iạ la pō la rē‘ia ta tēet la rue‘ạkia huạg ‘on ‘Ạitu la fäeag ha‘oa ‘on famori, kepoi ka iris la vil se faksara ma a‘sokoa ta ag sar ti‘ut. ‘On a‘fūmou‘ȧk la a‘sok ne tē te‘is, iạ ‘es‘ao‘ạkia hạiạn haharȧg keleag lelei ne Moape la ta‘ag ‘on moun ta.Hatag Ne Famori 22:1-7; 31:15, 16; Kel‘ȧk Tē 2:14.

3. Ka tes ta a‘ofiạg ne fại ‘on Pela‘ami?

3 Ka te ka ‘on fại heta garue? ‘Ī. Iris fā äf saghul ma fumā ‘üm ‘e fại heta ‘e ‘oris “mös ag‘esea ma hạiạn ne Moape.” Iris titi‘ȧk tape‘ma se ‘ạit ‘on lelea‘ Moape, ne  laloag‘ȧk ‘ạit ta Peali-Piori, ‘ạit ne a‘fup tore, ne ag fak‘inoso. Iris 24,000 al mumuạ la iris la sur se Hanuạ Porȧk ta. Tē kelea‘ehanis ti‘ut sok!Hatag Ne Famori 25:1-9.

4. ‘E rēko tese ta äf hisaghul ‘e famör Isireli vil se mös ‘e‘eve?

4 Ka tes ta hün ne ‘oris pefä‘ ta? Ma‘oit ‘e iris, ‘oris huga tokana ‘e lelei ‘e rēko iris roua Jihova, ‘Ạitut ne sại‘ạkia iris ‘e Ijipita, hagan iris ‘e ut gaogao ta, ka muạ‘ạkia iris se hanuạ porȧk ta. (Hiperiu 3:12) ‘Apostol ta Paula ‘ea: “‘Is la se mös ‘e‘ev, la fak ma ne iris ‘e ‘on rerege rē, ma ta le‘ äf ruạghul ma fol ‘e irisa al ‘e ta terȧn ‘eseat.” *1 Korinita 10:8.

5, 6. ‘E rēko tese ta rogrog hün se ag raksa‘ ‘on lelea‘ Isireli ‘e ut Aroag‘esea ne Moape iạ ‘es‘ao pạu se ‘is ‘e ‘on ‘i‘i?

5 Tē ne sok ‘e Hatag Ne Famori ma ‘on resön pumuạ ma‘oi la famör ‘on ‘Ạitu la rak ‘e ‘on ‘i‘i, ne ‘is ‘el‘ia la sur se hanuạ porạkit ne pumuạ se‘ ‘e hanuet ne nā se lelea‘ Isireli. (1 Korinita 10:11) La fak se lelea‘ ne Moape, rȧn te‘ a‘pumuạ‘ȧk pạu hea‘hea‘ la a‘sok ag fak‘inoso. ‘E te‘ ne fạu ‘i, lelea‘ rot fakKaristo äf hisaghul vil ‘e rēko ag se  ma‘ma‘a—moun ‘eseat ma ne lelea‘ Isireli ‘umie. (2 Korinita 2:11) La fak ma se huạg toa‘ ‘on Simri, la ho‘am ta hȧn Mitiani se ‘on rī läe ta ‘e utut ne lelea‘ Isireli fū‘ạki e ‘oris nohoag ta, iris ‘on rereag ‘e ‘on ‘i‘i hele‘ tape‘ma la ho‘am ag se ma‘ma‘a se laloag ne kạurotuga.Hatag Ne Famori 25:6, 14; Juta 4.

6 ‘Is tape‘ma la fak se ne ‘is täe ‘e Ut Aroag‘esea ne Moape. Togit ne ‘is fe‘en ma kikia la po‘ia täe ‘e lā ne lȧg ta—rȧn fo‘ou ta! ‘On fuạga, la ‘is la nā ‘os vahia la noh ȧf‘ȧk ma ‘is ‘e hanis ‘on ‘Ạitu ‘e ‘os la tạupir se fas‘ȧk tē ‘on ‘Ạitu: “Joniomus ‘e mös ‘e‘eve.”1 Korinita 6:18.

Ut aroag‘esea ne Moape

KA TES TA MӦS ‘E‘EVE?

