HӦL SE TĒ ‘E ‘ON LALOGA

Skip to secondary menu

Skip to table of contents

Uetnes ‘on Jihova

Rotuạm ta

Ka Tes tä Puk Ha‘a ‘Ea Aire?

VÄE TĀ

Tes tä tē Aier ne Mou se ‘Ạitu?

Tes tä tē Aier ne Mou se ‘Ạitu?

Tei ka ‘Ạitu kokon‘ȧk aier ‘äe?

Iạ ‘Ạit tapenet? Tei ka iạ ma on asat?

Tei ka la pola hại‘eleag ma ‘Ạitu?

TAPEN ‘ou räe se vahia sạio‘ tē ‘on lä‘riri‘i? Iris ma‘oi sạio‘ tē ma ‘e avat ne iris kamat rak fäega e. ‘Oris mafa ra‘ sema se ‘äe ‘e pa ‘inea ma sạio‘ tē ‘i la fakse: Po ‘e tes tä lạgi jarava? Hefu rēem ‘e tese? Sei tä rak‘ȧk se mạnmạnu la suạ mak? Kop ma ‘äe la na ‘ou vahia la togia ‘oris sại‘o ka kat vavhian ra. ‘Ou tög a‘nonoj ne sạio‘ ta hele‘uen la iris la sạio‘ tē ma kikia: ‘E reko tese?

2 ‘Eake lä‘riri‘i ‘esea tä sạio‘ tē. Avat ne ‘is fupfupu e ‘is gat ke av sạio‘ tē. ‘Is re te te‘is la ‘is la ‘inea‘ia salat ne ‘is la la‘o e, la ‘is la rakoa la ‘inea la hȧ‘ạkia ‘is ‘e tē mamạru, ne la ‘inea a‘nonojoa tēet ne kat taf ra se ‘isa. Ka famör ma‘oi toak ‘e sạio‘ tē, a‘ti‘ se‘ se tē ne ‘es’ao. Iris toak ‘e pa ao tög ne sại‘o.

Le‘ mea‘mea‘ het sạio‘ te

3 Re a‘häe se sạio‘ het ne täe ‘e fạu ne puk hete‘is, ne sạio‘ ne täe ‘e ‘on‘amnȧki, ne ‘e kamatag ne väe te‘. Te‘is sạio‘ ‘es‘ao ‘e ‘on rerege ne ‘äe pōla sại‘o. Ka ne famör ma‘oi ravatia ‘e ao ne tög ne sại‘o. ‘E reko tese? Tei ka Puk Ha‘a ‘es ‘e tög ne sại‘o? Famör ‘e ‘on rerege a‘häe ne noanoa la ‘inea tög ne sại‘o. Iris ne tore kokon‘ȧk ne ‘oris sạio‘ tē la pola hö‘ masrag se irisa. Lelea‘ ‘e ‘on rerege re a‘häe ne sạio‘ tape‘ ta lelei la rou se famör puer ne rotu ma lelea‘ rak‘ȧk tē. Tapen se ‘äe?

4 Taf pạu ‘äe ‘oaf la ‘inea tög ne sạio‘ ne ‘es‘ao se ‘os mạuri. Kop ma av ma‘oi ‘äe rē a‘häe: ‘Tes tä ‘amnȧk ne mạuri? Tei ka mȧür te‘is tä‘ma‘ie? Iạ kainag ‘Ạit tapenet?’ Te leleit la ‘äe la na kạinag sạio‘ ‘i ma te ‘es‘ao pumuet la ‘äe la na vahia la ‘äe la aoa tög ne ‘es fuạg aier se ‘ou sại‘o. Jisu Karisto ne rog ‘e ‘on rak‘ȧk tē ‘ea: “ ‘Au la farfar ma, ma täla nāagea se ‘ausa; ‘au la aoao ma, ma ‘aus täla räea; ‘au la tüktük ma, ma täla säeagea se ‘ausa.”—Mataio 7:7.

