Skip to content

Skip to table of contents

Timboni ta Yehovha

Hlawula lidzrimi Xironga

 NDZRIMA 2

Bibele​—Buku Ledzri Humaka Ka Xikwembu Nkulukumba

Bibele​—Buku Ledzri Humaka Ka Xikwembu Nkulukumba

1, 2. Ha yini Bibele dzri li xihiwa xa ku hlamalisa lexi pfaka ka Xikwembu Nkulukumba?

XANA u nga titwisa kuyini loko munghanu waku o ku txhuketa hi xihiwa? U nga tala hi ku nyonxa hi leswi a ku dzrimukiki, u va u mu tlangela!

2 Bibele i xihiwa xa ku hlamalisa lexi pfaka ka Xikwembu Nkulukumba! Ha yini? Hikusa dzri hi byela timhaka leti hi ngeke na ku ti kuma kumbeni. Hi xikombiso, dzri hi byela leswaku i Xikwembu Nkulukumba a tumbuluxiki matilo, misava, kun’we ni wanuna ni wansati va ku sungula. Dzri hi pfuna ku langusana ni swikazratu, dzri tlhela dzri hi byela ndlela leyi Xikwembu Nkulukumba a taka hetisisa nkongometo wakwe ha yone, wa ku yentxa misava yi va mbangu lowunene wa ku hanya ka wone.

3. Loko u tama u dondzra Bibele u ta pfuneka hi yini?

3 Loko u ya u dondzra Bibele, u ta gungula leswaku Xikwembu Nkulukumba a djula u va munghanu wakwe. Hi ku tama u dondzra ha yene, wuxaka byenu byi ta ya byi tiya.

4. I yini lexi ku hlamalisaka hi Bibele?

4 Bibele dzri kumeka hi tindzrimi ta ku tlula 3.200, nakone ku gandlisiwe Mabibele ya ntsrandzra-vahlayi. Vhanu va ku tala a misaveni hinkwayu va na dzrone hi tindzrimi tavu. Nakone, vhiki ni vhiki, ku phakeliwa Mabibele lama tlulaka 1.000.000! Hakunene, Bibele dzri hlawulekile ku tlula mabuku hinkwawu.

5. Ha yini hi hlaya leswaku Bibele i dzra Xikwembu Nkulukumba?

 5 Bibele i buku ledzri ‘huhutiwiki hi Xikwembu Nkulukumba’. (Dondzra 2 Timoteo 3:16.) Kambe vambeni va tivutisa leswaku leswi Bibele dzri tsraliwiki hi vhanu, swi nga kotekisa kuyini leswaku dzri va dzra Xikwembu Nkulukumba? Bibele dzra hlamula: ‘A vhanu va Xikwembu Nkulukumba ve ku kanela na va susumetiwa hi moya lowa ku xwenga.’ (2 Petros 1:21) A hi nge, kokwana a zruma ntukulu akuva a mu tsralela papela. Xana u nga ku papela i dzra ntukulu, kumbe i dzra kokwana wakwe? I dzra kokwana. Hi la ku fanaka, Bibele i dzra Xikwembu Nkulukumba, a hi dzra lava a va tizrisiki ku dzri tsrala. Hakunene Bibele i ‘zritu dzra Xikwembu Nkulukumba’.​—1 Ba-le-Thesalonika 2:13; yana ka “Dondzra Swin’wana”, 2.

A Tradução do Novo Mundo da Bíblia Sagrada dzra kumeka hi tindzrimi ta ku tala

 BIBELE MINKAMA HINKWAYU DZRI KHANELA NTIYISO

6, 7. Ha yini hi hlaya leswaku Bibele dzra pfumelelana?

