HӦL SE TĒ ‘E ‘ON LALOGA

Skip to table of contents

Uetnes ‘on Jihova

Hil fäeag ta Rotuạm ta

 VÄE 4

‘E Rēko tese ‘Is Kop la ‘E‘ȧk Iris ne Pure?

‘E Rēko tese ‘Is Kop la ‘E‘ȧk Iris ne Pure?

“A‘pumuạ‘ạkia te‘ ne famör ‘atakoa.”1 PITA 2:17.

1, 2. (a) Ka ‘e rēko tese iạ tē noanoat la ‘e‘ȧk iris ne pure? (e) Ka sạio‘ tese tä ‘is la sạkior sin?

KA TEI ka ‘äe kel vȧh se ‘io‘io ‘on le‘ mea‘mea‘ heta ‘e avat ne ‘ea e se ia la rē‘ia tēet ne iạ kat ‘oaf ra se? ‘Io‘io ne ‘on mafa kel‘ȧk ne ‘on huga araruạ. Iạ a‘fại se lio ne ‘on ö‘rua ma iạ ‘inea ne nonoj la iạ la ‘e‘ȧk ‘oriạ pure. Ka iạ kat ‘oaf ra la tovavhiạn. Ta‘ag tēet ne ‘is agtạu ‘e av ‘on rereag.

2 Iạ tē noanoat la ‘e‘ȧk fuạg pure. Ka tei ka ‘äe aier‘ȧk ne iạ tē noanoat la ‘e‘ȧk iris ne pure ‘e av ‘on rereag? ‘Eake ‘äe ‘esea ta agtạu ma tē te‘is. ‘Is noh ‘e avat ne famori toak ‘e ‘e‘ȧk ne fuạg pure. Ka, Puk Ha‘a ‘ea ‘is kop la tovavhiạn se iris ne pure. (Fäeag ‘Es Fuạga 24:21) Iạ tē pumuet kepoi ka ‘is pa ‘es la nōnō ma ‘e hanis ‘on ‘Ạitu. Ma tä fupu e sạio‘ la fak se. ‘E rēko tese iạ tē noanoat la ‘e‘ȧk iris ne pure? Ka ‘e rēko tese tä Jihova pa ‘es la ‘is la kel‘ȧk ‘e‘ạkiga, ma tes tä la hạiasoagan ‘is la tovavhiạn? Ka ‘is la kel‘ȧk tapen ne ‘is ‘e‘ȧk fuạg pure?

HÜN NE IẠ TĒ NOANOA

3, 4. Ka ag raksa‘a kamat tapen, iạ a‘noanoa tapen ‘os la ‘e‘ạkia fuạg pure?

3 ‘Is la sạkior se hün he ruạ ‘e rēko tese iạ tē noanoat  la ‘e‘ȧk iris ne pure. ‘On tā, ‘is famör se ‘atakoa; ‘on rue, iris ne pure tape‘ma kat ‘atakoa ra. Ag raksa‘a kamat ‘e ‘Iteni ‘e avat ne ‘Atama ma ‘Ive agạia puer ‘on ‘Ạitu. Kamatag ne ag raksa‘a ta toa‘noa, ta‘ag hün ne ‘is toa‘noa e.Kamataga 2:15-17; 3:1-7; Salamo 51:5; Roma 5:12.