5 Kepoi ka ‘äe la “aoao ma kikia” tög ne sạio‘ ‘es‘ao ‘i, ma ‘äe täla räea ‘on ‘es‘ao aire. (Fäeag ‘Es Fuạga 2:1-5) ‘Inea ne tes tä se tē ne famör ‘e ‘on rerege ‘ea se ‘äea, ka ma ‘on tög se ‘ou sại‘o, ma ‘äe la pola räe sin—‘e laloag ne Puk Ha‘a. Tög ne sại‘o kat noanoa ra se ‘is la ‘inea ‘on fuạga. ‘On lelei heta, tē ‘i ho‘am ‘ạiröt‘ạkiga ma ‘oaf‘ofa. Ma tē ‘og la pola hạiasoagan ‘äe la mȧür‘ạkia mȧür ‘oaf‘ofa ‘e ‘on ‘i‘i. La kamatan, ‘is la rē a‘häe se sạio‘ het ne a‘maksulua a‘häe ‘on famör ma‘oi.

TEI KA ‘ẠITU KAT KOKON‘ȦK TĒ RA MA KAT MÄEAV HANIS RA?

6 Famör ma‘oi a‘häe ne aier. Iris ‘ea ne ‘Kepoi ka ‘Ạitu,’ kokon‘ȧk ‘is, ‘ma tei ka rȧnte‘ la tape‘?’ ‘Is ‘io kạl‘ȧk ma räe ne rȧnte‘ hoi ‘e pelu, hạifekega, ma tē a‘rū. ‘Is ‘af‘af, ‘is noh mamauạ, ma iris ne ‘is hanis sin al. Kā, iris ma‘oi ‘ie ‘ea, ‘Ne kepoi ka ‘Ạitu kokon‘ȧk ‘is ma ‘os pefä‘e, ma tei ka iạ la fue‘ tē ‘i la sok?’

7 Ma a‘ti‘ua maksul ta, lelea‘ rak‘ȧk tē ne rotu hoa‘ tūan a‘häe ‘on famori ma ‘ea ne ‘Ạitu kat mäeav hanis ra. Ka pō tapen? ‘E avat ne tē raksa‘a soko e, iris ‘ea ne ta‘ag ‘amnȧk ‘on ‘Ạitu. Ma ‘e reko tē ne iris rak‘ạki, lelea‘ rak‘ȧk tē keu sar ta se ‘Ạitu ‘e reko tē raksa‘ ne soksoko. Tei ka tē ne iris ‘ea ‘e ‘Ạitu aier? Tes tä Puk Ha‘a ‘ea aire? Jemesa 1:13 tög ma ‘eag: “Kat lelei ra la ta le‘ la ‘eag, ‘e avat ne faksarat rē e se ia, ‘Ạitu tä faksaram se goua.’ Ko ‘äna noanoa la faksaran ‘Ạitu ‘e ta tē raksa‘, ma ia kat rē faksar ra se ta le‘.” ‘Eake ‘Ạitu tä hün ne tē raksa‘ ne soksok ‘e laloag ne rȧnte‘. (Jope 34:10-12) Kā, iạ fue‘ la tē raksa‘a la sok. Ka ma ‘on tūtū hiti‘ het ‘e ‘on fue‘iag la ta tēet la sok ma ‘on rēag ne ta tēet.

8 Kel‘ạkiag het, re a‘häe se ö‘fā hanisit ne ma ‘on le‘ fa haharạgit ne noh ma ‘on ö‘rua. ‘E avat le‘ ta agại e ma re puer ‘e iạ la roua iriạ, ö‘fā ta fue‘ iạ. ‘On le‘ ta hilia mȧür se lelei ma hele‘ la agtạu ma tē raksa‘a. Tei ka pefä‘ ne agtạu se ‘on le‘ ta sok hün se ‘on ö‘fā ta? ‘Igke‘. (Luke 15:11-13) La fakma, ne ‘Ạitu iạ kat fu‘ȧk ra famori ‘e ‘oris hiliạg ne tē raksa‘a, ‘eake iạ tä hün ne tē raksa‘a soko e. Aier, kat nonoj pạu ra, la famori la keu sar ta se ‘Ạitu ‘e reko pefä‘ ne agtạu se irisa.

