MATEU 28:16-20 LUKA 24:50-52 MIDIMU 1:1-12; 2:1-4

  • YESU AMUMAN KAL KUDI ANTU AVUD

  • YESU WAYA KAL MWIUR

  • YESU WASHIRISH KAL SPIRITU UTUMBILA KUDI IN KWILEJ 120

Pavumbukay Yesu, wayikana atwimbuy end 11 anch atanijana ku mukandu wa Galalia. In kwilej akwau 500 niyau ading kwinikwa, pakwez amwing ading idjidjekin. (Mateu 28:17; 1 Korint 15:6) Pakwez yom yalonday Yesu yayikwasha ikala nich kashinsh anch chakin Yesu udi mwom.

Yesu walejana patok anch Nzamb wamwinkishin ulabu wawonsu mwiur ni pansh. Yesu wayileja anch: “Yangany kudi antu a michid yawonsu, [yikadishany] in kwilejam. Yibatishany mu dijin dia Tatuku, ni dia Mwan, ni dia [spiritu] utumbila. Yilejany kuziyil ku yom yawonsu yinakulejanya.” (Mateu 28:18-20) Chakin kamu, ap pavumbukay Yesu, wadandamena kukasikeshin pa mudimu wa kulejan rusangu ruwamp.

In kwilej awonsu a Yesu—amakundj, amband, ni an—ayinkisha awonsu chisend cha kwikadish in kwilej. Akankuny amwing afanyina kupakish kuyikangesh kuwanyish mudimu wau wa kulejan ni wa kufundish, chawiy chayikasikeshay Yesu anch: “Anginkishin kal ulabu wawonsu wa mwiur ni wa pansh.” Mazu minam marumburikin ik kudi in kwilejend? Ndiy wayileja anch: “Am nikez kwikal ni yenen machuku mawonsu, djat ni kwisudiel kwa [ditenchik dined dia yom].” Yesu kalondap anch antu awonsu ipanina mu mudimu wa kulejan rusangu ruwamp akez kusal yilay. Pakwez spiritu utumbila ndiy ukeza kuyikwash.

Padingau in kwilej awonsu pamwing, Yesu wayimekena “mu machuku 40” kupwa kwa kuvumbuku kwend. Wimekesha mu mitapu kushalijan mulong wa “kwiyijikesh patok anch, ndiy wavumbukin kal, udi mwom,” wading ni kulond nau “piur pa Want wa Nzamb.”—Midimu 1:3; 1 Korint 15:7.

Chimeken patok anch padingau atwimbuy mu Galalia, Yesu wayileja kuchirik mu Yerusalem. Patanijanau mu musumb winou, Yesu wayileja anch: “Kangal wadiokalany mu Yerusalem, pakwez chingelany chom chashilayimu Tatukwam kupan mudi munakulejanya. Yohan wabatisha antu nich mem, pakwez mu machuku makemp Nzamb ukukubatishany en ni [spiritu utumbila.]”—Midimu 1:4, 5.

Kupwa Yesu watanijana kand ni in kwilejend. Ndiy “waya nau piswimp ni ku Betaniy,” wadinga kwingangel kwa Mukandu wa Mitond mudi ya Mpach. (Luka 24:50) Chikalap nchik yom yawonsu yayilejau kudi Yesu kurutu aya, awiy ading kutong anch Want wend ukwikal pa divu.—Luka 22:16, 18, 30; Yohan 14:2, 3.

Atwimbuy amwipula Yesu anch: “Ov, Nsalejetu, chisu chinech chawiy chiusotila kuyichirishin in Isarel want wau?” Yesu wayakula anch: “Kichidiap kudi en kujingunin yisu ap yirung yikumekana yom, mulong Tatuku watenchika kal yom yiney ku ulabu wend amwinend.” Kupwa wayikasikesha mulong wa mudimu wayinkishay palonday anch: “Anch [spiritu] utumbila wakushirikinany en, ukez kwikalany nich ukash. Chad ukez kwikalany atuman amam mu Yerusalem, ni mu Yudeya mwawonsu, ni mu Samaria, djat ni kusudiedila mangand.”—Midimu 1:6-8.

Atwimbuy ading pa Mukandu wa Mitond mudi ya Mpach pamwing ni Yesu wavumbuka amana mutapu wayay Yesu mwiur. Pakad kulab, madj mamubwika ni kamumanap kand. Pavumbukay, Yesu wamekana ni mujimbu wa chiuntu. Pakwez payay Yesu, waswimpa mujimbu wend wa chiuntu ni waya mwiur mudi chitang cha muspiritu. (1 Korint 15:44, 50; 1 Pita 3:18) Pading payilay Yesu mwiur, atwimbuy ashinshamena amana “amakundj aad iminy nau, adjit masun matok”. Amakundj inay ading angel, chawiy ayipula anch: “Ov, en in Galalia, mulong wak wiminanya pinap, utadilany mwiur neeng? Yesu winou wasendau kal mwiur ukez kuchirik kand mutapu umwing mudi [muyilay] mwiur.”—Midimu 1:10, 11.

Yesu waya mwiur pakad kumuman kudi antu avud, ching in kwilejend ashinshamena awiy amumana mutapu wayay. Ndiy ukez kuchirik “mutapu umwing”—pakad antu avud kumunan,  ching in kwilejend ashinshamena awiy akeza kujingunin kwez kwend mu Want wa dikand.

Chawiy atwimbuy achirika ku Yerusalem. Mu kwacha, awiy akumangana pamwing ni atwimbuy akwau kuwejinaku “Mariy makwend wa Yesu, ni anamakwend a Yesu.” (Midimu 1:14) Awiy adandamena kulembil. Chom chadingau kujimbul nakash mu malembil chading cha kutond mwin kwilej ukutwisha kumuswinkan Yudas Isakariot mulong wa kuchirish uvud wa atwimbuy 12. (Mateu 19:28) Awiy ading akimbin kutan mwin kwilej wimenap amwinend yom yasalay Yesu ni wamana mutapu wavumbukay Yesu. Yom yasambelau kulond mu Bibil yawiy yayikwasha ajingunina rusot ra Nzamb pa mulong winou. (Kuseng 109:8; Jinswir 16:33) Matias, wading pakach pa in kwilej 70 atumau kudi Yesu mu mudimu wa kulejan, ndiy watondau ni ‘amuwejina ku chisak cha atwimbuy 11.’—Midimu 1:26.

Pakwasuta machuku dikum kupwa kwa Yesu kuya mwiur, kwasadika Musambu wa in Yuda wa Pentekot wa muvu wa 33 C.C. Kwading in kwilej piswimp 120 akumangana mu kapalikany ka piur kading mu Yerusalem. Kukashimuk, masok mudi ma rinkind mukash mizula mu chikumbu. Mizwizu ya kasu yifanikena ni ndim yamekana pa mitu yau. Atwimbuy awonsu asambisha kulond mu mazu kushalijan. Spiritu utumbila wayishirikina mudi mwayikanau kudi Yesu!—Yohan 14:26.