HӦL SE TĒ ‘E ‘ON LALOGA

Skip to secondary menu

Skip to table of contents

Uetnes ‘on Jihova

Rotuạm ta

Ka Tes tä Puk Ha‘a ‘Ea Aire?

VÄE SAGHUL MA LIẠM

Titi‘ạkiget ne ‘Ạitu Tȧr ma A‘soko

Titi‘ạkiget ne ‘Ạitu Tȧr ma A‘soko

Tei ka te‘ ne kạinag rot ‘atakoa a‘oaf ‘Ạitu?

‘Is la pola ‘inea tapen ne tes tä rot aier ta?

Sei tä famör titi‘ȧk aier ‘on ‘Ạitu ‘e rȧnte‘ ‘e terạnit ‘e ‘i?

JIHOVA ‘ẠITU kokon‘ȧk aier pạu ‘is ma iạ pa ‘es la ‘is la po ‘on ‘es‘ao ne ‘on juj‘ȧk te mäeav hanisi. Ma nono ka ‘is la titi‘ȧk se iạ ‘e salat ne nonojo, ma ‘is la pola hȧ‘ȧk ‘is ‘e te noanoa ma‘oi ma ‘is la mȧür ‘oaf‘oaf. Ma ‘is la po tape‘ma ‘on hạiasoaga ma ‘on ạlạlum‘ạkiga. (Aisea 48:17) Ka, ma ‘on rot tarạu his ne ‘ea iris tä rak‘ȧk te aier ne mou se ‘Ạitu. Ka tä‘ma tēet ‘oris rak‘ȧk tē tutu pạu. La fakse tög ne kạinag sạio‘ ‘i ne sei tä ‘Ạitu ma tes tä iạ pa ‘es la ‘is la re.

2 ‘Äe la po tapen la ‘inea salat ne nonoj la ‘äe la titi‘ạki e se Jihova? ‘Äe kal a‘noa ra la rak la ‘inea ma a‘tatạu‘ạkia te ne rak‘ȧk ‘e te‘ ne rot ma‘oi tutu ‘atakoa. Ka tä‘ma tēet ne ‘äe kop la re, ‘äe la rakoa la ‘inea‘ia te ne Puk Ha‘a ‘ea hün se titi‘ạkiget ne aire. La a‘tatạu‘ạkia: ‘E hanuạ ma‘oi, ma ‘on pefä‘ soksok hün se mone sioksiko. Ma kepoi ka garue te‘ na se ‘äe la ao la räea mone sioksiko ma tes tä ‘äe la re? Tei ka ‘äe la aoa la faki‘ogan kelkeleag ne te‘ ne mone sioksiok ‘atakoa? ‘Igke‘. Lelei se‘ la ‘äe la na ‘ou ava la ‘äe la sạkiroa la ‘inea a‘leleia kelkeleag ne mone aier ta. Ma ‘e av ne ‘äe ‘inea a‘lelei vạhia kelkeleag ne mone aier ta, ma ‘äe täla pola faki‘ogan mone sioksiok ta. Ma la tatạu sema se rotu. ‘E av ne ‘ís rak ma ‘inea la faki‘ogan rot aier ta, ma ‘is täla pola ‘inea‘ia rot sioksiko.

3 Iạ te ‘es‘aot la ‘is la titi‘ȧk se Jihova ‘e salat ne iạ tȧr ma a‘soko. Famör ma‘oi aier‘ȧk pạu ne te‘ ne kạinag rot ‘atakoa a‘oaf ‘Ạitu, ka Puk Ha‘a kat ‘ea ra te ta‘. Kat vȧh ra sin la ‘äe la ‘eama, ne ‘äe famör rot fakKaristo. Jisu ‘ea: “‘Eake te‘ ne iris tūtū ‘atakoa ne ‘eam se goua, Ko Gagaj, ko Gagaj, täla sur se pure‘ag ne lạgi, gat ma ke ia ne rē‘ia fioangar ne ‘otou Ö‘fāat ne noh ‘e lạgi.” Nono ka ‘is pa ‘es la ‘Ạitu la tȧr ma a‘sok ‘is, ma ‘is kop la rak la ‘inea ne tes tä ‘Ạitu pa ‘es la ‘is la re se iag ma ‘is la re la fakma sin. Jisu ‘ea famör ne kat re‘ia ra ‘amnȧk ‘on ‘Ạitu iris tä hat la “‘aus ne gargarue‘ȧk tē se nonojo.” (Mataio 7:21-23) La fakma se mone sioksiko, rot sioksiko la pola hö‘ pefä‘ ‘e ‘on fakmuri. Ka ‘on mamạr pạu heta te‘is, iạ la pola mane‘ȧk ‘ou mạuri.