4 ‘E rēko ‘is famör ag raksa‘a ma vavhiạn pạu la ‘is la kel‘ạkia huạg pa ti‘u ma huạg siki, ka ag te‘ huạg vạivại iạ ‘eake tē vavhine la kel‘ạkia ne la sasap la mou sin. Kepoi ka ‘is agag se Jihova ‘e laloag ne ta av roat, ‘is la pō la nōnō ma se la rē‘ia ma tē ne ‘is pa ‘ese ka huạg pa ti‘. Kel‘ạkiạg het, Korā huạg aier ‘e ‘on tạupir ma se lelea‘ Isireli, aier ma ne iris agtạu ma noanoa ma‘oi. Ka iạ pa ‘es la puer ma tä iạ kat mäe ra la agạia Mosese, fā huạg vạivại pạu ne mȧür ‘e av ta. (Hatag Ne Famori 12:3; 16:1-3) Huạg pa ti‘u ta rē ma Sạu ta Usaia suru e se rī ha‘ ‘on Jihova la a‘sokoa väegat ne mou se iris ape‘ạitu. (2 Puk Asoat Se Puk ‘On Sạu 26:16-21) Iris ‘atakoa ne agại Jihova tötög‘ȧk. ‘Is la pō la rak tē ‘e ‘oris kel‘ạkiạg se lelei. ‘Is kop la ‘ut‘ȧk pạu ‘e ‘os huga huạg pa ti‘u ‘e rēko iạ täla a‘noanoan ‘os la ‘e‘ạkia fuạg pure.

5. Ka famör se ‘atakoa a‘es‘av‘ȧk a‘sirsir tapen ‘oris pure?

5 ‘E sal hoi‘ạkit, te‘ ne tē ‘atakoa ne iris famör puer se ‘atakoa a‘soko ta a‘noanoan famori la ‘e‘ạkia iris. Ma‘oit ‘oris pure mam‘as, ne‘ne‘ ka a‘mamạuen famori. Rogrog ne ava kel‘ȧk ne famori a‘sok a‘sirsir ‘oris pure. (Hat Le‘ Marag ta 8:9.) Kel‘ạkiạg het, Saula fā leleit ka huạg vạivại ‘e avat ne Jihova hil iạ la Sạu. Iạ hele‘ue la huạg fua‘ ka huạg pa ti‘; ma tä iạ pa ‘es la al‘ạkia fā huạg aier ta Tevita. (1 Samuela 9:20, 21; 10: 20-22; 18:7-11) Tevita hele‘ la sạu lelei pạu ne Isireli. Ka iạ ‘es‘av‘ȧk a‘sirsir ‘on pure ‘e ‘on väehäk ma hȧn ‘on Uraia fā Hitait ta, ma tä iạ fūfū‘ȧk la fā se ‘es sar te‘ la al ‘e pelu. (2 Samuela 11:1-17) ‘I, ag raksa‘a a‘noanoan ‘on la a‘es‘av‘ȧk a‘nonoj pure. ‘Oris pure pō se tea‘at ‘on raksa‘a ‘e av ne iris kat ‘e‘ȧk ra Jihova. ‘E vạhiạg ne ‘on foar pal‘ȧk ne iris sạu ha‘ he his ne rot Katoliko ta kamat se a‘rū‘ạkiạg ne soko, Le‘ politik ne Pertania fȧ‘ se: “‘Es pure ta a‘mou faksaran famori, ‘on ‘es fuạmamạu ne pure la pō la faksaran iạ la ‘es‘av‘ȧk a‘sirsir ‘on pure.” A‘häe‘ạkiạg ne famori ‘es‘av‘ȧk a‘sirsir pure, ‘is la sạkior se sạio‘ te‘: ‘E rēko tese ta ‘is kop la ‘e‘ȧk iris ne pure?

‘E RĒKO TESE ‘IS KOP LA ‘E‘ȦK IRIS NE PURE?

6, 7. (a) Ka ‘os hanisi se Jihova täla rue‘ạkia ‘is la a‘sokoa tese, ‘on hün heta? (e) Ka tes ta laloag‘ȧk ‘e ‘os tovavhina, ma ‘is la kel‘ȧk tapen?