9 ‘Ạitu ma ‘on hün lelei se ‘on fue‘iag la famori la la‘ ‘e sal se nonojo. Ma ‘e reko Iạ Ne Fup‘ȧk Tē, ne pot ka ne‘ne‘i, iạ kal a‘noa ra la sui‘ȧk ‘on huni se ‘isa. Ka po ‘e ‘on hanisi, ‘Ạitu rē tē te‘is. Väe 11 täla a‘tafan hün ‘i. Se maomao‘ạkia ne ‘Ạitu kat fup‘ȧk ra tē raksa‘ ne sok se ‘os mạuri. Ka tēet ne iạ rē, iạ nā se ‘isa ‘ạiröt‘ạkiag ‘eseat ne la a‘ofia pefä‘ ‘atakoa!—Aisea 33:2.

10 Te hoi‘ạkit, ‘Ạitu iạ ha‘ ka ma‘ma‘. (Aisea 6:3) ‘On fuạga iạ ‘atakoa ka ma‘ma‘. Kat ‘es tē raksa‘at ra ‘e iag. ‘Is pola tua‘nȧk pạu se iạ. Ka tē ‘i ‘is kal pora la ‘ea hün se ‘is famori, ne ‘e av ‘e ‘on rerege re ag se nonoj. Tape‘ma se iris ne täe ‘e fuạg pure ne kop ma garue nonoj ka kat ‘es ne‘ne‘ ra la a‘leleia raksa‘at ne famori rē. Ka ‘Ạitu ‘atakoa sema ‘on ne‘ne‘i. Iạ po sema, ma iạ la a‘lelei te raksa‘ ne soksok se famori. ‘E avat ne iạ a‘sok ‘on pure iạ la re ‘e salat ne la a‘öf fakapạua agmam‘asa.—Salamo 37:9-11.

KA TAPEN A‘HÄE ‘ON ‘ẠITU ‘E REKO PUER SE NONOJO?

11 Ka ‘e ‘on ‘i hete‘, tes tä räe ‘on ‘Ạitu ‘e reko tē ne soksok ‘e rȧnte‘ ma ‘e ‘ou mạuri? Puk Ha‘a ‘ea ne ‘Ạitu “‘oaf se puer nonojo.” (Salamo 37:28) Ma kel‘ȧk ne iạ kokon‘ȧk a‘ti‘ pạu tē noj ta ma tē se noj ta. Iạ fesiạ‘ pạu se tē se nonoj ‘atakoa. Puk Ha‘a ‘ea ne ‘Ạitu “‘on huga rū” ‘e tē raksa‘ ne kạlua rȧnte‘ ‘e ‘on mumua. (Kamataga 6:5, 6) ‘Ạitu kat jen ra. (Malakai 3:6) Iạ fesiạ‘ ma kikia se te mamauạ ne soksok ‘e rȧnte‘ ‘atakoa. Ma ‘Ạitu kat ‘oaf ra la famori la noh mamauạ. “Iạ noh a‘häe se ‘ausag,” Puk Ha‘a ‘ea tape‘.—1 Pita 5:7.

12 ‘Äe la ‘inea tapen ne ‘Ạitu kat ‘oaf ra la kel se te a‘ru ‘i? Te‘is aier‘ạkiag hoi‘ȧk. Puk Ha‘a ‘ea ne famori fup‘ȧk la ȧr se ‘Ạitu. (Kamataga 1:26) Ma ‘e reko te te‘is ‘is ma ‘os aglelei po ‘e ‘Ạitu ma ‘on aglelei tape‘ma. La fakse, avat ne tē a‘rū sok se famör ne ag nonojo ma tei ka ‘ou huga rū? Kepoi ka ‘ou huga rū ‘e reko tē se nonoj ‘i, ma fürmariạ ‘äe ‘e reko ‘Ạitu a‘häe‘ȧk a‘mah pạu te ‘i.