4 Jihova na ao la te‘ ne famör ne rȧnte‘ la pola po‘ia mȧür se ‘es a‘ofiga. Ka, nono ka ‘is pa po mȧür se ‘es gata‘aga ‘e Parataisi te rȧnte‘, ma ‘is kop la titi‘ȧk se ‘Ạitu ‘e salat ne nonojo ka aire, ma ‘os mạuri kop la la‘oag ‘esea ma ‘amnȧk ‘on ‘Ạitu la pola iạ la tȧr ma a‘sok ‘is. ‘On kelea‘ehanis heta te‘is, famör ma‘oi kat ‘oaf ra la re te‘ i. Ma täe ‘on‘on Jisu ‘ea e: “‘Au la suruomus ‘e nu‘suạr ‘ep ta: ko taf nu‘suạr ta, ka ofrau sal ta, ne hoa‘ se maoga, ma ma‘oi iris ne suru e sin; kane ‘ep nu‘suạr ta, ka jiakjiak sal ta, ne hoa‘ se mạuri, ma mokoi iris ne suru e sin.” (Mataio 7:13, 14) Rot aier ta hoa‘ se mȧür se ‘es gata‘aga. Rot sioksiok ta hoa‘ se maoga. Jihova kat ‘oaf ra la ta le‘et la a‘raksa‘ȧk, ma tä ‘on‘on iạ na ao se famori ‘e te‘ ne utu la rak la ‘inea‘ia iạ. (2 Pita 3:9) Ma te te‘is aier pạu, ne ‘os titi‘ạkiga se ‘Ạitu, iạ la pola ho‘am mạuri ne ala se ‘isa.

LA FAKI‘OGAN ROT AIER TA

5 ‘Äe la räe tapen salat ne hof se mạuri? Jisu ‘ea ne rot aier ta la kel‘ȧk ‘e mȧür ‘on famör ne rot aire. Jisu ‘ea ne “‘Aus la ‘inea iris ‘e ‘oris hue. ‘Ạit ma ne lelei, ia hue‘ȧk hue lelei.” (Mataio 7:16, 17) ‘Is la pola ‘ea tape‘ma, rotut ne aire la pola kel‘ȧk ‘e mā ma pilifi, ma ag ‘on iris ne mou se rot aier ta. Te airet iris famör agraksa‘ ma iris re te sar, ka ‘oris kạutạunạ‘iag ta na vahia ma kikia la re ‘amnȧk ‘on ‘Ạitu. Ma ‘is la re a‘häe se te he on ne la faki‘ogan iris ne mou se rotut ne aire.

IRIS NE TITI‘ȦK SE ‘ẠIT AIER TA

  • hün‘ȧk ‘oris rak‘ȧk te se Puk Ha‘a
  • titi‘ȧk ma se Jihova iạ ‘esea het ma foar kạl‘ȧk ‘on asa
  • kel‘ȧk hanis aire se famori
  • tȧr ma aier‘ȧk ne Jisu tä ‘Ạitu garue‘ȧk la sại‘ạkia ‘is
  • kat teag‘esea ra ma rȧnte‘
  • marag‘ȧk ne Pure‘ag ‘on ‘Ạitu tä‘ma ‘ạiröt‘ạkiag ‘on famori
Famör ne kạinag tutu titi‘ȧk se ‘Ạitu

