Skip to content

Skip to table of contents

Timboni ta Yehovha

Hlawula lidzrimi Xironga

 NHLOKO-MHAKA YA XIDONDZRO 1

“U Nga Hlatiyele, Hikusa Ni Xikwembu Xaku”

“U Nga Hlatiyele, Hikusa Ni Xikwembu Xaku”

“U nga txhave, hikusa ni na wene. U nga hlatiyele, hikusa ni Xikwembu xaku. Ni ta ku tiyisa, ina, ni ta ku pfuna.”​—EZA 41:10, Tradução do Novo Mundo.

LISIMU 7 Yehovha I Ntamu Wezru

NKATSRAKANYU WA LESWI TAKA DONDZRIWA *

1-2. a) Xana mazritu lama nga Ezaya 41:10 ma mu khumbise kuyini makwezru waxisati lwe va liki i Yoshiko? b) Yehovha a yentxe leswaku mazritu wolawo ma hlayiseliwa ku pfuna mani?

MAKWEZRU waxisati lweyi va liki i Yoshiko a yamukele ndzrava ya ku biha. Dotori a mu byele leswaku e saleliwa hi ntlhanu wa tiwheti ntsena kuva a hanya. A yentxe yini Yoshiko? A dzrimuke ndzrimana ya Bibele leyi a yi zrandzraka, Ezaya 41:10, NM. (Dondzra.) A game a byela dotori na a nga zruzrumeli leswaku a a nga txhavi, hikusa Yehovha a a mu khome hi voko. * Mazritu lama tlemanaka mbilu lama kumekaka ka ndzrimana yoleyo ma pfune makwezru waxisati ku dumba Yehovha hi ku helela. Ndzrimana yo ya yin’we yi nga hi pfuna ku tsrhama na hi zrulile loko hi lwisana ni mindzringo leyikulu. Akuva hi twisisa leswaku hi nga swi yentxisa kuyini leswo, ku sungula a hi kambisiseni xivangelo lexi yentxiki Xikwembu Nkulukumba a zruma Ezaya ku hlaya mazritu lawo.

2 A ku sunguleni ka kone, Yehovha a zrume Ezaya ku tsrala mazritu lawo ku txhavelela va-Yuda lava a va ta gama va khomiwa va yisiwa Babilona. Nambitanu, Yehovha a yentxe leswaku mazritu wolawo ma hlayisiwa akuva ma ta pfuna swib’otxwha swa va-Yuda ni hinkwavu vhanu vakwe ku sukela nkameni wolowo. (Eza 40:8; Ro 15:4) Namunhla, hi hanya ‘minkameni lemimfani’ leya ku nonon’hwa, nakone siku ni siku hi vilela ntxhavelelo lowu kumekaka a bukwini dzra Ezaya.​—2Tm 3:1.

3. a) Hi swini swidumbiso leswi kumekaka ka Ezaya 41:10, ku nga tsralwa dzra lembe ledzri hlawuleliwiki 2019? b) Ha yini hi swi djula ku tiyisiwa nhlana hi swidumbiso swoleswo?

3 Ka nhloko-mhaka leyi, hi ta bula hi swidumbiso swizrazru swa Yehovha leswi tiyisanaka lipfumelo, leswi nga ka Ezaya 41: 10: 1) Yehovha a ta va na hine, 2) yene i Xikwembu xezru, nakone 3) a ta hi pfuna. Ha swi djula ku tiyisiwa nhlana hi swidumbiso swoleswo * hikusa, ku fana na Yoshiko, hi lavisana ni mindzringo a wuton’wini byezru. Handle ka leswo, hi boheka ku hanya ni swikazratu leswi vangiwaka hi swiyimu swa misava. Van’wana ka hine va sindzriseka ni ku tiyisela hansi ka nxaniso wu vangiwaka hi mimfumu ya ntamu swinene. A hi kambisiseni swidumbiso leswizrazru ha xin’we-xin’we.

