Skip to content

Skip to table of contents

Timboni ta Yehovha

Hlawula lidzrimi Xironga

 NHLOKO-MHAKA YA XIDONDZRO 29

“Fambani Mi Ya Yentxa Vadondzrisiwa”

“Fambani Mi Ya Yentxa Vadondzrisiwa”

“Hi leswo-ke, fambani mi ya yentxa vadondzrisiwa ka vhanu va matiko hinkwawu.”​—MT 28:19, Tradução do Novo Mundo.

LISIMU 60 A Hi Va Huluxeni

NKATSRAKANYU WA LESWI TAKA DONDZRIWA *

1-2. a) Hi ku ya hi xileleto xa Yesu lexi tsraliwiki ka Mattheo 28:18-20, hi wini ntizro lowukulu lowu bandla dzra wukriste dzri zrwexiwiki wone? b) Hi swini swivutiso leswi hi taka swi kambisisa ka nhloko-mhaka leyi?

LOKO vapostola va li kazri va hlengeletana a tlhelweni ka nhava, nakunene a va tale hi manyawu. Loko Yesu a pfuxiwe ku feni, a va lelete leswaku va ya tlhangana naye ka mbangu lowo. (Mt 28:16) Swi nga yentxeka a ve hi nkama wolowo a nga voniwa kan’we hi vamakwavu lava tlulaka ntlhanu wa madzana. (1Ko 15:6) Xana Yesu a a va vitanele yini vadondzrisiwa vakwe ka ntlhanganu lowo? A a djula ku va zrwexa ntizro wa ku nyonxisa swinene. A te: “Hi leswo-ke, fambani mi ya yentxa vadondzrisiwa ka vhanu va matiko hinkwawu.”​—Dondzra Mattheo 28:18-20, NM.

2 Vadondzrisiwa lava twiki mazritu ya Yesu va ve xiyenge xa bandla dzra wukriste dzra ku sungula. Ntizro wukulu lowu bandla dzroledzro a dzri zrwexiwe wone a ku li ku yentxa vadondzrisiwa lava yengetelekiki va Kriste. * Namunhla, ku ni makume-kume ya madzana ya mabandla ya vakriste va xihlayelamfuzri a misaveni hinkwayu, nakone ntizro wukulu lowu mabandla lawo ma zrwexiwiki wone wa ha li wo wa wun’we. Ka nhloko-mhaka leyi, hi ta kambisisa mune wa swivutiso: Ha yini ntizro wa ku yentxa vadondzrisiwa wu li wa lisima? Wu koxa yini ntizro lowu? Xana vakriste hinkwavu va patsreka a ku yentxeni ka vadondzrisiwa? Nakone, ha yini swi djula hi lehisa mbilu loko hi yentxa ntizro lowu?

 HA YINI NTIZRO WA KU YENTXA VADONDZRISIWA WU LI WA LISIMA?

3. Hi ku ya hi Yohan 14:6 na 17:3, ha yini ntizro wa ku yentxa vadondzrisiwa wu li wa lisima?

3 Ha yini ntizro wa ku yentxa vadondzrisiwa wu li wa lisima? Hikusa ko va ntsena vadondzrisiwa va Kriste lava nga kotaka ku va vanghanu va Xikwembu Nkulukumba. Handle ka leswo, lava landzraka Kriste va yampswisa wutomi byavu swoswi nakone va ni ku lavisela ka kuma wutomi lebyi nga helikiki a nkameni lowu taka. (Dondzra Yohan 14:6; 17:3.) Nakunene, Yesu a hi zrwexe ntizro wa lisima, kambe a hi wu yentxi wuswezru. Loko a tsrala mayelanu na yene n’wini ni vanghanu vakwe, mupostola Pawulo a te: ‘Hi vatizri-kulobye ni Xikwembu Nkulukumba.’ (1Ko 3:9) Vona ntizro wa lisima lowu Yehovha na Kriste va nyikiki vhanu va ku kala ku hetiseka!