6Lelea‘ ea‘ ‘on ‘Ạitu rak‘ạkia ma te ne fȧ‘ ‘e Puk Ha‘a. Puk Ha‘a iạ ‘ea pạu: “Te‘ ne puk tūtū ‘atakoa ne fȧ‘ ‘e ui rȧg ‘on ‘Ạitu, iris ‘es‘ao tape‘ma se rak‘ȧk tē, se fȧr tē, se a‘nonoj‘ȧk tē, se puer‘ạkiag ne mou se ag nonojo: la famör ‘on ‘Ạitu la ‘atakoan, ka potsusun se te‘ ne garue lelei tūtū ‘atakoa.” (2 Timoti 3:16, 17) Te‘is te ne ‘apostol ta Paula fȧ‘ se ‘on hensạsiag rot fakKaristo: “Ma te‘is ‘on‘on ‘ạmis noanoa‘ia tape‘ma se ‘Ạitu, ma kat toak ra, ne ‘e avat ne ‘aus pō e ‘e ‘ạmisa fäeag ne rog heg ‘on ‘Ạitu, ma ‘aus tạria, ‘eake la fak ma ne ia fäeag ‘on famör, fak ma ke se ‘on aire, ne ia fäeag ‘on ‘Ạitu, fäeagat ne garue a‘mou tape‘ma ‘e ‘aus ne pilifi.” (1 Tesalonaika 2:13) Ma täe ‘on‘on, ‘oris pilifi ma te ne rotut ne aire rere, kat hūn‘ȧk ra se räe te, a‘häe ma ag ‘on famori. Te‘ i ho‘am ‘e Puk Ha‘a, ne Fȧ‘ ‘e ui rȧg ‘on ‘Ạitu.

7 Mạl lelei het tä Jisu Karisto kel‘ạki ‘e reko ‘on rak‘ȧk te ho‘am kikia ‘e Fäeag ‘on ‘Ạitu. Iạ ‘ea ‘e ‘on ro‘ạitu se ‘on Ö‘fa faklạgi: “‘Ou fäeag ta aier ta.” (Jone 17:17) Jisu aier‘ȧk pạu Fäeag ‘on ‘Ạitu, ma te‘ ne te ne iạ rak‘ạki tatạu pạu ma Puk Ha‘a. Jisu fa‘ ‘ea pạu: “‘Äna fȧ‘ tape‘.” (Mataio 4:4, 7, 10) Ma kotä iạ la hat ta ut ne pukut. Ma fakma sin ‘e terạnit ‘e ‘i, famör ‘on ‘Ạitu kat rak‘ạkia ra ‘oris a‘häe. Ma tä ‘on‘on ‘oris rak‘ȧk te hün‘ȧk pạu se Puk Ha‘a ‘e reko iris aier‘ȧk pạu ne te‘is Fäeag ‘on ‘Ạitu.

8Iris ne mou se rotut ne aire ma tạupir sin, iris titi‘ȧk ma se Jihova iạ ‘esea het, ma rak‘ȧk ofrạu ‘on asa. Jisu foar a‘taf pạu: “‘Äe la titi‘ȧk se Jihova, ‘ou ‘Ạitu, ma rot se ia ‘esea ma.” (Mataio 4:10) Ma tä ‘on‘on hün ne lelea‘ ea‘ ‘on ‘Ạitu titi‘ȧk ma se Jihova, iạ ‘esea het. ‘E ‘oris titi‘ạkiga iris rak‘ȧk se famori as ‘on ‘Ạit aier ta, ma tape‘ma ne iạ kạinag ‘Ạit tapenet. Salamo 83:18 ‘ea tape‘: “Ne ‘äe ‘esea tä purer se‘ ‘e rer ne rȧn te‘ ‘Atakoa. Ko äe ne he‘ ‘ou asa Jihova.” Jisu rou sio fohot ‘e ‘on ro‘ạit ta la ‘is la tạupir sin, la ‘is la pola hạiasoagan iris ne tore la pola ‘inea‘ia ‘Ạitu. Jisu ‘ea ‘e ‘on ro‘ạit ta: “Gou no‘ȧk vạhia ‘ou asa se te‘ ne famör ne ‘äe nāamea se goua ‘e rȧn te‘.” (Jone 17:6) Ma tatạu sema ‘e terạnit ‘e ‘i, lelea‘ ne titi‘ȧk aier se ‘Ạitu, iris rak‘ȧk ‘on asa, ‘on ‘amnạki, ma ‘on ag pumua se te‘ ne famori.

