HӦL SE TĒ ‘E ‘ON LALOGA

Skip to secondary menu

Skip to table of contents

Uetnes ‘on Jihova

Rotuạm ta

“Ȧf‘ȧk ‘Ạus ‘e Hanis ‘On ‘Ạitu”

 VÄE 15

‘Es‘ao ne ‘Ou Garue Maha

‘Es‘ao ne ‘Ou Garue Maha

“‘Oaf‘oaf‘ia ‘is . . . ‘e rēko tē ne ‘is garue ma pōom.”—LE‘ MARAG TA 3:13.

1-3. (a) Ka tes ta räe ‘on famör ma‘oi ‘e rēko ‘oris garue? (e) Ka tes ta räe ne täe ‘e Puk Ha‘a ‘e rēko garue, ma sạio‘ tes ta ‘is la sạkior ‘e väe te‘?

FAMÖR ma‘oi ‘e ‘on ‘i‘i, kat ‘oaf ra se garuet ne iris rē. Iris ‘öl pạu ‘e la‘ se garue ‘e te‘ ne terạni ma roa ne aoa‘ ne iris a‘sok ‘e ta garuet ta iris kat ‘oaf ra se. Ka tes ta la pō la rue‘ạkia iris ne ‘es ‘e kạinag a‘häe te‘ la kokon‘ȧk ka la ‘oaf se ‘oris garue?

2 Puk Ha‘a kel‘ạkia ta räe lelei het hün se garue maha. ‘Ea ne garue ma ‘on hue ho‘am ạlạlumu. Solomoni fȧ‘: “‘Is ‘atakoa hạitạuạg lelei ke la ‘ā‘ā ‘es tē, ma ‘iom‘imoas, ma ‘oaf‘oaf‘ia ‘is ‘e rēko tē ne ‘is garue ma pōom. Ne ta‘ag tēfakhanis ‘on ‘Ạitu.” (Le‘ Marag Ta 3:13) Jihova hanis ma kokon‘ȧk aier ‘is, iạ pa ‘es la ‘is la ‘oaf ‘e tē ne ‘is a‘sok ma pō ‘on ‘es‘ao ne garue ta. La ȧf‘ȧk ma kikia ‘is ‘e ‘on hanisi, ‘is kop la noh‘ȧk ‘on räe ma ‘on muạ‘ạkiga ‘e rēko garue.Hat Le‘ Marag Ta 2:24; 5:18.

3 ‘Is la sạkior se sạio‘ he häk ‘e väe te‘: Ka ‘is la ‘oaf‘oaf tapen ‘e garue mah ne ‘is a‘sok? Ka garue tese kat hạitạuạg ra ma lelea‘ rot fakKaristo aire? Ka ‘is la matạ‘ tapen ‘os garue togi la se hạipāag ma ‘os tē fak‘ata? Ma garue pumuạ tese ta ‘is la pō la rē?  ‘Is la sạkior mumuạ se mạl lelei ‘on iria ruạ ne garue mah pạu ‘e rȧn te‘ ma lạgi—‘Ạitu Jihova ma Jisu Karisto.

IẠ NE PURER ‘E GARUE MAHA MA LE‘ MAJẠUT NE VAHIẠ GARUE

4, 5. Ka Puk Ha‘a kel‘ȧk tapen garue mah ‘on Jihova?

4 Jihova ta Purer ‘e Garue maha. Kamataga 1:1 ‘ea: “‘E ‘on kamataga ‘Ạitu fup‘ạkia lạgi ma rȧn te‘.” Vạhiạg ne ‘on garue fup‘ȧk tē ne laloag‘ȧk rȧn te‘, iạ ‘ea ne ‘on garue ta “lelei fakapạu.” (Kamataga 1:31) ‘On fäega tape‘ma kel‘ȧk ‘on ‘ofa se garue ne iạ a‘sok se rȧn te‘. Jihova, “‘Ạit ‘oaf‘ofa, NW,” ta hün het ne iạ pō ‘ofa se tē ne iạ fup‘ạki.1 Timoti 1:11.