6 Swi teke malembe ya ku tlula 1.600 leswaku Bibele dzri tsraliwa. Vatsrali va dzrone va hanye hi minkama ya ku hambana. Van’wana a va dondzrekile kasi van’wana a va nga dondzrekanga. Hi xikombiso, mu’nwe a a li dokodela. Van’wana a va li vadzrimi, vaphasi va tinhlampfi, vabyisi, vaprofeta, vatsremi va timhaka ni tihosi. Nambi leswi Bibele dzri tsraliwiki hi vhanu va ku siyana-siyana, swiyenge swa dzrone swa pfumelelana. Bibele a dzri hlayi swa kukazri ka xiyenge xin’we dzri gama dzri ya hlaya leswi hambaniki ka xin’wana. *

7 Swiyenge swa ku sungula swa Bibele swi tlhamuxela leswi ku xaniseka ku nhingenisiki xiswone a misaveni, kasi leswa wugamu swi hi byela leswaku Xikwembu Nkulukumba a ta helisa ku xaniseka hi ku yentxa misava leyi yi va Paradeyisi. Bibele dzri ni madzrungula ya vhanu lava hanyiki khale swinene, lawa ma kombaka leswaku leswi Xikwembu Nkulukumba a swi djulaka minkama hinkwayu swa yentxeka.

8. Hi swini swikombiso swa leswaku Bibele dzri hlaya ntiyiso a timhakeni ta siyensa?

8 Bibele a hi buku dzra siyensa kumbe dzra xikole, kambe loko dzri khanela hi siyensa dzri hlaya ntiyiso. Hi leswi a hi ta swi yimela ka buku dzra Xikwembu Nkulukumba. Hi xikombiso, buku dzra Levhitika dzri ni swileleto swa Xikwembu Nkulukumba leswi a swi pfuna va-Israyele ku vhikela mavabyi. Swileleto leswi swi tsraliwe khale na vhanu va nge si swi tiva leswaku switsrongwa-tsrongwana  swi vanga mavabyi. Bibele dzri tlhela dzri dondzrisa leswaku misava yi hayekiwe mpfhukeni. (Yob 26:7) Handle ka leswo, na vhanu vanyingi va ha pimisa leswaku misava yi yandlaliwe ku fana ni likuku, Bibele afa kutani dzri hlaya leswaku misava yi fana ni bola.​—Ezaya 40:22NM.

9. Ku dumbeka ka vatsrali va Bibele ku hi kholwisa yini?

9 Loko Bibele dzri khanela hi matimu, minkama hinkwayu dzri hlaya ntiyiso. Kambe mabuku manyingi ya matimu a ma hlayi ntiyiso hikusa vatsrali va wone a va pfa va fihla swimbeni. Hi xikombiso, a va nga hlayi ntxhumu loko a tiko dzravu dzri hluliwa a yimpini. Ku hambana na vone, vatsrali va Bibele a va hlaya ntiyiso, nambi loko Israyele a hluliwa. Va tlhele va tsrala ni swihoxo swavu. Hi xikombiso, ka buku dzra Atinhlayo, Moxe a hi byela hi xihoxo xakwe lexikulu, lexi yentxiki Yehovha a mu kwhavela. (Atinhlayo 20:2-12) Ku dumbeka ka vatsrali va Bibele ku hi kholwisa leswaku Bibele dzri pfa ka Xikwembu Nkulukumba nakone hi nga dzri dumba.

BUKU DZRA SWILAYU LESWINENE

10. Ha yini swilayu swa Bibele swi hi pfuna ni namunhla?

10 Bibele i buku ledzri ‘huhutiwiki hi Xikwembu Nkulukumba’ nakone dzri ‘lulameli ku dondzrisa, ni ku kholwisa ni ku busetela kumbe ku wololoxa’. (2 Timoteo 3:16) Ina, swilayu swa Bibele swa hi pfuna ni namunhla. Yehovha awa yi twisisa ndlela leyi hi pimisaka ni ku titwa ha yone hikusa a tiva leswi hi vumbisiwiki xiswone. A hi tiva ku yampswa ku tlula hine vinyi, nakone a djula hi nyonxa a wuton’wini. Awa swi tiva leswi nga swinene ni leswi bihiki ka hine.

