Skip to content

Skip to table of contents

Timboni ta Yehovha

Hlawula lidzrimi Xironga

 NDZRIMA 8

I Yini Mfumu Wa Xikwembu Nkulukumba?

I Yini Mfumu Wa Xikwembu Nkulukumba?

1. Hi xini xikhongoto lexi tiviwaka ngopfu lexi hi taka xi kambisisa?

VHANU vanyingi va xi tiva ha hombe xikhongoto lexi vitaniwaka Tatana Wezru, kumbe Xikhongoto xa Hosi. Yesu a tizrise xikhongoto lexi akuva a dondzrisa valandzreli vakwe ndlela ya ku khongota. Xana a kombele yini ka xikhongoto lexi? Nakone ha yini xi li xa lisima ka hine namunhla?

2. Hi yini mintxhumu yizrazru ya lisima leyi Yesu a hi dondzrisiki ku yi kombela?

2 Yesu a te: ‘N’wine-ke, khongotisani xi swoleswo: ‘Tatana wezru lwa nga matilwini. A vito dzraku a dzri hlawuliwe. A wu te mfumu wa ku. A ku zrandzra kwaku a ku yentxiwe a misaveni, swanga hi le tilwini.’’ (Dondzra Mattheo 6:9-13.) Ha yini Yesu a hi dondzrise ku kombela mintxhumu leyi yizrazru?​—Yana ka “Dondzra Swin’wana”, 20.

3. Hi fanela ku tiva yini mayelanu ni Mfumu wa Xikwembu Nkulukumba?

3 Hi dondzrile leswaku a vito dzra Xikwembu Nkulukumba i Yehovha. Hi tlhele hi tiva nkongometo wa Xikwembu Nkulukumba hi misava ni vhanu. Kambe, Yesu a a djula ku hlaya yini loko a ku: ‘A wu te mfumu waku’? Hi ta dondzra leswaku a Mfumu wa Xikwembu Nkulukumba i yini, wu ta yentxa yini, ni leswaku wu ta hlawulekisa vito dzrakwe hi ndlela yini.

I YINI MFUMU WA XIKWEMBU NKULUKUMBA?

4. I yini Mfumu wa Xikwembu Nkulukumba nakone i mani hosi ya wone?

4 Yehovha a simeke Mfumu wa matilo a tlhela a hlawula Yesu ku va Hosi ya wone. Bibele dzri wu vitana Mfumu wa Xikwembu Nkulukumba. Yesu i ‘Mfumi ya timfumi ni  Hosi ya tihosi’. (1 Timoteo 6:15) Handle ka leswo, Yesu a kota ku yentxa leswinene ngopfu ku tlula mhunu wini na wini lweyi a samiki a fuma, mfuzri a ni ntamu swinene ku tlula vhanu hinkwavu.

5. Xana a Mfumu wa Xikwembu Nkulukumba wu ta fuma na wu sukela kwini? Wu ta fuma yini?

5 Loko ku khalute 40 wa masiku na a pfuxiwile, Yesu a tlhelele a matilweni. Hi wugamu, Yehovha a mu beke swanga Hosi ya Mfumu wakwe. (Amintiṛo 2:33) A Mfumu wa Xikwembu Nkulukumba wu ta fuma misava na wu sukela a matilweni. (Apfuletelo 11:15) Xileswo, Bibele dzri hlaya leswaku a Mfumu wa Xikwembu Nkulukumba i Mfumu wa le matilwini.​—2 Timoteo 4:18.

6, 7. I yini lexi yentxaka Yesu a va hosi leyinene ku tlula mhunu wini na wini?

6 Bibele dzri hi byela leswaku Yesu a tlakukile ku tlula hosi yini na yini hikusa hi yene ntsena ‘lwa ngeke na ku fa’. (1 Timoteo 6:16) Tihosi leti nga vhanu va nyama hi wugamu ta fa, kambe Yesu a nga ti za a file. Tlhantakubidzri, mintxhumu leyinene leyi Yesu a taka hi yentxela yone yi nga ti hela.

7 Bibele dzri hi byela leswaku Yesu a ta va Hosi leyi kombisaka wululami ni wuzrombe: ‘A moya wa Yehovha wu ta tsrhama a henhla kwakwe, moya wa vutlhazri ni wa ku yanakanya, moya wa ku tlhavukanyisa ni wa ntamu, moya wa ku tiva ni wa ku txhava Yehovha. A ta nyonxela ku txhava Yehovha; a nga ka a nga yavanyisi hi leswi mahlu yakwe ma swi vonaka; a nga ka a nga tsremi, hi laha a yingeliki ha kone hi tindleve takwe. A ta yavanyisela swisiwana hi vululami.’ (Ezaya 11:2-4) Xana a wu swi nyonxeli ku va ni hosi ya ku fana ni leyo?