9Famör ‘on ‘Ạitu kel‘ȧk ne iris hạihanisiag aier pạu. Jisu ‘ea tape‘: “‘E tē te‘is te‘ ne famör ‘atakoa täla ‘inea ne ‘aus ‘otou lelea‘ rak tē, kepoi ka hạihanisiga noh ‘e ‘ausag.” (Jone 13:35) Lelea‘ rot fakKaristo ‘e ‘on mumua iris hạihanisiag aier. Kạinag hanisit ne ‘is rakom ‘e ‘Ạitu iạ pola huạr‘ȧk pā ne ‘is famori fu‘ạki e ‘e reko ‘is mou se kạinag tutu, ne ‘os pōpō tutu, ne ‘is fupum ‘e hanuạ tutu. Hanis fak‘Ạit te‘is iạ ma‘op‘ȧk ma hại‘o‘oroag famori ‘e ta haikạinagagat ne kat ‘es ra ta tēet la pola väea. (Kolosa 3:14) Kat ‘es hạikạinagag tape‘it ra ‘e rot sioksiko. Ka ‘is ‘inea tapen te te‘is? Iris hạial‘ạkiag iris ‘e reko tutu ne ‘oris a‘häe ma ‘oris räe, ne hün ma se iris noh ‘e hanua tutu ne iris mou se kạinag tutu. Famör rot fakKaristo aire kat hạial‘ạkiag ra iris ne al‘ȧk ta le‘ tu hoi‘ạkit. Puk Ha‘a ‘ea: “‘E tē te‘is lelea‘ ‘on ‘Ạitu no‘om, ma lelea‘ ‘on tiapol ta tape‘ma: le‘et ma ne kat a‘mou rē‘ia ra ag nonojo, ia kat mou ra se ‘Ạitu, ma ia tape‘ma ne kat hanis ra se ‘on sạsigi. Ne te‘is fäeag tokot ne ‘aus a‘fại ‘e ‘on kamataga—la ‘is la hạihanisiag. Kat lelei ra la ‘is la fak se Keni, le‘et ne mou se ia ne raksa‘a, ma al‘ȧk ‘on sạsiag he ta.”—1 Jone 3:10-12; 4:20, 21.

10 Ka, ‘is ‘inea ne hanis aier ta ‘eake la se al‘ȧk te ma tä‘ma‘ie. Famör rot fakKaristo aire na a‘fürmariạ ‘oris ava, ‘oris ne‘ne‘i, ma ‘oris koroa la hạiasoagan ma a‘ne‘ne‘ia ‘oris hensạsiga. (Hiperiu 10:24, 25) Iris hại‘ioag ‘e av ne noanoa hele‘u e, ma iris hạigarueag a‘nonoj pạu. Iris po ma re te‘ i ‘e reko iris garue‘ȧk ‘e ‘oris mạuri puer‘ȧk te ne Puk Ha‘a na la “garue‘ȧk te lelei se te‘ ne famör ‘atakoa.”—Kalatia 6:10.

11Famör rot fakKaristo aire tār ma aier‘ȧk ne Jisu Karisto tä ‘Ạitu garue‘ȧk la sại‘ạkia ‘is. Puk Ha‘a ‘ea tape‘: “‘Äna a‘mȧür‘ạkiga kat puạpuạ ra ‘e ta le‘ tū; ‘e fȧn lạgi ‘eake ta as tū, ne nā se famori, ne mou se ‘isa la ‘is la a‘mạuri e.” (Garue 4:12) Fakma ne ‘is kel ‘e Väe 5 ta, Jisu na ‘on mạuri la tög ‘on lelea‘ tovavhina la sại‘ạkia iris. (Mataio 20:28) Ma hoi‘ȧk, Jisu iạ tä ‘Ạitu hil vạhia la Sạu ne Pure‘aga te hevạni ne la purea rȧnte‘ ‘atakoa. Ma ‘Ạitu pa ‘es la ‘is la tovavhian se Jisu ma garue‘ȧk ‘on rak‘ȧk te kepoi ka ‘is pa po mȧür se ‘es a‘ofiga. Ma täe ‘on‘on Puk Ha‘a ‘ea e: “Le‘et ne pilif se Le‘ ‘on ‘Ạitu, ia pō mȧür se ‘es gata‘aga; ka le‘et ne kat mā ra se Le‘ ‘on ‘Ạitu, ia kal kel ra se mạuri.”—Jone 3:36.

