TAPEN se nono ka ‘äe ke joniou ‘e ta famör al‘ȧk tēet. Iạ ne‘ne‘ se‘ ma väo se‘ ‘e ‘äea. ‘Äe ‘inea vạhia ne iạ kat ‘es ra ta hanisit ‘e reko ‘äe räe vạhia se ‘on al‘ạkiag ne ‘ou kạumane‘ag ‘e ‘on rerege. Ma ‘e ‘ou fe‘eni la a‘sousou pạu ‘e iạ, ka iạ ‘ut ma kikia la ‘el pạu. ‘Äe ‘inea vạhia ne ‘äe kal sại ra. Ka ‘äe ne ferehit sema, ‘e reko, famorit no‘ ‘e hitim la sại‘ạkia ‘äe. Iạ ne‘ne‘ se‘ ‘e ‘ou fir ta, ma iạ fäeag reut la sại‘ạkia ‘äe. Tapen se fürmariet ne sok se ‘ou huga!

² ‘Is tape‘ma kal pora la sại ‘e kạinag fir te‘is. Te‘ ne famör ‘atakoa la fakma sin. Ma ‘e ‘os rakoag ‘e väet ne vȧh se‘, Puk Ha‘a ‘ea ne ala, iạ firi. Kat ‘es ra ta le‘et la pola sại ne la agạia iạ. Ma‘oit ‘e ‘isa kel vạhia se fir te‘is ‘e ‘on poag ne mȧür ‘on iris ne ‘is hanis sin. Ka Jihova ne‘ne‘ se‘ Iạ ‘e ala. Iạ tä Sại‘ȧk Te hanisit ne kel‘ȧk vạhia ne iạ la pola fakrava fir ta la sại‘ạkia ‘äe. Ma iạ fäeag porȧk vahia la a‘öf pạu fir te‘, ala, ma kal sok hoi‘ȧk ra. Puk Ha‘a rak‘ȧk: “On fakmür ne firit ne ia täla fakravā, ala.” (1 Korinita 15:26) Ta‘ag rogrog a‘fạiạg lelei pạut!

³ ‘Is la sạkior a‘lelei ne täe tapen se ‘isa fir te‘ ala, ‘e avat ne iạ hele‘ume. ‘On la reag ne te te‘is pola hạiasoagan ‘is la tȧr ‘e huạg ‘ofa tēet ne la ho‘am se ‘isa fürmaria. Jihova fäeag porȧk ne famör ala la mȧür hoi‘ȧk. (Aisea 26:19) Iris täla fu‘ȧk hoi‘ạkimea se mạuri. Ta‘ag ‘ạiröt‘ạkiget se fū hoi‘ạkiag ta.

AVAT NE KẠUMANE‘AG ‘ELHET ATIA

⁴ Tei ka ‘äe ma le‘et ‘äe hanis sin ka atia? ‘Äe kat vahia ra la tạria rū, ma hanono, ne täe ‘e ‘ou huga. ‘E av heta‘ag, ‘is kop la Fäeag ‘on ‘Ạitu ne la na se ‘isa furmaria. (2 Korinita 1:3, 4) Puk Ha‘a hạiasoag se ‘isa la ‘inea‘ia ne tapen a‘häe ‘on Jihova ma Jisu ‘e reko ala. Jisu, ne ‘atakoa‘ȧk sema ‘on Ö‘fa ta, ‘inea rū ne agtạu ‘e avat ne le‘et ala e. (Jone 14:9) ‘E avat ne iạ ‘e Jerusalemi, Jisu a‘mou ȧs se Lasarusa ma ‘on sạsiạg hȧn he rua, Meri ma Marita, ne noh ‘eleaf se taon het ‘e Petania. Iris kạumane‘ag hại‘eleag pạu. Puk Ha‘a rak‘ȧk: “Jisu hanis se Marita, ma se ‘on sạsiag he ta, ma se Lasarusa.” (Jone 11:5) ‘Is rak vạhia ‘e väet ne vȧh se‘, ne Lasarusa iạ al.