8. Hi swi tivisa kuyini leswaku Yesu a nga ti fuma wuswakwe?

8 Xikwembu Nkulukumba a hlawule vhanu va nga li vangani akuva va fuma na Yesu ka Mfumu wa le matilweni.  Hi xikombiso, mupostola Pawulo a byele Timotewu a ku: ‘Loko hi tiyisela, hi ta fuma na yene.’ (2 Timoteo 2:12) I vangani va taka fuma na Yesu?

9. I vangani lava taka fuma na Yesu? Xana Yehovha a sungule nkama muni ku va hlawula?

9 Ka Ndzrima 7 hi dondzre leswaku mupostola Yohane a kombiwe xivoniso lexi ka xone a voniki Yesu a li matilweni swanga hosi a li ni lava 144.000. I vamani lava 144.000? Yohane a tlhamuxela leswaku va ‘ni vito dzra [Yesu], ni dzra tatana wa [yene], dzri tsraliwi a mimombyeni yavu’. A tlhela a ku: ‘Hi lava landzraka Hambana [ku nga Yesu] hinkwaku lomu yi yaka kone; hi vone lava xaviwiki ku vhanu.’ (Dondzra Apfuletelo 14:1, 4.) Lava va 144.000 i vakriste va ku dumbeka lava Xikwembu Nkulukumba a va hlawuliki leswaku ‘va ta fuma misava’ na Yesu. Loko va fa, va pfuxeliwa ku ya hanya a matilweni. (Apfuletelo 5:10) Ku sukela a minkameni ya vapostola, Yehovha a le ku hlawuleni ka vakriste va ku dumbeka leswaku va vumba ntlawa wa tihosi ta 144.000.

10. Ha yini ku li lizrandzru kuva Yehovha a hlawule Yesu ni lava 144.000 leswaku va fuma vhanu?

10 Yehovha a zron’weka ngopfu ha hine lakakuva a hlawule ni vhanu leswaku va fuma na Yesu. Yesu a ta va mufumi munene hikusa awa hi twisisa, nakone awa wu tiva nhlomulo wa misava. Pawulo a hlaye leswaku Yesu awa hi twela nakone a hi lweyi a nga swi kotikiki ku hi tsretsrelela gome dzrezru swanga hi leswi ‘a nga dzringiwa na yene hi matlhelo hinkwawu ku fana na hine’. (Ba-Heberu 4:15; 5:8) Handle ka leswo, lava va 144.000 va ma tiva a matsrhamela ya vhanu. Na vone va lwisane ni ku pfumala ku hetiseka ni mavabyi. Xileswo, hi nga kholwiseka ka leswaku Yesu ni lava va 144.000 va ma twisisa matitwela yezru ni swikazratu leswi hi lwisanaka na swone.

 XANA MFUMU WA XIKWEMBU NKULUKUMBA WU TA YENTXA YINI?

11. Ha yini Yesu a dondzrise valandzreli vakwe ku kombela leswaku ku zrandzra ka Xikwembu Nkulukumba ku yentxeka a matilweni?

11 Yesu a dondzrise valandzreli vakwe ku kombela leswaku ku zrandzra ka Xikwembu Nkulukumba ku yentxeka a matilweni. Ha yini? Ka Ndzrima 3 hi dondzre leswaku Sathana Diyavulosi a pfukele Yehovha. Ntsrhaku ka wupfukeli lebyo, Yehovha a pfumelele Sathana ni tintsrumi leti nga dumbekangakiki, kumbe mademona, leswaku va tama va tsrhama matilweni hi nkamanyana. Xileswo, a hi hinkwavu lava a va yentxa ku zrandzra ka Xikwembu Nkulukumba a matilweni. Ka Ndzrima 10 hi ta dondzra swin’wana mayelanu na Sathana ni mademona.

12. Hi yini mintxhumu yibidzri ya lisima leyi tlhamuxeliwaka ka Apfuletelo 12:10?

12 Bibele dzri tlhamuxela leswaku ntsrhaku ka loko Yesu a yentxiwe Hosi ya Mfumu wa Xikwembu Nkulukumba, a lwe na Sathana. (Dondzra Apfuletelo 12:7-10.) Ndzrimana 10 yi tlhamuxela mintxhumu yibidzri ya lisima leyi yentxekiki: 1) Yesu a sungula ku fuma swanga Hosi ya Mfumu wa Xikwembu Nkulukumba ni 2) Sathana a hlongoliwa matilweni, a txukumeteliwa a misaveni. Swiyentxakalu leswi kutani swi humelelile, hi lani hi taka dondzra ha kone.