13 Tēet ‘e tē lelei pạu ‘on ‘is famori ‘is pola garue‘ȧk hanisi. Tē tā kel‘ạkim ‘Ạitu. Puk Ha‘a ‘ea ne “‘Ạitu hanisi.” (1 Jone 4:8) ‘Is hanis po ‘e ‘Ạitu hanis. Tei ka hanisi la pola rue‘ȧk ‘ou huga la ‘äe la a‘ofia mamaua ma puer se nonoj ne ‘äe kel ‘e rȧnte‘? Kepoi ka ‘äe ‘es ne‘ne‘ la rē tē ta‘ag, ma tei ka ‘äe la rē? Taf pạu ‘äe la rē tē ta‘ag! ‘Äe la pola aier‘ȧk pạu ne ‘Ạitu la a‘öf mamaua ma puer se nonojo. Fäeag reut ne fȧ‘ ‘e ‘on‘amnạki ne puk hete‘ ‘eake re mose ne ‘ạiröt‘ạkiag väväre. Fäeag reut ‘on ‘Ạitu kop la sok la fakma se ‘on ‘amnạki! ‘Äe kop la rak la ‘inea tē ma‘oi hoi‘ȧk ne mou se ‘Ạitu, ne fup‘ȧk tē ‘i, la pola ‘äe la mā ma pilif se ‘on fäeag reut ‘i.

‘ẠITU PA ‘ES LA ‘ÄE LA ‘INEA NE SEI TÄ IẠ

14 Kepoi ka ‘äe pa ‘es la ‘inea a‘lelei pạu ta le‘et, ma tes tä ‘äe la rē? Tei ka ‘äe kal rak‘ȧk ra ‘ou ‘asa se famör ta? Tei ka ‘Ạitu ma ‘on asat? Famör rot ma‘oi tög sạio‘ te‘ ma ‘ea ‘on as ta “ ‘Ạitu” ne “Gagaja,” ka te‘i ‘eake as. Fūạg ‘i, la fakse “sạu” ne “peresiten.” Puk Ha‘a ‘ea ne ‘Ạitu ma ‘on fūạg ma‘oi. La fakse “‘Ạitu” ma “Gagaja.” Kā, Puk Ha‘a ‘ea tape‘ma ne ‘Ạitu ma ‘on asat: Jihova. Salamo 83:18 ‘ea: “La iris la ‘inea e ne ‘äe ‘esea tä purer se‘ ‘e rer ne rȧn te‘ ‘Atakoa. Ko ‘äe ne he‘ ‘ou asa Jihova.” Kepoi ka ‘ou Puk Ha‘a kat ‘es ra ‘e as ta, ‘äe la pola ‘io se ‘Onasoa. ‘On aire as ‘on ‘Ạitu no‘ȧk a‘äf his ‘e puk ne Puk Ha‘a ne fȧ‘ si‘ ‘e ‘on tạusa. Ma Jihova pa ‘es la ‘äe la ‘inea ‘on asa ma la garue‘ȧk. Te ne iạ re, iạ a‘es‘ao‘ạkia Puk Ha‘a la ‘äe la ‘inea iạ.

Hạnit rak‘ạkia sei iạ

‘E avat ne ‘äe pa ‘es la le‘et la ‘inea ‘äe, tei ka ‘äe kal rak‘ȧk ra ‘ou asa? ‘Ạitu kel‘ȧk ‘on asa se ‘isa ‘e Puk Ha‘a

15 ‘Ạitu nā vạhia se ia asat ne ‘es fuạg pạu. ‘On as ta Jihova, ‘on fuạga ‘Ạitu la pola a‘sokoa fäeag reutut ma ne iạ rē ma la pola re‘ia tēet ma ne ‘on huga värvär sin.* Kat ‘es ra ta as tape‘ hoi‘ạkit, as ta mou ma se ‘Ạitu ‘esea. Jihova kat ‘es ạ‘tatạu‘ạkiget ra. Ka pō tapen?

16 ‘Is räe ne Salamo 83:18 ‘ea ‘e reko Jihova: “ ‘Äe ‘esea tä purer se‘ ‘e rer ne rȧn te‘ ‘Atakoa.” Tape‘ma, Jihova ‘esea tä “ ‘atakoa se ma ‘ou ne‘ne‘i.” Kel‘ȧk Tē 15:3 ‘eag tape‘: “Titi‘ ka a‘ferehit ‘ou gargarue, ko Gagaj ‘Ạitu, ‘äe ne ‘atakoa se ma ‘ou ne‘ne‘i! Nonoj ka aier te‘ ne ‘ou sala, ko Sau ne te‘ ne ava!” ‘On fūạg heta “‘atakoa se ma ‘ou ne‘ne‘i” rak‘ȧk se ‘isa ne Jihova iạ ‘esea het te mȧür ne‘ne‘ pạut. ‘On ne‘ne‘i kat pora la a‘tatạu‘ȧk se ta tēet, iạ lamlam pạu sema. Ma ‘on fūạg heta “sạu ne te‘ ne ava” a‘häe‘ạkim se ‘isa ne Jihova iạ ‘esea het tape‘ma ‘e ta hün hoi‘ȧk het. Iạ ‘esea het kat ‘es a‘ofiget ra. Salamo 90:2 ‘ea tape‘: “‘E av se ‘es kamatagat ne ofiofu, ma hele‘ se av se ‘es gata‘agat ne tore, ‘äe ‘Ạitu.” A‘häe ta‘ag rue‘ȧk ‘os huga la fea se ia.