6 ‘Is la ‘e‘ȧk fuạg pure kepoi ka ‘is hanis ‘e Jihova, ‘os kạinaga, ma tape‘ma iạ la ‘es‘ao se ‘isa. ‘E rēko iạ tē pumuet se ‘isa la hanis ‘e Jihova, ‘is pa ‘es la a‘ofan ‘on huga. (Hat Fäeag ‘Es Fuạga 27:11; Mareko 12:29, 30.) ‘Is ‘inea ne puer purer ‘on Jihova kamat la agại ‘e avat ne ‘Atama ma ‘Ive toa‘noa ‘e ‘Iteni. Ma‘oit ‘e famori kạu ma Satan ta ma iris fesiạ‘ȧk fuạg puer ‘on Jihova. ‘Is ‘oaf ‘e ‘os kạu‘ȧk ne puer purer ‘on Jihova. Tē ne ‘ea ‘e Kel‘ȧk Tē 4:11, rue‘ạkia ‘os huga. ‘Is a‘fūmou‘ȧk ne Jihova ta puer purer nonoj ne lạgi ma rȧn te‘! ‘Is kel‘ȧk ‘e ‘os mạuri ‘e te‘ ne terạni ne ‘is hạitokoag ‘on puer purere.

7 Kel‘ạkiạg ne ‘e‘ạkiga ‘eake la tovavhiạn ma tä‘mä ‘ie. ‘Is tovavhiạn se Jihova ‘e rēko ‘is hanis ‘e ia. Kepoi  ka ‘e av ‘on rereag iạ tē a‘noat la ‘is la tovavhiạn, ‘is kop la a‘vạivạia ‘is la tovavhiạn la fak se le‘ mea‘me‘at ne sui‘ȧk ‘e kamatag ne väe te‘. Jisu tovavhiạn ma kikia se ‘on Ö‘fā ta, aier ma ne iạ la noanoa ‘e av ‘on rereag. Iạ ‘ea se ‘on Ö‘fā ta “La ta‘ea se ‘otou a‘häe, la sokoan ma ke ‘ou a‘häe.”Luke 22:42.

8. (a) Ka tes ta laloag‘ȧk ‘e ‘os la tovavhiạn se fuạg puer ‘on Jihova ‘e ‘on ‘i‘i, ma kel‘ạkiạg tese ta no‘ạkia räe ‘on Jihova ‘e rēko tē te‘is? (e) Ka tes tä la hạiasoagan ‘is la a‘fại se muạ‘ạkiga ma a‘nonoj‘ȧk tē ne la rē? (‘Io se kes tä ‘e “ A‘fai se Puer‘ak te—Ma taria Puer‘akiga.”)

8 ‘E ‘on ‘i‘i, Jihova kat fäeag ra se ‘is le‘et se le‘et; iạ ‘es‘av‘ȧk ‘on Fäega ma ‘on mata ‘e rȧn te‘. ‘Os ‘e‘ȧk ne iris ne Jihova hil la muạ‘ạkia ‘is kel‘ạkia ne ‘is tovavhiạn se ‘on fuạg pure. Huạg ‘on Jihova la rū ‘e avat ne ‘is la toa‘noa ‘e ‘os kat a‘fại ra se ‘oris muạ‘ạkiạg fak Puk Ha‘a ma ‘oris a‘nonoj‘ȧk tē. ‘E avat ne lelea‘ Isireli gū ma agạia Mosese, Jihova hat ne iris a‘a‘sokoa se iạ.Hatag Ne Famori 14:26, 27.

9. ‘E rēko tese tä ‘os hanis ‘e ‘os kạinaga la rue‘ạkia ‘is la ‘e‘ȧk iris ne pure? Nā ta kel‘ạkiạg het.

