Skip to content

Skip to table of contents

Timboni ta Yehovha

Hlawula lidzrimi Xironga

 NDZRIMA 9

Xana A Misava Yi Kusuhi Ni Ku Hela?

Xana A Misava Yi Kusuhi Ni Ku Hela?

1. Xana hi nga swi tivisa kuyini leswi taka yentxeka ka masiku lama taka?

U SAMA u hlalela madzrungula ka televisão kumbe u ma twa ka radiyu, kutani u tivutisa leswi: ‘Kasi mintxhumu leyi yi ta hela siku muni xana ke?’ Ku yentxeka mintxhumu yinyingi ya ku biha ni leyi tsremaka nhlana lakakuva van’wana va pfumela leswaku a misava yi kusuhi ni ku hela. Xana leswo i ntiyiso? Xana yi kone ndlela ya ku tiva leswi taka yentxeka ka masiku lama taka? Ina. Nambi leswi vhanu va nga tivikiki leswi taka yentxeka, Yehovha Xikwembu Nkulukumba awa swi tiva. Hi ku tizrisa Bibele, a hi byela leswi wumundzruku byezru ni bya misava byi hi tameleliki swone.​—Ezaya 46:10; Yakob 4:14.

2, 3. I yini leswi vadondzrisiwa va Yesu a va djula ku swi tiva, nakone a va yangulise kuyini?

2 Loko Bibele dzri vulavula hi ku hela ka misava, a dzri hlayi misava leyi hi yi kandzretelaka, kambe dzri hlaya ku hela ka wubihi hinkwabyu. Yesu a dondzrise vhanu leswaku Mfumu wa Xikwembu Nkulukumba wu ta fuma misava. (Luka 4:43) A vadondzrisiwa vakwe va djule ku tiva leswaku a Mfumu wolowo a wu ta ta siku muni, va ku: ‘Hi byele nkama lowu swi taka humelela ha wone, u hi tivisa ni xikombiso xa ku buya kwaku, ni xa ku hela ka misava.’ (Mattheo 24:3) Yesu a nga va byelanga siku hi ku kongoma, kambe a va byele leswi a swi ta humelela loko misava yi li kusuhi ni ku hela. Leswi Yesu a tiki swi ta humelela, swa humelela swoswi.

3 Ka ndzrima leyi, hi ta vulavula hi leswi kombaka leswaku hi hanya a masikwini ya wugamu. Akuva hi twisisa leswaku ha yini mintxhumu ya ku biha ngopfu yi humelela  la misaveni, hi ta zranga hi ku vulavula hi yimpi leyi humeleliki a matilweni.

YIMPI A TILWENI

4, 5. a) Ku yentxeke yini a matilweni ntsrhaku ka loko Yesu a ve Hosi? b) Hi ku ya hi Apfuletelo 12:12, ku yentxeke yini a misaveni ntsrhaku ka loko Sathana a txukumeteliwe ka yone?

4 Ka Ndzrima 8 hi dondzre leswaku Yesu a ve Hosi a matilweni hi 1914. (Daniel 7:13, 14) A buku dzra Apfuletelo dzri hi byela leswi humeleliki: ‘Ku va ni ku lwa a tilweni; Mikael [ku nga Yesu] ni tintsrumi takwe va lwa na dragon [Sathana]; na dzrone dragon dzri lwa, na dzri ni tintsrumi ta dzrone.’ * Sathana ni mademona yakwe va hluliwile ka yimpi leyi, kutani va txukumeteliwa la misaveni. Yanakanya hi ku nyonxa loku tintsrumi ti viki na kone. Kambe swi li yini hi vhanu la misaveni? Bibele dzri li lowo a wu ta va nkama wa nhlomulo ka vhanu. Ha yini? Hikuva Diyavulosi a hlundzruke swinene ‘hi ku tiva leswaku a nkama lowu a nga nawu i wutsrongo’.​—Apfuletelo 12:7, 9, 12.

5 Diyavulosi hi yene a hi vangelaka nhlomulo lowu hi nga nawu la misaveni. A hlundzrukile hi ku tiva leswaku nkama lowu saliki wa kuva Xikwembu Nkulukumba a mu suvisa i wutsrongo. A hi kambisiseni leswi Yesu a tiki swi ta humelela a masikwini ya wugamu.​—Yana ka “Dondzra Swin’wana”, 24.