17 Jihova iạ tape‘ma iạ ‘esea het, ‘e reko iạ ‘esea het tä Fup‘ȧk Tē Ta. Kel‘ȧk Tē 4:11 ‘eag: “ ‘Äe tau, ko ‘otomis Gagaja ka ‘otomis ‘Ạitu [“Jihova,” NW] la ‘äe la tạria kolori ma faktē‘ạkiga ma ne‘ne‘i; ne ‘äe tä fup‘ạkim te‘ ne tē ‘atakoa, ka ‘oris noho ma ‘oris fup‘ạki hün ma se fiongar ‘on‘ou!” Te‘ ne tē ne ‘äe pola a‘häe‘ạkia—kamat ‘e tē fak‘at ne fup‘ạki ‘e hevạni ne ‘äe kat pora la räe sin se hef ne lạgi se hue ne ‘ại tūtū se iạ‘ ne sạsi ma sạfu—te‘ ne te ‘atakoa ‘i mȧür hün ma se Jihova tä Fup‘ȧk Tē Ta!

TEI KA ‘ÄE LA POLA ‘EL SE JIHOVA?

18 Hatag ne tē a‘ferehit ka ne‘ne‘ ne täe ‘e Jihova famör ‘e ‘on rerege araruạ. Iris fea‘ȧk ne ‘Ạitu lamlam sirien ma iris kal po pạu ra la ‘ut a‘el se ia ne, ma ‘on ‘es‘ao het se ‘Ạitut ne lamlam pạu. Tei ka a‘häe te‘is noj? Puk Ha‘a ‘ea tēet ne kat salag ‘esea ra ma ‘oris a‘häe. Te‘is tēet ne Puk Ha‘ ‘ea ‘e reko Jihova: “Tē aire, ia kat sousou ra ‘e te‘ ne ‘is tūtū.” (Garue 17:27) Puk Ha‘a fas‘ȧk se ‘isa: “‘Au la ‘ut a‘eleaf se ‘Ạitu, ma ia täla ‘ut a‘elemea se ‘ausag.”—Jemesa 4:8.

Puk Ha‘a rak‘ȧk ne Jihova Iạ tä Fup‘ȧk Tē mäeav hanisit ne fup‘ȧk sio lạgi ma rȧnte‘

Fupȧk te ‘on ‘Ạitu

19 ‘Äe la po tapen la ‘ut a‘el se ‘Ạitu? Te‘is mumuạ ne tē, re‘ia ma kikia tēet ne ‘äe rērē ‘e ‘on ‘ihete‘—‘ou rakoag ne ‘Ạitu. Jisu rak‘ȧk: “Ma mȧür se ‘es gata‘aga te‘is: la iris la ‘inea ‘äe, ‘Ạit aier ‘esea ta, ma ia ne ‘äe fekạu‘ạkimea, Jisu Karisto.” (Jone 17:3) Te aire, Puk Ha‘a ‘ea ne ‘e ‘os rakoag ne Jihova ma Jisu la ho‘am se ‘is “mȧür se ‘es gata‘aga”! La fakma ne ‘ea vȧh, “ ‘Ạitu hanisi.” (1 Jone 4:16) Jihova tape‘ma ma ‘on aglelei ma‘oi pạu. La fakma se tē ne Puk Ha‘a ‘ea ne Jihova, iạ “‘Ạitut ne puer hanis ma ag figalelei, fek fep, ka fuạmamạu ‘on mäeav hanisi ma ‘on aire.” (Sại‘ạkiga 34:6) Iạ “ag lelei ka ‘oaf la fạu‘ȧk ag raksa‘a.” (Salamo 86:5) ‘Ạitu huạg lal. (2 Pita 3:9) Iạ ag nonoj. (Kel‘ạk Tē 15:4) Ma ‘e ‘ou hatag ne tē ma‘oi hoi‘ȧk ne täe ‘e Puk Ha‘a, ‘äe täla räe se Jihova ‘on kel‘ạkiag ne ‘on aglelei pumua.

