Skip to content

Skip to table of contents

Timboni ta Yehovha

Hlawula lidzrimi Xironga

 KU HANYA SWANGA VAKRISTE

Tizrisa Mavhidiyu Akuva U Dondzrisa Lava U Dondzraka Na Vone Bibele

Tizrisa Mavhidiyu Akuva U Dondzrisa Lava U Dondzraka Na Vone Bibele

Switizro leswi voniwaka hi mahlo swi yentxa vhanu va navela ku tama va swi vona, swi va pfuna ku twisisa ni ku dzrimuka leswi dondzrisiwiki. Mudondzrisi wezru Lwenkulu, Yehovha, a tizrise switizro leswi voniwaka akuva a dondzrisa tindondzro ta lisima. (Gn 15:5; Yr 18:1-6) Yesu Mudondzrisi lwenkulu, na yene a swi tizrisile. (Mt 18:2-6; 22:19-21) Xin’we xa switizro leswi voniwaka hi mahlo leswi pfuniki swinene malembe ya swoswinyana i mavhidiyu. Xana u ma tizrisa hi ndlela leyinene mavhidiyu loko u fambisa swidondzro swa Bibele?

Ku lulamisiwe 10 wa mavhidiyu ku hi pfuna loko hi fambisa swidondzro hi xibukwana lexi liki Madzrungula Lamanene Ya Xikwembu Nkulukumba! Hi ntolovelo nhloko-mhaka ha yin’we ya vhidiyu yi fambisana ni xin’we xa swivutiso leswi bekiwiki hi matsralela ya ntima lama nga ka xibukwana. A xibukwana xa eletroniku xi ni malink lawa ma taka hi dzrimuxa loko swi fanela kuva hi kombisa vhidiyu. Handle ka leswo, mavhidiyu man’wana ma pfunisa hi ku yengesela dzrungula ka Switizro swezru Swa Ku Dondzrisa ha swone.

Xana mi bula hi mhaka ya kukazri ya Bibele leyi nga kazratelaka xidondzro xaku ku yi twisisa? Kumbe xi langusana ni ntlhontlho? Hamba wusetxhi ka jw.org® ni ka Wuhaxi bya JW® leswaku u kuma dzrin’we dzra mavhidiyu lama nga xi pfunaka. Kumbexana wene ni xidondzro xaku mi nga ha ma hlalela kun’we kutani mi bula ha wone.

Wheti yin’wana ni yin’wana, ku humexiwa mavhidiyu mampswha. Loko u ma hlalela, yanakanyisisa hi leswaku u nga ma tizrisisa kuyini akuva u dondzrisa van’wana.