5 ‘Ạitut ne garue mah pạu kat fu‘ ra ‘on garue. ‘On la fu‘ ‘e ‘on vạhiạg ne garue roa la fū‘ạkia rȧn te‘, Jisu ‘ea: “‘Otou Ö‘fā ta gargarue ma kikia ka hele‘um se ‘on ‘i‘i.” (Jone 5:17) Ka tes ta Ö‘fā ta rērē‘ia? ‘E lạgi, iạ matạ‘ua ma muạ‘ạkia ‘is. Iạ ho‘am ta “famör fo‘ou,” ta‘ag iris lelea‘ rot fakKaristo ne nin ne la puer faksạu ma Jisu ‘e lạgi. (2 Korinita 5:17) Iạ garue ma kikia se ‘on la a‘hoi ne ‘on ‘amnạki se famori—la pō la iris ne hanis se ia la pō mȧür se ‘es gata‘aga. (Roma 6:23) Jihova kop ma ‘oaf ‘e ‘on räeag ne ‘es‘ao ne ‘on garue. Famör miliön his tȧr vạhia rog heg ne Pure‘aga ma rē‘ia ‘oris mạuri la ȧf‘ȧk ma kikia ‘e hanis ‘on ‘Ạitu.Jone 6:44.

6, 7. Ka Jisu kel‘ȧk tapen ta mạl lelei het hün se garue maha?

6 Jisu tape‘ma rog ‘e garue maha. Mumuạ la iạ la leum se rȧn te‘ la a‘sū fak famör, ‘Ạitu a‘es‘av‘ȧk iạ la “le‘ majạut” la fup‘ạkia tē hoi‘ȧk “‘e lạgi ma ‘e rȧn te‘.” (Fäeag ‘Es Fuạga 8:22-31; Kolosa 1:15-17) Iạ garue  mah tape‘ma ‘e avat ne iạ ‘e rȧn te‘. ‘E avat ne iạ mea‘me‘a iạ rakoa garue ‘on le‘ majạut, ne he‘ “majạu ne ‘ại.” * (Mareko 6:3) Garue ta fạiȧk pạu ka ma ‘on fạiạv ma‘oi pạu—a‘ti‘ se rī rēag ‘ại, ut ne nā tē ne famori kop la ‘ese ma ut ne nā‘ia tē garueag la‘ mer. Rē a‘häe se Jisu ‘on la ho‘am ta ‘ại—kop ma ‘ại ne mut a‘vȧh ma hoa‘ se utut ne iạ garue? Ka tei ka ‘äe la pō la rē a‘häe ne ‘äe kel ka Jisu fū‘ạkia ta rīit—ösös ma nā‘ia fupuạg ne rī, rē nu‘suran rī ta, ma tape‘ma ‘on majạu ne tē ne laloag rī? Jisu ‘inea fürmariet ne leum ‘e garue mah ne iạ a‘sok vȧh.

7 Jisu famör garue mah pạu ka fe‘en ‘e ‘on a‘sok ne garue marag ta. Sir ‘e fạu fol, iạ a‘popotoa iạ se garue ‘es‘ao pạu te‘. ‘E ‘on pa ‘es la te‘ ne famör ‘atakoa la ‘inea rog heg ta, iạ garue‘ȧk a‘lelei pạu ‘on ava, kamat ‘on garue ‘e us ta la hele‘ se tu‘rua pög ta. (Luke 21:37, 38; Jone 3:2) Iạ la‘ kạl‘ȧk “hanuạ noh titi‘ ma hanuạ noh riri‘, ka iạ marmarag ma foarfoar rog heg ne Pure‘ag ‘on ‘Ạitu.” (Luke 8:1) Jisu la‘ȧk mäel tarạu ‘e sal kefkefu la forȧs‘ạkia rog heg ta se famori.

8, 9. Ka Jisu ‘oaf‘oaf tapen ‘e ‘on garue maha?