MASIKU YA WUGAMU

6, 7. Xana ku hlayiwa yini namunhla hi tiyimpi ni tindlala?

6 Tiyimpi. Yesu a te: ‘A dzrin’we tiko dzri ta pfukela dzrin’wana tiko, ni mfumu wun’we wu ta pfukela mfumu wun’wana.’ (Mattheo 24:7) Vhanu vanyingi va dlayiwile hi tiyimpi leti viki kone a masikwini yezru ku tlula matin’wini  hinkwawu ya vhanu. Nhlengeletanu leyi kambisisaka leswi yentxakaka a misaveni hinkwayu yi li ku sukela hi 1914, tiyimpi ti dlaye vhanu va ku tlula 100.000.000. A ndzreni ka 100 wa malembe, ku sukela hi 1900 ku ya ka 2000, nhlayu ya vhanu lava dlayiwiki a tiyimpini a yi tlula kazrazru nhlayu ya vhanu lava dlayiwiki ku dzringana malembe ya 1900 lama khalutiki. Yanakanya wusiwana ni ku kazrateka loku vhanu va ntsrandzra-vahlayi va viki nakone hi kola ka yimpi!

7 Tindlala. Yesu a te ‘ku ta va ni tindlala’. (Mattheo 24:7) Nambi leswi ku pfuniwaka swakuda swa ku tala ku tlula a nkameni wa khale, vhanu vanyingi a va na swakuda leswi yanelaka. Ha yini? Hikusa a va na mali leyi yanelaka ya ku xava swakuda kumbe a va na mbangu wa ku dzrima. Vhanu va ntsrandzra-vahlayi va sika hi ndlala. Nhlengeletanu leyi tizrelaka swa wudahu yi li lembe ni lembe ku fa vatsrongwana lava tlulaka 5.000.000, hi kola ka madela ya wusiwana.

8, 9. I yini leswi kombaka leswaku wuprofeta bya Yesu mayelanu ni swimbeta ni mavabyi bya hetiseka?

8 Swimbeta, kumbe ku tsrekatsreka ka misava. Yesu a profete leswi:  ‘Ku ta va ni swimbeta leswikulu.’ (Luka 21:11) Lembe ni lembe, ku humelela swimbeta leswikulu. Ku sukela hi 1900, ku tlula 2.000.000 wa vhanu va dlawile hi swimbeta. Nambi leswi tekinolojiya dzri pfunisaka ku vona swimbeta na swi nga si na humelela, vhanu vanyingi va ha fa.

9 Mavabyi. Yesu a profete leswaku a ku ta va ni ‘mintungu’. Mavabyi lama nga ni khombo a ma ta hangalaka hi xihatla ni ku dlaya vhanu vanyingi. (Luka 21:11) Nambi leswi vadokodela va dondzriki madahela ya mavabyi manyingi, ka ha ni man’wana lama nga dahekikiki. Ina, madzrungula man’wana ma hlaya leswaku lembe ni lembe vhanu va ntsrandzra-vahlayi va fa hi mavabyi ya ku fana ni tuberkuloze, malarya, ni kolera. A hi leswo ntsena, vadokodela va tsrumbule 30 wa mixaka ya mavabyi lamampswha. Man’wana ya wone a ma daheki.

MATSRHAMELA YA VHANU A MASIKWINI YA WUGAMU

10. Xana 2 Timoteo 3:1-5 yi hetiseka hi ndlela yini namunhla?

10 Ka 2 Timoteo 3:1-5, Bibele dzri li: ‘A masikwini ya vugamu, ku ta tlhasa minkama lemimfani.’ Mupostola Pawulo a tlhamuxele ndlela  leyi vhanu vanyingi a va ta hanya ha yone a masikwini ya wugamu. A te vhanu a va ta va:

  • Vatizrandzri

  • Vazrandzri va mali

  • Lava ku ka va nga yingiseti vapswele vavu

  • Lava nga dumbekiki

  • Lava nga zrandzrikiki maxaka yavu

  • Lava nga tivikiki ku tikhoma

  • Lava ku lebya

  • Lava zrandzraka ku titsrhavisa va nga zrandzri Xikwembu Nkulukumba

  • Lava nga ni xiyimu xa wukhongoti kasi va landzrule ntamu wa byone

11. Hi ku ya hi Amapsalma 92:7, ku ta yentxeka yini hi lavamfani?

11 Xana vhanu va hanya hi ndlela yoleyo lomu u tsrhamaka kone? A misaveni hinkwayu vanyingi va xiswoswo. Kambe Xikwembu Nkulukumba a ta yentxa xa kukazri hi mhaka leyi. A dumbisa leswi: ‘[Loko] vamfani va mila swanga byanyi, va zrumbuka hinkwavu lava va yentxaka [wu]somboloki hi leswi swaku va ta mbundzrumuxiwa  hi laha ku nga helikiki.’​—Amapsalma 92:7, Testamente Ledrimpswha Ni Mapsalma.

MADZRUNGULA LAMANENE A MASIKWINI YA WUGAMU

12, 13. I yini leswi Yehovha a hi dondzrisiki mayelanu ni masiku ya wugamu?

12 A Bibele dzri profete leswaku a masikwini ya wugamu, a misava a yi ta tala hi mbitsi ni swikazratu. Kambe a Bibele dzri tlhela dzri hi byela leswaku a ku ta yentxeka mintxhumu leyinene.

‘Evhangeli ledzri dzra Mfumu dzri ta zrezriwa misaveni hinkwayu.’​—Mattheo 24:14

13 Ku twisisa Bibele. Muprofeta Daniyele a tsrale mayelanu ni masiku ya wugamu a ku: ‘A ku tiva ku ta yengeteleka.’ (Daniel 12:4) Xikwembu Nkulukumba a nyike malandzra yakwe wuswikoti bya ku twisisa Bibele ha hombe ku tlula khale. Yehovha a yentxe leswo ngopfu-ngopfu ku sukela hi 1914. Hi xikombiso, a hi byele lisima dzra vito dzrakwe, nkongometo wakwe hi misava ni ntiyiso mayelanu ni xitizrulo, xiyimu xa vafi ni ku pfuka kwavu. Hi dondzre leswaku ko va Mfumu wa Xikwembu Nkulukumba ntsena lowu wu nga helisaka ku kazrateka kwezru hinkwaku. Mfuzri hi dondzre ndlela leyi hi nga nyonxaka ha yone ni ku hanya hi ndlela leyi nyonxisaka Xikwembu Nkulukumba. Kambe, xana malandzra ya Xikwembu Nkulukumba ma ta yentxa yini hi wutivi lebyo? Nhlamulo hi yi kuma ka wuprofeta byin’wana.​—Yana ka “Dondzra Swin’wana”, 21 ni 25.

14. Evhangeli ledzri dzra Mfumu dzri zrezriwa kwini nakone hi vamani?

14 Ntizro wa ku zrezra a misaveni hinkwayu. Mayelanu ni masiku ya wugamu, Yesu a te: ‘Evhangeli ledzri dzra Mfumu dzri ta zrezriwa misaveni hinkwayu.’ (Mattheo 24:3, 14) Evhangeli ledzri dzra Mfumu dzri zrezriwa a matikweni ya ku tlula 230 ni hi tindzrimi leti tlulaka 700. Ina, a misaveni hinkwayu, Timboni ta Yehovha ta ‘matiko hinkwawu ni  . . . tinxaka’ hinkwatu ti pfuna vhanu ku twisisa leswaku Mfumu lowu i yini nakone wu ta va yentxela yini vhanu. (Apfuletelo 7:9) Phela, Timboni ti yentxa leswo na ti nga yimeli ku hakeliwa. Nambi leswi ti nyenyiwaka ni ku xanisiwa hi vhanu vanyingi, a xi kone lexi nga yimisaka ntizro lowu, hi lani Yesu a profetiki ha kone.​—Luka 21:17.

XANA U TA YENTXA YINI?

15. a) Xana wa kholwa leswaku hi hanya a masikwini ya wugamu? Ha yini? b) I yini leswi taka yentxeka hi lava yingisetaka Yehovha ni lava yalaka ku mu yingiseta?