“NI NA WENE”

4. a) Hi wani mazritu ya ku sungula lama tiyisaka nhlana lawa hi taka bula ha wone? (Vona ni ntlhamuxelo wa le hansi.) b) Xana Yehovha a hi kombisa kuyini leswaku awa hi zrandzra? c) Lizrandzru ni xinakulobye xa Yehovha swi ku khumbisa kuyini?

4 Yehovha ku sungula a hi tiyisa nhlana hi mazritu lawa: “U nga txhave, hikusa ni na wene.” * Yehovha a komba leswaku a na hine hi ku tsrhama hi ku zron’weka ha hine a tlhela a hi zrandzra swinene. Xiya ndlela leyi a hi kombaka ha yone leswaku awa hi zrandzra. A li: ‘U ni lisima mahlweni kwanga, u ni ku twala, nangweso ni ku zrandzrile.’ (Eza 43:4) A ku na ntxhumu a wuyakweni hinkwabyu lowu nga yentxaka Yehovha a tsrhika ku zrandzra lava mu tizrelaka; wudumbeki byakwe a byi nge tsrekatsreki. (Eza 54:10) Lizrandzru dzrakwe ni xinakulobye xakwe swi hi tata hi xivindzri. A ta hi sizrelela ni namunhla, swanga heswi a sizreleliki munghanu wakwe Abram (Abrahamu). Yehovha a mu byele leswi: ‘U nga txhave Abram. Ndzri xitlhangu xaku.’​—Gn 15:1.

Hi ku pfuniwa ha Yehovha, hi nga swi kota ku tsremakanya mindzringo yini na yini ya ku fana ni nambu kumbe ndzrilo leyi hi tlhanganaka nayu (Vona mayava 5-6) *

5-6. a) Hi swi tivisa kuyini leswaku Yehovha awa swi djula ku hi pfuna loko hi kumana ni mindzringo? b) Hi nga dondzra yini ka xikombiso xa Yoshiko?

5 Ha swi tiva leswaku Yehovha awa swi djula ku hi pfuna loko hi kumana ni mindzringo hikusa a dumbisa vhanu vakwe leswi: ‘Loko u tsremakanya matini, ndzri ta va na wene, kumbe milambu, mi nga ka mi nga ku tikisi. Ni loko u famba ndzrilweni, u nga ka u nga pswhi, ni langavi dzri nga ka dzri nga ku hisi.’ (Eza 43:2) Xana mazritu lawa ma djula ku hlaya yini?

6 Yehovha a nga dumbisi ku susa swihinga leswi hi bindzriselaka wutomi, kambe a nga ka a nga tsrhiki swizralanganya swa ku fana ni “milambu” swi hi mbombomelisa kumbe  mindzringo ya ku fana ni ‘langavi’ mi hi siya ni swilondzra leswi nga dahekikiki. A dumbisa leswaku a ta va na hine, a hi pfuna ku ‘tsremakanya’ swihinga leswo. Xana Yehovha a ta yentxa yini? A ta hi tiyisa timbilu akuva hi kota ku tsrhama na hi dumbike ka yene, nambi loko ho lavisana ni lifu. (Eza 41:13) Yoshiko, lweyi hi khaneliki ha yene, a swi vone hi yakwe leswi. N’wanakwe waxisati a li: “Hi hlamale ngopfu hi ku vona Mamana na a zrulise xileswiyana. Hakunene hi swi vonile leswaku Yehovha a mu nyike ku zrula ka le ndzreni. Mamana e za a fa, na a khanela ni vadahi ni timbabyi-kulobye ha Yehovha ni swidumbiso swakwe.” Hi nga dondzra yini ka xikombiso xa Yoshiko ke? Loko hi kholwa ka xidumbiso xa Xikwembu Nkulukumba lexi liki ‘ndzri ta va na wene’, na hine hi ta va ni ntamu ni xixixi xa ku tiyisela hansi ka mindzringo.

