YOHAN 7:11-32

  • YESU UFUNDISHIN MU TEMPEL

Yesu amwijika nawamp muvu wamubatishau. Tunan twa in Yuda amana yilay yasalay Yesu ni jinsangu ja yilay yiney japalangana mwi ngand yakabuj. Katat, ku Musambu wa Minkand (ap wa Ankunku) mu Yerusalem ading amukimbin.

Kwading yitongijok kushalijan piur pa Yesu. Antu amwing alonda anch: “Ndiy udi muntu muwamp,” Akwau alonda anch: “Bwat, ndiy ukat kuyidimb antu.” (Yohan 7:12) Pa dichuku diasambisha musambu, kwikala kand yitongijok yivud. Chikwau kand, kwadingap muntu utakamena wafanyina kulond patok piur pa Yesu mulong kwading jinsangu jovishena wom anch ajitesh kudi antakel in Yuda.

Pading pasadikina musambu, Yesu wasambisha kufundish mu tempel. Antu avud ashimoka mulong wa ukaliweny wadingay nich wa kufundish. Mulong ndiy kilejap ku shikol yijim ya in Yuda, chawiy in Yuda iyipula anch: “Ov, muntu winou wij nchik [Mifund] mwamu, ndiy kilejap kwend?”—Yohan 7:15.

Yesu walonda anch: “Malejan minilejena kimadiap mamam amwinam, pakwez madiokil kudi Nzamb wantuma. Muntu mwawonsu usotila kushinshik yom yisotilay Nzamb, ukwijik anch yom yinilejena yidiokil kudi Nzamb, ap yidiokil ku ulabu wamam amwinam.” (Yohan 7:16, 17) Malejan ma Yesu mading makwatijadin nich Chijil cha Nzamb, chawiy chamekana anch ndiy wading umutumbishin Nzamb, kitumbishap amwinend.

Kupwa Yesu wayakula anch: “Moses wakwinkishanya Yijil, pakwez kwikil muntu ap umwing wa pakach pen uziyidila ku Yijil yiney. Ing, mulong wak usotilany kwinjip?” Antu avud ading mu chisak cha antu inay, chimeken pamwing ap anch ading antu adiokala mu mal makwau, kitiyap chitongijok chiyimp chadingau nich in Yuda. Antu inay amana anch chading chitongijok chiyimp cha kukimb kumujip mulej muwamp mudi winou. Chawiy awiy atonga anch kudi chom chimwing chimurumbangeshina Yesu chakwel akula mwamu. Antu inay alonda anch: “Ey ukwet chilembil! Ov, nany win usotila kukujip?”—Yohan 7:19, 20.

Kupwa kwa muvu umwing ni chikunku, antakel in Yuda akimba mutapu wa kumujip Yesu mulong ndiy wamwoka muntu umwing pa dichuku dia Sabat. Katat, Yesu ulondin patok mulong wa yitongijok yau yiyimp yadingau nich. Wisambina pa uyakin wadinga mu Chijil chilondina anch mwan ikundj afanyina kumutwal ku mukand pa dichuku dia chinan kupwa kwa kuvadik ap anch dichuku dined diataliken pa dichuku dia Sabat. Chawiy Yesu wipula anch: “Anch en ukat kutwalany mwan ikundj ku mukand pa dichuku dia [sabat] mulong wa kulam Chijil cha Moses, ing, mulong wak winjimedinanya am mulong unamwokina muyej pa dichuku dia [sabat]? Likany kurumburish milong mudi mutapu umenanya en, pakwez rumburishany nich uyakin.”—Yohan 7:23, 24.

Antu a mu musumb wa Yerusalem ading ija nawamp yom yiney alonda anch: “Ov, kindiyap winou muntu usotilau kujip kudi [antakel]? Talany kwa, ukat kulond kwend patok, pakwez kwikil chom chimusadilau! Ov, amakurump etu ij kamu anch, winou ndiy Kristu? Etu awonsu twij ul udiokilay muntu winou, pakwez Kristu anch wez, kwikil muntu ukeza kwijik kudiokilay.”—Yohan 7:25-27.

Padingay mu tempel Yesu wayakula kapamp kamwing anch: “Ov, chakin kamu, en wingijany am, wijany kand kunidiokila? Am kinezap ku ulabu wam amwinam. Pakwez ndiy wantuma am udi wakin. En kiumwijanyap. Am yam nimwija, mulong nidiokil kudiay ndiy, chikwau kand, ndiy wantuma am.” (Yohan 7:28, 29) Pakulay patok, antu akimba kumukwat Yesu chakwel amuteka mu rukan ap amujipa. Pakwez, antu inay akanganya kumukwat mulong chisu cha kumujip Yesu chading kandikal chiwanyina.

Chawiy, antu avud ateka ritiy rau mudiay Yesu. Mulong ndiy wenda pa mem, wadutisha rinkind  mukash, wadisha tunan twa antu mu chilay nich mikat yikemp ni ansh, woka ayej, woka ayilim, waburila mes ma amputames, woka antu ading ni musong wa kasu ni wavumbula afu. Mwaning antu inay ading ni diyingishin diwamp pipulau anch: “Ov, pakez kwezay Kristu, ukez kusal yilay yivud kumupandakanamu muntu winou?”—Yohan 7:31.

Pateshau Afaris yom yiney yalondau kudi yisak ya antu, chawiy Afaris inay nau in kupesh ajim; atuma kapamp kamwing amasalay chakwel amukwata Yesu.