LUKA 1:5-33

  •   MWANGEL GABURIEL WASAMBELA KULEJAN KUVADIK KWA YOHAN MUBATISH

  • GABURIEL UMULEJIN MARIY ANCH UKUMUVAL YESU

Pitukata kushinshikin Bibil mwawonsu, tumening chakin kamu anch uruu udiamu udiokil kudi Nzamb. Tatukwetu udia mwiur watwinkishay mulong wa kutufundish nich. El amboku tushinshikinany uruu waad wa pakampwil walejenau pasutin kal mivu piswimp 2000. Uruu winou aulejana kudiay mwangel Gaburiel, ukata “kwiman kurutu kwa Nzamb.” (Luka 1:19) Mu yisu ik yimwing yalejanay mwangel uruu winou wa usey nakash?

Piswimp mu muvu wa 3 K.C.C. Kwisu kwalejanay Gaburiel uruu wa kusambish? Mwi ngand ya mikandu ya Yudeya, pamwing ap padingap palemp nakash ni Yerusalem, kwading kushichay mwin kupesh wa Yehova, Zakariy. Zakariy ni mukajend Elizabet ading amapal ni kavalap an. Chawiy chading chisu cha Zakariy cha kusal mudimu mu tempel ku Yerusalem mudi mwin kupesh wa Nzamb. Padingay Zakariy mu tempel, Gaburiel wamumekena mu chikashimwish piswimp ni chintamb cha kupeshin malash.

Chakin kamu, yom yiney yamwovisha Zakariy wom. Pakwez, mwangel wamudutisha Zakariy pamwelay anch: ‘Kangal wov wom Zakariy; mulong kulembil kwey akwov kal, mukajey Elizabet ukez kukuvadin mwan ikundj, ey ukumupil dijin anch Yohan.’ Gaburiel walonda kand anch Yohan ‘ukez kikal muntu mujim kurutu kwa Yehova’ ni ukez ‘kayitenchik antu a Yehova.’—Luka 1:13-17.

Zakariy wamana anch yom yiney yading yikasiken kuyitiy. Mulong wak? Mulong ndiy ni mukajend Elizabet ading amapal. Chawiy Gaburiel wamuleja anch: “Ey ukwikal kamam mulong walik kal kwitiy. Kiukulondap kand djat kamu ni ku dichuku dikeza kuwanyin yom yiney yinakuleja kal.”—Luka 1:20.

Pa chisu chinicha, antu ading pol iyipula mulong wak Zakariy walab kal mwamu mu tempel. Kupwa, wabudika ni katwishap kulond. Zakariy wasambisha kwilok miny ni makas mend. Chamekana patok anch wamana chom chimwing chishimokishina padingay mu tempel.

Papwishay Zakariy mudimu wend mu tempel wachirika kwol kwend. Kupwa kwa machuku makemp, Elizabet wimisha! Mu angond atan, padingau achingedin kuvadik kwa mwan, Elizabet washakama amwinend kwol kwend.

Kupwa, Gaburiel wamekana kand kapamp ka kaad. Wamekana kudi nany? Wamekana kudi changadim mujik Mariy wading ushicha kwinkaj kwa musumb wa Nazaret mu ul wa Galalia. Mwangel wamuleja changadim winou yom ik? Wamuleja anch: “Nzamb wakwanaken kal.” Gaburiel wamuleja kand Mariy anch : “Ey ukez kwimish divumu, chad ukumuval mwan ikundj, ukez kumupil anch Yesu.” Gaburiel walonda kand anch: ‘Ndiy ukez kwikal muntu mujim ni akez kumutazuk anch Mwan wendendiy Udia Piur, . . . ni ukez kayikel chikupu mudi Mwant pa chikumbu cha Jakob ni Want wend ukez kikal wa chikupu.’—Luka 1:30-33.

Ukutwish kusanger chisend chadingay nich Gaburiel cha kulejan uruu winou waad. Pitukutanga yom yivud piur pa Yohan ni Yesu, tukuman patok anch uruu winou wadiokala mwiur wading wa usey.