8 Ka te ka Jisu ‘oaf‘oaf ‘e ‘on garue maha ‘e garue marag ta? ‘I! Iạ hao huạl ne Pure‘ag ta, ka roua utut ne ma‘at la ser mut. Rē ne garue ‘on ‘Ạitu nā se Jisu ne‘ne‘i ma loh fak‘ata ne hele‘ue la iạ la toak ‘e kokon‘ȧk ne tē la ‘ā fakforo ka la a‘sokoa ma garue ‘on ‘Ạitu. (Jone 4:31-38) A‘häe se fürmariet ne Jisu pō ‘e vạhiạg ne ‘on garue maragat ‘e rȧn te‘ ne iạ la pō  la ‘ea aier se ‘on Ö‘fā ta: “Gou a‘kölör‘ȧk vạhia ‘äe ‘e rȧn te‘, ne gou vȧh‘ȧk vạhia garuet ne ‘äe nāamea se goua la rē.”Jone 17:4.

9 Jihova ma Jisu ta mạl lelei ruạ ne kel‘ȧk ne iriạ ‘oaf aier se garue maha. ‘Os hanisi se Jihova ta rue‘ạkia ‘is “la rakoa ‘Ạitu.” (Efeso 5:1) ‘Os hanisi se Jisu rue‘ạkia ‘is la “a‘ạu se ‘on aftea.” (1 Pita 2:21) ‘Is la sạkiroa ne ‘is la pō tapen la ‘oaf ‘e garue mah ne ‘is a‘soko.

‘OAF‘OAF ‘E ‘OS GARUE MAHA

Garue‘ȧk ne muạ‘ạkiạg fak Puk Ha‘a la pō la hạiasoagan ‘äe la ‘oaf‘oaf ‘e garue maha

10, 11. Ka tes ta hạiasoagan ‘is la ‘es ‘e a‘häe nonojo se ‘os garue?

10 Garue togi pō sema la ‘e mȧür ne ta kạunohoag rot fakKaristo aire. ‘Is ‘atakoa pa pō fürmariạ ka pa ‘oaf‘oaf ‘e ‘os garue, ta ‘on‘on iạ la noanoa pạu la ‘oaf‘oaf kepoi ka ‘is kat ‘oaf ra se ‘os garue togi. Kepoi ka ‘äe täe ‘e kạinag fūfū hete‘, ka tes ta ‘äe la rē la ‘oaf‘oaf ‘e ‘ou garue ta?

11 ‘Es ‘e a‘häe nonojo. ‘Is kal pō ra la jen ‘e te‘ ne ava ‘os fūfū heta, ka ‘is la pō la jen ‘os a‘häe. ‘Os la rē a‘häe a‘lal se räe ‘on ‘Ạitu täla hạiasoagan ‘is la ‘es ‘e a‘häe nonojo hün se garue. Kel‘ạkiạg het, kepoi ka ‘äe ta filo‘ ne kạunohoag ta, ma aier ‘äe kat ririạf ra ‘e ‘ou garue ta, ka fita‘ ma iạ hạiasoagan la a‘potsusunua pa ‘es ne ‘ou kạunohoag ta. Kokon‘ȧk ne ‘os kạunohoga tē mahat se maf ‘on ‘Ạitu. Ka kepoi ka iạ kat ösös ra ‘on kạunohoag ta, Puk Ha‘a ‘ea ne “iạ raksa‘ pumuạ ‘e le‘et ne kat pilif ra.” (1 Timoti 5:8) Garue tög te‘is—rē la ‘äe la pō la a‘sokoa ‘ou fūfū fak ‘Ạitu—ne pō la hạiasoagan ‘äe tape‘ma la pō ‘oaf‘oaf ‘e ‘ou garue ‘e rēko ‘äe ma ‘amnạkit ne iris ne ‘äe garue mar kat ‘es ra.