13. Ku yentxeke yini matilweni loko Sathana a hlongoliwile?

13 Bibele dzri khanela hi ku tsrhava loku tintsrumi ta ku dumbeka ti viki na kone a tilweni loko Sathana ni mademona yakwe va hlongoliwile. Dzri li: ‘Tsrhavani, matilu, na n’wine n’wi yakiki kone!’ (Apfuletelo 12:12) Swoswi ku ni ku zrula loku heleliki ni wumun’we a matilweni hikusa hinkwavu va yentxa ku zrandzra ka Xikwembu Nkulukumba.

Ku sukela loko Sathana ni mademona va hlongoliwile matilweni, ku ni ku xaniseka lokukulu la misaveni

14. Xana ku yentxeka yini a misaveni hi leswi Sathana a hlongoliwiki a matilweni?

14 Kambe a xiyimu a misaveni xi hambanile. Vhanu va  yentxekeliwa hi mintxhumu ya ku txhavisa hikusa Diyavulosi a xikile nakone ‘a ni mahlundzru lamakulu, hi ku tiva leswaku a nkama lowu a nga nawu i wutsrongo’. (Apfuletelo 12:12) Sathana a hlundzrukile hikusa a hlongoliwe a matilweni nakone awa swi tiva leswaku ku nga li khale a ta helisiwa. A yentxa hinkwaswu leswi a nga swi kotaka leswaku ku va ni swikazratu, nhlomulo ni ku vaviseka a misaveni.

15. Hi kwini ku zrandzra ka Xikwembu Nkulukumba hi misava?

15 Nambitanu, a ku zrandzra ka Xikwembu Nkulukumba hi misava a ku txintxanga. A ha djula leswaku vhanu lava hetisekiki va hanya hi la ku nga helikiki a misaveni leyi nga paradeyisi. (Amapsalma 37:29) Kutani, xana Mfumu wa Xikwembu Nkulukumba wu ta swi yentxisa kuyini leswo?

16, 17. Xana wuprofeta bya Daniel 2:44 byi hi byela yini mayelanu ni Mfumu wa Xikwembu Nkulukumba?

16 A wuprofeta bya Daniel 2:44 byi li: ‘A masikwini ya tihosi leti Xikwembu Nkulukumba wa tilu a ta pfuxa mfumu lowu nga tiki honeka ni siku ni dzrin’we; a vuhosi bya wone byi nga ka byi nga hundzri byi ya ku tiko dzrin’wana; kambe wu ta tsrhova ni ku helisa mimfumu leyi hinkwayu, wu ta va kone hinkwayu minkama.’ Xana wuprofeta lebyi byi hi dondzrisa yini mayelanu ni Mfumu wa Xikwembu Nkulukumba?

17 Xa ku sungula, byi hi byela leswaku Mfumu wa Xikwembu Nkulukumba a wu ta sungula ku fuma ‘a masikwini ya tihosi leto’. Leswi liki mimfumu yin’wana a yi ta va ya ha li kone a misaveni loko Mfumu wu sungula ku fuma. Xa wubidzri, swi hi byela leswaku Mfumu wa Xikwembu Nkulukumba a wu ta tsrhama hi la ku nga helikiki nakone a wu nga ti za wu siviwile hi mimfumu yin’wana. Xa wuzrazru, a ku ta va ni yimpi makazri ka Mfumu wa Xikwembu  Nkulukumba ni mimfumu ya misava. Mfumu wa Xikwembu Nkulukumba wu ta hlula nakone wu ta fuma misava wuswawone. Vhanu va ta va ni mfumu wa wunene ngopfu ku tlula hinkwayu.

18. Hi dzrini vito dzra yimpi ya wugamu leyi taka va kone makazri ka Mfumu wa Xikwembu Nkulukumba ni mimfumu ya misava?

18 Xana a Mfumu wa Xikwembu Nkulukumba wu ta yi helisa hi ndlela yini mimfumu ya misava? Loko ku nga si na sungula yimpi ya wugamu, leyi vitaniwaka Armagedoni, mademona ma ta kanganyisa ‘tihosi ta misava hinkwayu, ma ti hlengeletela a ku lweni ka siku ledzrikulu dzra Xikwembu Nkulukumba wa Ntamu hinkwawu’. Ina, mimfumu ya misava yi ta lwa ni Mfumu wa Xikwembu Nkulukumba.​—Apfuletelo 16:14, 16; yana ka “Dondzra Swin’wana”, 10.

19, 20. Ha yini hi djula Mfumu wa Xikwembu Nkulukumba akuva wu fuma misava?

19 Ha yini hi djula Mfumu wa Xikwembu Nkulukumba? Ku ni swivangelo swizrazru. Xa ku sungula, hi dohile, xileswo ha vabya nakone ha fa. Kambe Bibele dzri li a hansi ka Mfumu wa Xikwembu Nkulukumba hi ta hanya hi la ku nga helikiki. Xileswo, Yohan 3:16 yi li: ‘Hikuva Xikwembu Nkulukumba a zrandzre misava swa ku nhati, a ko a nyik[ela] n’wanakwe, lwe wa ku va swakwe, akuva mani na mani lweyi a pfumelaka ku yene a nga lahleki, kambe a kuma vutomi lebyi nga gamikiki.’