20 Tē aire, ‘äe kal pora la kel se ‘Ạitu ‘e reko iạ ‘ata. (Jone 1:18; 4:24; 1 Timoti 1:17) Ka ‘e ‘ou rakoag ne iạ ‘e rạupeap ne Puk Ha‘a, ‘äe la pola ‘inea ‘Ạitu la fakse iạ famorit. Fakma ne Salam ta ‘eag, ne ‘äe la po sema “la kel se helav ‘on Jihova.” (Salamo 27:4; Roma 1:20) ‘On ti‘ ne tē ne ‘äe rak hün se Jihova, täe ‘on ti‘ ne ‘on aire se ‘äea, ma täe hün lelei pạu het la ‘äe la hanis se iạ ma noh hại‘eleag ma iạ.

Ö‘faat ma ‘on le‘ fa mea‘me‘at

Hanisit ne täe ‘e huạg ‘on ta ö‘fā hanisit se ‘on lele‘a kel‘ạkim hanis ti‘ut ne täe ‘e ‘os Ö‘fā faklạgi se ‘isa

21 ‘Äe täla ‘inea‘ia hün ne Puk Ha‘a ‘ea la ‘is la a‘häe se Jihova la fakse ‘os Ö‘fāat. (Mataio 6:9) ‘Eake ‘os mạuri ‘esea ne takam ‘e ia ma tä‘ma‘ie, ka iạ pa ‘es la ‘is la mȧür‘ȧk ta kạinag mȧür helav pạut—la fakse ö‘fā mäeav hanisit ‘on pa ‘ese se ‘on lele‘a. (Salamo 36:9) Puk Ha‘a ‘ea tape‘ma ne ‘is famori pola kạinag [“kạumane‘ag,” NW] ‘on Jiova. (Jemesa 2:23) Re a‘häe sin—‘äe la po sema la kạumane‘ag ‘on Iạ ne Fup‘ȧk se‘ lạgi ma rȧnte‘!

22 Ma ‘e ‘ou rakoag ma kikia ne Puk Ha‘a, kop ma famör ‘e ‘on rerege ne kat a‘häe raksa‘ ra la has‘ȧk se ‘äea la roua ‘ou hat puk ta. Iris kop ma la kokon‘ȧk nono ma ‘äe roua ‘ou mā ma pilifi. Ka se aier‘ạkia ta le‘et la fu‘ạkia ‘ou pa re kạumane‘ag ma ‘Ạitu, ta‘ag tē pumuạ pạut ne ‘äe la pola ‘ese.

23 Te aire, ‘äe kal ‘inea a‘lelei ra tē ‘e ‘on rerege ‘e ‘on kamatag heta. Ma ‘eake te vavhine la far hạiasoag, ka ‘äe se masrag. Jisu ‘eag ne te leleit la ‘is la huạg vạivại, la fakse ta le‘ mea‘me‘at. (Mataio 18:2-4) Ma la‘riri‘i, ‘is ‘inea, sạio‘ tē ma‘oi pạu. ‘Ạitu pa ‘es la ‘äe la ‘inea‘ia ‘on togi. Puk Ha‘a voi‘ȧk ‘iris ‘e ‘on rerege ne pa ‘es pạu la ‘inea ‘Ạitu. Iris sạkior a‘lel se Puk Ha‘a la iris la ‘inea a‘leleia ne tē ne iris rakrakoa tä aier ta.—Garue 17:11.

24 Sal pumuạ pạut ‘e ‘ou la rakoag ne Jihova la ‘äe la sạkiroa Puk Ha‘a. Iạ kat tatạu ra ma ta puk hoi‘ȧk het. ‘E reko tese? Väet ne tohim täla rak‘ạkim.