⁵ Tapen a‘häe ‘on Jisu ‘e avat ne ‘on kạumane‘ag heta ala e? Te ne fạ‘i rak‘ạkim se ‘isa ne Jisu leum la tȧr rū ag‘esea ma kạinag ma kạumane‘ag ‘on Lasarusa ‘e ‘on alaga. ‘E ‘on keleag se irisa, Jisu hoi ‘e hanisi. Ia “rū ‘e ‘on huga, ka ruerue.” Ma te ne fạ‘i rak‘ȧk, “Jisu ‘on sui ne mafa huạr.” (Jone 11:33, 35) Tei ka rū ne ‘on huga kel‘ȧk ne iạ kat ‘es ra ta ‘ạiröt‘ạkiget? ‘Igke‘. Taf pạu, Jisu ‘inea vạhia ne ma ‘on te pumuet täla sokoana. (Jone 11:3, 4) Ma ‘e reko te ne ösös la soko, ka ‘on huga rū ma kokon ‘e avat ne ala hele‘ume.

⁶ Rū ne huạg ‘on Jisu a‘ne‘ne‘ạkiget se ‘isa. Iạ rak‘ȧk se ‘isa ne Jisu ma ‘on Ö‘fa ta, Jihova, fesiạ‘ se ala. Ka Jihova ‘Ạitu po sema la fakravāan fir ta! ‘Is la ‘io se tē ne Jisu la re ‘e reko ne‘ne‘it ne ‘Ạitu na se iạ.

“LASARUAS, HOTOM ‘ÄE!”

⁷ Lasarusa tak‘ȧk se laloag ‘anat, ma tä Jisu far‘ȧk la ‘ut‘ạkia hạfut ne pa‘ȧk se nu‘suạr ne ‘an ta. Marita kat kạu‘ȧk ra ‘e reko terȧn häk vȧh‘ia, ma kop ma for ‘on Lasarusa kamatan la par. (Jone 11:39) Se räe ‘on famori, iris ‘ea ka tes tä ‘on ‘esao?

⁸ ‘E avat hạf ta ‘ut‘ạki e, ma Jisu ‘oho ‘e ta lio ti‘ut: “Ko Lasaruas, hotom ‘äe!” Tes tä soko? “Ma ia ne ala hot se‘.” (Jone 11:43, 44) Tei ka ‘äe la pola a‘häe se ‘ofat ne tạu se famori ‘e täe? Hensạsiag ma kạinag ma kạumane‘ag ‘on Lasarusa, ‘inea ne iạ atia. Ka iạ te‘is—ne iris hanis sin hotomea. Kop ma la noanoa la aier‘ạkia te a‘helavat ne soko. Iris ma‘oi kạp se iạ ‘e ti‘ ne ‘oris ‘ofa. Kotä ma fakrava‘ạkiget se ala!

⁹ Jisu kat huạg pa ti‘ ra la ‘ea ne iạ re garue man te‘is ‘e ‘on ne‘ne‘i. ‘E ‘on ro‘ạitu mumuạ la iạ la he‘ Lasarusa, iạ kel‘ȧk a‘taf ne Jihova tä Hū ne fū hoi‘ạkiag ta. (Jone 11:41, 42) ‘Eake te‘ ma av het ne Jihova a‘es‘ao‘ȧk tape‘ ‘on ne‘ne‘i. Fū hoi‘ạkiag ‘on Lasarusa iạ tēet ‘e garue man siạv ne fȧ‘ ‘e Fäeag ‘on ‘Ạitu.* Iạ te ne ‘ofat se ‘isa la hat ma rakoa te ne fȧ‘ sio. Te ‘i rak‘ȧk se ‘isa ne ‘Ạitu kat puer hil ra, ‘e reko iris ne la fu‘ȧk hoi‘ạki, lelea‘ haharȧg ma mamfuạ, fa ma hạiạn, lelea‘ ‘Isirel ma iris ne ‘eake lelea‘ ‘Isirel. Ma kạinag ‘oaf‘oaf tapenet tä kel‘ạkim ‘e väe ne puk hete‘! La fakma ne, ‘e avat ne Jisu fu‘ạki e le‘ hȧn het ‘e ala, ‘on ö‘rua “ferehit ‘e ta ferehit ti‘.” (Mareko 5:42) ‘I, Jihova na‘ia se irisa hū ne ‘oaf aire ne iris kat pora la mao‘ạkia.

