LUKA 1:34-56

  •   MARIY UYIL KUMUTAL MWANAMAKWEND ELIZABET

Kupwa kwa kumulej changadim Mariy kudi mwangel Gaburiel anch ukuval mwan ikundj ni ukumupil anch Yesu ni mwan winou ukuyikel chikupu mudi Mwant, chawiy Mariy wamwipula mwangel anch: “Ov, yom yiney yikwikal nchik, mulong am [kandikal] nijikap ikundj?”—Luka 1:34.

Gaburiel wamwakula anch: “[Spiritu utumbila] ukez kukushirikin ey, mwamu ukash wa Nzamb ukez kwikal ni yeyey. Mulong wa chom chinech, mwan winou utumbila akez kumupil anch, Mwan a Nzamb.”—Luka 1:35.

Mulong wa kumukwash Mariy kwitiy uruu winou Gaburiel walonda kand anch: “Tal! Elizabet, mwanamakwey, welangau anch kakutwishap kuval, pakwez katat ukwet [madikaj] ma angond musamban. Kutal, ndiy wikadil kal ipal nakash, mulong kwikil chom chikukanganyay Nzamb kusal.”—Luka 1:36, 37.

Mariy witiya yom yamulejau kudi Gaburiel pakulay anch:“Am nidi mwilomb wa [Yehova]. Chifanyidin yom yawonsu yisadika kudi am mudi muwalondanga!”—Luka 1:38.

Pachirikay Gaburiel, Mariy wirijeka mulong wa kuya kumutal Elizabet wading ni nfumwend Zakariy, ading ashich piswimp ni musumb wa Yerusalem mu ul wa mwi ngand ya mikandu ya Yudeya. Kudiokal ku Nazaret kwadingay, Mariy wafanyina kusal machuku masatu ap manying mu weny mulong wa kushik kwading kuyilay.

Kupwa, Mariy washika ku chikumbu cha Zakariy. Pandamay mu chikumbu, wamulangwisha mwanamakwend Elizabet. Pa chisu chinicha, Elizabet wizula nich spiritu utumbila ni wamwela Mariy anch: “Ey Mariy, Nzamb wakuyukishin kal kupandakanamu amband awonsu. Chiyukish chend chikwikal kand kudi mwan ukuvala! Ov, am nidi nany, ing, makwend wa Nsalejam eza ni kwinlangwish? Katat kamu pinatesha kal kulangwish kwey, mwan udia mwivumu mwam winyikeshang nich musangar nakash.”—Luka 1:42-44.

Mariy wakula nich musangar wawonsu anch: “Muchim wam ukat kushiman kujimb kwa [Yehova]. Muchim wam ukat kusangar nakash mulong wa Nzamb Mupandish wam. Ndiy wanvurik kal am, mwilomb wend wikepishina! Chakin kamu, kudiokal ilel antu awonsu akez kwingelang anch uyukila, mulong wa yom yijim yansadilay Nzamb Mwin Dikand.” Ufanyidin kwijik anch ap anch Mariy amwela anch uyukin, pakwez, ndiy wapana ntumb yawonsu kudi Nzamb. Walonda kand anch “Dijin diend ditumbil, ukat kuyovil riy antu a majuku ni majuku akata kumulimish ndiy.”—Luka 1:46-50.

Mariy wadandamena kumutumbish Nzamb nich mazu manam ma uprofet malondina anch: “Ndiy wasala yom yikwamushena ku usu wa chikas chend. Ndiy wayipalangesha in kwibaz. Wayimwanga ant, wayidiosh pa matand mau, chad wayizambwish in kwikepish. Wapana yom yiwamp kudi aburedina, chad ampich wayopata, aya mu makas mwamwamu. Wawanyisha kushilamu kwashilayimu nau ashankuretu, chad weza mulong wa kuyikwash atushalapol end in Isarel. Wavurika kumwovil Aburaham riy, chad wayovila kand a majuku mend mawonsu riy chikupu!”—Luka 1:51-55.

Mariy washakama pamwing ni Elizabet mu angond piswimp asatu pamwing ap chadinga mulong wa kumukwash Elizabet kusal midumu kanang padingay piswimp ni kuval. Chading chisangareshina mud ik kushakam pamwing mu chisu chinicha kudi amband inay aad ashinshamena ikala ni madikaj ku ukwash wa Nzamb!

Twaman kal mutapu wamutumbishau Yesu kurutu avadika. Elizabet wamutazuka anch “Nsalejam,” ni mwan wadinga mwivum mwend “winyikesha nich musangar nakash” chisu chatanijanay ni Mariy kapamp ka kusambish. Tukuman mitapu kushalijan yamusadinau Mariy ni Elizabet kudi antu akwau kurutu avala an.