12Famör ne titi‘ȧk aire iris kat teag‘esea ra ma rȧnte‘. ‘E avat ne iris ho‘am iạ la a‘lel ‘e muạ ‘on fa puer Roam ta Pailato, Jisu ‘ea ne: “‘Otou pure‘ag ta kat mou ra se rȧn te‘is.” (Jone 18:36) Famör ne tạupir aier se Jisu ne noh ‘e ut tutu ne rȧnte‘ iris mou kikia se Pure‘ag fakhevȧn ta, ma iris matạ‘ pạu la iris se teag‘esea ma puer fakpolitik fakfamori. Iris kat pülüf ra se ‘oris uạke ne ‘oris hạifiriga. Ka, iris ne titi‘ȧk aier se Jihova kat na huạg ra famori ‘e reko ‘oris repure ne iris la sur se ta kạu fakpolitikit, ne iris la na ‘oris asa se hil te la iris la po fūag lamlam fakmatantu fakfamori, ne iris la hil te. Ma te airet lelea‘ ne titi‘ȧk aier se ‘Ạitu kat pülüf ra se te fakpolitiki, iris ‘eake famör kao foh. Po ‘e tese? ‘E reko Fäeag ‘on ‘Ạitu fas‘ȧk se irisa la “noh a‘fại” se puer fakmatantu fakfamori “puer ne purere.” (Roma 13:1) Ka ‘e av ne te ne ‘Ạitu pa ‘ese ma te ne puer fakpolitiki pa ‘ese hạisiriga e, ma famör titi‘ȧk aier ‘on ‘Ạitu tạupir kikia se mạl het ne le‘et ‘e iris ‘on ‘apostolo kel‘ạki ma ‘ea e: “‘Ạmis kop la mā ke se ‘Ạitu ‘e famori.”—Garue 5:29; Mareko 12:17.

13Tisaipel aier ‘on Jisu marag‘ȧk ne Pure‘ag ‘on ‘Ạitu tä‘ ma ‘ạiröt‘ạkiag ‘eseat ‘on famori. Jisu parofesại‘ȧk vạhia: “Rog heg ne pure‘aga, täla marag‘ạkiomo ‘e rȧn ‘atakoa te‘, la uetnes‘ạkiget se lelea‘ ne te‘ ne hanuạ ‘atakoa, ma kotä hele‘ a‘ofiag ta.” (Mataio 24:14) Famör ne tạupir aier se Jisu Karisto rak‘ȧk ofrạu ne Pure‘ag fakhevȧn ‘on ‘Ạitu iạ tä ‘ạiröt‘ạkiag ‘eseat ‘on famori, ma iris kat ‘ea ra ne famör pure täla a‘ofia ‘oris pefä‘e. (Salamo 146:3) Jisu rak‘ȧk vạhia la ‘is la ro‘ạit‘ạkia matantu pumue te‘is ‘e avat ne iạ ‘ea e: “‘Ou pure‘aga la leum, ‘ou rere la sok, fak ma ‘e lạgi, la tape‘ma ‘e rȧn te‘.” (Mataio 6:10) Fäeag ‘on ‘Ạitu parofesại‘ȧk vạhia ne Pure‘ag fakhevȧn te‘is “täla kaokaoa ma a‘ofia te‘ ne pure‘ag ‘atakoa ‘og [ne fū ‘e ‘on ‘i‘i], ma la fūmou se av se ‘es gata‘agat ne tore.”—Taniela 2:44.

14 Ma ‘e reko te ne ‘is hạifäegag vạhia sin, ‘äe la pola sạio‘ se ‘äea: ‘Ka kạurotuag tese tä hün‘ȧk te‘ ne ‘oris rak‘ȧk te se Puk Ha‘a ma rak‘ȧk ma garue‘ȧk as ‘on Jihova? Ka kạutạunạ‘iag teset tä a‘es‘av‘ȧk hanis fak‘Ạitu, garue‘ȧk ‘oris mā se Jisu, ka kat teag‘esea ra ma rȧnte‘, ma marag‘ȧk ne Pure‘ag ‘on ‘Ạitu iạ tä ‘ạiröt‘ạkiag aier ‘on famori? Ma ‘e te‘ ne rot ‘atakoa ne rȧnte‘, ka rotus tä po ma re te‘ ne te ‘atakoa ‘i?’ Tē ne Jihova Uetnes ta re kel‘ȧk a‘taf pạu ne te‘is rotut ne pola re‘ia te‘ ne te ‘atakoa ne fȧ‘ sio.—Aisea 43:10-12.

Ti‘ se‘ te ne ‘äe la po ‘e ‘ou agag ag‘eseat ma ‘on famori, se Jihova, ‘e te ne ‘äe la mao‘ȧk ‘e ta avat

Famör ne kạinag tutu iris kạumane‘aga

MA TES TÄ ‘ÄE LA RE?

