Skip to content

Skip to table of contents

Timboni ta Yehovha

Hlawula lidzrimi Xironga

 DONDZRO 11

Xana Minsinya Ya Milawu Ya Bibele Yi Hi Pfunisa Kuyini?

Xana Minsinya Ya Milawu Ya Bibele Yi Hi Pfunisa Kuyini?

1. Ha yini hi djula ku kongomisiwa?

Xana minsinya ya milawu ya Bibele yi nga hi susumetelisa kuyini ku tivhikela timhangu?​—AMAPSALMA 36:9

Mutumbuluxi wezru a tlhazrihe ngopfu ku hi tlula. Swanga Tatana lwa nga ni lizrandzru, awa zron’weka ha hine. Nakone, a nga hi hambelanga kuva hi tifuma. (Yeremiya 10:23) Xileswo, swanga heswi ntsrongwana a djulaka ku kongomisiwa hi vapswele, hinkwezru hi djula ku kongomisiwa ha Xikwembu Nkulukumba. (Ezaya 48:17, 18) Minsinya ya milawu ya Bibele yi hi nyika nkongomiso lowu nga nyiko ya Xikwembu Nkulukumba.​—Dondzra 2 Timoteo 3:16.

Milawu ni minsinya ya milawu ya Yehovha yi hi dondzrisa ndlela ya ku yampswa ya ku hanya ha yone swoswi nakone yi hi komba leswaku hi nga yi kumisa kuyini minkateko leyi nga helikiki a nkameni lowu taka. Leswi lweyi a hi hambiki ku nga yene Xikwembu Nkulukumba, swo vhela swi twisiseka leswaku hi fanela ku yamukela nkongomiso wakwe hi mbilu ya ku khensa.​—Dondzra Amapsalma 19:7, 11; Apfuletelo 4:11.

2. I yini minsinya ya milawu ya Bibele?

Minsinya ya milawu ya Bibele i mintiyiso ya masungulu. Kasi milawu yi nga tizra ka swiyimu swa ku kongoma. (Deuteronoma 22:8) Hi fanela ku tizrisa wuswikoti bya ku yanakanya akuva hi twisisa leswaku nsinya wa kukazri wa nawu wu tizrisa kuyini a xiyin’wini xa kukazri. (Amaproverbia 2:10-12) Hi xikombiso, Bibele dzri dondzrisa leswaku wutomi i nyiko ya Xikwembu Nkulukumba. Nsinya lowu wa nawu wa masungulu wu nga hi kongomisa loko hi li a ntizrweni, a kaya ni le ku yendzreni. Wu hi yentxa hi tivhikela timhangu.​—Dondzra Amintiṛo 17:28.

3. Hi yini minsinya yibidzri ya milawu leyi nga ya ku sungula?

Yesu a khanele hi minsiya yibidzri ya milawu leyi nga ya lisima dzrikulu a henhla ka hinkwayu. Lowa ku sungula wu komba leswaku  vhanu va hanyela yini​—i nga ku tiva Xikwembu Nkulukumba, va mu zrandzra va va va mu tizrela hi ku dumbeka. Loko hi djula ku yentxa xiboho xini na xini, hi fanela ku zranga hi ku pimisa hi nsinya lowu wa ku sungula wa nawu. (Amaproverbia 3:6) Lava londzrisaka nsinya lowu wa nawu va ta kuma wunghanu na Xikwembu Nkulukumba, ku nyonxa ka ntiyiso ni wutomi lebyi nga helikiki.​—Dondzra Mattheo 22:36-38.

Nsinya wa nawu wa wubidzri wu nga hi pfuna ku hanya hi ku zrula ni vhanu vambeni. (1 Ba-le-Korinte 13:4-7) Ku tizrisa nawu lowu wa wubidzri swi patsra ku tekelela ndlela leyi Xikwembu Nkulukumba a khomaka ha yone vhanu.​—Dondzra Mattheo 7:12; 22:39, 40.

4. Xana minsinya ya milawu ya Bibele yi hi pfunisa kuyini?

Minsinya ya milawu ya Bibele yi dondzrisa mindangu ndlela leyi yi nga tlhanganisiwaka ha yone hi lizrandzru. (Ba-le-Kolosa 3:12-14) Nakone, Zritu dzra Xikwembu Nkulukumba dzri sizrelela mindangu hi ku dondzrisa nsinya wun’wana wa nawu lowu kongomisaka—wa leswaku wukati i xiboho lexi nga helikiki.​—Dondzra Genesis 2:24.

Hi ku landzrelela tindondzro ta Bibele, hi nga kota ku tisizrelela hi nyameni ni le mbilwini. Hi xikombiso, vatholi va tala ku langa vatizri lava hanyaka hi minsinya ya milawu ya Bibele ya ku fana ni ku dumbeka ni ku tizra hi nkhinkhi. (Amaproverbia 10: 4, 26; Ba-Heberu 13:18) Zritu dzra Xikwembu Nkulukumba nakone dzri hi dondzrisa kuva hi nga hlatiyeli hi mintxhumu leyi vilelekaka, kambe hi zrangisa wunghanu byezru na Xikwembu Nkulukumba a henhla ka mintxhumu leyi vonekaka.​—Dondzra Mattheo 6:24, 25, 33; 1 Timoteo 6:8-10.

Ku tizrisa minsinya ya milawu ya Bibele swi nga hi sizrelela ka mavabyi. (Amaproverbia 14:30; 22:24, 25) Hi xikombiso, loko hi namazrela nawu wa Xikwembu Nkulukumba lowu tsimbisaka ku popswa, leswo swi ta hi sizrelela ka mavabyi lama dlayaka ni timhangu. (Amaproverbia 23:20) Yehovha awa hi pfumelela ku nwa byala kambe ntsena hi ku pimela. (Amapsalma 104:15; 1 Ba-le-Korinte 6:10) Minsinya ya milawu ya Xikwembu Nkulukumba ya hi pfuna hi ku hi dondzrisa ku vonelela swiyentxo ni miyanakanyu yezru. (Amapsalma 119:97-100) Nambitanu, lexi yentxaka Vakriste va ntiyiso va hlonipha milawu ya Xikwembu Nkulukumba a hi ku djula ku tipfuna ntsena. Va yentxa tanu hikusa va djula ku dzrumisa Yehovha.​—Dondzra Mattheo 5:14-16.