¹⁰ Aier, iris ne Jisu fu‘ȧk hoi‘ȧk se‘ al hoi‘ȧk. Tei ka ‘on fuạg ne fu‘ȧk hoi‘ȧk ne iris ‘i ‘e ala kat ‘es‘ao ra? ‘Igke‘. Te ne fȧ‘ ‘e Puk Ha‘a aier‘ȧk se ‘isa te ‘es‘ao aire ma nāam se ‘isa ‘ạiröt‘ạkiga.

RAKOA ROGROG NE FŪ HOI‘ẠKIAG TA

¹¹ Puk Ha‘a ‘ea ne iris ne atia “kat ‘inea ra ta tēet.” Te ne fȧ‘ ‘e reko Lasarusa aier‘ȧk te te‘is ne aier. ‘E avat ne iạ mȧür hoi‘ạki e, tei ka Lasarusa a‘oaf huạg ‘on famori ‘e ‘on fäeag‘ạkiag ne hevani? Ne tei ka iạ a‘fea ‘oris huga ‘e rogrog mamạr ne susunut ‘e Heli? ‘Igke‘. Puk Ha‘a kat fȧ‘ ra ne Lasarusa ‘ea ta te tape‘it. ‘E terȧn häk ‘atakoa ne iạ ala, ia “kat ‘inea ra ta tēet.” (Le‘ Marag ta 9:5) Lasarusa mosean ‘e ala.—Jone 11:11.

¹² Te ne fȧ‘ ‘e reko Lasarusa rak‘ȧk tape‘ma se ‘isa, ne fū hoi‘ạkiag ta iạ te airet, ka ‘eake hanuju. Jisu fu‘ȧk hoi‘ȧk se‘ Lasarusa ‘e muạ ‘on iris famör ne tạunạ‘i. Ma iris famör muạ‘ȧk rotu ne fesiạ‘ se Jisu, aier‘ȧk pạu ne te te‘is sok aier. Ka, iris ‘ea: “Ka tes tä la ‘is la rē? ‘Äna famör te‘is rērē faki‘oag man ma‘oi?” (Jone 11:47) Famör ma‘oi la‘ la kel ‘e fāat ne fu‘ȧk hoi‘ȧk se‘. ‘E reko te ne soko, famör ma‘oi pạu mā ma pilif se Jisu. Iris räe ne fū hoi‘ạkiag ‘on Lasarusa, aier‘ȧk ne ‘Ạitu tä fekạu‘ạkim Jisu. Aier‘ạkiag te‘ hele‘uen la te ‘es ne‘ne‘it ma iris lelea‘ Jiu muạ‘ȧk rot ne huạg ne‘ne‘i hạifäegag la al‘ạkia Jisu ma Lasarusa.—Jone 11:53; 12:9-11.

