LUKA 12:35-59

  • KASHALAPOL USHINSHAMENA UFANYIDIN KWIKAL WIRIJEKINA

  • YESU WEZA MULONG WA KWAURIL ANTU

Yesu warumburila anch ching “kachisak kakemp” kawiy kakuyikela mu Want wa mwiur. (Luka 12:32) Pakwez kwikal ni chisend chinech cha usey chisangareshina chidiap chom cha kupipej. Chawiy Yesu wakasikeshina pa mwikadil wa usey ufanyidinay kwikal nich muntu winou anch ukimbin kuyikel mu Want.

Yesu wayibabesha in kwilejend chakwel adandamena kucha ku mes pakuchirikay. Ndiy walonda anch: “Irijekany, kasikeshany may, limikany [ma lamp men]. Chifanyidin en wikalany mudi atushalapol ababela akata kumuchingel nsalejau kuchirik kudiokal ku musambu wa kwatan kwayay. Pakushikay, wakokal ku chis, chad awiy akez kumwanzuril. Ayuk kwau atushalapol akutanau kudi nsalejau atadil!”—Luka 12:35-37.

In kwilej afanyidin kwikal ni mwikadil wisambinay Yesu mu chishimu. Atushalapol isambinay ading achil ku mes, akat kumuchingel mwant wau. Yesu warumburila anch: “Ayuk kwau anch ndiy [mwant wau] wez mukach mwa uchuku wayitan irijekang kal, ap anch wezap nchik pa nkunku pa kucha!”—Luka 12:38.

Chiyul chinech chidi cha usey nakash kusutamu chiyul piur pa atushalapol in kulam chikumbu in manangu ap in mudimu. Chinech chamekana patok pisambinay Yesu Mwan a muntu piur pa amwinend mu chishumu chinech. Wayileja in kwilejend anch: “Chifanyidin niyen wirijekany kand, mulong Mwan a muntu ukwez kwa kukashimuk pa chisu chiwakadiany en kwijik.” (Luka 12:40) Chawiy pa chisu chiwanyidina, Yesu ukwez. Ukatin anch in kwilejend—pakampwil “kachisak kakemp”—kikala kirijekina.

Pita wakata kutesh nawamp yom yalonday Yesu, chawiy chamwipulay anch: “Ov, chishimu chinech ututidil etu kusu, anch uyitidil kand ni antu awonsu?” Pa ndond pa kumwakul kapamp kamwing Pita, Yesu wasadina chishumu chikwau palonday anch: “Ov, nany kashalapol ushinshamena ni kubabal ukez katekau piur pa atushalapol akwau mulong wa kuyangen yakudia yau pa chisu chiwanyidina? Wayuk kwend kashalapol winou, pakuchirikay mwant wend, anch wamutan ukat kusal mudimu winou! Nakulejany chakin kamu, mwant ukumwinkish kashalapol winou ukurump wa kulam yom yend yawonsu.”—Luka 12:41-44, NWT.

Mu chishumu cha kusambish, “mwant” wisambidinau ndiy Yesu Mwan a muntu. Chimeken patok anch, “kashalapol ushinshamena” kadi “kachisak kakemp” ka antu kakwinkishau Want. (Luka 12:32) Mu chishumu chinech, Yesu ulondin anch antu amwing a mu chisak chinech akuyitek “piur pa atushalapol akwau mulong wa kuyangen yakudia pa chisu chiwanyidina.” Chawiy Pita ni in kwilej akwau afundishau ni adishau mu spiritu kudi Yesu atonga anch mazu minam makez kuwanyin mu machuku ma kurutu pakwezay Mwan a muntu. Pa chisu chinicha, kukez kikal kutenchik mulong wa kuyidish mu spiritu in kumulondul Yesu, “atushalapol awonsu” a Mwant.

Yesu wakasikeshina mutapu ukwau wafanyinau in kwilejend kubabal ni kushinshikin pa mwikadil wau. Mulong chading chiswapel kudi amwing pakach pau kwikal ni kampuw ni kushiken ku kwikal mu ukankuny ni mwanamakwend chawiy chalonday anch: “Pakwez anch kashalapol winou walond mu muchim wend anch, ‘Mwant wam uchilabil kwend kwez;’ ndiy wasambish kuyibul atushalapol ni amilomb, ni kudia ni kuna ni kukwachik maruvu. Mwant wa kashalapol winou ukwez pa muten wakadiay kuchingejin ndiy, ni mu chisu chakadiay kwijik, ukez kamubul kamu nakash ni kumutek ku mutambu kudia akad ritiy.”—Luka 12:45, 46, TMK.

Yesu walonda anch weza “mulong wa kulet kasu mu mangand.” Ndiy walangwisha milong yalangwisha kasu kakash kosha malejan ni yishankur ya makasu. Milong yiney yafanyina kuyauril antu adinga mu umwing, “atatuku akez kuyipompat anau amakundj, niyau  an amakundj akez kuyipompat atatukwau. Amaku akez kuyipompat anau amband, niyau an amband akez kuyipompat amakwau. Mawen ukez kumupompat mawenend.”—Luka 12:49, 53, NWT.

Mazu minam amalonda pakampwil mulong wa in kwilejend. Kupwa Yesu wakarumuka watal yisak ya antu. Antu avud kitiyap uman wamekesha anch ndiy wading Mesia, chawiy ndiy wayileja anch: “Piukat kumanany didj didiokil mutambu wa kurand, ukat kulondany swa anch: ‘Ruvul usotil kunak.’ Chakin kamu ukat kunak. Chad piukata kumanany rinkind watut kudiokal mutambu wa kurul, ukat kulondany anch: ‘Ilel kukwez marungul nakash.’ Chakin kamu, makat kwez. En, in rubabek, ukwetany manangu ma kujingunin yom yikumekana pansh ap mwiur, ov, ing, mulong wak ukangenanya kwov kurumburik kwa chirung chinech?” (Luka 12:54-56) Chimeken patok anch antu inay kadingap irijekina.