4. Hi nga dondzra yini ka leswi humeleliki Ivan na Matilde?

4 Ntizro wa ku yentxa vadondzrisiwa wu nga hi nyika ku nyonxa lokukulu. Vona xikombiso xa Ivan ni nkatakwe, Matilde, va le Colômbia. Va zrezrele mumpswha lwa vitaniwaka Davier, lwa nga va byela leswi: “Na swi djula ku txintxa wutomi byanga, kambe a ni swi koti.” Davier a a li mulwi wa boksi lweyi a a dzraha timbangi, a kukutlela byala nakone a tsrhama ni wansati lwa vitaniwaka Erika na va nga txhatanga. Ivan a li: “Hi sungule ku mu yendzrela a mugangeni wakwe lowu a wu li kule ni doropa, leswi a swi djula hi heta mawora ya ku tala na hi famba hi mabisikleta ka switaratu swa ku tala hi ntsraka. Loko a vona leswaku Davier a a pumbile mahanyela ya ku biha, Erika na yene a sungule ku dondzra Bibele.” Hi ku famba ka nkama, Davier a tsrhike timbangi, mabyala ni ku lwa boksi. A tlhele a txhata hi nawu na Erika. Matilde a li: “Loko Davier na Erika va babatisiwa hi 2016, hi dzrimuke leswaku Davier a a hamba a ku: ‘Na swi djula ku txintxa, kambe a ni swi koti.’ A hi tengatenga minyembeti.” Handle ka ku ganaganeka, hi nyonxa ngopfu swinene loko hi pfuna vhanu ku va vadondzrisiwa va Kriste.

WU KOXA YINI NTIZRO LOWU?

5. Hi wini ntxhumu wa ku sungula lowu djulekaka loko hi yentxa vadondzrisiwa?

5 Ntxhumu wa ku sungula lowu djulekaka loko hi yentxa vadondzrisiwa i ku djuletela lava nga ni timbilu letinene. (Mt 10:11) Hi kombisa leswaku hakunene hi Timboni ta Yehovha hi ku bula ha Yehovha ni hinkwavu lava hi kumanaka navu. Hi kombisa leswaku hi vakriste va xihlayelamfuzri hi ku yentxa ntizro wa ku zrezra, hi laha Kriste a leletiki ha kone.

6. I yini leswi nga hi pfunaka ku humelela a nsin’wini?

6 Van’we lava hi va kumaka a nsin’wini va swi zrandzra ku dondzra xihlayelamfuzi lexi nga Bibeleni, kambe ku tala ka vambeni va talisa ku tikomba na va nge na mhaka na xone a ku sunguleni. Swi nga ha djula hi zranga hi ku pfuxa ku nyonxela kwavu. Akuva swi hi fambela ha hombe a nsin’wini, hi fanela ku tilulamisela ha hombe swinene. Hlawula timhaka ta kukazri leti kumbexana ti nga pfuxaka ku nyonxela ka lava u taka va kuma a nsin’wini. Ntsrhaku ka leswo dondzra leswi u nga sungulisaka xiswone mabulu.

7. U nga dzri sungulisa kuyini bulu, nakone ha yini swi li swa lisima ku yingiseta ni ku hlonipha mavonela yavu?

7 Hi xikombiso, u nga ha vutisa n’winyi wa muti u ku: “Ni nga ku vutisa xa n’wantxhumu? Ku tala ka swikazratu leswi hi kumanaka naswu namunhla swi khumba vhanu a misaveni hinkwayu. Xana u vona leswaku lexi nga tlhantlhaka swikazratu hinkwaswu ku nga va mfumu wa misava?” U nga gama u bula hi Daniel 2:44. Kumbe u nga ha sungula hi ku: “Hi ku vona kwaku, i yini lexi nga pfunaka vapswali ku dondzrisa vana ku va ni mahanyela lamanene? A ni navela ku twa mavonela yaku.” A ntsrhaku ka leswo, bula hi Deuteronoma 6:6, 7. Nambi wo langa mhaka yini akuva u bula ha yone, pimisa hi  vhanu lava u taka bula navu. Yanakanya hi leswi va taka pfunekisa xiswone hi ku dondzra leswi Bibele dzri dondzrisaka swone hakunene. Loko u khanela navu, i swa lisima ku va zreyela ndleve u tlhela u hlonipha mavonela yavu. Hi ndlela leyo u ta kota ku va twisisa ku yampswa, nakone swi nga yentxeka na vone va ku yingiseta.

