LUKA 2:21-39

  • YESU AMUTWAL KAL KU MUKAND NI KUPWA AMUTWADIN MU TEMPEL

Josef ni Mariy ashakama mu Betlehem kurutu achirika mu Nazaret. Pawanyishay Yesu machuku chinan amutwala ku mukand kukwatijan ni Chijil cha Nzamb chayilejau in Isarel. (In Levi 12:2, 3) Kwading kand chaku cha kumupil mwan ikundj dijin pa dichuku dinidia. Amupila mwanau ikundj anch Yesu, mudi mwalonday mwangel Gaburiel.

Kwasuta ngond umwing ni chikunku, Yesu wawanyisha machuku 40. Kwisu kwamutwalau anvaj end? Amutwala ku tempel mu Yerusalem, padingap palemp nakash ni kwindond kwadingau ashich. Chijil chading chilondin anch machuku 40 kupwa kwa kuvadik kwa mwan ikundj, makwend a mwan wafanyina kuya kupan mulambu wa kwishitwish ku tempel.—In Levi 12:4-8.

Mariy wasala mwamu. Mulambu wapanay wading wa an a atujil aad. Chinech chimekeshin anch Mariy ni Josef kadingap nich nfalang jivud. Kukwatijan ni Chijil, mwan a mukoku ni kajil afanyina kuyilambul. Pakwez, anch maku winiwa kakwetap mwan a mukoku, ndiy wafanyina kulambul kwend an aad a amayemb ap an aad a atwinkudimb. Chawiy chasala anch Mariy alambula atujil.

Padingau mu tempel, ipal umwing weza pa ndond padingay Josef ni Mariy. Dijin diend ndiy Simeyon. Nzamb wamuleja anch kurutu afa, ndiy ufanyidin kumuman Kristu ap Mesia washilayimu Yehova. Chisu chinicha, Simeyon amutakela nich spiritu utumbila chakwel aya ku tempel, kwawiy kwamutanay Josef ni Mariy pamwing ni mwanau. Simeyon wamusenda mwan mwinkond yend.

Pading pamusendinay Yesu, Simeyon wamujikitisha Nzamb anch: “Katat, [Yehova], ey wawanyish kal kushilamu kwey, ukutwish kumulik kashalapol wey kuya nich chisambu. Mes mam maman kal dipandish diey, diwarijeka chakwel antu awonsu adimana. Dipandish dined didi mudi chimunyik chikeza kwijikish rusot rey kudi antu a michid yikwau, ni kulet uyaj kudi antwey in Isarel.”—Luka 2:29-32.

Josef ni Mariy ashimoka pateshau mazu minam. Simeyon wayiyukisha ni wamuleja Mariy anch mwaney ikundj “Nzamb wamutonda mwan winou mulong wa kwikal mwin kuyifish nich ni mwin kuyingish nich in Isarel avud,” ushon ukez kukutap mudi mpak ya musamun mu muchim wey.—Luka 2:34.

Pa dichuku dinidia kweza kand muntu mukwau. Wading muprofet mband wading ni mivu 84 dijin diend Ana. Chakin kamu, mband winou kajingangap pakad kuya ku tempel. Pa chisu chawiy chimwing mband winou waya pa ndond padingay Josef, Mariy ni mwan Yesu. Ana wasambisha kumujikitish Nzamb ni walonda yom piur pa Yesu kudi antu awonsu ading amuteshina.

Ukutwish kutong mutapu wasangaray Josef ni Mariy piur pa yom yamanau mu tempel! Chakin kamu, antu inay awonsu amuleja patok Josef ni Mariy anch mwan winou ndiy Washilayimu Nzamb.