Skip to content

Skip to table of contents

Timboni ta Yehovha

Hlawula lidzrimi Xironga

 NHLOKO-MHAKA YA XIDONDZRO 10

Xana Ku Nga Sivela Yini Ku Nha Ni Babatisiwa?

Xana Ku Nga Sivela Yini Ku Nha Ni Babatisiwa?

‘Va xikela matini hi vubizri byavu, ye Filipi ni ndzruna; a hanga mu bapatisa.’​—MIN 8:38.

LISIMU 52 Ku Tinyiketela Ka Wukriste

NKATSRAKANYU WA LESWI TAKA DONDZRIWA *

1. I yini leswi Adamu na Evha va lahlekeliwiki ha swone, nakone wu ve wini ntsrhovelo wa kone?

I MANI lweyi u pimisaka leswaku a ni mfanelo ya ku beka milawu ya leswi nga swinene ni leswi bihiki? Loko Adamu na Evha va de handzru wa nsinya wa ku tiva leswi nga swinene ni leswi bihiki, va beke mhaka a livaleni: Vone a va nga mu dumbi Yehovha ni milawu yakwe. Va hlawule ku tibekela milawu ya ka kwavu ya leswi nga swinene ni leswi bihiki. (Gn 3:22) Kambe, lavisa leswi va lahlekeliwiki hi swone. Va lahlekeliwe hi wunghanu byavu na Yehovha. Va tlhele va lahlekeliwa hi ndjombo ya ku hanya hi la ku nga helikiki, nakone va tlulete vanavu xidoho ni lifu. (Ro 5:12) Xiboho xa Adamu na Evha xi tise wusiwana.

A ntsrhaku ka loko yi pfumele ka Yesu, a ndzruna ya mu-Etiyopiya yi djule ku babatisiwa na yi nga hlwelanga (Vona mayava 2-3)

2-3. a) Xana a ndzruna ya mu-Etiyopiya yi yangulise kuyini loko Filipi a yi zrezrela? b) Hi wani matovoko lawa hi ma kumaka loko hi babatisiwa, nakone hi swini swivutiso leswi hi taka swi kambisisa?

2 Vona ku hambana ka ndlela leyi Adamu na Evha a va pimisa ha yone ni leyi ndzruna ya mu-Etiyopiya yi yanguliki ha yone loko Filipi a yi zrezrela. A ndzruna leyi yi tlangele swinene leswi Yehovha na Yesu va yi yentxeliki swone lakakuva a yi hlwelanga ku babatisiwa. (Min 8:34-38) Na hine, loko hi tinyiketela ka Xikwembu Nkulukumba hi tlhela hi babatisiwa ku fana ni ndzruna liya, hi ta beka mhaka a livaleni. Hi ta kombisa leswaku ha swi tlangela hinkwaswu leswi Yehovha na Yesu va hi yentxeliki swone. Handle ka leswo, hi kombisa leswaku ha mu dumba Yehovha, nakone ha pfumela leswaku hi yene ntsena lwa fanelaka ku beka milawu ya leswi nga swinene ni leswi bihiki.

3 Yanakanya hi matovoko lawa hi ma kumaka loko hi tizrela Yehovha! Dzrin’we dzra wone i ku lavisela ku nyikiwa hinkwaswu leswi Adamu na Evha va swi lahliki, ku patsra ni ndjombo ya ku hanya hi la ku nga helikiki. Handle ka leswo, Yehovha a hi dzrivalela swihoxo swezru a tlhela a hi nyika lipfalu ledzri basiki hi kola ka lipfumelo dzrezru ka Yesu Kriste. (Mt 20:28;  Min 10:43) Nakambe, hi hamba xiyenge xa ndangu wa Yehovha wa malandzra lama yamukeliwaka hi yene, nakone hi lavisela matovoko a nkameni lowu taka. (Yh 10:14-16; Ro 8:20, 21) Nambi leswi ku nga ni matovoko hinkwawu lawa, van’we va lava tivaka Yehovha va ganaganeka ku landzra xikombiso xa ndzruna ya mu-Etiyopiya. Xana ku nga sivela yini ku nha va babatisiwa? Nakone va nga swi hlulisa kuyini swihinga swoleswo?