¹³ Tei ka iạ te väväret ‘os la tạriạg ne fū hoi‘ạkiag ta? ‘Igke‘, ‘e reko Jisu rak‘ȧk vȧh ne ma ‘on terạnit “te‘ ne iris ‘atakoa ne täe ‘e fạmuạg ne a‘häe‘ạkiga” la fu‘ȧk hoi‘ȧk. (Jone 5:28, NW) Jihova tä Hū ne mạuri. Tei ka noanoa la aier‘ȧk ne iạ po sema la na hoi‘ȧk mạuri? La po sema, te ‘i täe kikia ‘e te ne Jihova a‘häe‘ạki. Tei ka ia la pola a‘häe‘ạkia iris ne atia ka ‘is hanis sin? Piliön hisaghul ‘atakoa ‘e hef ne lạgi, ka ‘Aitu na ‘atakoa ‘oris as tutu! (Aisea 40:26) Ma ‘Ạitu Jihova po sema la a‘häe‘ạkia te‘ ne te ‘atakoa ne täe ‘e iris ne atia ka ‘is hanis sin, ma iạ pola na hoi‘ȧk se irisa mạuri.

¹⁴ Tapen a‘häe ‘on Jihova ‘e ‘on la fu‘ȧk hoi‘ȧk ne iris ne ala? Puk Ha‘a ‘ea ne ‘on huga ririạf la fu‘ȧk hoi‘ȧk se‘ famör ala. Fa agnonoj ta Jope sạio‘: “Kepoi ka ta famorit la al ma, ma tei ka ia la pōla mȧür hoi‘ạkim?” Jope fäeag‘ạkia ‘on noh tạrit ‘e famuag ne a‘häe‘ạkiga la hele‘ se avat ne ‘Ạitu ‘on la a‘häe‘ạkiạg ne iạ. Iạ ‘ea se Jihova: “Ma kotä ‘äe he‘om se goua ma gou togiof, ma ‘äe täla fürmaria hoi‘ȧk se gou, ne ‘äe fup‘ạkim.”—Jope 14:13-15.

¹⁵ A‘häe‘ȧk! Jihova pa ‘es pạu la a‘mạuria famör ala. Tei ka hanisi kat pupuạ ra ‘e ‘äea ‘e ‘ou rakoag ne Jihova a‘häe tape‘? Tapen se fū hoi‘ạkit ne la re ‘e avat ‘ut‘utum ‘og? Sei täla fu‘ȧk hoi‘ạki ma la re ‘e tei?

“TE‘ NE IRIS ‘ATAKOA NE TÄE ‘E FẠMUẠG NE A‘HÄE‘ẠKIGA”

¹⁶ Rogrog ne fū hoi‘ạkiag ta ne fȧ‘ ‘e Puk Ha‘a, rak‘ạkim fū hoi‘ạkiget ne ta‘ kankanam ‘og. Famör ne fu‘ȧk hoi‘ȧk se mạuri ‘e rȧnte‘ la hạipoag hoi‘ȧk ma iris ne iris hanis sin. Fū hoi‘ạkiget ne ta‘ ‘ut‘utum ‘og la tatạu sema ka la lelei se‘. La fakse te ne ‘is rak vạhia ‘e Väe 3 ta, ‘amnȧk ‘on ‘Ạitu la rȧnte‘ ‘atakoa la parataisi. Ma iris ne ala kal fu‘ȧk hoi‘ȧk ra se rạnit ne hoi ‘e pelu, raksa‘a, ma ‘af‘afa. Iris la po ạlạlum‘ạkiga la mȧür fürmaria ma ‘oaf‘oaf ‘e rȧnte‘ ma kal ‘es tohiget ra.

¹⁷ Sei täla fu‘ȧk hoi‘ạki? Jisu ‘ea “te‘ ne iris ‘atakoa ne täe ‘e fạmuạg ne a‘häe‘ạkiga la a‘fại se ‘on lio [Jisu] ma iris täla hotomea.” (Jone 5:28, 29, NW) Ma la fakma se, Kel‘ȧk Tē 20:13 ‘ea: “Ma sạsi nā se‘ te‘ ne lelea‘ al ne nōnō ‘e ‘on laloga: ma ala ma ‘oroi ta [“hetesi,” NW] na se‘ tē ne lelea‘ al ne nōnō ‘e iria.” “Ala” ma “Oroi ta [“hetesi,” NW] fuạg ‘esea ma—fạmuga. (‘Io se ‘Onasoa.) Fạmuga la taftaf. Famör piliön hisaghul ne täe ‘e fạmuga la mȧür hoi‘ȧk. Apostol ta Paula ‘eag: “Ne täla sokoana ta fū hoi‘ạkiag se‘ ‘on famör nonojo ma famör se nonojo tape‘ma.” (Garue 24:15) Tes tä ‘on fuaga?

