Skip to content

Skip to table of contents

Timboni ta Yehovha

Hlawula lidzrimi Xironga

 DONDZRO 8

Ha Yini Hi Yambala Hi Ndlela Leyinene A Mintlhanganwini Yezru?

Ha Yini Hi Yambala Hi Ndlela Leyinene A Mintlhanganwini Yezru?

Islândia

México

Guiné-Bissau

Filipinas

Xana u swi vonile ka mifoto leyi nga ka xibukwana lexi leswaku Timboni ta Yehovha ti yambala ha hombe loko ti ya mintlhanganwini ya tone ya bandla? Ha yini hi ku tekela nhlokweni ku yambala ni ku tixongisa kwezru?

Ku kombisa xitxhavu ka Xikwembu xezru. I ntiyiso leswaku Xikwembu Nkulukumba a nga lavisi ndlela leyi hi langusekaka ha yone he handle. (1 Samuel 16:7) Nambitanu, loko hi tlhangana akuva hi mu gandzrela, ku xuva ka timbilu tezru i ku kombisa xitxhavu ka Yene ni le ka vagandzreli-kulozri. Loko a ho yima mahlweni ka muyavanyisi a hubyeni, a hi ta zron’weka ngopfu hi ndlela leyi hi langusekaka ha yone hi mhaka ya ku hlonipha muyavanyisi yelweyo. Hi ku fanana, mayambalela yezru a mintlhanganwini ma kombisa xihlonipho ka ‘Mutsremi wa misava hinkwayu’, Yehovha Xikwembu Nkulukumba, ni ka mbangu lowu hi mu gandzrelaka ka wone.​—Genesis 18:25.

Hi kombisa leswaku hi hanya hi minsinya yini ya milawu. Bibele dzri kutxa Vakriste ku yambala ‘hi ku simama ni ku tikhoma’. (1 Timoteo 2:9, 10) Ku yambala hi ‘ku simama’, kumbe ku titsrongahata, swi hlaya ku nga yambali mpahla leya ku dula swinene, leyi nga pfuxaka nyanyuku kumbe leyi holokelaka. Nakone ‘ku tikhoma’, kumbe ku va ni miyanakanyu leyinene, swi hi pfuna ku hlawula mpahla leyi xongiki, leyi nga hi yentxikiki vhanu va futa kumbe va ku titsrhika. Minsinya leyi ya milawu ya ha tama yi hi pfulela mikhandlu leyikulu ya ku tihlawulela. Nambi loko hi nga vulavuli hi nomu, loko hi yambala ha hombe hi tlhela hi xonga, hi nga ‘nkhensisa ndondzro ya Muhuluxi wezru’ hi va hi ‘dzrumisa Xikwembu Nkulukumba’. (Tito 2:10; 1 Petros 2:12) Hi ku yambala hi ndlela leyinene loko hi ya mintlhanganwini, hi yentxa leswaku van’wana va vona lisima dzra ku gandzrela Yehovha.

U nga txhave ku ya Ndlwini ya Mfumu hi mhaka ya leswi mpahla yaku yi nga tsrhamisisa xiswone. Akuva mpahla yezru yi va leyi yamukelekaka, yi basiki mfuzri yi tsrhamisekiki a swi sindzrisi leswaku yi va ya ku dula kumbe ya mimoda.

  • Ha yini swi li swa lisima ku yambala ha hombe loko hi gandzrela Xikwembu Nkulukumba?

  • Hi yini minsinya ya milawu leyi kongomisaka ndlela leyi hi yambalaka ni ku tixongisa ha yone?