“NI XIKWEMBU XAKU”

7-8. a) Hi wani mazritu ya wubidzri ya ku tiyisana nhlana lawa hi taka bula ha wone, nakone ma tlhamuxela yini? b) Ha yini Yehovha a byele va-Yuda lava a va li wub’otxwheni a ku: “U nga hlatiyele”? c) Hi wani mazritu lama kumekaka ka Ezaya 46:3, 4 lawa ma ta ka va ma zrulise timbilu ta vhanu va Yehovha?

7 Xiya mazritu ya wubidzri ya ku tiyisana nhlana lama tsraliwiki hi Ezaya: “U nga hlatiyele, hikusa ni Xikwembu xaku.” Xana mazritu lawa ma djula ku hlaya yini hi ku hlatiyela? Ka ndzrimana leyi, zritu dzra lidzrimi dzra ku sungula lani ku liki “U nga hlatiyele” dzri ni miyanakanyu ya ku “u nga langute hala ni hala hi ku txhava ntxhumu lowu u nga wu tivikiki”, kumbe “u nga talataleke swanga hi loko wo txhava xantxhumu.”

8 Ha yini Yehovha a byele va-Yuda lava a va ta khomiwa va yisiwa a Babilona leswaku va nga ve ‘hlatiyela’? Hikusa a a swi tiva leswaku vayaki va tiko a va ta txhava. A va ta txhavisa ha yini? A ku heleni ka 70 wa malembe ya wub’otxwha bya va-Yuda, Babilona a a ta hlaseliwa ni makhandzra ya ntamu ya Medo-Persiya. Yehovha a a ta tizrisa khandzra ledzri ku ntsrhunxa tiko dzrakwe a wub’otxwheni le Babilona. (Eza 41:2-4) Loko va-Babilona ni vhanu va matiko mambeni lava a va hanya ka nkama wolowo va tivile leswaku nala wavu a a tsrhindzrekela, va dzringise ku nyikana ntamu hi ku byelana leswi: “Tiya nhlana.” Va yengetele ni nhlayu ya swikwembu swa swithombe, na va lavisela leswaku swi ta va sizrelela. (Eza 41:5-7) Kambe Yehovha a zrulise timbilu ta va-Yuda lava a va li wub’otxwheni a ku: “Wene, Israyele, [ku hambana ni vayakelani vaku] u nandzra wanga. . . U nga hlatiyele, hikusa ni Xikwembu xaku.” (Eza 41:8-10, NM) Xiya leswaku Yehovha a te: “Ni Xikwembu xaku”. Hi mazritu lawo, Yehovha a tiyise vagandzreli vakwe lava dumbekaka leswaku a a nga va dzrivalanga​—a a ha li Xikwembu xavu, na vone a va ha li tiko dzrakwe. A te: ‘Ndzri ta n’wi zrwala. . .ndzri va ndzri n’wi huluxa.’ Mazritu lawo lama tiyisanaka nhlana handle ka ku ganaganeka ma nyike ntamu va-Yuda lava a a va li wub’otxwheni.​—Dondzra Ezaya 46:3, 4.

9-10. Ha yini swi nga zi swi djula kuva hi txhava? Hamba xifaniso.

9 Namunhla ku tlula dzrini na dzrini, vhanu lava nga matlhelweni kwezru va hlatiyela hi ku vona swiyimu swa misava swi ya swi biha. I ntiyiso leswaku nambi hine ha khumbiwa hi swizralanganya swoleswo. Kambe a swi zi swi djula kuva hi txhava. Yehovha a hi byela leswi: “Ni Xikwembu xaku”. Ha yini mazritu lawo ma li xivangelo xa ntamu xa kuva hi tsrhama na hi zrulile?