20 Xa wubidzri, hi hanya ni vhanu lava bihiki. Vanyingi va hemba, va kanganyisa va tlhela va mbuyeta. A hi nge swi koti ku va susa, kambe Xikwembu Nkulukumba a ta swi kota. Vhanu lava nga tsrhikiki wubihi byavu va ta helisiwa hi Armagedoni. (Dondzra Amapsalma 37:10.) Xa wuzrazru, mimfumu ya misava a yi dumbeki nakone ya hluleka ku lulamisa swikazratu swa vhanu. A yi zron’weki hi ku  pfuna vhanu leswaku va yingiseta Xikwembu Nkulukumba. Bibele dzri li ‘mhunu a fuma mun’wana ku mu yentxa swa ku biha’.​—Eklesiasta 8:9.

21. Xana a Mfumu wa Xikwembu Nkulukumba wu ta hetisisa ku zrandzra kwakwe a misaveni hi ndlela yini?

21 A ntsrhaku ka Armagedoni, Mfumu wa Xikwembu Nkulukumba wu ta hetisisa ku zrandzra kwakwe a misaveni. Hi xikombiso, wu ta helisa Sathana ni mademona yakwe. (Apfuletelo 20:1-3) Hi wugamu a nga kone lwa taka vabya kumbe ku fa. Hi nkonta ya leswi Yesu a hi feliki, vhanu hinkwavu va ku dumbeka va ta hanya hi la ku nga helikiki a paradeyisini. (Apfuletelo 22:1-3) A Mfumu wu ta xwengisa vito dzra Xikwembu Nkulukumba. Xana swi tlhamuxela yini leswo? Swi tlhamuxela leswaku loko Mfumu wa Xikwembu Nkulukumba wu fuma misava, vhanu hinkwavu va ta txhava vito dzra Yehovha.​—Yana ka “Dondzra Swin’wana”, 21.

XANA YESU A SUNGULE SIKU MUNI KU FUMA?

22. Hi swi tivisa kuyini leswaku Yesu a nga vanga Hosi na a ha li misaveni kumbe a ntsrhakunyana ka ku pfuxiwa kwakwe?

22 Yesu a dondzrise valandzreli vakwe ku khongota hi ndlela leyi: ‘A wu te Mfumu waku.’ Swi le livaleni leswaku a Mfumu wa Xikwembu Nkulukumba a wa ha buya. A swi djula leswaku Yehovha a sungula hi ku simeka Mfumu wakwe  ni ku beka Yesu swanga Hosi. Xana Yesu a tekele ku va hosi loko a tlhelele tilweni? Im-him. A a fanela ku zrindzra. Ntsrhaku ka loko Yesu a pfuxiwile, Petro na Pawulo va swi beke livaleni leswaku Amapsalma 110:1 a yi khanela ha Yesu. Ka wuprofeta lebyi Yehovha a te: ‘Tsrhamisa xineneni xanga, ndzri ta ko ndzri beka valala vaku va va vunalavutelo bya minkondzro yaku.’ (Amintiṛo 2:32-35; Ba-Heberu 10:12, 13) Xana Yesu a a ta zrindzra nkama wa ku tlhasa kwini akuva a yentxiwa Hosi?

Mfumu wa Xikwembu Nkulukumba wu ta hetisisa ku zrandzra kwakwe la misaveni

23. a) Yesu a sungule siku muni ku fuma swanga Hosi ya Mfumu wa Xikwembu Nkulukumba? b) Hi ta dondzra yini ka nhloko-mhaka leyi landzrelaka?

23 Malembe manyingi a ntsrhaku ka 1914, ntlawa wun’we wa VaKriste va ntiyiso wu twisise leswaku lembe ledzri a dzri li dzra lisima ka wuprofeta bya Bibele. Ku sukela hi 1914, leswi yentxekiki la misaveni swi kombise leswaku a va tiyisile. Yesu a sungule ku fuma swanga Hosi hi lembe dzroledzro. (Amapsalma 110:2) Ntsrhakunyana ka leswo, Sathana a txukumeteliwe a misaveni, nakone a ‘nkama lowu a nga nawu i wutsrongo’. (Apfuletelo 12:12) Ka ndzrima leyi landzrelaka, hi ta vona swikombiso swin’wana swa leswaku hi hanya a nkameni wolowo. Nakone hi ta dondzra leswaku ku nga li khale Mfumu wa Xikwembu Nkulukumba wu ta hetisisa ku zrandzra kwakwe la misaveni.​—Yana ka “Dondzra Swin’wana”, 22.