7, 8. Ka tes ta “mös ‘e‘eve,” ma iris ne mös ‘e‘eve la tạu tapen tē ne iris hao?

7 La fak ma ne ‘es‘ao‘ȧk ‘e Puk Ha‘a, “mös ‘e‘eve” (fäeag kiris ta, por·neiʹa) ‘ạliạg‘ạkia ag fak‘inos se ma‘ma‘ ne a‘sok ‘e fạ‘ ne mȧür fak‘inoso. Iạ laloag‘ȧk tape‘ma väehäke, le‘et ne tög‘ạkia ‘on foro, ma a‘sok ne ag fak‘inoso ‘e iris ne kat seminte ‘inoso, ‘es‘ao‘ȧk ne nuju ma la‘la‘oga (oral ma anal sex) ma ‘at‘atạk ne muạ ‘on ta le‘et ne iạ kat ‘inos sin. Iạ laloag‘ȧk tape‘ma fāat ‘on la a‘sok ne ag ‘i se ta fāat, hạnit se ta hạnit, ma tape‘ma ‘on la a‘sok ne ag ‘i ma mạnmạnu. *

8 Tē ne Puk Ha‘a ‘ea taf pạu: Iris ne mös ‘e‘eve la ‘ut‘ȧk ‘e laloag ne kạurotuga ma kal pō‘ia ra mȧür se ‘es gata‘aga. (1 Korinita 6:9; Kel‘ȧk Tē 22:15)Iris la agtạu mumuạ ma pefä‘ ne tē ne iris a‘soko, lele‘a täla toak ‘e tua‘nȧk ma ‘ē‘ȧk ne iris, pefä‘e la fup ‘e laloag ne ‘inoso, konsiene tokana  ‘e la ma‘ma‘, ‘efmafuạ ‘e taf ta, ‘af‘afa, ma ala tape‘ma. (Hat Kalatia 6:7, 8.) Iạ ‘eake kel‘ạkiạg ne huạg poto la rē‘ia tēet ne ‘is ‘inea la a‘rū ‘os huga. Ma‘oit kat a‘häe ra se pefä‘ ne la sok ‘e avat ne iris kamat la iof se salat ne kat nonoj ra la iris la la‘o e, ne ‘e av ma‘oi laloag‘ȧk keleag ne mạl kelea‘efakina.

MẠL KELEA‘EFAKINA—HUẠLĀ MUMUE TA

9. Ka tei ka mạl kelea‘efakina kat mamạr ra la fak se tē ne lelea‘ ma‘oi ‘ea? Sui‘ạkia.

9 ‘E hanuạ ma‘oi, mạl kelea‘efakina kel‘ȧk ‘e ut tög‘ȧk puku, mekasini, niuspepa, maka ma tivi ta, ma iạ pō fuạmamạu pạu ‘e Internet ta. * Iris ‘e ‘on rereag ‘ea ne iạ kat mamạr ra, ka tē ka iạ aier? ‘Igkȧ‘! Iris ne kel ‘e mạl kelea‘efakina hele‘ la ‘oris ag het la pạrpạrua ‘oris mua ne masturbation, ma täe fupu e “hea‘hea‘ riạria,” ne po la rē iris la lelea‘ mamauạ se ag fak‘inoso, hea‘hea‘ raksa‘a, mȧür fak‘inoso täla tokana ‘e la la‘ lelei ma hele‘ue la ‘inoso la uf. * (Roma 1:24-27; Efeso 4:19) Le‘ sạkior tēet a‘tatạu‘ạkia mamauạ se ag fak‘inoso la fak se ‘af‘af ta kensa. Iạ ‘ea: “Iạ fup ka forȧs ma kikia ma la a‘noa pạu la öf ne la pot‘ȧk.”

Iạ kel‘ạkia huạg ‘atmại la se a‘es‘ao‘ȧk näe‘ȧk internet ta ‘e hanue ta

10. Ka ‘e sal tes ‘atama ta ‘is la pō la garue‘ạkia muạ‘ạkiạg ne fȧ‘ ‘e Jemesa 1:14, 15? (‘Io tape‘ma se kes tä “ Pōag ne Ne‘ne‘i La Ma‘ma‘.”)