10 Yanakanya hi xifaniso lexi: Vhanu vabidzri, Jaime na Bernardo, va le vhiyaweni ledzri tsrekatsrekisiwaka hi swidzedze leswikulu. Loko vhiyawu dzri pewuka, ku twala zritu dzri ku: “Tsrhamani na mi fase mabandi yenu.  Hi ta tsremakanya xidzedze hi nkamanyana.” Jaime a tala hi ku txhava. Kambe muhahisi wa vhiyawu a tlhela a ku: “Mi nga txhaveni ntxhumu. Lwa vulavulaka hi ye muhahisi wa vhiyawu dzrenu.” Kolanu, Jaime a hlakahla nhloko a ku: “Swi dja ku hlaya yini swoleswo?” Kambe a xiya leswaku Bernardo a voneka a nga txhavi ntxhumu ni wutsrongo. Jaime a mu vutisaka a ku: “Wene a wu txhavi ha yini?” Bernardo a n’wayita a ku: “Hikusa lwa hahisaka vhiyawu ledzri ni mu tiva ha hombe. I papayi wanga!” Bernardo a gama a ku: “Yima ni ku byela hi papayi wanga. Na dumba leswaku loko u ta mu tiva u tlhela u tiva ni wuswikoti byakwe, na wene u nge ti txhava ntxhumu.”

11. Hi nga dondzra yini ka xifaniso xa vhanu vabidzri lava nga vhiyaweni?

11 Hi nga dondzra yini ka xifaniso lexi? Ku fana na Bernardo, ha zrula hikusa hi mu tiva ha hombe Tatana wezru wa le tilweni, Yehovha. Ha swi tiva leswaku a ta hi tsremakanyisa ha hombe ka swizralanganya swa ku fana ni swidzedze leswi hi tlhanganaka naswu a masikwini lawa ya wugamu ya xiyimu lexi. (Eza 35:4) Hi leswi hi dumbaka Yehovha, hi kota ku zrula timbilu na kasi lavambeni va khome hi ntxhavu. (Eza 30:15) Mfuzri hi yentxa ku fana na Bernardo loko hi byela vayakelani vezru swivangelo leswi hi yentxaka hi dumba Xikwembu Nkulukumba. Kutani na vone va nga dumba leswaku nambi vo tlhangana ni ndzringo wa ku kulisa kuyini, Yehovha a ta va seketela.

“NI TA KU TIYISA. . .NI TA KU PFUNA”

12. a) Hi wani mazritu ya wuzrazru lama tiyisanaka nhlana lawa hi taka bula ha wone? b) Mazritu lama liki ‘voko’ dzra Yehovha ma hi dzrimuxa mhaka yini?

12 Yanakanya hi mazritu ya wuzrazru lama tiyisanaka nhlana lawa Ezaya a ma tsraliki: “Ni ta ku tiyisa, ina, ni ta ku pfuna.” Ezaya a a tlhamuxelile ndlela leyi Yehovha a a ta tiyisa vhanu vakwe ha yone, loko a ku: ‘ Yehovha awa ta hi ntamu; awa tifumela hi voko dzrakwe.’ (Eza 40:10) Bibele dzri tala ku  tizrisa zritu ledzri liki ‘voko’ hi ndlela ya ku fanekisela akuva dzri hlaya ntamu. Kutani ke, mazritu lama liki Yehovha ‘awa tifumela hi voko dzrakwe’ ma hi dzrimuxa leswaku Yehovha i Hosi leya ntamu. A tizrise ntamu wakwe lowu nga hluliwikiki hi ntxhumu ku seketela ni ku mpfekela malandzra yakwe khale, nakone a tama a tiyisa ni ku sizrelela lava mu dumbaka ni namunhla.​—Dt 1:30, 31; Eza 43:10.

A ku na tlhazri ni dzrin’we ledzri taka kota ntxhumu loko dzri lwa ni voko dzra Yehovha ledzri nga ni ntamu wa ku mpfekela (Vona mayava 12-16) *

13. a) Ngopfu-ngopfu hi le minkameni yini lani Yehovha a hlayisaka xidumbiso xakwe xa ku hi tiyisa? b) Hi xini xidumbiso lexi hi tataka hi ntamu ni ku dumba?