SWIHINGA LESWI SIVELAKA VAN’WANA KU BABATISIWA

Swihinga leswi van’wana va langutanaka na swone na va nga si na babatisiwa

Ku kala ku tidumba (Vona mayava 4-5) *

4-5. Hi swini swihinga leswi djaha ledzri va liki i Avery ni n’hwanyana lweyi va liki i Hannah va langutaniki na swone?

4 Ku kala ku tidumba. Vapswele va Avery i Timboni ta Yehovha. Papayi wakwe a tiviwa swanga papayi lwa nga ni lizrandzru ni nkulu wa bandla lwa dondzrisaka ha hombe. Kambe Avery a a ganaganeka ku babatisiwa. Ha yini? A li: “A ni txhava leswaku a ni nge ti swi kota ku yentxa mintxhumu ha hombe ku fana na papayi.” Handle ka leswo, Avery a a ganaganeka leswaku a ta swi kota ku hetisisa swiyavelo leswi a a ta nyikiwa swone loko a babatisiwile. A li: “A ni txhava leswaku ni ta kombeliwa ku hamba xikhongoto a livaleni, ku beka wukaneli kumbe ku zrangela ntlawa wa ntizro wa nsimu.”

5 Hannah, lwa nga ni 18 wa malembe, a xaniseke ngopfu swinene hi ku kala a nga tidumbi. A kulisiwe hi vapswele lava tizrelaka Yehovha, kambe a a ganaganeka leswaku a ta swi kota ku hanya hi milawu ya Yehovha. Ha yini? Hannah a sungule ku tivona na a nga pfuni ntxhumu. Minkama yimbeni, a a titwa nandzru lakakuva a a ti vavisa hi maxivomu, leswi ntsena a swo ya swi kazratisa timhaka. A li: “A ni ngi sama ni byela mhunu leswi ni swi yentxiki, nambi ku li vapswele vanga, nakone ni yanakanye leswaku Yehovha a a nge ti txhuka a ni yamukela hi kola ka leswi a ni tiyentxetela swone.”

Nkutxetelo wa vanghanu (Vona yava 6) *

6. I yini leswi a swi sivela Vanessa ku babatisiwa?

6 Nkutxetelo wa vanghanu. Vanessa, lwa nga ni 22 wa malembe, a li: “A ni ni munghanu lwenkulu lweyi a hi djula ku pfala 10 wa malembe na hi li vanghanu.” Kambe, loko Vanessa a ku a djula ku babatisiwa, munghanu wakwe a a nga yimi naye. Leswo swi mu vavise mbilu Vanessa. A li: “Mine swa ni bindzrela ku hamba xinghanu ni vhanu, kutani a ni txhava leswaku loko no tsrhika ku va munghanu wakwe, a ni nge he na ku tlhela ni kuma munghanu mumbeni lwenkulu wa ku fana na yene.”

Ku txhava ku hoxa (Vona yava 7) *

7. I yini leswi n’hwanyana lweyi va liki i Makayla a a txhava swone, nakone ha yini?

7 Ku txhava ku hoxa. Makayla a a ni ntlhanu wa malembe loko makwavu waxinuna a tsremiwa bandleni. Loko a ya a kula a vone ndlela leyi swiyentxo swa makwavu swi khumbiki ha yone vapswele vakwe. A li: “A ni txhava leswaku loko no babatisiwa, a ni ta yentxa swihoxo ni  gama ni tsremiwa bandleni ni va ni yengesela ku vaviseka ka vapswele vanga.”