10 Rē a‘häe se fäeag ‘on Jemesa 1:14, 15, ne ‘ea: “Ka le‘et ma tȧr faksar ‘e avat ne iạ futi e ‘e hea‘hea‘ ‘on‘ono, ma  iạ pō ‘e moun het. Ma tä ‘on hea‘he‘ā ‘ef mafuạ‘ia, ma ‘es ag raksa‘a; ma nōnō, ka ag raksa‘a fupuen la ‘atakoa, ma tä iạ a‘sūkia ala.” Ma kepoi ka ta hea‘hea‘ se leleit täe ‘e ‘ou a‘häe, rē ta tē mijit la ‘ut‘ạkia! Kel‘ạkiạg het, kepoi ka ta mạl kelea‘efakinet no‘ ‘e hitim, ‘io tū ‘e ‘on av mij heta, ne la mös‘ȧk kompiuta, ne jen se ta prokräm hoi‘ạkit ‘e TV ta. Nā ‘ou vahia la rē‘ia tē ne ‘äe kop la rē la hȧ‘ạkia ‘äe ‘e ag ne pō la a‘hele‘ua hea‘hea‘ raksa‘a mumuạ la iạ la ‘ut la ti‘ ma fakravāan ‘äe!Hat Mataio 5:29, 30.

11. Ka ‘is la pō tapen la kel‘ạkia ‘os tua‘nạkiga se Jihova ‘e avat ne ‘is fe‘en la fakravā‘ạkia hea‘hea‘ raksa‘a?

11 Iạ hün lelei het la Iạ ne ‘inea leleia ‘is la fas‘ȧk se ‘isa: “Ma te‘is, ‘ạu la al‘ạkia ‘omus fupag ne nōnō ‘e rȧn te‘,  mös ‘e‘eve, ma ag se ma‘ma‘a, ma hea‘hea‘ raksa‘a, ma pa ‘es raksa‘a, ma küm tē (agat ne tē ‘esea ma ma ‘ạit‘ạkiạg ne tupu‘a).” (Kolosa 3:5) Aier ma ne iạ la a‘noa ka ‘is kop la fe‘en ma kikia. Ka ‘is la a‘häe‘ȧk ne ‘is la pō la tua‘nȧk se ‘os Ӧ‘fā faklạgi ne mäeavhanis ka huạg lal. (Salamo 68:19) Far ‘on hạiasoaga ‘e avat ma ne a‘häe raksa‘a suru e se ‘ou a‘häe. Ro‘ạit‘ạkia “ne‘ne‘ man ti‘ ta,” ma iof‘ạkia ‘ou a‘häe se tē hoi‘ȧk.2 Korinita 4:7; 1 Korinita 9:27; ‘io se kes ta “ Ka Gou La Rou Tapen Agraksa‘at ne Gou A‘mou Rere?

12. Ka tes ta ‘os “huga,”? Ka ‘is la matạ‘ tapen se ‘os huga?

12 Fā pot ta Solomoni ‘ea: “‘Äe la matạ‘ a‘lelei fakapạu se ‘ou huga. Ko ‘äna te‘ ne ag ne ‘ou mạuri fupu e.” (Fäeag ‘Es fuạga 4:23) ‘Os “huga” ta ‘os laloga, tēet ne ‘Ạitu ‘inea lelei ‘e rēko ‘isa. ‘Os la pōag ne mȧür se ‘es gata‘aga täe kikia ‘e tēet ne ‘Ạitu räe ‘e ‘os huga—‘eake räe ‘on iris ne tore. Iạ tē pumuet la ‘is la se fakfürmariạ‘ạkia. Jope rē sin ta fäeag puliot ma ‘on mafa la iạ se a‘häe raksa‘ se ta le‘ hȧn het. (Jope 31:1) Iạ kel‘ạkiạg lelei het se ‘isa! Salam ta ‘es tape‘ma ‘e a‘häet ne täe ‘e Jope ‘e ‘on ‘eag: “‘Äe la für tuen ‘otou mafa ‘e ‘oriạ ‘io‘ioag se tē väväre.”Salamo 119:37.