11, 12. a) Hi swini swilayu leswi Yesu a swi nyikeliki ka buku dzra Mattheo tindzrima 5 ku ya ka 7? b) Hi swini swin’wana leswi hi nga swi dondzraka a Bibeleni?

11 Ka Mattheo, tindzrima 5 ku ya ka 7, hi kuma swilayu  leswi Yesu a swi nyikeliki swa ndlela ya ku kuma ku nyonxa, ndlela ya ku hanyisana ni vambeni, ya ku khongota ni ndlela leyi hi fanelaka ku yi vonisa xiswone mali. Nambi leswi ku khalutaka 2.000 wa malembe na a swi nyikelile swilayu leswi, swa ha hi pfuna ni namunhla.

12 Handle ka leswo, a Bibeleni Yehovha a hi nyika minsinya ya milawu leyi hi pfunaka ku hanya hi ku nyonxa a ndangwini, ku va vatizri lavanene ni ku hanyisana hi ku zrula. Minsinya ya milawu ya Bibele yi nga hi pfuna ku tlhantlha swikazratu hinkwaswu, swi nge na mhaka leswaku hi huma kwini.​—Dondzra Ezaya 48:17; yana ka “Dondzra Swin’wana”, 3.

U NGA BYI DUMBA WUPROFETA BYA BIBELE

Ezaya mutsrali wa Bibele a profete leswaku Babilona a a ta hluliwa

13. Xana Ezaya a profete yini hi doropa dzra Babilona?

13 Wuprofeta byinyingi bya Bibele byi hetisekile. Hi xikombiso, Ezaya a profete hi ku helisiwa ka Babilona. (Ezaya 13:19) A hlaye hi ku kongoma ndlela leyi doropa ledzro a dzri ta helisiwa ha yone. Doropa ledzri, a dzri sizreleliwe hi swipfalu leswikulu ni hi nambu. Kambe Ezaya a profete leswaku nambu a wu ta pshwa, nakambe swipfalu a swi nge ti pfaliwa. Vadumeli a va ta hlula na va nga lwanga. A tlhele a hlaya ni vito dzra muzrangeli wa kone, a ku i Korexe.​—Dondzra Ezaya 44:27–45:2; yana ka “Dondzra swin’wana”, 4.

14, 15. Wuprofeta bya Ezaya byi hetiseke hi ndlela yini?

14 Ntsrhaku ka 200 wa malembe na wuprofeta lebyi byi tsraliwile, ku tlhase masotxha ku ta hlasela Babilona. I mani lweyi a a ma zrangela? Hi lani wuprofeta byi hlayiki ha kone, i Korexe, hosi ya Persia. A ku li nkama wa leswaku wuprofeta byi hetiseka.

15 Hi wusiku lebyi va hlaseliwiki ha byone, va-Babilona a va ni nkhuvu. A va titwa na va sizreleliwe hi nambu ni  hi lithangu ledzri yakiwiki dzri tiya. Kambe handle ka doropa, Korexe ni masotxha yakwe a va li ku djikiseni ka mati ya nambu. Ma pshwe lakakuva masotxha ma kota ku tsremakanya. Kambe a ma ta khalutisa kuyini ka lithangu ledzri yakiwiki dzri tiya? Hi lani wuprofeta byi hlayiki ha kone, swipfalu a swi nga pfaliwanga, xileswo, masotxha ma teke doropa na ma nga zanga ma lwa.

16. a) Ezaya a profete yini hi wumundzruku bya Babilona? b) Hi swi tivisa kuyini leswaku wuprofeta bya Ezaya byi hetisekile?

