MATEU 26:6-13 MARKO 14:3-9 YOHAN 11:55–12:11

  • YESU UCHIRIKIN KAND KU BETANIY PISWIMP NI YERUSALEM

  • MARIY UMUZIZIDIL YESU MALASH

Padiokalay mu Yeriko, Yesu waya ku Betaniy. Weny winou wading wa makilometre 20 ni njil yading yiyimp nakash. Yeriko wading mwinshin mwa nkurubuku wa ametre 250 mulong wa kushik ku karung pakwez Betaniy wading piur pa mukandu mu ametre 610 mulong wa kushik ku karung. Lazar pamwing ni ampanyend ading ashich mu ul wa Betaniy, wading mu akimotre 3 mulong wa kushik ku Yerusalem ni wading kand kwingangel kwa Mukandu wa Mitond mudi ya Mpach.

In Yuda avud ading ashikang kal mu Yerusalem mulong wa kusal musambu wa Pasak. Awiy atakelaku “mulong wa kwishitwish mudi mwading yijil yau,” asala mwamu pamwing ap mulong akwatang mujimbu wa nnam ap wa muntu wafang ap kand asalang chom chayijondishang. (Yohan 11:55; Kuchind Michid 9:6-10) Antu amwing asambela kushik akumangana mu tempel. Awiy ading iyipwil mulong wa kwijik anch Yesu ukwez ni yend ku musambu wa Pasak.—Yohan 11:56.

Kwading kupwitijan kujim piur pa Yesu. Antakel amwing a chirelijon ading kukimb mutapu wa kumukwat chakwel amujipa. Chawiy, awiy apana mbil anch muntu mwawonsu ukwijika ndond yidiay Yesu, muntu winou wafanyina kuyilej antakel inay mulong ‘amukwata’ Yesu. (Yohan 11:57) Antakel inay apakisha kumujip Yesu chisu chamuvumbulay Lazar. (Yohan 11:49-53) Chakin kamu, antu ading kwiyipul anch Yesu ukwimekesh patok.

Yesu washika ku Betaniy Diakatan, ‘kwading kuchishadil machuku musamban kurutu kwa kusal musambu wa Pasak.’ (Yohan 12:1) Urel wa Diakatan dichuku dia (Sabat, Nisan 8) dikusambish. Chawiy, Yesu washika kurutu kwa dichuku dia Sabat. Kafanyidinap kudiokal mu Yeriko pa dichuku dia Sabat—kusambishin pa urel wa Diakatan kushik pa urel wa Diampos—kusal weny pa dichuku dinidia akulikisha mu yijil ya in Yuda. Chimeken anch Yesu waya ku chikumbu chadingay Lazar mudi mwadinga chaku chend.

Simon, wading mu Betaniy wamutazuka Yesu pamwing ni arunend pamwing kand ni Lazar mulong wa kudia urel wa Diampos. Simon amutazukang anch “mwin musong wa mak,” pamwing ap ndiy muntu wokau kudi Yesu. Kukwatijan ni chaku chend chadingay nich cha mushiku, Mart wayaka angendj. Mariy wading umuteshin kamu Yesu, pakwez pa chisu chinicha kwalanka kupwitijan.

Mariy wafungula nsab ya diyal dia alibater mwadinga mwizwila “malash ma usey ukash mapidilau anch nard.” (Yohan 12:3) Malash minam mading ma usey wa nfalang (300 ja deniers) nfalang jamufutangau muntu pa muvu! Mariy wamuzizila Yesu malash minam ku mutu ni ku mend kupwa wamukuswolaku nich nsuch jend. Chikumbu chawonsu chizula nich rupwembu ra malash minam.

In kwilej ajimana chawiy ipula anch: “Ov, mulong wak washeshay kal malash minam?” (Marko 14:4) Yudas Isakariot walonda anch: “Ov, mulong wak chalikangau kumalandish malash minam kwi nfalang yitot yisatu [300 deniers] ja utad wa argent chakwel ayinkish atuzwend?” (Yohan 12:5) Yudas kayitonginangap kwend atuzwendj. Ndiy wading ni kwiyang nfalang mu chipau chading ni kulamay cha in kwilej.

 Yesu wamulondina Mariy anch: “Ov, mulong wak umumeshinanya mband winou mar? Chom chasalangay kudi am chidi chom chiwamp cha ufun. En ushichany nau atuzwendj machuku mawonsu, pakwez kiukushakamanyap ni yamam machuku mawonsu. Ndiy wawichil kal mujimbu wam malash, waurijek kal pakadiau kal kuujik. Nakulejany chakin anch, ku mangand mawonsu kukez kulejanau rusangu ruwamp, chom chasalay kal mband winou akez kuchilejan kwikal chivurikish chend.”—Mateu 26:10-13.

Kupwa kwa machuku makemp masalay Yesu mu Betaniy nsangu jend japalangana. In Yuda avud eza ku chikumbu cha Simon, kezap kusu mulong wa kumutal Yesu pakwez eza mulong wa kumutal kand Lazar, “wavumbulau kudi Yesu kwikal kand mwom.” (Yohan 12:9) In kupesh ajim apungana mulong wa kumujip Yesu ni Lazar. Antakel a chirelijon inay atonga anch mulong amuvumbula Lazar, diawiy diyingishin disadina anch antu avud ateka ritiy rau mudiay Yesu. Antakel inay a chirelijon ading ni chisum chikash mud ik!