12. Ka ‘e sal tes ‘atama ta ‘is pō tög ‘e ‘os garue fe‘eni ma garue nonojo?

 12 Garue fe‘en ma nonoj. Garue mah ma rak la rē a‘lelei garue ho‘am ke ạlạlumu. Garue fe‘eni ma fạiạv se garue ta tēet ne iris ne pure a‘pumuạ‘ȧk. (Fäeag ‘Es Fuạga 12:24; 22:29) ‘Is kop la aier se ‘os garue ‘e rēko ‘is lelea‘ rot fakKaristo aier—se hana‘ selen, tē garueag, ne ava ‘e utut ne ‘äe garue sin. (Efeso 4:28) La fak se tē ne ‘is rak ‘e väe mumue ta, ‘is pō tög ‘e ‘os aire. Ta le‘et ne aier ‘e ‘on garue ta la pō  la tua‘nȧk sin. Ma kepoi ka iạ ne ‘is garue sin räe se ‘os garue maha ne ‘igkȧ‘, ka ‘is ‘oaf ‘e rēko ‘os “konsiene taf” ma ‘is ‘inea tape‘ma ne ‘is a‘ofan ‘Ạitut ne ‘is hanis sin.Hiperiu 13:18; Kolosa 3:22-24.

13. Ka ‘es‘ao tese ta ‘is pō ‘e kel‘ạkiạg ne mạl lelei ‘e ut garueag ta?

13 A‘kölör‘ạkia ‘Ạitu ‘e ‘os aga. ‘E avat ne ‘is fūmou se foh fakKaristo hün se ‘os aga ‘e ut garueaga, iris ne tore pō la räe. Ka la pō tapen? ‘Is täla “a‘keleagleleia puer‘ȧk ‘on ‘Ạitu, ‘os A‘mạurige.” (Taito 2:9, 10) ‘I, ‘os kel‘ȧk ne ag lelei la pō la rue‘ạkia iris ne räe la ‘oaf se ‘os titi‘ạkiga. Rē a‘häe se kepoi ka le‘et ne ‘äe garue ag‘esea tȧr aier ta ‘e rēko ag lelei ne ‘äe kel‘ȧk ‘e ut garueag ta! Iạ tē pumuạ pạut, ma rē a‘häe se tē te‘is: Tes ta tög ti‘ut ne ‘is la pō ‘e ‘os ‘ineag ne ag lelei ho‘am kolori se Jihova ma a‘oaf‘ạkia ‘on huga.Hat Fäeag ‘Es Fuạga 27:11; 1 Pita 2:12.

HIL A‘HUẠG ‘ATMẠI ‘OS GARUE

14-16. ‘E av ne ‘is agtạu ma rē pure hün se garue togi, sạio‘ tes ta ‘is nonoj la sạkiroa?

14 Puk Ha‘a kat sui‘ȧk ‘atakoa ra ne garue tög tes ta nonoj la hil ma garue ne kat nonoj ra la hil. ‘Eake ‘on fuạga la ‘is la tȧr kạinag garuet ma. Ut ne Puku la pō la hạiasoagan ‘is la hilia kạinag garue ne ‘Ạitu värvär se ma matạ‘ua ‘is ‘e garue ne iạ kat värvär ra se. (Fäeag ‘Es Fuạga 2:6) ‘E av ne agtạu ma rē pure la hilia ta garue togit, lelei la ‘is la sạkior se sạio‘ pumuạ he ruạ ‘i.

15 Ka tei ka iạ laloag‘ȧk agat ne Puk Ha‘a kat kạu‘ȧk ra? Fäeag ‘on ‘Ạitu kel‘ȧk a‘taf pạu ne iạ kat kạu‘ȧk pạu ra hana‘o, sioksiko ma rēag ne tupu‘a. (Sại‘ạkiga 20:4; Garue 15:29; Efeso 4:28; Kel‘ȧk Tē  21:8) ‘Is la hȧ‘ȧk ‘e kạinag garue tög ne laloag‘ȧk kạinag ag tape‘ i. ‘Os hanisi se Jihova, ‘is kal tȧr ra ta kạinag garuet ne laloag‘ȧk ag ne la kaoa foh ‘on ‘Ạitu.Hat 1 Jone 5:3.