8. Ha yini swi djula hi tizrisa nkama wezru hi tlhela hi yentxa minzamu ya kukazri akuva hi yentxa timpinda?

8 Na mhunu a nga si pfumela ku dondzra Bibele, swi nga ha djula hi tizrisa nkama wezru hi tlhela hi yentxa minzamu ya kukazri akuva hi mu phindelela. Ha yini? Hikusa swi nga yentxeka hi nga mu kumi loko hi mu phindelela. Handle ka leswo, swi nga ha vilela u mu pfuxela hi makhambi ya ku hlawa ku ya tlhasa loko a titwa na a ntsrhunxekile ku dondzra Bibele na wene. Dzrimuka leswaku a nsinya wu nga kota ku kula loko wu txheleliwa nkama ni nkama. Hi ku fanana, lizrandzru ledzri mhunu lwa nyonxelaka madzrungula lamanene a nga na dzrone ha Yehovha na Kriste dzri nga kota ku kula loko nkama ni nkama hi bula ni mhunu yelweyo hi Zritu dzra Xikwembu Nkulukumba.

XANA VAKRISTE HINKWAVU VA PATSREKA A KU YENTXENI KA VADONDZRISIWA?

Timboni ta Yehovha hinkwatu a misaveni hinkwayu ta patsreka a ku djuleteleni ka lava swi va fanelaka (Vona mayava 9-10) *

9-10. Ha yini hi ku hinkwavu vakriste va xihlayelamfuzri va patsreka a ku djuleteleni ka vhanu va timbilu letinene?

9 Hinkwavu vakriste va xihlayelamfuzri va patsreka a ku pfuneni ka vhanu lava nga ni timbilu letinene. Ntizro lowu hi nga wu fananisa ni ku djuletela xin’wanana xa kukazri lexi lahlekiki. Hi ndlela yini? Vona xikombiso lexi hakunene xi yentxekiki xa xifanyatana xa malembe mazrazru lexi lahlekiki a mutini. Kolomu ka 500 wa vhanu va tinyikelile leswaku va famba va xi djuletela. Hi wugamu, a ntsrhaku ka loko ku khalute 20 wa mawora na xin’wanana lexiya xi lahlekile, mun’we wa vone a xi kumile a nsin’wini ya switsrama. Tatana lweyo a nga pfumelanga loko va mu dzrumisa hi ku kuma xifanyatana lexiya. A te:  “Ntizro lowu wu yentxiwe hi madzana ya vhanu.”

10 Vhanu vanyingi va fana ni xifanyatana lexiya​—va lahlekile. A va na dumbo, nakone va djula ku pfuniwa. (Ef 2:12) Hi vhanu lava tlulaka 8.000.000 hi patsrekaka a ku djuleni ka vhanu lava swi va fanelaka. Swi nga yentxeka leswaku wene hi ku kongoma u nga mu kumi mhunu lweyi a djulaka ku dondzra Bibele. Nambitanu, vazrezri van’wana lava tizrelaka a nsin’wini yenu va nga ha kuma mhunu lweyi a djulaka ku dondzra xihlayelamfuzri lexi nga Zritwini dzra Xikwembu Nkulukumba. Loko makwezru a kuma mhunu lweyi a gamaka a va mudondzrisiwa wa Kriste, hinkwavu lava hlengeliki a ku djuleteleni ka mhunu lweyo na vone va ni xivangelo lexinene xa ku nyonxa.

11. Nambi loko u nga fambisi xidondzro xa Bibele, hi tini tindlela tin’wana leti u nga pfunisaka ha tone ku yentxa vadondzrisiwa?

11 Nambi loko swoswi u nga fambisi xidondzro xa Bibele, u nga pfunisa a ku yentxeni ka vadondzrisiwa hi tindlela tin’wana. Hi xikombiso, u nga hoyozela vhanu lava nga tinyiwana u tlhela u yaka xinghanu navu loko va ta a Ndlwini ya Mfumu. Hi ndlela leyo u nga va pfuna ku vona ha wuswavu leswaku lizrandzru hi wone mfungu wa vakriste va xihlayelamfuzri. (Yh 13:34, 35) Tinhlamulo taku a mintlhanganwini, nambi loko ti gomile, ti nga dondzrisa lava ha ku sungulaka ku hlengela na hine ku khanela hi leswi va swi pfumelaka na swi sukela mbilwini ni hi ndlela ya xitxhavu. Xin’wana lexi u nga xi yentxaka i ku tizra a nsin’wini ni muzrezri lwemumpshwa u mu dondzrisa leswi a nga ma tizrisisaka xiswone Matsralwa akuva a bulisana ni vhanu. Hi ku yentxa leswo, u ta va na wu mu dondzrisa ku yetisela Kriste.​—Lk 10:25-28.