15 ‘Ou mā ‘atā heta se ‘Ạitu kal pora la a‘ofan iạ. Hün se Puk Ha‘a ‘ea ne timonio tape‘ma mā ne ‘Ạitu täe. (Jemesa 2:19) Ma fakma ne ‘is ‘inea, iris timonio kat re‘ia ra ‘amnȧk ‘on ‘Ạitu ma ‘Ạitu fue‘ vạhia iris. Ka nono ka ‘is pa ‘es la ‘Ạitu la tȧr ma a‘sok ‘is, ma ‘is kop la mā ma pilif ne ‘Ạitu täe, ma re‘ia ‘on fiongaro. Ma ‘is kop la hotoas ma rou pạu rot sioksiko ma tạupir ma sasap la mou se rot aier ta.

16 ‘Apostol ta Paula kel‘ȧk ne ‘is kal po pạu ra la teag‘esea ma rot sioksiko. Iạ fȧ‘ tape‘: “ ‘Au la hotoamus ‘e ‘oris gasava, ma ‘au la noh tū,’ (te‘is fäeag ‘on, Gagaja). ‘Ma ‘au se ‘atạk se tē se ma‘ma‘. ‘Ma gou täla a‘sokom ‘aus.’ ” (2 Korinita 6:17; Aisea 52:11) Famör rot fakKaristo aire a‘sousou pạu iris ‘e te‘ ne te ne mou se rot sioksiko.

17 Puk Ha‘a ‘ea ne te‘ ne kạinag rot sioksiko mou se “Papilon Ti‘ ta.”* (Kel‘ȧk Tē 17:5) As ta‘ag a‘häe‘ạkim se ‘isa taon ta Papiloni ne ‘on tạusa, utut ne rot sioksiko kamata ma ‘e vạhiag ne Hoi te av ‘on Noa. Rak‘ȧk te ma ag ma‘oi ne soksok ‘e rot sioksiko kamat ma ‘e av roat ne ofiofuạ ‘e Papiloni. La fakse ‘ạit le‘ fol ta ne ‘ạit fol ne famör ne Papiloni titi‘ȧk sin. Ma ‘e terạnit ‘e ‘i, rot ma‘oi hün‘ȧk ‘oris rak‘ȧk te se ‘Ạit Le‘ Fol ta. Ka Puk Ha‘a ‘ea a‘taf pạu ne ma ‘on ‘Ạit aier ‘eseat, Jihova, ma Jisu Karisto tä ‘on Le‘ ta. (Jone 17:3) Kakại ne Papiloni mā tape‘ma ne famori ma ‘oris ‘at se alal het ne mȧür ma kikia ‘e avat ne famori ala e ma a‘mamauạ ‘e ut ne mamaua. ‘E terạnit ‘e ‘i, rot ma‘oi mā ma rak‘ȧk ne famori ma ‘oris ‘at se alal het ne a‘mamauạ ‘e susunu ‘e heli.

18 ‘E reko titi‘ạkiag ‘on famör ne Papiloni ne ‘on tạusa foräs‘ȧk vạhia se rȧnte‘ ‘atakoa, ma ‘is la pola ‘ea ne Papilon Ti‘ ne ‘os ava, iạ tä matantu ‘on rot sikosiko ‘e rȧnte‘. ‘Äna ‘Ạitu parofesại‘ȧk vạhia ne matantu ne rot sioksiko täla a‘öf a‘ferehit mij pạu. (Kel‘ȧk Tē 18:8) Ma tei ka ‘äe taf‘ia sin se hün ne ‘äe kop la ‘ut‘ȧk pạu ‘äe ‘e te‘ ne te ne mou se Papilon Ti‘ ta? Jihova pa ‘es la ‘ạus la rue mij pạu ‘e av het ne tör sio la “hotoamus ‘e ia.”—Kel‘ȧk Tē 18:4.

19 Ma ‘e reko ‘ou repuret la roua rot sikosiko, iris ma‘oi kop ma la toak ‘e pa teag‘esea ma ‘äe. Ka, ‘e ‘ou agag se Jihova ‘e ‘ou teag‘esea ma ‘on famori, la ti‘ se‘ te ne ‘äe la po ‘e te ne ‘äe la mao‘ȧk ‘e ta avat. La fakse tisaipel mumuạ ‘on Jisu ne rou te ma‘oi la tạupir se ia, ‘äe täla po hensạsiag fak‘at ma‘oi. ‘Äe la mou se ta kạunohoag ti‘ut ne ma ‘on miliön his ‘e famör rot fakKaristo aire, ne la hanis aier pạu ‘e ‘äea. Ma ‘äe täla po‘ia ‘ạiröt‘ạkiag helavat se mȧür se ‘es a‘ofiga ‘e “rạnit ne leum ‘o.” (Mareko 10:28-30) Kop ma ‘e avat, ka iris ne fue‘kia ‘äe ‘e reko ‘ou pilifi la pola sạkiroa te ne Puk Ha‘a ‘ea ma leum la titi‘ạkiaris se Jihova.