16 Ka te ka ‘otou a‘sok ne garue te‘is hele‘ue la gou la ‘es väeag ‘e a‘sok ne ag raksa‘a‘? Kel‘ạkiạg het, tapen se ne ‘äe le‘ rot fakKaristo ka garue tȧr telefon ‘e utut  ne mou se la‘ȧk lele‘a? Aier ne iạ kat mou ra se garue la‘ȧk lele‘a. Ka te ka ‘on garue fūmou hạitokogan utut ne mou se la‘ȧk ne lele‘a—agat ne agại Fäeag ‘on ‘Ạitu? (Sại‘ạkiga 21:22-24) ‘Is ne hanis ‘e Jihova kat ‘oaf ra la laloag‘ȧk ‘is ‘e ag ne kat fak Puk Ha‘ ra.

17. (a) Ka sal tese tä ‘is la pō la sạkior ‘e avat ne ‘is rē puer la ao garue? (‘Io se kes tä “ Ka Tei ka Gou Tạu la Tȧr Garue ta?”) (e) Ka ‘os konsiene la pō la hạiasoag tapen ‘is la hilia tēet ne a‘ofan ‘Ạitu?

17 Sạio‘ ma‘oi hün se garue la pō la a‘lelei kepoi ka ‘is la rē a‘häe a‘lelei se tög ne sạio‘ ruạ ‘i ‘e pärakraf 15 ma 16. Ma tape‘ma, ma ‘on sal hoi‘ȧk la ‘is la sạkior a‘lelei ‘e avat ne ‘is rē puer la ao garue. * ‘Is kat tạu  ra la ‘es ‘e a‘häet ne le‘ ea‘ huạg aier ka huạg ‘atmại ta noj la nā foh se te‘ ne kạinag fūfū ne soksoko. Av hete‘is ‘is kop la ‘es ‘e huget ne ‘inea la väe tē lelei ta ‘e tē raksa‘ ta. La fak se tē ne ‘is rak ‘e Väe 2, ‘is kop la rak‘ȧk ma garue‘ȧk ‘os konsiene la garue‘ạkia tē ne ‘is rak ‘e Fäeag ‘on ‘Ạitu ‘e te‘ ne terạni. Kepoi ka ‘is “gargarue‘ȧk” ma a‘mamnạki e ‘os huga la “väe tē lelei ‘e tē raksa‘a,” ‘os konsiene la pō la hạiasoagan ‘is la hilia tēet ne a‘ofan ‘Ạitu ma ȧf‘ȧk ma kikia ‘is ‘e ‘on hanisi.Hiperiu 5:14.

‘OS LA ‘ES ‘E RÄE NOJO SE GARUE

18. Ka ‘e rēko tese iạ kat vavhiạn ra la ‘os rē pure la a‘oaf ma kikia Jihova?

18 ‘Os rē pure la a‘oaf ma kikia Jihova ‘eake tē vavhinet “‘e terȧn fakmuri” ne “av noanoa ‘ie la hele‘um.” (2 Timoti 3:1) Aoag ne ta garuet ma sasap sin iạ la pō la noanoa pạu. Lelea‘ rot fakKaristo aire ‘inea ‘on pumuạ ne garue maha la a‘potsusunua kạunohoag ta. Ka kepoi ka ‘is kat matạ‘, ma hashasag ne täe ‘e ut garueag ta ma a‘a‘häe ne koroa fakforo la pō la mane‘ȧk ‘os agaga ma titi‘ạkiga se ‘Ạitu. (1 Timoti 6:9, 10) ‘Is la hạifäegag ne ‘is la pō la tapen la “värvär ma se tē ne lelei aire.”Filipai 1:10.