12. Xana swi vilela u va ni wuswikoti bya ku hlamalisa akuva u yentxa vadondzrisiwa? Tlhamuxela.

12 Ni mun’we wezru a nga fanelanga ku pimisa leswaku akuva a yentxa vadondzisiwa swi vilela a va ni wuswikoti bya ku hlamalisa bya ku dondzrisa. Ha yini? Vona xikombiso xa Faustina lwa tsrhamaka a Bolívia. Nkama lowu a nga sungula ku bulisana ni Timboni ta Yehovha a a nga swi koti ku dondzra. Kambe swoswi kutsrongo awa swi kota. Swoswi a babatisiwile nakone a swi zrandzra ngopfu ku dondzrisa vambeni. A tekisa ku fambisa ntlhanu wa swidondzro swa Bibele vhiki ni vhiki. Ku tala ka swidondzro swakwe swa swi kota ku dondzra ha hombe ku mu tlula. Nambitanu, a pfune ntlhanu wa swidondzro na xin’we ku va swi fanelekela ku babatisiwa.​—Lk 10:21.

13. Nambi loko u khomeki ngopfu swinene, hi wani matovoko lawa u nga ma kumaka ka ntizro wa ku yentxa vadondzrisiwa?

13 Vakriste vanyingi va khomeka ngopfu hi leswi va nga ni mintizro yinyingi akuva va yi hetisisa. Nambitanu, va swi kota ku kuma nkama wa ku fambisa swidondzro swa Bibele, nakone leswo swi va yentxa va nyonxa. Twana xikombiso xa Melanie lweyi a a tsrhama a doropeni dzra le kule swinene a Alaska. A a wundla  xin’hwanyatana xakwe xa 8 wa malembe wuswakwe. Handle ka leswo, a a tizra vhiki hinkwadzru a tlhela a hlayisa tatana wakwe lweyi a nga ni kankru. A doropeni dzrakwe a o va yene ntsena a nga Mboni ya Yehovha. Nambi leswi a mbangwini wa kone a ku titimeta ngopfu swinene a a talisa ku khongota a kombela ntamu wa ku ya ku zrezreni hikusa a a swi djula hi mbilu ku kuma mhunu lweyi a nga mu fambiselaka xidondzro xa Bibele. Siku dzrin’wana a kume Sara, lweyi a nga nyonxa ngopfu hi ku dondzra leswaku Xikwembu Nkulukumba a ni vito. Hi ku famba ka nkama, Sara a pfumele ku dondzra Bibele. Melanie a li: “Hi wawuntlhanu ni wusiku, a ni va ni kazralile ngopfu, kambe mine ni xin’hwanyatana xanga a hi mu yela hi ya mu fambisela xidondzro. Nakone leswo a swi hi pfuna. A hi swi zrandzra ku djuletela tinhlamulo ta swivutiso swa Sara nakone a hi nyonxa ngopfu hi ku mu vona a ndzruluka munghanu wa Yehovha.” Hi xixixi Sara a lwisane ni ku kanetiwa, a tsrhike wukhongoti byakwe a va a babatisiwa.

HA YINI KU YENTXA VADONDZRISIWA SWI DJULA HI LEHISA MBILU

14. a) Ha yini lava yentxaka vadondzrisiwa va fanisiwa ni vatsrhevi? b) Xana mazritu ya mupostola Pawulo lama nga 2 Timoteo 4:1, 2 ma ku khumbise kuyini?

14 Nambi loko ntizro waku wu voneka ingiki a wu beki mihandzru, u nga godole ku djuletela lava djulaka ku va vadondzrisiwa. Dzrimuka leswaku Yesu a fananise ntizro wa ku yentxa vadondzrisiwa ni ntizro wa wutsrhevi. Vatsrhevi va nga ha heta mawora ya ku tala na va nga phasanga ntxhumu. Hi ntolovelo va tizra mpundzrwini swinene kumbe na bya ha xa, nakone minkama yin’wana va sindzriseka ku weta va ya kule swinene. (Lk 5:5) Hi la ku fanaka, hi ku lehisa mbilu lava yentxaka vadondzrisiwa va heta mawora ya ku tala na va ‘phasa’ hi minkama ni ka mimbangu ya ku siyana-siyana. Ha yini? Akuva  va va ni mukhandlu wa ku kuma vhanu. Lava yentxaka minzamu leyo hakanyingi va tovokisiwa hi ku kuma vhanu lava nyonxelaka dzrungula dzrezru. Xana u nga dzringisa ku zrezra hi nkama wa kukazri ni ka mbangu wa kukazri lowu u nga vaka ni mukhandlu wa ku kuma vhanu va ku tala?​—Dondzra 2 Timoteo 4:1, 2.