9 ‘Os la hanis ‘e ‘os kạinaga kel‘ȧk tape‘ma ‘os ‘e‘ȧk ne iris ne pure. ‘E sal tese? Rē a‘häe se ne ‘äe jạujiet ‘e ta kạupelut. La kạupel ta la marō, ma te‘ ne tē la la‘ lelei täe kikia ‘e hạigarueag ‘on jạujia, ‘oris tovavhina ma ‘e‘ạkiga se iris ne pure. Kepoi ka ‘äe la agạia fūfū‘ȧk tē ne kạupel ta, tē ne ‘äe rē la täe tape‘ma se iris jạujiạ ne tore. Aier‘ȧk vạhia ne kạupel famori ta hün ne famör ma‘oi al ‘e ‘on ‘i‘i. Ka kạupel ‘on Jihova ho‘am kikia lelei se famori. Ut ma‘oi ‘e Puk Ha‘a ‘ea “Jihova gagaj ne kạupelu.” (1 Samuela 1:3, NW) Iạ ta Puer se kạupel ‘on tē fak‘at mȧür ‘e lạgi. Av ‘on rereag, Jihova a‘tatạu‘ȧk ‘on lelea‘ e‘a ‘e rȧn te‘ se ta kạupelut. (Salamo  68:11; Isikeli 37:1-10) Kepoi ka ‘is la agạia iris ne Jihova hil la muạ‘ạkia ‘is, tē ne ‘is rē la täe tape‘ma se ‘os hensạsiga. ‘E avat ne ta le‘ rot fakKaristo la agạia fā mafuạ ne kạurotuga, iris ‘e laloag ne kạurotuga ‘oris huga la rū. (1 Korinita 12:14, 25, 26) ‘E avat ne ta le‘et la toa‘noa, kạunohoag ‘atakoa ta ‘oris huga la rū. ‘Is kel‘ȧk ne ‘is hanis ‘e ‘os kạinaga ‘e ‘os ‘e‘ạkiga ma hạigarueaga.

10, 11. Ka tapen ‘on ‘es‘ao se ‘isa ‘os tovavhina se iris ne pure?

10 ‘Is ‘e‘ȧk iris ne pure ‘e rēko iạ la ‘es‘ao se ‘isa. ‘E avat ne Jihova far‘ȧk la ‘is la ‘e‘ȧk iris ne pure, iạ ‘ea tape‘ma se ‘isa ‘on ‘es‘ao la rē la fak ma sin. Kel‘ạkiạg het, iạ fas‘ȧk la lä‘riri‘i la tovavhiạn se ‘oris o‘o‘i la pō la ‘oris mạuri la roa ka la ‘oaf‘oaf tape‘ma. (Nā Hoi‘ạkiạg Ne Foho 5:16; Efeso 6:2, 3) Iạ fas‘ȧk se ‘isa la ‘e‘ȧk fā mamfuạ ne kạurotuga kepoi ka ‘igkȧ‘ ‘is täla  mane‘ạkia ‘os hạikạinagaga ma ia. (Hiperiu 13:7, 17) Iạ ‘ea tape‘ma ne iạ päregat ‘e av ne ‘is tovavhiạn se iris ne puer ‘e matantū ta.Roma 13:4.

11 Ka tei ka ‘äe kạu‘ȧk, ne ‘is la ‘e‘ȧk iris ne pure, kepoi ka ‘is ‘inea a‘lelei hün ne Jihova pa ‘es la ‘is la tovavhiạn? ‘Is la sạkior se muạ‘ạkiạg pumuạ he fol ne kel‘ạkia ne ‘is la pō la ‘e‘ȧk iris ne pure.

‘E‘ẠKIGA ‘E LALOAG NE KẠUNOHOGA

12. Ka tes ta väeag garuet ne Jihova nā se väväne ne ö‘fā ‘e laloag ne kạunohoga, ma iạ la a‘sok tapen ‘on väeag garue te‘?

12 Jihova ta kamatan mȧür fakkạunohoga. Iạ ‘eake ‘Ạit ne uạkē, iạ fūfū‘ȧk a‘lelei kạunohoga la pō la iris la hạia‘leleiạg. (1 Korinita 14:33) Iạ hil la vävän ta ne ö‘fā ta la filo‘ ne kạunohoag ta. Vävän ta kel‘ȧk ‘on ‘e‘ạkiga se ‘on Filo‘ ta, Jisu Karisto, ‘e ‘on rakoag ne salat Jisu muạ‘ạkia ‘ekaresaia. (Efeso 5:23) Iạ kal nā ra se ta le‘ hoi‘ạkit la a‘sokoa ‘on väeag garue te‘; vävän ta la se mam‘as ne la fakgagajan iạ, ka iạ la kel‘ạkia ag figalelei ma mäeavhanisi. Iạ la a‘häe‘ȧk ne ‘on pure kal pō ra la sir ‘e fuạg puer ‘on Jihova.