13 Ngopfu-ngopfu loko valala va hi xanisa, Yehovha a hlayisa xidumbiso xakwe lexi liki: “Ni ta ku tiyisa”. A matikweni man’wana namunhla, valala vezru va dzringisa hinkwaswu akuva va hi tsrhikisa ntizro wezru wa ku txhumayela kumbe ku tsimbisa nhlengeletanu yezru. Nambitanu, a hi hlatiyeli ku tlula mpimu hi mhaka ya minhlaselo leyo. Yehovha a hi nyike xidumbiso lexi hi tataka hi ntamu ni ku dumba. A hi dumbisa leswi: ‘A tlhazri dzrin’wana ni dzrin’wana ledzri fuliwaka akuva dzri ta hona wene, dzri nga ka dzri nga koti ntxhumu.’ (Eza 54:17) Mazritu lawu ma hi dzrimuxa timhaka tizrazru ta lisima.

14. Ha yini hi nga hlamali loko hi vona valala va Xikwembu Nkulukumba va hi hlasela?

14 Xa ku sungula, swanga valandzreli ya Kriste, hi tsrhama na hi swi tiva leswaku hi ta vengiwa. (Mt 10:22) Yesu a profete leswaku vadondzrisiwa vakwe a va ta xanisiwa swinene a masikwini ya wugamu. (Mt 24:9; Yh 15:20) Xa wubidzri, wuprofeta bya Ezaya byi hi basopisa leswaku valala vezru va nge ti gamela ka ku hi nyenya ntsena; va ta tizrisa matlhazri ya ku hambana-hambana ku hi hlasela. Man’we ya matlhazri lawo i ku wonga hi mazritu ya ku xongiseliwa, ku hi pswhazreka hi madzrimi ni ku hi xanisa hi tihanyi. (Mt 5:11) Yehovha a nge ti sivela valala vezru ku tizrisa matlhazri lawa akuva va lwa na hine. (Ef 6:12; Mpf 12:17) Kambe a swi zi swi djula hi txhava. Hi mhaka muni?

15-16. a) Hi yini mhaka ya wuzrazru leyi hi fanelaka ku yi dzrimuka, nakone Ezaya 25:4, 5 yi swi seketelisa kuyini leswo? b) Xana Ezaya 41:11, 12 yi swi tlhamuxelisa kuyini leswi taka yentxekela lava lwaka na hine?

 15 Yanakanya hi mhaka ya wuzrazru leyi hi fanelaka ku yi dzrimuka. Yehovha a te a ku na ‘tlhazri’ dzra ku lwa na hine ledzri taka ‘kota ntxhumu’. Ku fana ni khumbi dzri hi sizrelelaka ka ntamu wa xidzedze lexi honetelaka, naye Yehovha a hi sizrelela ka ‘hefemulo dzra lava txhavisaka’. (Dondzra Ezaya 25:4, 5.) Valala vezru va nga ka va nga swi koti ku hi vangela swilondzra leswi ngeke na ku dahiwa.​—Eza 65:17.

16 Yehovha a tlhela a hi nyika nhlana wa ku mu dumba hi ku hi byela hinkwaswu leswi taka yentxekela ‘lava hi hlundzrukelaka’. (Dondzra Ezaya 41:11, 12.) Nambi loko valala vezru vo tshetshembuteka va ya gama kwini na va lwa na hine kumbe nambi loko yimpi ya kone yo hisisa kuyini, swo fana ntsena: Hinkwavu valala va Xikwembu Nkulukumba ‘va ta helisiwa, va ta suva’.

NDLELA YA KU YENTISA KU DUMBA KWEZRU YEHOVHA

Hi nga yentisa ku dumba kwezru Yehovha hi ku tsrhama hi ku dondzra ha yene a Bibeleni (Vona mayava 17-18) *

17-18. a) Xana ku dondzra Bibele ku nga yentisisa kuyini ku dumba kwezru Xikwembu Nkulukumba? Nyika xikombiso. b) Xana ku yanakanyisisa hi tsralwa dzra lembe ledzri hlawuleliwiki 2019 swi nga hi pfunisa kuyini?