Lehisa mbilu loko u li kazri u pfuna swidondzro swaku ku kula hi tlhelo dzra moya (Vona mayava 15-16) *

15. Ha yini ku fambisa swidondzro swa Bibele swi djula ku lehisa mbilu?

15 Ha yini ku fambisa swidondzro swa Bibele swi djula ku lehisa mbilu? Xin’we xa swivangelo hi leswaku ntizro wezru a wu gameli ka ku pfuna xidondzro ku tiva ni ku zrandzra tindondzro leti nga Bibeleni ntsena. Ku djuleka hi xi pfuna ku tiva xi tlhela xi zrandzra Mutsrali wa Bibele, ku nga Yehovha. Handle ka ku xi dondzrisa leswi Yesu a swi languseliki ka vadondzrisiwa vakwe, ku djuleka hi xi pfuna ku tiva hanyela dzra mukriste wa xihlayelamfuzri. Hi fanela ku lehisa mbilu hi xi pfuna loko xa ha lwela ku tizrisa minsinya ya milawu ya Bibele. Van’we va swi kota ku txintxa mayanakanyela ni mikhuva yavu hi tihwetinyana ntsena. Kambe vambeni va teka nkama wa ku leha.

16. Xana u dondzre yini ka leswi yentxekeliki Raúl?

16 Leswi swi nga yentxekela muzrumiwa mun’we le Perú swi kombekisa ha hombe mabindzru ya ku lehisa mbilu. A li: “Ni dondzre mabuku mabidzri ni xidondzro xa Bibele lexi va liki i Raúl, kambe a xa ha kumana ni swikazratu swikulu a wuton’wini bya xone. A xi hanya hi timholova ni nsati wa xone, a xi ni nhlambha nakone vana va xone a va swi vona na swi kazrata ku xi bekela xitxhavu. Leswi a xi hamba xi ta mintlhanganwini, ni tame ni xi yendzrela ni xi pfuna kun’we ni ndangu wa xone. A ntsrhaku ka malembe mazrazru na ni xi tivile, hi wugamu xi fanelekele ku babatisiwa.”

17. Xana hi ta bula hi yini ka nhloko-mhaka leyi landzrelaka?

17 Yesu a hi lelete ku ‘famba hi ya yentxa vadondzrisiwa ka vhanu va matiko hinkwawu’. Akuva hi hetisisa ntizro lowo, hi talisa ku vulavula ni vhanu lava pimisaka swa ku hambana ngopfu ni leswi hine hi swi pimisaka, ku patsra ni lava va nga lumbikiki wukhongoti ni byin’we kumbe lava n’waninkama va nga kholwikiki leswaku Xikwembu Nkulukumba a kone. Nhloko-mhaka leyi landzrelaka yi ta kombisa tindlela leti hi nga bulaka ha tone hi madzrungula lamanene ni vhanu va swiyimu swa ku hambana-hambana.

LISIMU 68 Byala Mbewu Ya Mfumu

^ par. 5 Bandla dzra wukriste dzri ni ntizro wun’we lowukulu lowu dzri nyikiwiki wone​—wa ku pfuna vhanu ku va vadondzrisiwa va Kriste. Nhloko-mhaka leyi yi nyikela miyanakanyu leyi pfunaka leyi hi nga yi tizrisaka akuva hi hetisisa ntizro lowu hi zrwexiwiki wone.

^ par. 2 NTLHAMUXELO WA MAZRITU: Vadondzrisiwa va Kriste a va gameli ka ku dondzra leswi Yesu a swi dondzrisiki ntsena, kambe va tizrisa leswi va swi dondzraka. Va dzringisa ku landzrelelisisa mintila kumbe xikombiso xa Yesu hi laha va nga kotaka ha kone.—1Pe 2:21.

^ par. 52 NTLHAMUXELO WA SWIFANISO: Wanuna lwa humaka maferiya a teka xipapelana ka Timboni ta Yehovha a livaleni dzra swihahampfhuka. A ntsrhaku, loko a famba-famba a vona mimbangu, a vona Timboni timbeni na ti zrezra a mbangwini wa mani na mani. Loko a buyele kaya, ku tlhasa vazrezri va ta ta gongondzra va mu txhumuyela.

^ par. 54 NTLHAMUXELO WA SWIFANISO: Wanuna yelweyi wa mun’we a yamukela xidondzro xa Bibele. Hi ku famba ka nkama, a fanelekela ku babatisiwa.