HIL TĒ SESEAV ‘ON TAINA

13. Ka sei ta Taina, ma ‘e rēko tese ta ‘on hiliạg ne ‘on kạumane‘aga iạ tē sesevat?

13 ‘Is sạkior vạhia ‘e Väe 3 ta ne ‘os kạumane‘aga la pō la rue‘ạkia ‘is se lelei ne se raksa‘a. (Fäeag ‘Es Fuạga 13:20; hat 1 Korinita 15:33.) Sạkior se kel‘ạkiạg ‘on Taina, le‘ hȧn ‘on peteriak ta, Jekope. (Kamataga 34:1) Aier muạ‘ạkiạg leleit rē se ia ‘e avat ne iạ mea‘me‘a, ka Taina rē puer seseav ma hil la rē kạumane‘ag ma hạiạn haharȧg  ne Kenani. La fak se lelea‘ ne Moape, lelea‘ Kenani rog tape‘ma ‘e ‘oris ag kelea‘efakina. (Foh Ne Rạu‘ifi 18:6-25) Fā ne Kenani ma tape‘ma se Sikemi—“le‘ purer” ‘e kạunohoag ne ‘on Ӧ‘fā ta—a‘häene Taina ‘oaf tape‘ma se ag kelea‘efakina.Kamataga 34:18, 19.

14. Ka ‘e rēko tese tä kạumane‘ag ne Taina hili ta huniạg ne pefä‘e?

14 Taina kop ma kat a‘häe‘ạkia ra ag fak‘inoso ‘e avat ne iạ räe e se le Sikemi. Ka le Sikemi a‘sokoa ma tēet ne lelea‘ Kenani a‘a‘soko ‘e avat ne iris pa a‘sok ag fak‘inoso. Kepoi ka le Taina agại ‘e menet fakmür heta, iạ kal ‘es‘ao ra ‘e rēko Sikemi “hoa‘kia iạ” ma “a‘masragan iạ.” ‘E ‘on fakmuri Sikemi “‘oaf‘ia” se le Taina, ka tē te‘is kat jen‘ia ra tē ne iạ a‘sok se ia. (Hat Kamataga 34:1-4.) ‘Eake Taina ‘esea ta agtạu ma pefä‘e. ‘On hil tē seseva ta ho‘am masraga ma feke se ‘on kạunohoag ‘atakoa ta.Kamataga 34:7, 25-31; Kalatia 6:7, 8.

15, 16. Ka ‘is la pō tapen pot aire? (‘Io tape‘ma se kes tä “ Ut ne Puk la Masmasar Sin.”)

 15 Taina rak tē ‘e vạhiạg ne ‘on agtạu ma pefä‘ ta. Iris ne hanis ‘e Jihova ka tovavhiạn se ia kal tȧr ra la pefä‘e la sok se irisa ma kotä iris rak tē. ‘E rēko iris noh a‘fại se ‘Ạitu, ma iris hil la “la‘la‘oag‘esea ma iris ne poto.” (Fäeag ‘Es  Fuạga 13:20a) Ma tä hele‘ue la iris la ‘inea‘ia “te‘ ne sal lelei tūtū ‘atakoa” ma hȧ‘ạkia iris ‘e pefä‘ ma tē a‘rū huạg se ‘es‘ao.Fäeag ‘Es Fuạga 2:6-9; Salamo 1:1-3.

16 Iris ne ro‘ạit marös ma hat hạisokoag se Fäeag ‘on ‘Ạitu, puk sui ne le‘ ea‘ huạg aier ka huạg ‘atmại ta osi, täla pō‘ia pot fak‘Ạitu. (Mataio 24:45; Jemesa 1:5) Huạg vạivại iạ tē pumuet, ne iạ no‘ ‘e ‘os pa ‘eset la tovavhiạn se muạ‘ạkiạg fak Puk Ha‘a. (2 Sạu 22:18, 19) Kel‘ạkiạg het, ta le‘ rot fakKaristoōt la pō la tạria ne ‘on huga rösrös ka raksa‘ sirien la a‘lelei‘ȧk. (Jeremaia 17:9) Ka ‘e avat ne iạ kat rē‘ia ra ta rē puer leleit, te ka ‘on huga vạivại la tạria hạiasoag ma puer‘ȧk tē ne rē se ia ‘e hanisi?

17. Sui‘ạkia ta tē het ne la pō la sok ‘e laloag ne kạunohoga, ma kel‘ạkia salat ne ö‘fā ta la pō la hạiasoag se ‘on le‘ hȧn ta.