Ku txhava nkaneto (Vona yava 8) *

8. I yini leswi djaha ledzri va liki i Miles a dzri swi txhava?

8 Ku txhava nkaneto. Mamana wa Miles wa ku mu pswala a hi Mboni, kasi papayi wakwe ni mamana wa ku mu wundla va tizrela Yehovha. Miles a li: “Ni tsrhame na mamana wa ku ni pswala 18 wa malembe, kutani a ni txhava ku mu byela leswaku a ni djula ku babatisiwa. Ni vone leswi a nga swi yentxa loko papayi a ve Mboni, kutani a ni txhava leswaku a ta ni holovisa.”

NDLELA LEYI U NGA HLULAKA SWIHINGA HA YONE

9. Ku ta yentxeka yini loko u dondzra ndlela leyi Yehovha a nga ni lizrandzru a tlhela a lehisa mbilu ha yone?

9 Lexi yentxiki Adamu na Evha va hlawula ku kala va nga mu tizreli Yehovha hi leswi va tsrhikiki ku txutxela lizrandzru ledzri tiyiki ha yene. Nambitanu, Yehovha a va pfumelele ku tama va hanya leswaku va va ni vana ni ku tibekela milawu ya leswi va taka va kulisisa xiswone. Kuva Adamu na Evha va lange ku kala va nga fumiwi ha Yehovha hi ku hatlisa swi tikombile leswaku a ku li wumphunta. N’wanavu wa mativula a dlaye makwavu lweyi a a nge na nandzru. Hi ku famba ka nkama tihanyi ni moya wa ku titiva swi sungule ku tala vhanwini. (Gn 4:8; 6:11-13) A ku fambeni ka minkama, Yehovha a pfule ndlela ya ku tizrula vana hinkwavu va Adamu lava djulaka ku mu tizrela. (Yh 6:38-40, 57, 58) Vona leswi nga ha yentxekaka. Loko u ya u dondzra ndlela leyi Yehovha a nga ni lizrandzru a tlhela a lehisa mbilu ha yone, a lizrandzru dzraku ha yene dzri ta kula. Swi ta ku yentxa u djula ku hambana na Adamu na Evha, u va u tinyiketela ka Yehovha.

Ndlela leyi u nga hlulaka swihinga leswi ha yone

(Vona mayava 9-10) *

10. Ha yini ku yanakanyisisa hi Amapsalma 19:7 swi nga ku pfuna ku tizrela Yehovha?

10 Tama u dondzra ha Yehovha. Loko u ya u dondzra ha Yehovha, leswo swi ta ku nyika ku dumba loku yengetelekiki ka leswaku u nga swi kota ku mu tizrela ha hombe. Avery, lweyi hi nga sungula hi khanela ha yene, a li: “Ni hlule ku ganaganeka hi ku dondzra ni tlhela ni yanakanyisisa hi xidumbiso lexi nga ka Amapsalma 19:7.” (Dondzra.) Loko Avery a vone leswi Yehovha a hetisisiki xiswone xidumbiso lexi, lizrandzru dzrakwe ha yene dzri kule dzri tlhela dzri tiya. Lizrandzru dzri tiyisa ku dumba dzri tlhela dzri hi yentxa hi djula ku nyonxisa Yehovha ni ku yentxa leswi a swi  zrandzraka. Hannah, lweyi hi nga sungula hi mu phata, a te: “Ka xidondzro xanga xa ximhunu xa Bibele, ni xiye leswaku loko ni tivavisa, ni vavisa na Yehovha.” (1Pe 5:7) Hannah a ve ‘muyentxi wa Zritu’. (Yk 1:22) Ku ve ni mabindzru wani? A li: “Loko ni vone leswi ku yingiseta Yehovha swi ni pfunisiki xiswone, ni sungule ku va ni lizrandzru ledzri tiyiki ha yene. Swoswi ni ni ku dumba ka leswaku Yehovha a ta ni kongomisa minkama hinkwayu loko ni djula mpfunu wakwe.” Hannah a swi kotile ku hlula nsusumeto wa ku tivavisa. A tinyiketele ka Yehovha a va a babatisiwa.