TĒ NE PUK HA‘A ‘EA

  • ‘Ạitu kokon‘ȧk pạu ‘äe.—1 Pita 5:7.
  • As ‘on ‘Aitu Jihova.—Salamo 83:18.
  • Jihova ‘ihia ‘äe la ‘ut a‘eleaf se ia.—Jemesa 4:8.
  • Jihova meav hanis, ag figalelei ka puer hanis.—Sại‘ạkiga 34:6; 1 Joni 4:8, 16.

*  Ma ‘on tē hoi‘ȧk fạ‘im ‘e fuạg ma ‘ea‘ea ne as ‘on ‘Ạitu ne fȧ‘ ‘e ‘Onasoa.


SẠIO‘ NE RAK TA

1, 2. Tes tä ‘on ‘es’ao ne sạio‘ tē?

3. Hün se teset famör ma‘oi toak ‘e pa ao tög ne sạio‘ ‘es‘ao ‘i.

4, 5. Tes tä sạio‘ ‘es‘ao pạu ‘e ‘on rerege ne ‘is pa sạio‘ ‘e ‘os mạuri, ma hün se teset ‘is kop la aoa ‘oris togi?

6. Hün se tese famör ma‘oi a‘häe ne ‘Ạitu kat kokon‘ȧk tē ra ‘e reko pefä‘ ne soksoko?

7. (a) Lelea‘ rak‘ȧk tē ne rotu muạ‘ȧk tapen ‘oris famori la a‘häe ne ‘Ạitu kat mäeav hanis ra? (b) Tes tä Puk Ha‘a rak‘ȧk aier hün se ȧsȧs ne la agtạu se ‘isa?

8, 9. (a) ‘Äe la a‘taf tapen ‘on tūtū ne la fue‘ la raksa‘a la fup, ma ‘on reag ne tē raksa‘ ‘i? (b) Po ‘e tes tä kat nonoj ra la ‘is la fakmer rē puer ‘on Jihova ‘e ‘on la fue‘ la famori la la‘la‘ ‘e salat ne kat nonoj ra?

10. Hün se teset ‘is pola tua‘nȧk ne ‘Ạitu pola a‘leleia tē raksa‘ ne soksoko?

11. (a)Tapen a‘häe ‘on ‘Ạitu se tē se nonojo? (b) Tapen a‘häe ‘on ‘Ạitu se ‘ou noh mamaua?

12, 13. (a) Hün se tes tä ‘is ma ‘os aglelei la fakse hanisi, ma tes tä hanisi pola rē se ‘isa ‘e ‘os räe hün se rȧnte‘? (b) ‘Äe la aier‘ȧk tapen ne ‘Ạitu la re ta tēet se pefä‘ ne rȧnte‘?

14. Sei tä as ‘on ‘Ạitu, ma po ‘e teset ‘is kop la a‘es‘ao‘ȧk ‘on asa?

15. Tes tä ‘on fuạg ne as ta Jihova?

16, 17. Tes tä ‘is pola rak ‘e Jihova ‘e ‘on fūạg ‘i: (a) “‘Ạit Purer Ta”? (b) “‘Ạit ne Te‘ ne Ava”? (c) “Iạ Tä Fup‘ȧk Tē”?

18. ‘E reko teset famör ‘e ‘on rerege a‘häe ne iris kal pora la ‘ut a‘el se ‘Ạitu, ka tes tä Puk Ha‘a ‘ea?

19. (a) ‘Is la kamat tapen la ‘ut a‘el se ‘Ạitu, ma tes tä ‘on ‘es‘ao? (b) Ag pumuạ teset ‘on ‘Ạitu tä ‘äe ‘oaf sin?

20-22. (a) Tei ka ‘os kat räet se ‘Ạitu fu‘ạkia ‘äe ‘e ‘ou hại‘elegat ma iạ? Sui‘ạkim. (b) Tes tä famör ne kat ‘amn‘ȧk raksa‘ ra has‘ȧk la ‘äe la rē, ma tes tä ‘äe nonoj la rē?

23, 24. (a) Hün se teset ‘äe kop la fa‘ sạio‘ tē ma kikia ‘e tē ne ‘äe rakrakoa? (b) Tes tä filo‘ ne väet ne tohim?