17 Hi yentisa ku dumba kwezru Yehovha hi ku mu tiva ku yampswa. Nakone ndlela ya yin’we ya ku mu tivisisa ha hombe Xikwembu Nkulukumba i ku dondzra Bibele hi wunyaminyami hi gama hi yanakanyisisa hi leswi hi swi dondzraka. Bibele dzri ni wudzrunguli lebyi dumbekaka bya ndlela leyi Yehovha a sizreleliki ha yone vhanu vakwe khale. Wudzrunguli lebyo byi hi yentxa hi dumba leswaku a ta hi hlayisa ni namunhla.

18 Yanakanya hi xikombiso xa xifaniso xa ku xonga lexi Ezaya a xi tizrisaka ku komba leswi Yehovha a hi sizrelelisaka xiswone. Yehovha a mu fanisa ni mubyisi, kasi vhanu va Nkulukumba a va fanisa ni swihambana. Ezaya a hlaya leswi ha Yehovha: ‘A ta hlengeleta swihambana hi voko dzrakwe, a ta swi zrwala xifuveni xakwe’. (Eza 40:11) Loko hi twa mavoko ya Yehovha na ma hi kufumeta a xifuveni xakwe, hi titwa na hi sizrelelekile, na hi zrulile. Ku hi pfuna ku tsrhama na hi zrulile nambi loko hi kumana ni swizralanganya, nandzra wa ku tlhazriha ni ku dumbeka a hlawule Ezaya 41:10, NM, swanga tsralwa dzra lembe dzra 2019, “U nga hlatiyele, hikusa ni Xikwembu xaku”. Yanakanyisisa hi mazritu lawo lama tiyisanaka nhlana. Ma ta ku nyika ntamu loko u lwisana ni swikazratu leswa ha taka.

LISIMU 38 Yehovha A Ta Ku Nyika Ntamu

^ par. 5 A tsralwa dzra lembe ledzri hlawuleliwiki 2019 dzri hi nyika swivangelo swizrazru leswi ha swone hi nga tsrhamaka na hi zrulile nambi loko ku humelela mintxhumu ya ku biha a misaveni kumbe a wuton’wini byezru hi ntshima. Nhloko-mhaka leyi yi ta kambisisa swivangelo swoleswo yi va yi hi pfuna ku pumba ku hlatiyela kambe hi va lava byekamelaka ngopfu ka ku dumba Yehovha. Yanakanyisisa hi tsralwa dzra lembe. Dzri tive hi nhloko loko u swi kota. Dzri ta ku tiyisa nhlana akuva u lwa ni swikazratu leswi u taka tlhangana naswu.

^ par. 1 Vona A Sentinela, Julho de 2016, p. 18.

^ par. 3 NTLHAMUXELO WA MAZRITU: Xidumbiso i mazritu lama dumbekaka ya leswaku xa kukazri nakunene xi ta humelela. Swidumbiso leswi Yehovha a hi nyikaka swone swi nga hi yentxa hi pumba ku hlatiyela hi swizralanganya leswi nga ha txhukaka swi humelela wuton’wini byezru.

^ par. 4 Mazritu lama liki “U nga txhave” ma hlayiwa kazrazru, ka Ezaya 41:10, 13 na 14. Tindzrimana leti ti tala ku tizrisa zritu ‘Ndzri’ (na ti hlaya Yehovha). Ha yini Yehovha a huhutele Ezaya ku tizrisa “Ndzri” kanyingi? Akuva a tlakuxa mhaka ya lisima ya leswaku hi nga hlula mintxhavu yezru hi ku dumba Yehovha.

^ par. 52 NTLHAMUXELO WA SWIFANISO: Swizro swa ndangu swi langusana ni mindzringo a ntizrweni, a mavabyini, a nsin’wini ni le xikole.

^ par. 54 NTLHAMUXELO WA SWIFANISO: Ntlhanganu wa Timboni lowu yentxiwaka kaya ka makwezru wu dumeliwa hi mapholisa, kambe vamakwezru vaxinuna ni vaxisati a va txhavi.

^ par. 56 NTLHAMUXELO WA SWIFANISO: Ku yentxa Wugandzreli Bya Ndangu nkama ni nkama swi hi nyika ntamu wa ku tiyisela.