17 Rē a‘häe se fūfū hete‘is. Ta ö‘fāat kat aier‘ȧk ra la ‘on le‘ hȧn ta la la‘ iạ ‘esea het ma ta la le‘ fā haharȧg rot fakKaristo het. Le‘ hȧn ta tög ma ‘eag: “Ka Ö‘fā, ‘äe kat tua‘nȧk ra se gou? ‘Ạmiạr kal rē ra ta tē raksa‘at!” Kop ma iạ la hanis ‘e Jihova ma ‘on ‘amnạki la lelei, ka te ka iạ “la‘la‘ ‘e pot [fak‘ạitu]”? Ka te ka iạ ‘jonien ‘e mös ‘e‘eve’? Ne iạ hele‘ la seseav ‘e ‘on la “tua‘nȧk se huạg ‘on‘ono”? (Fäeag ‘Es Fuạga 28:26) Kop ma ‘äe la pō la a‘häe‘ȧk ta muạ‘ạkiạg ‘es‘ao hoi‘ȧk ne la ‘es‘ao se ö‘fā ta ma ‘on le‘ hȧn ta.—‘Io se Fäeag ‘Es Fuạga 22:3; Mataio 6:13; 26:41.

JOSEFA JONIEN ‘E MÖS ‘E‘EVE

18, 19. Ka faksar tese ta Josefa agtạu ma ‘e ‘on mạuri, ma tes ta iạ rē?

18 Josefa sagavän ‘on Taina iạ kel‘ạkiạg lelei het ‘e ‘on hanisi se ‘Ạitu ma ‘on joniạg ‘e mös ‘e‘eve. (Kamataga 30:20-24) ‘E avat ne Josefa le‘ mea‘mea‘ het, iạ kel se pefä‘et ne sok se Taina. Taf pạu ne tē ne soko ma ‘on fūmou la noh ȧf‘ȧk ma iạ ‘e hanis ‘on ‘Ạitu, ta pärea iạ ‘e avat ne hȧn ‘on Potifa faksara e iạ “‘e terạnit se terạnit.” Josefa le‘  mamauet ma iạ kal pō ra la a‘u‘uạ‘ạkia iạ ‘e ‘on garue ta! Iạ kop la kel‘ạkia ‘on poto ma huạg to‘a la a‘leleia pefä‘ ta. Josefa kat nā marō ra, ma ‘e ‘on fakmuri iạ jonien ‘e hȧn ‘on Potifa.Hat Kamataga 39:7-12.

19 Rē a‘häe se: Kepoi ka Josefa gat ke av rē mös‘ạkia hȧn ta ne ag fak‘inoso, tei ka iạ la nōnō huạg aier ma? Kop ma la ‘igkȧ‘. Josefa fe‘en ma kikia la se a‘häe‘ạkia tē raksa‘a ‘e rēko iạ a‘pumuạ‘ạkia ‘on hạikạinagaga ma Jihova. Ta‘ag no‘ ‘e fäeag ne iạ ‘ea se hȧn ‘on Potifa: “‘Otou gagaja . . .kat ‘uru‘ạkia ra ta tē ‘e goua, gat ma ke ‘äe, pō ‘e ‘äe ‘on hạni. Ka gou la pō tapen la rē tē raksa‘ ti‘ te‘is ma ag raksa‘a e se ‘Ạitu?”Kamataga 39:8, 9.

20. Ka Jihova jen tapen fūfū ‘on Josefa?

20 Rē a‘häe se ‘oaf‘oaf ‘on Jihova, ‘e ‘on räeag se huạg aier ‘on Josefa, aier ma ne iạ sousou ‘e ‘on kạunohoag ta. (Fäeag ‘Es Fuạga 27:11) ‘E ‘on fakmuri Jihova jen fūfū ‘on Josefa ma sại‘ạkia Josefa ‘e rī hihiriạg ta, ka fū‘ȧk tape‘ma iạ la paraiminista ne Ijipita ka la puer tape‘ma se tēla‘ā! (Kamataga 41:39-49) Tē ne Salamo 97:10 ‘ea aier: “Ko ‘ạus ne ‘oaf se Jihova, ‘ạu la fesiạ‘ se ag raksa‘a. Jihova ȧf‘ạkia ‘at ne ‘on lelea‘ ag ma‘ma‘a; Iạ sại‘ạkia iris ‘e si‘ ‘on famör raksa‘a”!