 16 Ezaya a profete leswaku hi wugamu a ku nga ha ti tsrhama mhunu a Babilona. A te: ‘Wu nga ka wu nga ha tlheli wu pfuxetiwa ni siku ni dzrin’we, vhanu va nga ka va nga ha yaki ku wone ku tlhasa tinxakeni ni le tinxakeni.’ (Ezaya 13:20) Xana swi yentxekile? Lomu doropa dzra Babilona a dzri kumeka kone, 80 wa makilometro a nyingitimu wa Bagdade, a Iraque, i mazrumbi. Ni swoswi a ku tsrhami mhunu. Yehovha a kukule Babilona hi ‘nkukulu lowu helisaka’.​—Ezaya 14:22, 23. *

Mazrumbi ya Babilona

17. Ha yini hi nga tiyisekaka leswaku swidumbiso hinkwaswu swa Yehovha swi ta hetiseka?

17 Leswi wuprofeta byinyingi bya Bibele byi hetisekiki, swi komba leswaku hi nga swi dumba leswi Bibele dzri swi hlayaka hi wumundzruku. Hi nga tiyiseka leswaku Yehovha a ta hetisisa xidumbiso xakwe xa ku yentxa misava yi va Paradeyisi. (Dondzra Atinhlayo 23:19.) Ina,  hi ni ku lavisela ka ‘wutomi lebyi nga helikikiki, lebyi Xikwembu Nkulukumba, lwa ngeke na madzrimi, a nga hi dumbisa byone, na minkama ya khale mi nga si na va kone.’​—Tito 1:2. *

BIBELE DZRI NGA TXINTXA WUTOMI BYAKU

18. Pawulo a dzri tlhamuxelisa kuyini ‘zritu dzra Xikwembu Nkulukumba’?

18 Hi lani hi dondzriki ha kone, a ku na buku dzra ku fana ni Bibele. Dzra twanana, mfuzri loko dzri khanela hi siyensa kumbe hi matimu minkama hinkwayu dzri hlaya ntiyiso. Nakambe dzri hi nyika swilayu, nakone dzri ni wuprofeta byinyingi lebyi hetisekiki. Kambe a hi leswo ntsena. Mupostola Pawulo a te: ‘A zritu dzra Xikwembu Nkulukumba dzra hanya, dzri ni ntamu.’ Swi tlhamuxela yini leswo?​—Dondzra Ba-Heberu 4:12.

19, 20. a) Bibele dzri nga ku pfunisa kuyini ku titiva ku yampswa? b) U nga swi kombisisa kuyini leswaku u dzri nyika lisima Bibele?

19 Bibele dzri nga txintxa wutomi byaku. Dzri nga ku pfuna ku twisisa leswaku u mhunu muni, mapimisela ni matitwela yaku ya le ndzreni. Hi xikombiso, hi nga ha pimisa leswaku ha mu zrandzra Yehovha, kambe hi nga kombisa lizrandzru ledzro hi ku hanya hi leswi Bibele dzri hi dondzrisaka swone.

20 Hakunene Bibele i buku dzra Xikwembu Nkulukumba. A djula u dzri dondzra ni ku dzri zrandzra. Kombisa ku khensa hi ku ya mahlweni u dzri dondzra. U ta twisisa leswaku ha yini Xikwembu Nkulukumba a vumbe vhanu. Ka ndzrima leyi landzrelaka hi ta dondzra leswi yengetelekiki mayelanu ni mhaka leyo.

^ par. 6 Vhanu van’wana va li a Bibele dzra lwisana, kambe lowo a hi ntiyiso. Vona Ndzrima 7 ya buku ledzri liki A Bíblia—Palavra de Deus ou de Homem? dzri humexiwiki hi Timboni ta Yehovha.

^ par. 16 Loko u djula ku dondzra swimbeni hi wuprofeta bya Bibele, siza u vona matluka 27-29 ya xibukwana lexi liki Um Livro para Todas as Pessoas, lexi humexiwiki hi Timboni ta Yehovha.

^ par. 17 Ku helisiwa ka Babilona, ko va wuprofeta byin’wana bya Bibele lebyi hetisekiki. Dondzra hi wuprofeta lebyi khanelaka hi Yesu Kriste ka “Dondzra Swin’wana”, 5.