15 Xana wa kholwa leswaku hi hanya a masikwini ya wugamu? A wuprofeta byinyingi lebyi vulavulaka hi masiku ya wugamu byi le ku hetisekeni. Ku nga li khale, Yehovha a ta teka xiboho xa ku yimisa ntizro wa ku zrezra madzrungula lamanene kutani ku ta tlhasa ‘vugamu’. (Mattheo 24:14) Xana wugamu i yini? I nkama lowu Xikwembu Nkulukumba a taka helisa wubihi hinkwabyu hi yimpi ya Armagedoni. Yehovha a ta tizrisa Yesu ni tintsrumi takwe leti nga ni ntamu leswaku a helisa hinkwavu lava yalaka ku yingiseta Yene ni N’wanakwe. (2 Ba-le-Thesalonika 1:6-9) Ntsrhaku ka leswo, Sathana ni mademona yakwe a va nga ha ti va hambukisa vhanu. Nakone vhanu hinkwavu lava djulaka ku yingiseta Xikwembu Nkulukumba ni ku yamukela Mfumu wakwe va ta vona ku hetiseka ka xidumbiso xakwe.​—Apfuletelo 20:1-3; 21:3-5.

16. Leswi wugamu byi nga kusuhi, xana u fanela ku yentxa yini?

16 Misava leyi, leyi fumiwaka ha Sathana, ku nga li khale yi ta helisiwa. I swa lisima ku va hi tivutisa leswi: ‘Xana ni fanela ku yentxa yini?’ Yehovha a djula leswaku u dondzra ngopfu Bibele hi lani u nga kotaka ha kone. U nga yi tekele hansi dondzro yaku ya Bibele. (Yohan 17:3) Timboni ta Yehovha ti ni mintlhanganu vhiki ni vhiki akuva ti pfuna vhanu ku twisisa Bibele. Dzringisa ku kumeka ka yone nkama  wun’wana ni wun’wana. (Dondzra Ba-Heberu 10:24, 25.) Loko u vona leswaku ku ni ntxhumu lowu u fanelaka ku wu txintxa, u nga ganaganeke ku wu yentxa. Loko u yentxa leswo, a wunghanu byaku na Yehovha byi ta tiya.​—Yakob 4:8.

17. Ha yini vhanu vanyingi va ta hlamala loko wugamu byi tlhasa?

17 Mupostola Pawulo a hlaye leswaku ku helisiwa ka wubihi ku ta tlhasa hi xitxhuketa, ‘swanga hi muyivi a vusikwini’. (1 Ba-le-Thesalonika 5:2) Yesu a profete leswaku vanyingi a va ta dzrela swikombiso swa leswaku hi hanya masikwini ya wugamu. A te: ‘Kambe swanga hi masiku ya Nowa, a ku buya ka N’wana wa mhunu [kumbe masiku ya wugamu] ku ta va tanu. Hikuva swanga hi leswi faka va da, va nwa, va tekana, va tekisa, a masikwini lawa ma nga zrangela ntita, ku ya txhikela siku ledzri Nowa a nga nhingena ngalaweni, naswone ifaka va nga tivi ntxhumu, ntita yi kondzra yi tlhasa yi va heta hinkwavu; hi swoswo, nakone, a ku buya ka N’wana wa mhunu ku ta va tanu.’​—Mattheo 24:37-39.

18. Hi xini xileleto lexi Yesu a hi nyikiki xone?

18 Yesu a hi basopisile leswaku hi nga dzrivatiwi ‘hi maxovo, kumbe ku da ngopfu, ni ku popswa ni minhlatiyelo ya wutomi’. A te wugamu byi ta ta ‘swanga xizrimba’. A tlhele a ku a siku dzra kone ‘dzri ta wa a henhla ka hinkwavu lava tsrhamiki a misaveni hinkwayu’. A yengete a ku: ‘Hitekani-ke hi minkama hinkwayu, n’wi kombela, akuva n’wi kuma ntamu wa ku phondla ku hinkwaswu leswi taka yentxeka, n’wi ta kota ku yima a mahlweni ka N’wana wa mhunu.’ (Luka 21:34-36) Ha yini swi li swa lisima ku yingiseta swileleto swa Yesu? Hikusa ku nga li khale, Sathana ni misava yakwe ya ku biha va ta helisiwa. Ntsena lava yamukeliwaka ha Yehovha na Yesu hi vone va taka huluka kutani va hanya hi la ku nga helikiki a misaveni leyimpswha.​—Yohan 3:16; 2 Petros 3:13.

^ par. 4 Mikayele i vito dzrin’wana dzra Yesu Kriste. Akuva u kuma leswi yengetelekiki, siza u ya ka “Dondzra Swin’wana”, 23.