YOHAN 1:29-51

  • IN KWILEJ A KUSAMBISH A YESU AMULONDWIL

Kupwa kwa kusal machuku 40 mwi mpay ni kurutu achirika mu Galalia, Yesu wachirika kand kudi Yohan, muntu wamubatisha. Pasejay Yesu piswimp, Yohan wamwisika muny ni wayileja antu anch: “Talany kwa, Mwan a Mukoku wa Nzamb ukata kudiosh yitil ya [mangand]! Winou ndiy muntu unakulejanganya anch: ‘Muntu umwing ukat kwez kwinyim kwam.’” (Yohan 1:29, 30) Ap anch Yohan wading mukurump kumusutamu Yesu, pakwez Yohan wading wij anch Yesu wadingaku mudi muntu wa muspiritu mwiur kurutu avadika.

Mbing jikemp kurutu Yesu eza mulong wa kumubatish, chimeken anch Yohan kijikap anch Yesu ndiy ukwikala Mesia. Yohan walonda anch: “Am kinadiap nij anch, ndiy winou, pakwez neza kubatish antu nich mem chakwel in Isarel amwijik ndiy.”—Yohan 1:31.

Yohan waya kuyilej in kwilej end piur pa yom yashikena chisu chamubatishay Yesu anch: “Am namana [spiritu] utumbila udiokil mwiur, wamushirikin mudi iyemb, chad wimana padi ndiy. Am kinadiap nij anch, ndiy winou, pakwez Nzamb wantuma am kubatish antu nich mem wanleja anch: ‘Ey ukez kuman [spiritu] utumbila wamuwil muntu umwing, wiman padiay ndiy. Muntu winou ndiy ukeza kubatish antu nich [spiritu] utumbila.’ Am namana kal yom yiney, chawiy nikulejinany anch, winou udi Mwan a Nzamb.”—Yohan 1:32-34.

Mukwacha, Yohan wading pamwing nau in kwilej aad chisu chezay kand Yesu. Yohan walonda anch: “Talany kwa, Mwan a Mukoku wa Nzamb!” (Yohan 1:36) Pa chisu chinicha, in kwilej inay aad a Yohan Mubatish amulondula Yesu. Umwing wa pakach pa in kwilej inay udi Andare. Chimeken anch mwin kwilej mukwau wa pakach pa in kwilej wafunda jinsangu jinej wading Yohan mukwau mwin kwilej. Chimeken kand anch Yohan winou wading mwan a Salome, wading kand musanyend wa Yesu. Wading mpanyend a Mariy, ni nfumwend ndiy Zebede.

Pakarumukay mulong wa kumutal Andare ni Yohan adinga amulondwila Yesu wayipula anch: “Ov, usotilany yom ik?”

Amwakula anch: “Rabbi, ov, ushiching kwisu?”

Yesu wayakula anch: “Ezany, utalany.”—Yohan 1:37-39.

Wading urel pa saa ya kanying, Andare ni Yohan ashakama pamwing ni Yesu chisu chinicha. Andare wasangara nakash patanijanay ni mwanamakwend Simon utazukinau kand anch Pita ni wamuleja anch: “Twamutan kal Mesia.” (Yohan 1:41, TMK.) Andare wamutwala Pita kudiay Yesu. Kupwa Yohan ni ndiy wamutana mwanamakwend Jakobu ni wamutwala kudiay Yesu, pakwez, Yohan kalejanap rusangu rend mu yom yafunday.

Dichuku dikwau, Yesu wamutana Filip wadiokala ku Betsaida. Musumb winou wading piswimp ni kwinkaj kwa Karung wa Galalia, wawiy musumb wavadikinay Andare ni Pita. Yesu wamuleja Filip anch: “Nlondula Am!”—Yohan 1:43, TMK.

 Filip niyend wamutana Natanyel utazukinau kand anch Bartelemi ni wamwela anch: “Twamutanang muntu walejanay Moses mu mikand ya Yijil, ndiy kand walejanau kudi [aprofet] a Nzamb. Ndiy Yesu mwan ikundj wa Josef wa ku ul wa Nazaret.” Natanyel widjidjeka ni wamuleja Filip anch: “Ov, ku Nazaret kukutwish kudiokal chom chiwamp?”

Filip wamwakula anch: “Ez, utala.” Pamumanay Yesu Natanyel ukat kwez kudi ndiy walonda anch: “Winou udi mwin Isarel wakin, wakad makasu.”

Natanyel wamwipula Yesu anch: “Ov, ey wangijik kal nchik?”

Yesu wamwakula anch: “Padingay Filip kand kal akutazuk, am nakumana ey wiminy mwishin mwa mutond wa nfung.”

Natanyel washimoka ni walonda anch: “[Rabbi], ey yey Mwan a Nzamb! Yey Mwant wa in Isarel.”

Yesu wamwipula anch: “Ov, ey witiyij kal kwey mulong chinakulejanga anch, nakumana mwishin mwa mutond wa nfung? Ey ukez kuman yom yikwau yijim kupandakan chom chinech!” Kupwa Yesu wamukana anch: “Nakulejany chakin, ukez kumanany diur dianzurik, chad [angel] a mwiur a Nzamb akat kwandam ni kushirikin padi Mwan a Muntu.”—Yohan 1:45-51.

Kupwa kwa yom yiney, Yesu waya pamwing nau in kwilej inay asu, auka Nkurubuk ya Yordan ni aya ku Galalia.