21. Ka sạsig fāat ‘e Afrika kel‘ȧk tapen ‘on huạg to‘a?

 21 ‘E ‘on ‘i‘i, lelea‘ ea‘ ma‘oi ‘on Jihova kel‘ȧk ne iris “fesiạ‘ se tēet ne raksa‘a, ka ‘oaf ma se tēet ne aire.” (Emose 5:15) Ta sạsig fā haharȧg het ‘e Afrika ‘ea ne ta le‘ hȧn het ‘e ‘on kilas ta ‘ea se ia ne iạ la pō la a‘sok ag fak‘inoso ma iạ kepoi ka iạ la hạiasoag se ‘on rue‘ȧk ta. Sạsig fā haharȧg te‘ ‘ea, “Gou ‘ea se ia ne gou kal hạiasoag ra. ‘E ‘otou huạg aire, gou sasap ma mou se ‘otou ag pumua, ma fakte‘ạkiga ne pumuạ se‘ ‘e koula ma siliva.” Aier, ag raksa‘a nā “‘oaf karạu,” ka ‘oaf‘oaf karạu a‘mou ho‘am ke rū ti‘ut. (Hiperiu 11:25) Hoi‘ȧk, iạ kal ‘es‘ao ra nōnō ka ‘is la a‘tatạu‘ạkia se ‘oaf‘oaf se tokat ne ‘is la pō ‘e ‘os tovavhina se Jihova.Fäeag ‘Es Fuạga 10:22.

TẠRIA HẠIASOAG ‘ON ‘ẠIT MÄEAVHANIS TA

22, 23. (a) ‘E avat ne ta le‘ rot fakKaristoōt a‘soko e ta ag sir ti‘ut, ‘e rēko tese ta iạ la se huạg ‘af‘af? (e) Ka hạiasoag tese ta iạ ne ag sara la pō?

22 ‘Is famör se ‘atakoa, ma ‘is nā ‘os vahia la fakravāan ‘os hea‘hea‘ fakforo ma la rē‘ia ma kikia tēet ne nonoj se ‘Ạitu. (Roma 7:21-25) Jihova ‘inea se ma tē te‘is, ka “nōnō ma ‘e ‘on huga ne ‘is kefkefu.” (Salamo 103:14) Av ‘on rereag, ta le‘ rot fakKaristoōt kop ma la a‘sok ta ag sir ti‘ut. Ka te ka iạ la huạg ‘af‘af? ‘Igkȧ‘! La fak se Sạu ta Tevita, kop ma iạ la agtạu ma raksa‘ ne tē ne iạ a‘soko. Ka ‘Ạitu ‘noh iạtiạt la fạu‘ạkia’ iris ne huạha‘ȧk ka “foar‘ia” ‘oris ag raksa‘a.Salamo 86:5 NW; Jemesa 5:16; hat Fäeag ‘Es Fuạga 28:13.

23 ‘E laloag ne kạurotuạg fakKaristo ‘Ạitu nāam “tēfakhanis se famori”—huȧ‘ ne ma‘at fak‘at ka ‘iạt la hạiasoag. (Efeso 4:8, 12; Jemesa 5:14, 15) ‘Oris ‘amnạki la iris la hạiasoagan iạ ne rē‘ia ag sir ta la a‘fo‘ou hoi‘ạkia ‘on hạikạinagaga ma ‘Ạitu ma, la fak se tē ne ta fā potot ‘ea, la  ‘ia la “huạg ‘atmại” la po la iạ se a‘sok hoi‘ạkia ag sir ta.Fäeag ‘Es Fuạga 15:32.

‘AOA HUẠG ‘ATMẠI’

24, 25. (a) Ka fā haharạgit ne fäeag‘ȧk ‘e Fäeag ‘Es Fuạga 7:6-23 kel‘ȧk tapen ne iạ “huạg parpar”? (b) Ka ‘is la pō tapen la “huạg ‘atmại?

24 Puk Ha‘a fäeag‘ạkia iris ne “huạg parpara” ma iris ne “huạg ‘atmại.” (Fäeag ‘Es Fuạga 7:7) Kop ma iạ ne “huạg parpara” var ‘e huạg ‘atmại ma rē puer lelei ‘e rēko iạ kat ma‘at fak‘at ra ma kat ‘es ra ‘e räe ‘on ‘Ạitu. La vavhiạn pạu la iạ la vil la a‘sokoa ta ag sir ti‘ut la fak se fā haharạgit ne fäeag‘ȧk ‘e Fäeag ‘Es Fuạga 7:6-23. Ka iạ “ne huạg ‘atmại” sạkior ‘akmam‘oi se ‘on huga ‘e ‘on rakoag hạisokoag ne fäeag ‘on ‘Ạitu ne rēag ‘esea ma ro‘ạitu. ‘E rēko iạ famör se ‘atakoat, iạ fe‘en ma kikia la ‘on a‘häe, mäeva, hea‘he‘ā, ma ‘on ‘amnạki ‘e mȧür te‘is la salag‘esea ma fiongar ‘on ‘Ạitu. Le‘et ne “hanisi e se ‘at ‘on‘ono [ne “‘on mạuri,” NW],” iạ la ạlạlum ka “täla pō lelei.”Fäeag ‘Es Fuạga 19:8.

