LUKA 12:1-34

  • CHISHIMU CHA MPICH

  • YESU WISAMBIDIN PIUR PA ANKWAJ NI YISALAMB

  • “KACHISAK KAKEMP” KAKWIKALA MU WANT

Padingay Yesu ukat kudia mu chikumbu cha Mufaris, tunan twa antu twading tumuchingedin pol. Yisak ya antu yiney yidi mudi yisak ya antu yeza kumutal padingay mu Galalia. (Marko 1:33; 2:2; 3:9) Padiay mu Yudeya, antu avud akata kumuman ni kumutesh, antu inay amekesha mwikadil ushalijadina ni wa Afaris adia adilay nend.

Yesu wasambela kuyilej in kwilejend anch: “Babalany ku rubabek ra Afaris ridia mudi chivish chiyimp.” Yesu wayibabesha in kwilejend kurutu kwa chisu, chawiy yom yamanangay pamutazukangau kudia yawiy yimekeshina usey wa chiyul chinech. (Luka 12:1; Marko 8:15) Afaris asala usu wa kujindjik uyimp wau mu kumekesh riy, pakwez awiy ading atongin kusal yom yiyimp nakash. Yesu warumburila anch: “Yom yawonsu yijingamina yikez kumekan patok, ujindj wawonsu akez kuujingunin.”—Luka 12:2.

Pamwing ap yisak ya antu inay eza kumutal Yesu ading in Yudeya ading kandikal amuteshap pafundishay mu Galalia. Chawiy Yesu wachirikina mafundish ma usey masambelay kufundish. Wayileja antu awonsu ading amuteshina anch: “Kangal wovany wom wa antu akata kujip mujimbu, chad anch ey wafa kal kakutwishap kand kusal chom chikwau chiyimp.” (Luka 12:4) Mudi mwasambelay kand kufundish, ndiy wayileja in kumulondul chakwel amuchingejina Nzamb mulong ndiy ukutwisha kuyilam. Wayileja kand anch afanyidin kumwijik Mwan a muntu ni kwijik kand anch Nzamb ndiy ukutwisha kuyikwash.—Mateu 10:19, 20, 26-33; 12:31, 32.

Kupwa muntu umwing wading mu chisak cha antu wamwipula Yesu piur pa mulong wend wadingay nich anch: “Mulej, muleja mwanamakwam chakwel twangan nend dipit diatushilay tatukwetu.” (Luka 12:13) Chijil chalonda anch mwan wakusambish ndiy wafanyina kutambul yikunku yaad ya mapit, chawiy kafanyinap kupwitijan. (Kuvurik Yijil 21:17) Chimeken anch muntu winou wakimba kutambul yom yivud kusutamu mudi mwalejanau mu chijil. Nich manangu Yesu walika kwiyandjik mu milong yiney. Yesu wamwipula muntu winou anch: “Ov, muntwey, nany wanteka am kwikal nkalansambu wa milong yen, ap mwin kukwangenany dipit dien?” —Luka 12:14.

Kupwa Yesu wayibabesha antu inay awonsu anch: “Babalany, ichidijany ayinen, likany ris ra mitapu yawonsu, mulong mwom wakin wa muntu kiudiap mu yom yikwetay, ap anch ukwetap nchik mapit mavud.” (Luka 12:15) Chikalap nchik mapit makwetay muntu, ov chisu chimwing kakutwishap kufa ni kusha mapit mawonsu makwetay? Yesu walejana chishimu chimwing cha usey nakash chimekeshina usey wa kwikal ni dijin diwamp ku mes ma Nzamb palonday anch:

“Kwading mpich umwing ukweta [yir] yifukina, yasonga yom yakudia yivud. Wasambisha kutong anch: ‘Kinikwetap [tusik] jiwanyidina ja kulamin yakudia yawonsu. ov, nikusal nchik?’ Chad watonga anch: ‘Komb nisala mwamu. Nikez kumwangol [tusik] twam chakwel nez nitung [tusik] tupandakena kujimb, mwa kulamin yakudia ni yom yam yikwau yawonsu. Nikez kuulej mupim wam anch, Mupim wam, ey watap kal dilau! Ey ukwet yom yiwanyidina ya mivu yivud. katat iswedisha kwey, diang ni kuna, isangarisha kwey amwiney!’ Pakwez Nzamb wamuleja anch: ‘Chisup ey! Uchuku unou kamu ey ukukatuk mupim. Ov, nany ukeza kutambul yom yiney yawonsu yiwakumangejina kal?’” Yesu walonda kand anch: “Mwamu muchikwikala kudi antu akata kwikumangejin mapit ayinau, pakwez aburedin mapit makin ku mes kwa Nzamb.”—Luka 12:16-21.

Chawiy in kwilej ni antu akwau atesha mazu minam ading aswik mulong wa kukimbol yom ap mapit ma kumujimbu. Kukimbol kwa yom yiney ya ku mujimbu kwela kuyinkish kampuw pading pa musadidinau Yehova. Chawiy Yesu wachirikina chiyul chinech cha usey chapanay pasut kal muvu umwing ni chikunku mu Malejan mend ma Usey ma pa Mukandu anch:

“Kangal wiyakamishany mulong wa yakudia ya mujimbu ap mulong wa yidjal. . . . Talany ankwaj. Kakukunangap mbut, ap kwangul. Awiy kakwetap  [tusik] ap yikumbu ya kulamin yom, pakwez Nzamb ukat kuyidish! Ov, en ukwetanyap usey ujim kupandakanamu atujil? . . . Talany, yisalamb ya mu masuku mutapu uyidia. Yawiy kiyikusalangap mudimu, ap kwichimin yidjal, pakwez nakulejany chakin, Mwant Salomon wading ni miril ya mapit, chad kadingap nich yidjal ya ufun mudi chisalamb chimwing cha mu masuku. . . . Chawiy kangal wanengananany mulong wa kukimb yakudia ni yakuna . . . Tatukwen wij kal anch, ukwetany kuswir kwa yom yiney. . . . Kimbany bil Want wa Nzamb, chad ndiy ukukuwejinanyaku kand yom yiney.”—Luka 12:22-31; Mateu 6:25-33.

Anany akukimba Want wa Nzamb? Yesu walejana anch kadi ka “chisak kakemp” ka antu ashinshamena. Kupwa, alejana anch uvud wa kachisak kinak udi wa antu 144000. Kwisu kutekinau antu inay mapit mau? Antu inay akwet kashinsh kayilejau kudi Yesu anch: “Tatukwen usanger kukwinkishany Want wend.” Awiy kakatap kushinshikin pa kwikal nich mapit ma pa mangand, makutwishau kwiy kud ij. Pakwez michim yau yid ku ‘chipau cha mwiur chakad kupwang,’ ndond yikezau kuyikel pamwing ni Kristu.—Luka 12:32-34.