Ta Ӧ‘fā rot fakKaristo täla rakoa salat ne Karisto ta garue‘ạkia ‘on pure

13. Ka hȧn ‘inosot ne ta o‘honit la a‘sok tapen ‘on väeag garuet ‘e salat ne la a‘ofan Jihova?

 13 Hȧn ‘inos ta ne ö‘hön ta, la hạiasoag se ‘on vävän ta. Nā tape‘ma se ia pure ‘e laloag ne kạunohoạg ta, ne Puk Ha‘a ‘ea “rak‘ȧk tē ne ‘ou ö‘hön ta.” (Fäeag ‘Es Fuạga 1:8) ‘On pure kat pō ra la sir ‘e puer ne ‘on vävän ta. Hȧn rot fakKaristo ne ‘e‘ȧk puer ne ‘on vävän ta, hạiasoagan ‘on vävän ta la a‘sokoa ‘on väeag fakfilo‘ ne kạunohoga. Iạ kal pikoi ra ne la siạ‘ puer ne ‘on vävän ta, ka iạ la hạitokoag ma la hạigarueag ma ia. ‘E avat ne rē pure kat hạitạuạg ra ma ‘on ‘ofa, iạ kel‘ạkia ‘on a‘häe ‘e ‘e‘ạkiga, ka iạ la noh tovavhiạn ma. Iạ la tē noanoat kepoi ka ‘on vävän ta kat pupuạ ra ‘e aier ta, kop ma ‘on aga ma ‘on tovavhina täla rue‘ạkia ‘on vävän ta la agag se Jihova.Hat 1 Pita 3:1.

14. Ka lä‘riri‘i la pō tapen la a‘ofan ‘oris ö‘rua ma Jihova?

 14 Lä‘riri‘i a‘ofan huạg ‘on Jihova ‘e avat ne iris la tovavhiạn se ‘oris ö‘rua. Iris ‘e‘ȧk ka a‘ofan tape‘ma ‘oris ö‘rua. (Fäeag ‘Es Fuạga 10:1) Lä‘riri‘i kop la tạupir tape‘ma se muạ‘ạkiạg ‘esea ‘e kạunohoag ö‘ ‘eseat. Lä‘riri‘ ‘e laloag ne kạunohoag tape‘i, noj la ‘inea ne pa ‘es ti‘ pạu la iris la hạigarueag. Kạunohoga la noh ‘oaf‘oaf ka hạia‘leleiạg ke ‘e avat ne iris ‘atakoa la a‘sokoa ‘oris väeag fak‘ạitu. Tē te‘is faktē‘ạkia ‘Ạitu Jihova, iạ ne ta Kamatan mȧür fakkạunohoga.Efeso 3:14, 15.

‘E‘ẠKIGA ‘E LALOAG NE KẠUROTUGA

15. (a) Ka ‘is la kel‘ȧk tapen ‘e laloag ne kạurotuga ne ‘is ‘e‘ȧk fuạg puer ‘on Jihova? (e) Ka muạ‘ạkiạg tese täla hạiasoagan ‘is la tovavhiạn se iris ne muạ‘ȧk tē? (‘Io se kes tä ‘e “ Tovavhia n se Iris ne Mua ‘a Kia ‘Is.”)