19. Ka ‘e rēko tese ta ‘is tạu la tua‘nȧk pạu se Jihova, ma tua‘nạkiạg tape‘ ta hạiasoag tapen ‘is?

19 Nā ‘ou tua‘nạkiạg ‘atakoa se Jihova. (Hat Fäeag ‘Es Fuạga 3:5, 6.) Te ka tạu la tua‘nạkiga la nā se ia? Iạ kokon‘ȧk aier ‘is. (1 Pita 5:7) Iạ ‘inea a‘lelei ‘os pa ‘ese ‘e ‘isa, ma iạ kat fep ra la hạiasoag ‘is. (Salamo 37:25) Ta ‘on‘on ‘iạhahan‘ȧk ‘e ‘on fäega ne ‘ea:  “‘Omus huga la se ‘oaf se mone: ‘ạu la hat la tạu se ma tē ne ‘ạu pō: ko ‘Ạitu ‘ea vạhia: ‘Gou kal fue‘kia ra ‘äe, ma gou kal roua ra ‘äe.’” (Hiperiu 13:5) Lelea‘ ma‘oi ne garue fūmou aier‘ȧk ‘Ạitu ‘on matạ‘ se ‘oris mạuri. Kepoi ka ‘is tua‘nȧk aier ne Jihova la matạ‘ se ‘isa, ma ‘is la se kokon‘ȧk a‘mahan pa ‘es ne kạunohoag  ta. (Mataio 6:25-32) ‘Is kal fue‘ ra ‘os garue togi la tāopea ‘os garue marag ta ma ‘os la la‘ se tạutạunạ‘i.Mataio 24:14; Hiperiu 10:24, 25.

20. Ka tes ta ‘on fuạg la a‘liuliu ‘os mafa, ma ‘äe la pō tapen la sasap se tē te‘is?

20 ‘Ou mafa la liuliu. (Hat Mataio 6:22, 23.) La ‘os mafa la liuliu ‘on fuạga ‘os mạuri kop la a‘vavhiạn. Le‘ rot fakKaristo a‘liuliu ‘on mafa se—a‘sokoag ne fiongar ‘on ‘Ạitu. Kepoi ka ‘os mafa liuliu, ‘is kal ‘öf ra la pō‘ia garue tög lelei pạu ma ‘es tē ne rȧn te‘. ‘Is kal laloag‘ȧk ra ‘is ‘e jenjen ma‘oi fak se tē fo‘ou ne famori a‘häe ne iris kop la ‘ese la iris la ‘oaf‘oaf. Ka tes ta ‘äe la rē la ‘ou mafa la liuliu? Matạ‘ la se a‘mamauen ‘äe ‘e hanhap fak selene. Se fue‘ la raksa‘ ne mȧür te‘ la hoa‘ tūen ‘ou ava ma ‘ou noh a‘fạliga. Tạupir se muạ‘ạkiạg fak Puk Ha‘a, ‘is pō fürmariạ ‘e “tē la ‘ā ma hạ‘ ne ‘is pō.” (1 Timoti 6:8) A‘vavhiạn ma kikia ‘os mạuri.

21. Ka ‘e rēko tese ta ‘is kop la fū‘ȧk a‘lelei tē ne nonoj la mua, ma tes ta la muạ ‘e ‘os mạuri?

21 Nā la ‘ou tē fak‘ata la muạ, ma fūmou se. ‘E rēko ‘os ava kat ti‘ ra ‘e ‘os garue ‘e te‘ ne terạni, ‘is kop la fū‘ȧk a‘lelei pạu tē ne nonoj la muạ. Kepoi ka ‘igke‘, ma ‘os ava täla tör se tē se ‘es‘ao. Ka tes ta nonoj la muạ ‘e ‘os mạuri? Ma‘oit ‘e rȧn te‘ a‘pumuạ‘ȧk rak lamlama la pō la iris la pō ta garue leleit ‘e av ne tore. Ka Jisu hahan‘ȧk se ‘on lelea‘ rak tē la “ao mumuen . . . kikia Pure‘ag ‘on ‘Ạitu,.” (Mataio 6:33 NW) ‘I, lelea‘ rot fakKaristo aire, nā mumuạ Pure‘ag ‘on ‘Ạitu la muạ ‘e ‘oris mạuri. ‘Os mạuri—rē puer ne ‘is a‘sok, ‘akivao ne ‘is fū‘ȧk ma garuene ‘is rē—kel‘ạkia  ne ‘is a‘pumuạ‘ȧk pạu tē ne mou se Pure‘ag ta ma fiongar ‘on ‘Ạitu ‘e koroa ma garue togi.