¹⁸ “Famör nonojo” ta iris famör ma‘oi ne ‘is hat ‘e Puk Ha‘a ne mȧür mumuạ la Jisu la leum se rȧnte‘. ‘Äe la a‘häe se Noa, Eprahama, Sera, Ruti, Esteri, ma iris ma‘oi hoi‘ȧk. Iris fa ma hạian ‘i ne fumou ‘oris pilifi täe fäeag‘ȧk ‘e Hiperiu väe 11 ta. Ka “famör nonojo” iris tape‘ma lelea‘ ea‘ aier ‘on Jihova ne al ‘e ‘on ‘i‘i. ‘Is ‘uạ‘uạ‘ȧk ‘e reko ‘ạiröt‘ạkiag ne fū hoi‘ạkiag ta, ‘is tokana ‘e la fea ‘e ala.—Hiperiu 2:15.

¹⁹ Tapen se iris famör ‘atakoa ne kat agag ra ne noh a‘fai se Jihova ‘e reko iris kat ‘inea ra Aitu? Iris famör piliön his “se nonojo” kal mao ra. Iris ‘i tape‘ma la fu‘ȧk hoi‘ȧk ma la na se irisa ta av het la rakoa ‘Ạit aier ta, ma agag se ia. Ma ‘e laloag ne fạu äfet, iris ne ala la fu‘ȧk hoi‘ȧk, ma la na se irisa la teag‘esea ma iris famör ne mā ma fumou ‘e rȧnte‘ ‘e ‘oris agagat se Jihova. Iạ la av ne ‘oaf‘ofa. Av hete‘ tä Puk Ha‘a rak‘ȧk ne iạ ta Terȧn A‘lel ta.^#

²⁰ ‘On fuạga te‘ ne famori la fu‘ȧk hoi‘ȧk? ‘Igke‘. Puk Ha‘a ‘eag ne iris ‘e ‘on rerege ne ala täe ‘e “Kihena.” (Luke 12:5) As ta Kihena ho‘am ‘e utut ‘e fạ‘ ne pā te Jerusalem ne roa ta ne na sin moaf ‘atakoa. Famör ala ma mofa susun ‘e täe. Famör al ne kir‘ȧk se täe lelea‘ Jiu a‘häe‘ȧk ne iris kal a‘noa ra la fạm ma kal pora la fu‘ȧk hoi‘ȧk. Ma Kihena iạ a‘tatạu‘ȧk nonoj pạu se a‘raksa‘ạkiget ne a‘öf pạu. Te aire Jisu la ma ‘on väegat ‘e a‘leleag ne iris ne mạuri ma ala, ka Jihova iạ tä Gagaj Puer ta. (Garue 10:42) Iạ kal fu‘ȧk hoi‘ȧk ra iris ne iạ ‘inea mam‘as ma kal ‘oaf ra la jen.

FŪ HOI‘ẠKIAG ‘ON IRIS NE LA LA‘ SE HEVẠNI

²¹ Puk Ha‘a fäeag‘ạkia kạinag fū hoi‘ạkiag hoiakit, la iạ la te fak‘at fup‘ạki ne la mȧür ‘e Hevạni. Kạinag fū hoi‘ạkiag te‘is ne rak‘ȧk ‘e Puk Ha‘a, tä Jisu Karisto.