15 Jihova nin ‘on Le‘ ta la Puer se ‘ekaresaia. (Kolosa 1:13) Ma tä, Jisu hilia “le‘ ea‘ ‘huạg aier ka huạg ‘atmại ta” la osia tēla‘ā fak‘ata se famör ‘on ‘Ạitu ‘e rȧn te‘. (Mataio 24:45-47) Kạupuer ne Muạ‘ȧk Tē ne Uetnes ‘on Jihova ta “le‘ ea‘ huạg aier ka huạg ‘atmại ta.” La fak ma se kạurotuạg rot fakKaristo ‘e senjuri mumue ta, fā mamfuạ ne kạurotuga pō fas‘ȧk tē ma muạ‘ạkiga ‘e Kạupuer ne Muạ‘ȧk Tē, ‘e tē ne la rē ne la a‘es‘av‘ạkia ‘oris mata, la fak se iris huȧ‘ ne ȧs tē. ‘E avat ne ‘is ‘e‘ȧk iris fā mamfuạ ne kạurotuga, ‘is tovavhiạn se Jihova.Hat 1 Tesalonaika 5:12; Hiperiu 13:17.

16. ‘E sal tese ta fā mamfuạ ne kạurotuga hil ‘e ‘at ha‘a?

16 Fā mamfuạ ne kạurotuga ma iris fā agaga kat ‘atakoa ra, iris ag raksa‘ fak se ‘isa. Ka, iris fā mamfua ta “tēfakhanis se famori,” iris hạiasoag la a‘ne‘ne‘ȧk fak‘atan ‘is. (Efeso 4:8) ‘At ha‘a ta hilia iris fā mamfuạ  ne kạurotuga. (Garue 20:28) ‘E sal tese? Iris kop la a‘sok tē ne pa ‘es ‘e iris ne fȧ‘ ‘e Fäeag ‘on ‘Ạitu. (1 Timoti 3:1-7, 12; Taito 1:5-9) Fā mamfua far‘ȧk tape‘ma muạ‘ạkiạg ne ‘at ha‘a la iris la ‘inea‘ia kepoi ka ta sạsigit a‘sok tape‘ma tē ne pa ‘es ‘e fā rot fakKaristo ne ‘igkȧ‘.

17. ‘E rēko tese tä hạina la kukul ‘oris filo‘u, ‘e avat ne iris la a‘sok ta väeag ‘e laloag ne Kạurotuga?

17 ‘E av ‘on rereag, kop ma kal ‘es fā mamfuạ ra ne fā agag ne kạurotuga la a‘sok väeag ne mou se irisa la fak se muạ‘ạkiạg ne garue marag ta. La pō la ‘es‘av‘ȧk hensạsiạg fā papetạiso. Kepoi ka kat ‘es sạsiạg fā ra, la pō la ‘es‘av‘ȧk hạiạn rot fakKaristo ma‘ata. ‘E avat ne sạsiạg hạnit la a‘sok väeag ‘on ta sạsiạg fā papetaisot iạ kop la kukul ‘on filo‘u. * (1 Korinita 11:3-10) ‘Eake ‘on fuạg ne fūfū‘ȧk te‘is la a‘pufạ‘ȧk hạina. Ka kel‘ȧk ne iris ‘e‘ȧk fūfū‘ȧk tē ‘on Jihova ‘e laloag ne kạunohoga ma ‘e kạurotuga.

‘E‘ȦK FUẠG NE MATANTŪ TA

18, 19. (a) Ka ‘äe la sui‘ȧk tapen muạ‘ạkiạg ne fȧ‘ ‘e Roma 13:1-7? (e) Ka ‘is la kel‘ȧk tapen ‘e‘ạkiga se iris ne pure?