20 Puk Ha‘a ‘ea ne ‘Ạitu täla a‘ofia rȧn raksa‘ te‘ ma iạ täla fu‘ȧk ta rȧn fo‘out ne ag nonojo la noho e ‘e fȧn puer ne ‘on Pure‘ag ta. (2 Pita 3:9, 13) Ma kota ma la ‘on rȧn helav tape‘it! La soko e la ma ‘on rot aier ‘eseat, ma titi‘ạkiag aier ‘eseat, ‘e rȧn fo‘out ne ag nonojo noho e. Ma tei ka te te‘is iạ te ‘atmại pạut la ‘äe la rue se‘ la leum la teag‘esea ma iris ne titi‘ȧk aire ‘e ‘on ‘i pạu hete‘?

TĒ NE PUK HA‘A ‘EA

  • Ma ‘on rot aier ‘eseat.—Mataio 7:13, 14.
  • ‘On rak‘ȧk te ma te ne iạ rere tä faki‘ogan rot aier ta.—Mataio 7:16, 17.
  • Jihova Uetnes ta titi‘ȧk ‘e salat ne ‘Ạitu tȧr ma a‘soko.—Aisea 43:10.

*  Ma ‘on te hoi‘ȧk fȧ‘ ‘e hün ne Papilon Ti‘ ta tä a‘tatạu‘ȧk se matantu ne rot sioksiko ‘e rȧnte‘, ‘io se ‘Onasoa.


SẠIO‘ NE RAK TA

1. La ‘es‘ao tapen se ‘isa kepoi ka ‘is la titi‘ȧk se ‘Ạitu ‘e salat ne nonojo?

2. ‘Is la ‘inea tapen sal nonojot la ‘is la titi‘ạki e se Jihova, ma a‘tatạu‘ȧk tes het tä na vạhia la ‘is la pola taf‘ia sin?

3. Tes tä Jisu ‘ea ‘is kop la re la ‘Ạitu la tȧr ma a‘sok ‘is?

4. Tes tä ‘on fuạg ne te ne Jisu ‘ea ‘e reko sal rua, ma iriạ a‘öf se tei?

5. ‘Is la po tapen la ‘inea‘ia iris ne mou se rotut ne aire?

6, 7. Tapen räe ‘on lelea‘ ea‘ ‘on ‘Ạitu se Puk Ha‘a, ma mạl tapen het tä Jisu kel‘ạki ‘e reko te te‘is?

8. Te tes ‘atama tä ‘is kop la re ‘e ‘os titi‘ạkiga se Jihova?

9, 10. Famör rot fakKaristo aire kel‘ȧk tapen ‘oris hạihanisiga?

11. Po ‘e tes tä iạ te ‘es‘aot la ‘is la aier‘ȧk ne Jisu Karisto iạ tä ‘Ạitu garue‘ạk la sại‘ạkia ‘is?

12. Tes tä ‘is re ‘e ‘os kat teag‘eseat ra ma rȧnte‘?

13. Tes tä räe ne tisaipel aier ‘on Jisu ‘e reko Pure‘ag ‘on ‘Ạitu, ma tes tä te ne iris re?

14. Rot tes tä ‘äe aier‘ȧk ne po ma re te‘ ne te ‘atakoa ne mou se titi‘ạkiag aire?

15. Ma tape‘ma se ‘os mā ma pilifi ne Iạ ‘Ạitu täe, tes hoi‘ȧk ta ‘Ạitu pa ‘es la ‘is la re se ia?

16. Tes tä ‘is la re ‘e reko tete ag‘esea ma rot sioksiko?

17, 18. Tes tä “Papilon Ti‘ ta,” ma ‘e reko teset famori kop la rue mij pạu la “hotoamus ‘e ia”?

19. Tes tä ‘äe la po ‘e ‘ou la agagat se Jihova?

20. Tes tä la sok se iris ne rot aire ‘e ‘on fakmuri?