(Vona yava 11) *

11. I yini leswi Vanessa a swi yentxiki akuva a kuma vanghanu lavanene, nakone hi nga dondzra yini ka leswi?

11 Hlawula vanghanu vaku hi wutlhazri. Vanessa, lweyi hi nga sungula hi khanela ha yene, hi wugamu a swi vonile leswaku a munghanu wakwe phela a o mu sivela ku tizrela Yehovha. Xileswo, a tsrhike ku tlanga naye. Kambe Vanessa a nga gamelanga lanu. A tihite swinene akuva a kuma vanghanu va nyiwana a bandleni dzrakwe. Hi lani a hlayiki ha kone, xikombiso lexi bekiwiki hi Nowa ni ndangu wakwe hi xone xi nga mu pfuna. A li: “Nambi leswi a va hanya a makazri ka vhanu lava nga mu zrandzrikiki Yehovha, Nowa ni ndangu wakwe va kume vanghanu lavanene kole kaya kwavu.” A ntsrhaku ka loko a babatisiwile, Vanessa a ve phayona. Swoswi a li: “Leswi swi ni pfune ku kuma vanghanu a bandleni dzranga ne mabandleni man’wana.” Na wene u nga swi kota ku kuma vanghanu lavanene hi ku khinyela swinene a ntizrweni lowu Yehovha a hi nyikiki wone.​—Mt 24:14.

(Vona mayava 12-15) *

12. Hi wini muxaka wa ntxhavu lowu Adamu na Evha a va nge na wone, nakone ku ve ni ntsrhovelo wini?

12 Txhava ku hlundzrukisa Yehovha. Mixaka yimbeni ya ntxhavu ya hi pfuna. Hi xikombiso, hi fanela ku txhava ku hlundzrukisa Yehovha. (Ps 111:10) Lowo i muxaka lowunene wa ntxhavu. Loko Adamu na Evha a ve txutxela muxaka lowo wa ntxhavu, inha va nga mu pfukelanga Yehovha. Kambe va mu pfukelile. Loko va dohile, mahlo yavu ma pfulekile, leswi liki va swi vonisisile leswaku a va li vadohi. A ku nge he na ntxhumu wa wunene lowu a va ta wu nyika vanavu loko ku nge xidoho ni lifu ntsena. Loko va swi vonile leswaku va le ka xiyimu xini, va ve ni tingana hi kola ka leswi a va nga yambalanga ntxhumu kutani va tifuneketa.​—Gn 3:7, 21.

13-14. a) Hi ku ya hi 1 Petros 3:21, ha yini hi nga fanelanga ku va ni ku txhava loku bihiki ka ku fa? b) Hi swini swivangelo leswi hi nga naswu swa kuva hi zrandzra Yehovha?

 13 Ku txhava ku hlundzrukisa Yehovha swa djuleka minkama hinkwayu. Kambe lexi nga djulekiki i ku tsrhama na hi txhava leswaku hi ta khatisiwa hi lifu. Ha yini? Hikusa Yehovha a pfule ndlela ya ku va hi kuma wutomi lebyi nga gamikiki. Loko hi doha kambe hi tisola na swi sukela mbilwini, Yehovha a ta hi dzrivalela swihono swezru. A ta hi dzrivalela hi leswi hi kombisaka lipfumelo ka xitlhavelo xa N’wanakwe lexi hi huluxaka. Ndlela ya ku sungula leyi hi kombisaka lipfumelo ha yone i ku nyiketela wutomi byezru ka Xikwembu Nkulukumba hi tlhela hi babatisiwa.​—Dondzra 1 Petros 3:21.

14 Hi ni swivangelo swa ku tala swa ku va hi zrandzra Yehovha. A hi nyika mintxhumu leyinene leyi hi tikholisaka ha yone siku ni siku, nakone a hi dondzrisa xihlayelamfuzri mayelanu na yene ni minkongometo yakwe. (Yh 8:31, 32) A hi nyike bandla dzra wukriste akuva dzri hi kongomisa ni ku hi seketela. A hi pfuna ku zrwala mintsrhwalu yezru swoswi a tlhela a hi nyika dumbo dzra ku hanya hi la ku nga gamikiki a hansi ka swiyimu leswi hetisekiki a nkameni lowu taka. (Ps 68:19; Mpf 21:3, 4) Ku ni mintxhumu yinyingi leyi Yehovha a hi yentxeliki yone ku komba leswaku awa hi zrandzra. Loko hi yanakanyisisa ha yone, na hine hi ta susumeteleka ku mu zrandzra. Nangweso, ku zrandzra Yehovha swi hi dondzrisa ku va ni ku txhava lokunene. Ha txhava ku khunguvanyisa Lweyi hi mu zrandzraka swinene.