GARUE FE‘EN ‘E GARUE MARAG TA

‘Is la pō la kel‘ȧk ‘os hanisi se Jihova ‘e ‘os la nā la marag‘ạkiạg ne rog heg ta la muạ ‘e ‘os mạuri

22, 23. (a) Ka tes ta garue pumuet se lelea rot fakKaristo aire, ma ‘is la kel‘ȧk tapen ne iạ pumuạ se ‘isa? (‘Io se kes tä “ Mȧür ‘Oaf‘ofat ne Gou pō ‘e ‘Otou rē Pure.”) (e) Ka tes ta ‘äe a‘fūmou‘ȧk la rē a‘ti‘ȧk se garue togi?

22 ‘Os ‘ineag ne ‘is noh ‘el se terȧn fakmür ta, ‘is nā ‘os a‘häe ‘atakoa se garue marag ta—ma garue rē tisaipeli la muạ ta‘ag garue pumuet ne lelea‘ rot fakKaristo aire nonoj la a‘sok. (Mataio 24:14; 28:19, 20) La fak se Jisu, Iạ ne Kel‘ȧk Mạl Lelei, ‘is pa a‘popotoa ‘is se garue ne sại‘ȧk mȧür ‘on famori. Ka ‘is la kel‘ȧk tapen ne garue te‘is pumuạ se ‘isa? Famör ma‘oi ‘on ‘Ạitu nā ‘atakoa ‘oris mạuri se garue marag te‘is ‘e ‘oris la lelea‘ hoa‘ marag ‘e laloag ne kạurotuga. Iris ‘on rereag fūfū‘ȧk la painia ne la lelea‘ fekạu‘ạki. ‘Ineag ne ‘es‘ao ne ‘akivao ‘i, ö‘ö‘ ma‘oi a‘ne‘ne‘ȧk ‘oris lele‘a la garue agag fūmou. Ka te ka lelea‘ ne marag‘ạkia Pure‘ag ta ‘oaf se garue ne iris a‘soko? ‘I, iris ‘oaf pạu! Agag se Jihova ‘e ‘atakoa ne ‘oris huga ho‘am mȧür ‘oaf‘oaf aire, fürmaria ma ạlạlum ma‘oi.Hat Fäeag ‘Es Fuạga 10:22.

23 Ma‘oit ‘e ‘is ‘es‘av‘ȧk aoa‘ ma‘oi pạu ‘e garue la matạ‘ fakfor se ‘os kạunohoga. A‘häe‘ȧk ne Jihova pa ‘es la ‘is la ‘oaf‘oaf ‘e ‘os la a‘sok ne garue. ‘Os la a‘sok ne ‘os agaga ma rērē la la‘oag‘esea ma ‘on räe ma muạ‘ạkiga ‘is pō fürmaria ‘e ‘os garue. ‘Is la se fue‘kia la garue togi la hoa‘ tūen ‘is ‘e ‘os garue pumue ta—la marag‘ạkia rog heg ne Pure‘ag ‘on ‘Ạitu. Nāag ne garue te‘ la muạ ‘e ‘os mạuri, kel‘ȧk ‘os hanis aire se Jihova ma ‘os ȧf‘ạkiạg ne ‘is ‘e ‘on hanisi.

^ para. 6 Fäeag Kiris ta se “majạu ne ‘ại” ‘ea ne iạ “täe ‘ofrạu se te‘ ne kạinag garue ne laloag‘ȧk a‘es‘av‘ȧk ne ‘ại la fak se fū‘ȧk rī ne tepeli, nofo‘a ma tē tes hoi‘ȧk.”

^ para. 17 Ta hạifäegagat ne fäeag‘ȧk a‘leleia hanhap ne garue, ‘io se The Watchtower,15 ‘Epereli , 1999, rạu peap 28-30, ma 15 Julai, 1982, rạu peap 26.