25 ‘Is la sạio‘ se ‘isa: ‘Ka te ka gou aier‘ȧk pạu ne foh ‘on ‘Ạitu nonoj? Ka te ka gou pilif ne gou la ‘oaf‘oaf aier ‘e ‘otou la tạupir sin?’ (Salamo 19:7-10; ‘Ạisea 48:17, 18) Kepoi ka ‘äe la araruạ, ȧs‘ȧk la fakravā‘ạkia. Rē a‘häe se tē ne la soko ‘e avat ne ‘äe la kaoa foh ‘on ‘Ạitu. ‘Äe la “ȧsȧs ma räe ne Jihova lelei” ‘e ‘ou la mȧür‘ȧk ne tēet ne aier, nonoj, ma‘ma‘, helav, ka rog lelei. (Salamo 34:8; Filipai 4:8, 9) ‘E avat ne ‘ou huga ‘iạt la a‘sokoa tē ‘i, ‘ou hanisi se ‘Ạitu la pō se tē a‘at ma ‘äe täla ‘oaf se tē ne iạ ‘oaf sin, ka la fesiạ‘ se tē ne iạ fesiạ‘ạki. Josefa kat ‘atakoa ra. Ka iạ pō ma “jonien ‘e mös ‘e‘eve” ‘e rēko iạ huạg vạivại la Jihova la nā se ia huget ne pa a‘ofan ‘Ạitu. ‘Ạiröt‘ȧk ne la sok tape‘ma se ‘isa.Aisea 64:8.

26. Ka filo‘ pumuạ tese ta ‘is la hạifäegag sin ‘e tē a‘ hete‘?

 26 ‘Eake ‘amnȧk ‘on Iạ ne Fup‘ȧk Tē la ‘os fupag ne a‘fup tore la tē mane‘ag het, ka la ‘es‘ao‘ȧk la ‘es lelea‘, ma iriạ ne ‘inoso la a‘pumuạ‘ạkia ag fak‘inoso. (Fäeag ‘Es Fuạga 5:18) ‘E väe he ruạ ne töh sin ‘is la hạifäegag se räe ‘on ‘Ạitu ‘e rēko ‘inoso.

^ para. 4 Maf ne fiạk ta ne af ‘e Hatag ne Famori laloag‘ȧk “lelea‘ muạ‘ȧk tē” ‘itạke iris 1,000 ne lelea‘ pure al‘ạki, ma iris ne Jihova a‘raksa‘ạki.Hatag Ne Famori 25:4, 5.

^ para. 7 La ‘inea‘ia fuạg ne ag se ma‘ma‘a ma ag riạria, ‘io se “Questions From Readers” ‘e The Watchtower ne 15 Julai, 2006, ne Uetnes ‘on Jihova pạni.

^ para. 9 “Mạl kelea‘efakina,” ne ‘es‘av‘ȧk ‘e te‘ ‘ạliạg‘ạkia ‘e ‘on kel‘ạkiạg ne ‘e mạlu, ‘e tē ne fạ‘i, ne ‘e tō het ne ‘is a‘fại ka po la rue‘ạkia ta le‘et la pa a‘sok ‘e ag fak‘inoso. Tē ne laloag‘ȧk ‘e mạl kelea‘efakina la pō la kamat ‘e mạl kelea‘efakiạn ‘on ta le‘et la hele‘ se mạl kelea‘efakiạn pạu ne mou se a‘sokoag ne ag fak‘inoso ‘on ta famör ruạ ne iris ma‘oi.

^ para. 9 Pạrpạr ne ‘ot mua ne masturbation ta sui‘ạkim se ‘isa ‘e ‘On Asoa “‘Ou la Marō ‘e Pạrpạr ne ‘Ot Mua ne Masturbation.”