YOHAN 10:1-21

  • YESU WISAMBIDIN PIUR PA KAFUNG MUWAMP NI MAYIND MA AMIKOKU

Padandamenay Yesu kufundish mu Yudeya, ndiy wasadina chilakej chimwing chading chijau nawamp kudi in kumutesh end—chilakej cha amikoku ni cha diyind dia amikoku. Pakwez ndiy walonda mwamu mu mutapu wa chifanakesh. In Yuda avurika pamwing ap mazu malonday David malondina anch: “[Yehova] ndiy kafung wam, kinikusotip kwam chom. Ukat kwinladikang mu madil matalel.” (Kuseng 23:1, 2, TMK) Mu mukand ukwau wa kuseng, wayileja in muchid anch: “Twasany manungin pansh kurutu kwa [Yehova] watutanga. Mulong ndiy Nzamb wetu, niyetu tudi antu a [mu madil mend].” (Kuseng 95:6, 7) Chakin kamu, in Isarel adinga mwinshin mwa Chijil ading mudi chisak cha amikoku.

“Amikoku” inay ading mu ‘diyind’ mulong awiy avadikina mu manswik ma Chijil cha Moses. Chijil chinech chading mudi rubumbu riyaurila ku yisal yijondina ya antu akad kwikal mu manswik minam. Pakwez in Isarel amwing ayisadinang amikoku a Nzamb nayimp. Yesu walonda anch: “Nakulejany chakin, muntu wakad kwandamin ku chis cha diyind dia amikoku, pakwez wandamin pa dipan, muntu winou udi mwij, udi kand mbwitan. Muntu ukwandamina ku chis cha diyind, winou udi kafung wa amikoku.”—Yohan 10:1, 2.

Antu avud atonga anch awiy adia Mesia ap Kristu. Antu inay ading mudi ij ap ambwitan. Antu kafanyinap kulondul ambwambwol inay. Pakwez awiy afanyina kulondul “kafung wa amikoku,” wisambinay Yesu anch:

“Kalam ukat kumwanzuril kafung ku chis. Amikoku akat kutesh dizu dia kafung pakuyitazukay amikoku end umwing ni umwing pa dijin diend, chad ndiy ukat kuyitakel kurutu. Chad amikoku akat kumulondul mulong ij dizu diend. Awiy kakumulondulap muntu mwindj, pakwez akumuchinyin muntu winou kulemp, mulong kijap kwau dizu diend.”—Yohan 10:3-5.

Pasambishay Yohan Mubatish mudimu wend, ndiy wading mudi kalam ukata kumwazuril kafung ku chis, pamumekeshay Yesu kudi amikoku a chifanakesh adinga mwinshin mwa Chijil afanyina kumulondul. Ni amikoku akwau, adinga mu Galalia ni adinga mu Yudeya atesha dizu dia Yesu. Kwisu kwafanyinay ‘kuyitwal’? Ni yibudikin ik yiwamp yelau kutan anch amulondul? Antu amwing atesha chishimu chinech iyipula yipul mulong ‘kwovap kwau kurumburik kwa yom yayilejau.’—Yohan 10:6.

Yesu warumburila anch: “Nakulejany chakin, am yam chis cha diyind dia amikoku. Antu akwau awonsu atakelaku kwez adi ij, adi kand ambwitan, pakwez amikoku kayiteshap awiy. Am yam chis, muntu mwawonsu ukwandamina kudi am ukez kupand. Ndiy ukez kwandam ni kubudik, ukez kutan yakudia yiwamp.”—Yohan 10:7-9.

Chakin kamu, Yesu walonda chom chimwing chisu. In kumutesh ading ij anch ndiy kadingap chis cha manswik ma Chijil, chadingaku kwasutin kal mivu yitot. Chawiy wafanyina kurumburil anch amikoku ‘akutwalay’ akwandam mu diyind dikwau. Kwela kwikal chibudikin ik?

Kurutu arumburila chisend chend, Yesu walonda anch: “Am neza chakwel amikoku am ikal nich mwom, wawiy kamu mwom uwanyidina. Am nidi kafung muwamp witiyina kufa mulong wa amikoku.” (Yohan 10:10, 11) Yesu wasambela kuyikasikesh in kwilejend payilejay anch: “Kangal wovany wom, ap anch udianyap nchik chisak chikemp, mulong tatukwen usanger kukwinkishany Want wend.” (Luka 12:32) Chakin kamu antu asadina “kachisak kakemp” kinak awiy akutwalau kudi Yesu mu diyind disu, chakwel ikala nich “mwom uwanyidina.” Chiyukish mudi ik pa kwikal mu chisak chinech!

Pakwez Yesu kisambinap kusu ching pa kachisak kinak kakemp. Walonda kand anch: “Nikwet kand amikoku akwau kadiap mu diyind dined. Nifanyidin kuyilet kand. Awiy akez kutesh dizu diam, chad awonsu akez kwikal chisak chimwing ni kafung wau umwing.” (Yohan 10:16)  “Amikoku akwau” inay “kadiap mu diyind dined.” Chawiy amikoku inay afanyidin kwikal ni diyind dikwau dishalijadina ni diyind dia “kachisak kakemp” akuswana Want. Amikoku adia mu mayind minam maad akwet ruchingej kushalijan. Pakwez amikoku inay awonsu akutaninamu kusutil ku chisend cha Yesu. Ndiy walonda anch: “Tatuku winkatil mulong nitiyin kupan mwom.”—Yohan 10:17.

Chisak cha antu amutesha alonda anch: “Ndiy ukwet chilembil, uzarikin.” Pakwez antu akwau amekesha anch asangera kutesh yom yalonday ni akwata mupak wa kumulondul Kafung Muwamp. Alonda anch: “Muntu ukweta chilembil kakutwishap kulond mwamu! Ov, chilembil ukutwish kuyok amputames?” (Yohan 10:20, 21) Antu inay alonda piur pa muntu wavadika mputames wokau kudi Yesu.