Skip to content

Skip to table of contents

Timboni ta Yehovha

Hlawula lidzrimi Xironga

Xana A wu Swi Tiva?

Xana A wu Swi Tiva?

Sinagoga Dzra Le Dzaneni Dzra Ku Sungula: Xifaniso lexi xi seketeliwe ka mazrumbi ya sinagoga dzra le dzaneni dzra ku sungula ledzri kumiwiki a Gamla, kolomu ka 10 km a n’walungu ka Lwandle dzra le Galileya. Xifaniso lexi xi hi vonisa leswi sinagoga dzra khale kumbexana a dzri tsrhamise xiswone

Sinagoga dzri sungulele kwini?

ZRITO ledzri liki “sinagoga” dzri buya hi ka zritu dzra xigrika ledzri tlhamuxelaka “nhlengeletanu” kumbe “ku hlengeletana”. Vito ledzri dzra fanela hikusa ku sukela a minkameni ya khale, va-Yuda a va ni ntoloveto wa ku hlengeletana leswaku va dondzrisiwa ni ku gadzrela Xikwembu Nkulukumba. A Matsralwa ya Xiheberu a ma khaneli hi ku khanya hi masinagoga, kambe ka Matsralwa ya Xigrika ya Wukriste swa khanyisiwa leswaku a ku li mimbangu ya ku hlengeletana leyi kutani a yi li kone swinene a dzaneni dzra ku sungula a Nguveni Yezru (N.Y.).

Swidondzri swinyingi swi kholwa leswaku masinagoga ma sungule ku va kone hi nkama lowu va-Yuda a va li wub’otxhweni a Babilona. A Encyclopaedia Judaica dzri li: “Lava khomiwiki, leswi a va nge he na Tempele leswaku va gandzrela kone, a va tlhangana nkama ni nkama, hi ntoloveto hi Sabata, va dondzra Matsralwa leswaku va txhavelelana.” Ntsrhaku ka loko va ntsrhunxiwile a wub’otxhweni, swi tikomba ingiki va-Yuda va ye mahlweni va tlhangana leswaku va khongota ni ku dondzra Matsralwa, nakone va pfule masinagoga kun’wana ni kun’wana lomu a va kumeka kone.

Na ku nga si na tlhasa dzana dzra ku sungula, masinagoga ma ve ntsindzra wa wukhongoti bya xiyuda ni wutomi bya siku ni siku bya vhanu lava a va kumeka a Mediterrânio, Oriente Médio ni Israyele. Prisori Lee Levine, wa Univhersidadi dzra Xiheberu dzra le Yerusalema, a hlaye leswaku Sinagoga “dzri tizre swanga mbangu wa ku dondzra, wa swifihlulu swa ku xwenga, wa ku yavanyisa timhaka, wa ku nyikela minhlengo ni wa mintlhanganu ya ta mafumela ni ta muganga.” A yengetela a ku: “Kambe, handle ka ku ganaganeka, nkongometo lowukulu a ku li mintlhaganu ya wukhongoti.” Kutani ke, a swi hlamalisi leswi Yesu nkama ni nkama a a ya a mintlhangan’wini a masinagogeni. (Mr 1:21; 6:2; Lk 4:16) A a dondzrisa kone, a luleka ni ku kutxa lava a va li kone. Ntsrhaku ka loko ku sunguliwe bandla dzra wukriste mupostola Pawulo, hi ku fanana, a txhumayele ngopfu a masinagogeni. Lava a va li ni ku vilela ka moya a va ya a sinagogeni, xileswo loko a nhingena doropeni dzra kukazri, Pawulo hi ntoloveto a a zranga hi ku ya a sinagogeni ni ku dondzrisa kone.​—Min 17:1, 2; 18:4.