²² ‘E vạhiag ne alag ‘on Jisu, Jihova kat fue‘ ra ‘On Le‘et ne aier se iạ la noh ‘e tamura. (Salamo 16:10; Garue 13:34, 35) ‘Ạitu fu‘ȧk hoi‘ȧk Jisu, ka kat fakfamör ra. ‘Apostol ta Pita ‘eag ne Karisto ta “ne al‘ȧk ia ‘e foro, ka rē‘ia la mȧür ‘e ‘ata.” (1 Pita 3:18) Te te‘is iạ te man ti‘ ka aier pạut. Jisu mȧür hoi‘ȧk la ‘at ne‘ne‘it! (1 Korinita 15:3-6) Jisu ta famör mumuet ne po‘ia ‘on tā ne fū hoi‘ạkiag a‘kölör‘ȧk te‘. (Jone 3:13) Ka ‘eake tä‘ma fū hoi‘ạkiạg te‘.

²³ Jisu ‘ea se iris ne tạupir aier se iạ ne iạ täla ösös ta utut se irisa ‘e reko iạ ‘inea ne iạ ‘el‘ia la hö‘ se hevạni. (Jone 14:2) Jisu ‘ạligen iris ne la la‘ se hevạni ‘on “hag sip mea‘me‘a.” (Luke 12:32) Ka iris his la ‘e laloag ne hag sip mea‘mea‘ te‘is, ‘ạligen iris lelea‘ rot fakKaristo aier ne mā ma fumou? Se te ne rak‘ȧk ‘e Kel‘ȧk Tē 14:1, ‘apostol ta Jone ‘ea: “Ma tä gou kel, ma gou räe se Läm ta [Jisu Karisto] fūfūen ‘e Saioni, sol ta, ia ma ta le‘ äf tarau ma häkeaghul ma häk, ma fȧ‘ vạhia ‘e ‘oris motara as ‘on Läm ta ma as ‘on Ö‘fā ta.”

²⁴ Iris 144,000 ne aier fak‘ata, tape‘ma lelea‘ rak te ‘on Jisu, fu‘ȧk hoi‘ȧk se‘ se mạuri ‘e hevạni. ‘Oris fū hoi‘ạkiag te‘ re ‘e av hes ta? ‘Apostol ta Pạula fȧ‘ ne te te‘is la sok ‘e av ‘on Karisto ta. (1 Korinita 15:23) Ma ‘e ‘ou la rakoag ‘e Väe 9 ta, ne ‘is noh ‘e laloag ne av heta‘ag. Ma se iris ne tör sio ‘e 144,000 ne al ‘e ‘on ‘i‘i la fu‘ȧk hoi‘ȧk ma ‘e av pạu heta‘ag se mạuri ‘e hevạni. (1 Korinita 15:51-55) Ka iris famör ma‘oi pạu ne tore, ma ‘oris ‘ạiröt‘ạkiget la fu‘ȧk hoi‘ȧk se mạuri ‘e Parataisi te rȧnte‘ ‘e avat ‘ut‘utum ‘og.

²⁵ Aier pạu, Jihova la fakrava pạu ‘os fir ta ala, ma la a‘öf pạu! (Aisea 25:8) Mumuạ la sok te‘i, kop ma ‘äe la a‘häe, ‘Tes tä iris ne fu‘ȧk hoi‘ȧk se‘ se hevạni la re ‘e täe?’ Iris täla lelea‘ ne Matantu fakhevän ta. ‘Is täla rak te ma‘oi hoi‘ȧk ‘e matantu te‘is ‘e väet ne tohim sin.

*  Te ‘e ‘on rerege ne fạ‘i täe ‘e 1 Puk ‘on Sau 17:17-24; 2 Puk ‘on Sau 4:32-37; 13:20, 21; Mataio 28:5-7; Luke 7:11-17; 8:40-56; Garue 9:36-42; ma 20:7-12.

^#  Se te ma‘oi hoi‘ȧk ne mou se terȧn a‘lel ta, ma ‘on la a‘sokoag ne, figalelei ma ‘io se ‘Onasoa.