15. Xana Makayla a ku hlulise kuyini ku txhava loku a a li nakone ka leswaku a ta doha?

15 Hi lani hi swi voniki ha kone, Makayla a a txhava leswaku a nga txhuka a doha. Kambe a hlule ku txhava koloko. Hi ndlela yini? Hi ku twisisa leswaku Yehovha awa dzrivalelana. A li: “Ni xiye leswaku hinkwezru a hi hetisekanga nakone hi yentxa swihoxo. Kambe ni tlhele ni twisisa leswaku Yehovha awa hi zrandzra ni leswaku a ta hi dzrivalela hi nkonta ya xitizrulo.” Lizrandzru dzrakwe hi Yehovha dzri mu susumetele ku tinyiketela a tlhela a babatisiwa.

(Vona yava 16) *

16. Xana Miles a pfuniwe hi ndlela yini ku hlula ku txhava nkaneto?

16 Miles, lweyi a a txhava leswaku mamana wakwe a a ta yala ku mu tsrhika a babatisiwa, a kombele mpfunu ka mulaviseli wa muganga. A li: “Mulaviseli wa muganga a ni byele leswaku na yene a kulele ka ndangu lowu wu yavaniki hi wukhongoti. A ni pfune ku yanakanya hi leswi a ni ta swi byela mamana akuva ni mu kholwisa leswaku hi mine ni tilangeliki ku babatisiwa neswaku a ni nga sindzrisiwanga ha papayi.” Mamana wa Miles a nga swi nyonxelanga leswi a nga swi twa. Hi wugamu, swi sindzrise leswaku Miles a zruzra kaya, kambe a khomelele ka xiboho xakwe. Miles a li: “Ku dondzra hi mintxhumu leyinene leyi Yehovha a ni yentxeliki yone swi ni khumbe mbilu. Loko ni yanakanyisise swinene hi xitlhavelo xa Yesu xa ku hi huluxa, ni twisise ndlela leyi Yehovha a ni zrandzraka swinene ha yone. Swoleswo swi ni  susumetele ku tinyiketela ka Yehovha ni va ni babatisiwa.”

KHOMELELA KA XIBOHO XAKU

Hi nga kombisa leswaku hi tlangela leswi Xikwembu Nkulukumba a hi yentxeliki swone (Vona yava 17)

17. Hi wini mukhandlu lowu hinkwezru hi nga na wone?

17 Loko Evha a de handzru wa nsinya lowu a wu li a Edeni, a fulazrele Tatana wakwe. Loko na yene Adamu a dile, a kombise leswaku a a nga na mhaka nakone a a nga swi tlangeli hinkwaswu leswi Yehovha a mu yentxeliki swone. Hinkwezru hi ni mukhandlu wa ku kombisa leswaku a hi pfumelelani na xone xiboho lexi Adamu na Evha va xi yentxiki. Loko hi babatisiwa, hi komba Yehovha leswaku ha kholwa leswaku hi yene lwa nga ni mfanelo ya ku beka milawu ya leswi nga swinene ni leswi bihiki ka hine. Nangweso, hi kombisa leswaku hi zrandzra Tatana wezru nakone ha mu dumba.

