Skip to content

Skip to table of contents

Timboni ta Yehovha

Hlawula lidzrimi Xironga

 DONDZRO 3

Xana Madzrungula Lamanene Hakunene Ma Huma Ka Xikwembu Nkulukumba?

Xana Madzrungula Lamanene Hakunene Ma Huma Ka Xikwembu Nkulukumba?

1. I mani Mutsrali wa Bibele?

Madzrungula lamanene ya leswaku vhanu va ta hanya hi la ku nga helikiki la misaveni ma tsraliwe Bibeleni. (Amapsalma 37:29) Bibele dzri vumbiwa hi 66 wa mabuku lamatsrongo. Xikwembu Nkulukumba a tizrise kolomu ka 40 wa vavanuna va ku dumbeka ku ma tsrala. Mabuku ya ku sungula ya ntlhanu ma tsraliwe ha Moxe kolomu ka 3.500 wa malembe lama khalutiki. Buku dzra wugamu dzri tsraliwe ha muapostola Yohane ku tlula 1.900 wa malembe lama khalutiki. Xana lava tsraliki Bibele va tsrale miyanakanyu ya mani? Xikwembu Nkulukumba a vulavule ni vatsrali va Bibele hi ku tizrisa moya wakwe wa ku xwenga. (2 Samuel 23:2) Va tsrale miyanakanyu ya Xikwembu Nkulukumba, ku nga li ya ka kwavu. Xileswo, Yehovha hi yene Mutsrali wa Bibele.​—Dondzra 2 Timoteo 3:16; 2 Petros 1:20, 21.

2. I yini lexi hi kholwisaka leswaku Bibele dzri khanela ntiyiso?

Ha swi tiva leswaku Bibele i dzra Xikwembu Nkulukumba hikusa dzri hlaya hi ku kongoma leswi swi taka yentxeka a minkameni leyi taka na dzri nga siyi ntxhumu. A ku na mhunu lwa nga swi kotaka ku yentxa leswo. (Yehošua 23:14) Ko va ntsena Xikwembu Nkulukumba wa Ntamu Hinkwawu lweyi a nga kotaka ku vona hi ku kongoma leswi taka yentxekela vhanu a nkameni lowu taka.​—Dondzra Ezaya 42:9; 46:10.

Swa twisiseka leswaku buku ledzri humaka ka Xikwembu Nkulukumba dzri nga va dzri hambanile ni laman’wana, nakone swi tanu hi Bibele. Ku humexiwe mabibele ya ntsrandzra-vahlayi hi madzana-dzana ya tindzrimi. Nambi leswi dzri nga dzra khale, Bibele dzra twanana ni siyensa ledzri  khanelaka ntiyiso. Nangweso, lava 40 va nga dzri tsrala a va zanga va kanetana. * Handle ka leswo, Bibele dzri ni mfungu wa lizrandzru dzra Xikwembu Nkulukumba lowu vonekaka ha hombe, nakone dzra ha ni ntamu wa ku txintxa wutomi bya vhanu wu byi yampswisa. Hinkwaswu leswi swi kholwisa makhulukhulu ya vhanu leswaku Bibele i Zritu dzra Xikwembu Nkulukumba.​—Dondzra 1 Ba-le-Thesalonika 2:13.

3. Bibele dzri khanela ha yini?

Bibele dzri khanela ngopfu hi ndzrava leyinene ya leswaku ku ni swa ku xonga leswi Xikwembu Nkulukumba a djulaka ku swi yentxela vhanu. Matsralwa ma tlhamuxela leswaku mhunu a yi luzise kuyini ndjombo ya ku hanya ka misava ya paradeyisi na a ha ku tumbuluxiwa ni leswaku paradeyisi hi wugamu dzri ta tlhela dzri buyiseliwa hi ndlela yini.​—Dondzra Apfuletelo 21:4, 5.

Zritu dzra Xikwembu Nkulukumba nangweso dzri ni milawu, minsinya ya milawu ni swilayu. Handle ka leswo, Bibele dzri khanela hi ndlela leyi Xikwembu Nkulukumba a khomiki vhanu ha yone ku sukela khale—leswi swi hi pfunaka ku vona leswaku i Xikwembu xa muxaka muni. Xiswoswo, Bibele dzri nga ku pfuna ku tiva Xikwembu Nkulukumba. Dzri tlhamuxela leswaku u nga yentxa yini akuva u va munghanu wakwe.​—Dondzra Amapsalma 19:7, 11; Yakob 2:23; 4:8.

4. U nga yentxa yini akuva u kota ku twisisa Bibele?

Xibukwana lexi xi ta ku pfuna ku twisisa Bibele hi ku tizrisa mayentxela ya ku fana ni ya Yesu. A a khanela ni vhanu hi ndzrimana ha yin’we-yin’we ya Bibele a gama ‘a va tlhavukanyisa a matsralweni’.​—Dondzra Luka 24:27, 45.

A yi talanga mintxhumu ya ku nyonxisa ku fana ni madzrungula lamanene ya Xikwembu Nkulukumba. Kambe, van’we a va na mhaka na wone, kasi van’wanyana va patsra ni ku nyenyentsiwa ha wone. U nga godole. Leswaku u kuma wutomi lebyi nga helikiki swi djula u tivisisa Xikwembu Nkulukumba.​—Dondzra Yohan 17:3.

 

^ par. 3 Vona xibukwana lexi liki Um Livro Para Todas As Pessoas (Buku Dzra Vhanu Hinkwavu)