18 Lelea‘ rot fakKaristo aire tạupir se muạ‘ạkiạg ne täe ‘e Roma 13:1-7. (Hat.) Ut ne puk te‘ ‘ạliạg‘ạkia “puer” ‘on matantū ta. Jihova nōnō aier‘ȧk ma la iris la puer, ma tē rereag ne iris a‘sok iạ ‘es‘ao, iris fe‘en la nohnoho la lelei, ma tä iris ös se maj he his ne la pō la hạiasoag se ‘isa. ‘Is la ‘e‘ȧk iris ‘e ‘os tạupir se foho, togia fatogia, a‘vȧh fom ne matantū ta pa ‘es ‘e ‘isa, tạupir se foh ne laloag‘ȧk ‘is le‘et se le‘et, ‘os kạunohoga,  pesnese ma tē ne ‘is ‘ese. ‘Is kal tovavhiạn ra se irisa ‘e avat ne iris la ‘ea la ‘is la toa‘noa se ‘Ạitu. La fak se iris ‘apostolo ‘is la ‘ea: “Ạmis kop la mā ke se ‘Ạitu ‘e famori.”Garue 5:28, 29; ‘io se kes ta “ Ka Gou la Tovavhiạn se Sei?

19 ‘Is ‘e‘ȧk iris ne ‘es puer ‘e matantū ta ‘e ‘os aga. ‘E av ‘on rereag kop ma ‘is la hạifäegag ma iris ne garue se matantū ta. ‘Apostol ta Paula hạifäegag ma Sạu ta Akripa ma Kavan ta Festo. Aier ma ne iriạ sar ti‘ pạu, ka Paula kel‘ȧk ‘e‘ạkiga ‘e ‘on fäefäega. (Garue 26:2, 25) ‘Is la rakoa kel‘ạkiạg ‘on Paula ‘e ‘os fäefäega se ta le‘ puer rogot ne ta pirismäne ‘e utut ne ‘is noho. ‘E rako lelea‘ rot fakKaristo kop la ‘e‘ȧk ‘oris famör rē rako ma iris ne garue tape‘ma ‘e rak ta. ‘Is kal ‘e‘ȧk ra ma iris ne kạu‘ȧk ‘os pilifi; ‘is ‘e‘ȧk tape‘ma iris ne kat ‘oaf ra se ‘isa. Iris ne kat rot fakKaristo aire kop la ‘inea ne ‘is ‘e‘ȧk iris.Hat Roma 12:17, 18; 1 Pita 3:15.

20, 21. Ka ạlạlum‘ạkiạg tese tä ‘is la pō ‘e ‘os ‘e‘ȧk ne iris ne pure?

20 ‘Is la se ‘uru la kel‘ạkia ‘e‘ạkiga. ‘Apostol ta Pita fȧ‘: “A‘pumuạ‘ạkia te‘ ne famör ‘atakoa.” (1 Pita 2:17) ‘Os kel‘ạkiạg ne ‘e‘ạkiga la pō la täe se huạg ‘on iris ne tore, ‘e rēko ag te‘ peak pạu la pō ‘e ‘on ‘i‘i. Kel‘ȧk ne ‘e‘ạkiga aier‘ȧk ne ‘is tạupir se fas‘ȧk tē ‘on Jisu: “‘Omus tafa kop la puạlpuạl ‘e muạ ‘on famori, la iris la räe se ‘omus garue lelei, ma a‘kölör‘ạkia ‘omus Ö‘fāat täe ‘e lạgi.”Mataio 5:16.

21 ‘E rȧn maksul fak‘at te‘, famör huạg vạivại aoa taf fak‘ata. ‘Os kel‘ạkiạg ne ‘e‘ạkiga ‘e laloag ne kạunohoga, kạurotuga, ma se iris ‘e matantū ta, täla rue‘ạkia iris heuạ la leum la la‘ ag‘esea ma ‘is ‘e taf ta. Ta‘ag tē a‘kölör‘ạkit! Kepoi ka famori kat leum ra la agag se Jihova, ‘is la aier‘ȧk ne ‘os ‘e‘ȧk ne famori a‘ofan Jihova ma ‘is nōnō ȧf‘ȧk ma ‘e hanis ‘on ‘Ạitu. Ta‘ag tög pumuet ne ‘is la pō la ‘ese.

^ para. 17 Ne ‘On Asoa ta “Kukul ne Filo‘u—Av Hes ta ma Hün se Tese?” sạkior se sal he his la ‘is la garue‘ạkia muạ‘ạkiạg te‘.