18. I yini leswi u nga swi yentxaka akuva swi ku fambela ha hombe loko u tizrela Yehovha?

18 A ntsrhaku ka loko hi babatisiwile, ka ha ta sala ntlhontlho wun’we: Xana hi ta hanya hi milawu ya Yehovha siku ni siku, kumbe hi ta tibekela ya ka kwezru? Vhanu va ntsrandzra-vahlayi va hanya hi milawu ya Yehovha lembe dzrin’wana ni dzrin’wana. Ku fana na vone, na wene u nga swi kota loko u ya mahlweni u kulisa wutivi byaku hi Zritu dzra Xikwembu Nkulukumba, ku nga Bibele, u titlhanganisa ni vamakwenu nkama ni nkama u tlhela u byela van’wana hi nkhinkhi hi leswi u swi dondzraka hi Tatana waku wa lizrandzru. (Hb 10:24, 25) Loko u yentxa swiboho, yingiseta swilayu leswi Yehovha a ku nyikaka swone hi ku tizrisa Zritu dzrakwe ni nhlengeletanu yakwe. (Eza 30:21) Kutani hinkwaswu leswi u swi yentxaka swi ta ku fambela ha hombe.​—Pr 16:3, 20.

19. I yini leswi u fanelaka ku tsrhama hi ku swi pimisa, nakone ha yini?

19 Loko u tsrhama hi ku pimisa hi ndlela leyi nkongomiso wa Yehovha wu ku pfunaka ha yone, u ta ya u mu zrandzra, yene ni milawu yakwe. Kutani nambi Sathana o ku dzringa ha yini na yini, a nge ti swi kota ku ku tsrhikisa ku tizrela Yehovha. Tivone na u hanya wugan’wini bya 1.000 wa malembe. U ta languta ntsrhaku kutani u vona leswaku kuva u babatisiwile ku ve xiboho xa lisima ku tlula swiboho hinkwaswu leswi u samiki u swi yentxa!

LISIMU 28 I Mani Munghanu Wa Yehovha?

^ par. 5 Xiboho xa lisima dzrikulu ku tlula hinkwaswu leswi u nga swi yentxaka a wuton’wini i xa leswaku u ta babatisiwa kumbe im-him. Ha yini xiboho lexo xi li xa lisima swa ku nhati? Nhloko-mhaka leyi yi ta hlamula xivutiso lexo. Handle ka leswo, yi ta pfuna lava pimisaka ku babatisiwa ku hlula swihinga leswi nga ha vaka swi va yentxa va ganaganeka.

^ par. 56 NTLHAMUXELO WA SWIFANISO: Ku kala ku tidumba: Djaha ledzri dzri txhava ku yangula a mintlhanganwini.

^ par. 58 NTLHAMUXELO WA SWIFANISO: Nkutxetelo wa vanghanu: Mumpswha lweyi a nga Mboni na a li ni munghanu lweyi a nga liki munene. Kutani loko a vona Timboni-kulobye, o dana.

^ par. 60 NTLHAMUXELO WA SWIFANISO: Ku txhava ku hoxa: Loko makwavu a tsremiwile a bandleni a tlhela a suka kaya, n’hwanyana lweyi a txhava leswaku na yene a nga ha hoxa.

^ par. 62 NTLHAMUXELO WA SWIFANISO: Ku txhava nkaneto: Djaha ledzri dzri txhava ku khongota na dzri voniwa hi mamana wa dzrone lwa nga liki mupfumeli.

^ par. 65 NTLHAMUXELO WA SWIFANISO: Ku kala ku tidumba: Djaha ledzri dzri tihita ka xidondzro xa dzrone xa ximhunu.

^ par. 67 NTLHAMUXELO WA SWIFANISO: Nkutxetelo wa vanghanu: Mumpswha lweyi a nga Mboni a dondzra ku tivona lisima hi ku va Mboni.

^ par. 69 NTLHAMUXELO WA SWIFANISO: Ku txhava ku hoxa: N’hwanyana lweyi hi ku zrandzra xihlayelamfuzri, a tinyiketelile ka Yehovha, a babatisiwa.

^ par. 71 NTLHAMUXELO WA SWIFANISO: Ku txhava nkaneto: Djaha ledzri dzri kuma xixixi xa ku tlhamuxela mamana wa dzrone leswi dzri swi pfumelaka.